1 Idahaemi ke ini Mosiah ama akanam emi enye ɔdɔŋ ke ofuri isɔŋ, ke ufɔt kpukpru owo, oyom ndifiɔk uduak mmɔ kabaŋa owo emi anade edi edidem mmɔ.

2 Ndien edikem ete uyo mme owo edi, ete: Nnyin iyom ite yak Aaron eyen fo edi edidem ye andikara nnyin.

3 Idahaemi Aaron ama ɔdɔk aka isɔŋ Nephi, ke ntak oro edidem ikikemeke ndinɔ enye ukara; ŋko Aaron ikiyomke ndibɔ ukara; ndien eyen Mosiah ndomo kiet ikiduhe emi okoyomde ndibɔ ukara.

4 Ke ntak oro edidem Mosiah afiak ɔdɔŋ ke ufɔt mme owo; iŋ, kpa ikɔ emi ewetdewet ke enye ɔkɔdɔŋ ke otu mme owo. Ndien emi edi mme ikɔ emi ekewetde, ete:

5 Sese, O mbufo ikɔt mi, mme nditɔ eka mi, koro ntre ke ami nse mbufo, ami nyom nte yak mbufo ekere ebaŋa ŋkpɔ emi ekotde mbufo ete ekere ebaŋa—koro mbufo enyenede udɔŋ ndinyene edidem.

6 Idahaemi ami ndɔhɔ mbufo nte ke enye emi ukara edide unen esie esin, inyuŋ iyomke ndida ukara nnɔ idem esie.

7 Ndien idahaemi edieke emekde owo efen ke itie esie, sese ami mfehe ndik nte ke eneni oyodu ke ufɔt mbufo. Ndien aniefiɔk mme eyen mi, emi obio ubong edide esie, ayaakabare ayaresit onyuŋ ada usuk mbon emi ye enye, emi edisiakde mme ekɔŋ ye mme eneni ke ufɔt mbufo, emi edidide ntak uduɔk ediwak iyip ye ndikwaŋa mme usuŋ Jehovah, iŋ, nyuŋ nsobo ukpɔŋ ediwak owo.

8 Idahaemi ami ndɔhɔ mbufo nte yak nnyin inyene ifiɔk inyuŋ ikere ibaŋa mme ŋkpɔ emi, koro nnyin inyeneke unen ndiwot eyen mi, ŋko inaha nte nnyin inyene unen ndomo kiet ndiwot owo efen edieke emekde enye ke itie esie.

9 Ndien edieke eyen mi edifiakde iŋwɔŋɔre ibine ntaŋidem esie ye mme ikpikpu ŋkpɔ enye eyeti mme ŋkpɔ emi enye eketiŋde, onyuŋ oyom unen esie ndikara, emi edinamde enye ye ikɔt esie ŋko enam ediwak idiɔk ŋkpɔ.

10 Ndien idahaemi yak nnyin inyene ifiɔk inyuŋ ise iso ibaŋa mme ŋkpɔ emi, inyuŋ inam se ididade emem idi inɔ mbon emi.

11 Ke ntre ami nyedi edidem mbufo ke nsuhɔ usen mi; edi, yak nnyin imek mme ebiere ikpe, man ebiere ikpe enɔ mbon emi nte asaŋade ye mbet nnyin; ndien nnyin iyinim obufa usuŋ ndikara mbon emi, koro nnyin iyimek mme ɔfiɔk ŋkpɔ nte mme ebiere ikpe, emi edibierede ikpe inɔ mbon emi nte asaŋade ye mme ibet Abasi.

12 Idahaemi ɔfɔn ete Abasi ebiere ikpe ɔnɔ owo akan ete owo ebiere ɔnɔ owo, koro mme ubiere ikpe Abasi edi edinen kpukpru ini, edi ubiere ikpe owo idihe edinen kpukpru ini.

