1 Ndien edikem ete Limhi ye ikɔt esie enyɔŋ eka obio Nephi, enyuŋ etɔŋɔ ndiduŋ ke isɔŋ oro ke emem.

2 Ndien edikem ete ke ediwak usen ema ekebe mme Lamanite efiak etɔŋɔ ndidemere ke iyaresit mbaŋa mme Nephite, ndien mmɔ etɔŋɔ ndiduk mme adaŋa isɔŋ nkanare nkuk.

3 Ndien mmɔ inyeneke uko ndiwot mmɔ, ke ntak eŋwɔŋɔ emi edidem mmɔ akanamde ye Limhi; edi mmɔ eyemia mmɔ ke mbaŋ mmɔ, enyuŋ enyene unen ke idem mmɔ; enyuŋ etɔŋɔ ndidori mme ndodobi mbiomo ke edem mmɔ, enyuŋ ebin mmɔ nte ekpebinde imum ass—

4 Iŋ, ekenam kpukpru ŋkpɔ emi man ikɔ Jehovah okposu.

5 Ndien idahaemi mme ukut mme Nephite ema ekpon, ndien usuŋ ikiduhe mmɔ ndinam idem mmɔ ebɔhɔ ke ubɔk mmɔ, koro mme Lamanite ema ekanare mmɔ ekuk ke ofuri nkaŋ.

6 Ndien edikem ete mme owo etɔŋɔ ndikuni mbaŋa edidem ke ntak mme ukut mmɔ; ndien mmɔ etɔŋɔ ndinyene udɔŋ ndika ekɔŋ ye mmɔ. Ndien mmɔ enam idiɔk ukut esim edidem ke ntak mme utɔk mmɔ; ke ntak oro enye ayak ete mmɔ enam nte mme udɔŋ mmɔ edide.

7 Ndien mmɔ efiak esobo idem mmɔ ɔtɔ kiet, enyuŋ esine ŋkpɔ-ekɔŋ mmɔ, enyuŋ eka ebine mme Lamanite ndibin mmɔ nsio ke isɔŋ mmɔ.

8 Ndien edikem ete mme Lamanite ema ekan mmɔ, enyuŋ ebin mmɔ efiak edem, enyuŋ ewot ediwak mmɔ.

9 Ndien idahaemi akwa mfuhɔ ye eseme ama odu ke otu ikɔt Limhi, ebekpa ɔfuhɔ ebe esie, eyen eren ye eyen aŋwan efuhɔ ete mmɔ, ndien nditɔ eka iren efuhɔ nditɔ eka iren mmɔ.

10 Ndien ema edu ediwak mme ebeakpa ke isɔŋ oro, ndien mmɔ ema esio ŋkpo ke ɔkpɔsɔŋ ke usen ke usen, koro ɔkpɔsɔŋ ndik ke abaŋa mme Lamanite ema esim mmɔ.

11 Ndien edikem ete ke nka-iso eseme mmɔ ama edemere nsuhɔ ikɔt Limhi ke iyaresit abaŋa mme Lamanite; ndien mmɔ efiak eka ekɔŋ, edi ema efiak ebin mmɔ efiak edem, ediwak ema etak.

12 Iŋ, mmɔ efiak eka kpa ɔyɔhɔ ikata, ndien ekpa ke ukem usuŋ oro; ndien mbon emi owo mikiowotke efiak enyɔŋ eka obio Nephi.

13 Ndien mmɔ esuhɔre idem mmɔ esim ntan, esin idem mmɔ ke ɔkpɔnɔ itie-ufin, eyak idem mmɔ enɔ ete emia, enyuŋ ebin enɔ iso ye edem, enyuŋ ebiom mbiomo, nte asaŋade ye mme udɔŋ mme asua mmɔ.