13 Ke ntak oro, edieke ekpekemede ete ke mbufo emekeme ndinyene ndinen owo edi ndidem mbufo, emi edisiakde mme mbet Abasi, enyuŋ ebiere ikpe enɔ mbon emi nte asaŋade ye mme ibet esie, iŋ, edieke mbufo ekpekemede enyene mme owo nte ndidem mbufo emi edinamde kpa nte ete mi Benjamin akanamde ɔnɔ ikɔt esie—ami ndɔhɔ mbufo, edieke emi ekpedide ntre kpukpru ini ndien ɔkpɔ ɔfɔn ete mbufo enyene ndidem ndikara mbufo kpukpru ini.

14 Ndien kpa ami ke idem mi ye ofuri odudu ye ukeme emi ami nyenede, ndikpep mbufo mme ibet Abasi, ye ndisiak emem ke ofuri isɔŋ, man mme ekɔŋ ye mme eneni okudu aba, inɔ okudu, mme udia ŋwo, mme uwot owo, mme utɔ ukwaŋ-ŋkpɔ ekededi;

15 Ndien owo ekededi emi anamde ukwaŋ-ŋkpɔ, enye ke ami nnɔ ufen nte asaŋade ye ubiatibet emi enye anamde, nte asaŋade ye mbet emi mme ete nnyin ekenɔde nnyin.

16 Idahaemi ami ndɔhɔ mbufo, nte ke ntak emi kpukpru owo midihe edinen ifɔnke ete mbufo enyene edidem mme ndidem ndikara mbufo.

17 Koro sese, ukwaŋ-ŋkpɔ ifaŋ ke idiɔk edidem kiet anam ete enam, iŋ, ndien nsutɔ akwa nsobo!

18 Iŋ, eti edidem Noah, ibak esie ye mme mbubiam esie, ŋko ye ibak ye mme mbubiam ikɔt esie. Sese nsutɔ akwa nsobo ekesim mmɔ; ndien ŋko ke ntak mme ukwaŋ-ŋkpɔ mmɔ ema eda mmɔ esin ke ufin.

19 Ndien edieke mikpe idihe nte ɔfiɔk kpukpru ŋkpɔ Andibot mmɔ ekesinde ubɔk, ndien emi ke ntak erikabare esit ke akpanikɔ mmɔ, mmɔ ekpedu ke ufin tutu idahaemi owo ikpikemeke ndinyaŋa.

20 Edi sese, enye anam mmɔ ebɔhɔ koro mmɔ ekesuhɔrede idem ke iso esie; ndien ke ntak emi mmɔ ekesemede ke ɔkpɔsɔŋ enɔ enye enye ama anam mmɔ ebɔhɔ ewɔrɔ ke ufin; ndien ke ntem ke Jehovah anam ye odudu esie ke kpukpru ŋkpɔ ke otu nditɔ owo, anyanare ubɔk mbɔm ɔnɔ mmɔ emi esinde mbuɔtidem mmɔ ke enye.

21 Ndien sese, idahaemi ami ndɔhɔ mbufo, mbufo ikemeke ndidorode edidem emi anamde ukwaŋ-ŋkpɔ ibɔhɔke oto ke ɔkpɔsɔŋ eneni, ye ndiduɔk ediwak iyip.

22 Koro sese, enye enyene mme ufan esie ke ukwaŋ-ŋkpɔ, onyuŋ enim mbon ukpeme esie ekpere enye; ndien enye abiat mme mbet mbon emi ekebemde enye iso ekara ke nnen nnen; ndien enye edihi ke idak ikpat esie mme ibet Abasi;

23 Ndien enye enim mme mbet, onyuŋ ɔnɔ mmɔ eka ke ufɔt ikɔt esie, iŋ, mme mbet nte asaŋade ye ibak esie; ndien owo ekededi emi eduede mme mbet esie enye anam ete esobo; ndien owo ekededi emi ɔsɔŋde ibuot ye enye enye ɔyɔdɔŋ mbon ekɔŋ esie ete eka ekɔŋ ye mmɔ, ndien edieke enye ekemede enye oyosobo mmɔ; ndien ke ntem ke edidem emi anamde ukwaŋ ido akwaŋa mme usuŋ kpukpru nnen nnen ido.

24 Ndien idahaemi ami ndɔhɔ mbufo, ke ifɔnke ete utɔ mme mbubiam emi edi doro mbufo.

25 Ke ntak oro, mbufo emek eto uyo mbon emi, mme ebiere ikpe, man edikpe ikpe enɔ mbufo nte asaŋade ye mme mbet emi mme ete nnyin ekenɔde, emi edide nnen nnen, ye emi ekenɔde mmɔ ke ubɔk Jehovah.

26 Idahaemi isiwakke ete ke uyo mme owo eyom ŋkpɔ emi misaŋake ye se idide nnen nnen; edi esiwak ete ekpri ubak owo eyom ŋkpɔ emi midihe nnen nnen; ke ntak oro emi ke mbufo edinam enyuŋ enam enye mbet mbufo—ndinam utom mbufo ke uyo mme owo.

27 Ndien edieke ini edide ete uyo mme owo emek ukwaŋ-ŋkpɔ, ndien oro edi ini emi mme ubiere ikpe Abasi edidide idoro mbufo; iŋ, ini oro edi ini emi enye edidide idise mbufo ye akwa nsobo kpa nte enye ekekesede isɔŋ emi.

28 Ndien idahaemi edieke mbufo enyenede mme ebiere ikpe, ndien mmɔ ibiereke ikpe inɔ mbufo nte asaŋade ye mbet emi enɔde, mbufo emekeme ndinam ete akamba ebiere ikpe ebiere ikpe ɔnɔ mmɔ.

29 Edieke mme akamba ebiere ikpe mibiereke mme nnen nnen ubiere ikpe, mbufo eyenam ete yak ekpri ibat eke mme usuhɔre ebiere ikpe esobo ɔtɔ kiet, ndien mmɔ eyebiere ikpe enɔ mme akamba ebiere ikpe, nte asaŋade ye uyo mme owo.

30 Ndien ami nnɔ mbufo uyo nte enam mme ŋkpɔ emi ye uteŋe Jehovah; ndien ami nnɔ mbufo uyo nte enam mme ŋkpɔ emi, ndien nte mbufo ekunyene edidem; man edieke mbon emi enamde mme idiɔk ŋkpɔ ye mme ukwaŋ-ŋkpɔ mmɔ eyebɔrɔ ke ibuot mmɔ.

31 Koro sese ami ndɔhɔ mbufo, mme idiɔk ŋkpɔ ediwak owo eto mme ukwaŋ-ŋkpɔ ndidem mmɔ; ke ntak oro ebɔrɔ mme ukwaŋ-ŋkpɔ mmɔ ke ibuot ndidem mmɔ.

32 Ndien idahaemi ami mbeŋe nte yak unana ndidi ukem ukem emi okudu aba ke isɔŋ emi, akpan akpan ke otu ikɔt mi emi; edi ami mbeŋe nte isɔŋ emi edi isɔŋ uwɔrɔ ufin, ndien yak kpukpru owo enyene unen ye odudu esie ukem ukem, ke adaŋa ini nte Jehovah okutde ete ke ɔfɔn ete nnyin idu uwem inyuŋ inyene isɔŋ emi, iŋ, kpa nte ke adaŋa ini emi ubon nnyin ndomo kiet ɔsuhɔre ke iso isɔŋ.

33 Ye mme ediwak ŋkpɔ efen ke edidem Mosiah ekewet ɔnɔ mmɔ, anam mmɔ efiɔk kpukpru idomo ye mme afanikɔŋ eke nnen nnen edidem, iŋ, kpukpru ukut ukpɔŋ ke ntak ikɔt mmɔ, ndien ŋko kpukpru ŋkuni mme owo enɔde edidem mmɔ; ndien enye anam kpukpru emi aŋwaŋa mmɔ.

34 Ndien enye ɔdɔhɔ mmɔ ete ke mme ŋkpɔ emi ikpinaha edi ntre; edi ke ukɔ emi akpana nte odoro kpukpru owo ke idem, man owo kiet kiet ɔyɔ ubak esie.

35 Ndien enye ŋko ama anam mmɔ efiɔk kpukpru mme idiɔk emi edisimde mmɔ, ke ndinyene edidem anam ukwaŋ ido ete akara mmɔ;

36 Iŋ, kpukpru ukwaŋ-ŋkpɔ ye mme mbubiam esie, ye kpukpru ekɔŋ, ye mme eneni, ye uduɔk iyip, ye uyip inɔ, ye udia ŋwo, ye ndinam mme use, ye utɔ kpukpru ukwaŋ-ŋkpɔ emi owo mikemeke ndibat—ɔdɔhɔ mmɔ ete ke mme ŋkpɔ emi ikpinaha edi ntre, ete ke mmɔ misaŋake saŋa kiet ye mme ibet Abasi.

37 Ndien idahaemi edikem, ke ini edidem Mosiah ama ɔkɔdɔŋ mme ŋkpɔ emi ke ufɔt mme owo mmɔ ema ekut akpanikɔ ke mme ikɔ esie.

38 Ke ntak oro mmɔ ema esioŋo idem ekpɔŋ mme udɔŋ mmɔ ndiyom edidem, enyuŋ ekabare enyene udɔŋ ata eti eti ete yak owo kiet kiet enyene ukem ukem ufaŋ ke ofuri isɔŋ; iŋ, ndien owo kiet kiet enyime ndibɔrɔ mbaŋa mme idiɔk ŋkpɔ esie.

39 Ke ntak oro, edikem ete mmɔ esobo idem mmɔ ɔtɔ kiet ke mme eboho ke ofuri isɔŋ, nditiŋ ye uyo mmɔ kabaŋa owo emi anade nte edi ebiere ikpe mmɔ, ndibiere ikpe nnɔ mmɔ nte asaŋade ye mbet emi ekenɔde mmɔ; ndien mmɔ edaresit ata eti eti ke ntak uwɔrɔ ufin emi ekenɔde mmɔ.

40 Ndien mmɔ ema ekop odudu ke ima ebaŋa Mosiah; iŋ, mmɔ ema ese enye ke okpon akan owo efen; koro mmɔ ikisehe enye nte idiɔk andikara ke ufik emi okoyomde udori, iŋ, utɔ mbukpo udori oro emi anamde ukpɔŋ abiara; koro enye ikikpakke inyene ito mmɔ, ŋko enye idarekesit ke ediduɔk iyip; edi enye ama esin emem ke isɔŋ, ndien enye ama ayak ete enam ikɔt esie ebɔhɔ ewɔrɔ ke kpukpru utɔ ufin; ke ntak oro mmɔ ema ese enye, iŋ, ata eti eti, ebe se edomode.

41 Ndien edikem ete mmɔ ema emek mme ebiere ikpe ndikara mmɔ, mme ndibiere ikpe nnɔ mmɔ nte asaŋade ye mbet; ndien emi ke mmɔ ekenam ke ofuri isɔŋ.

42 Ndien edikem ete ke ema emek Alma ete edi akpa ada ibuot mme ebiere ikpe, enye ekedide ŋko akwa oku, koro ete esie ama ɔnɔ enye itie utom oro, ndien ama ɔnɔ enye uyo abaŋa mme ŋkpɔ ufɔk Abasi.

43 Ndien idahaemi edikem ete Alma ama asaŋa ke mme usuŋ Jehovah, ndien enye ama enim mme ibet esie, ndien enye ama ebiere mme nnen nnen ubiere ikpe; ndien emem ama aka iso odu ke isɔŋ oro.

44 Ndien ke ntem ke ukara mme ebiere ikpe ɔkɔtɔŋɔ ke ofuri isɔŋ Zarahemla, ke ufɔt kpukpru owo emi ekekotde mme Nephite; ndien Alma ekedi akpa ye ada ibuot ebiere ikpe.

45 Ndien idahaemi edikem ete ete esie akpa, ke enye ekedide isua anaŋ ye iba, ke ama ekedu uwem anam mme ibet Abasi.

46 Ndien edikem ete Mosiah akpa ŋko, ke ɔyɔhɔ isua ukara esie edip ye duopeta, ke ekedide isua ata ye ita; anam ke kpukpru, isua ikie ition ye usuk kiet tɔŋɔ ke ini emi Lehi ɔkɔkpɔŋde Jerusalem.

47 Ndien ke ntem ke ukara mme ndidem eketre ɔnɔ mbon Nephi; ndien ke ntem ke mme usen Alma eketre, emi ekedide andisiak ufɔk Abasi mmɔ.