14 Ndien mmɔ ema esuhɔre idem mmɔ kpa ke ntuŋɔ nsuhɔre-idem; ndien mmɔ ema eseme ke ɔkpɔsɔŋ enɔ Abasi; iŋ, kpa ke ofuri usen ke mmɔ ekeseme enɔ Abasi mmɔ ete enye anyaŋa mmɔ ke mme ukut mmɔ.

15 Ndien idahaemi Jehovah ikisɔpke ndikop eseme mmɔ ke ntak mme ukwaŋ-ŋkpɔ mmɔ; edi Jehovah ama okop mme eseme mmɔ, ndien ɔtɔŋɔ ndinam esit mme Lamanite emem tutu mmɔ etɔŋɔ ndinam mbiomo mmɔ efere; edi Jehovah ikikereke ete ke odot ndiyaŋa mmɔ ewɔrɔ ke ufin.

16 Ndien edikem ete mmɔ etɔŋɔ ndiforo mkpri mkpri ke isɔŋ, enyuŋ etɔŋɔ nditɔ mkpasip ata ediwak, ye mme ufene, ye mme enaŋ, ndien mmɔ ikikutke ndutuhɔ ke ntak ɔbiɔŋ.

17 Idahaemi ibat iban ama awak eti eti, ewak ekan eke iren owo; ke ntak oro edidem Limhi ɔnɔ uyo ete yak kpukpru iren owo enɔ enɔ man eŋwam mme ebeakpa ye nditɔ mmɔ, man mmɔ ekukpa ye biɔŋ; ndien emi mmɔ ekenam ke ntak akamba ibat mbon mmɔ emi ekewotde.

18 Ndien ikɔt Limhi ema edu kiet ke nte ekpekande, enyuŋ ekpeme mkpasip mmɔ ye mme ufene mmɔ;

19 Ndien edidem ke idem esie ikiwɔrɔke ikpɔŋ obio, ibɔhɔke enye ada mbon ukpeme esie ye enye, efehe ndik ete ke ndusuk enye ekeme ndiduɔ nduk ke ubɔk mme Lamanite.

20 Ndien enye anam ete ikɔt esie ekpeme isɔŋ ekanare, mbak ke ndusuk mmɔ ekeme ndimum mme oku oro emi ekefehede eduk wilderness, emi ekeyipde nditɔ iban mme Lamanite, ye emi akanamde utɔ akwa nsobo oro esim mmɔ.

21 Koro mmɔ ema enyene udɔŋ ndimum mmɔ man mmɔ enɔ mmɔ ufen; koro mmɔ ema eduk isɔŋ Nephi ke okoneyo, enyuŋ etaŋ mkpasip mmɔ ewɔrɔ ye ediwak ŋkpɔ uto mmɔ; ke ntak oro mmɔ edibe ebet mmɔ.

22 Ndien edikem ete mfina ikiduhe aba ke otu mme Lamanite ye ikɔt Limhi, kpa tutu esim ini emi Ammon ye nditɔ eka esie eke edidukde isɔŋ oro.

23 Ndien edidem ke okodude ke aŋwa inua otop ye mbon ukpeme esie, okut Ammon ye nditɔ eka esie; ndien ke ekerede ete ke mmɔ edi mme oku Noah ke ntak oro enye anam ete emum mmɔ, enyuŋ ebɔp, enyuŋ esin ke ufɔk ŋkpɔkɔbi. Ndien edieke mmɔ ekpekedide mme oku Noah enye akpakanam ete ewot mmɔ.

24 Edi ke ini enye ɔkɔfiɔkde ete ke mmɔ idige, edi ke mmɔ ekedi nditɔ eka esie, ndien ke eketo isɔŋ Zarahemla edi, enye ama ɔyɔhɔ ye ata akamba idaresit.

25 Idahaemi edidem Limhi ama ɔdɔŋ, mbemiso edidi Ammon, ekpri ibat irenowo ete eyom isɔŋ Zarahemla; edi mmɔ ikikanke ikut enye, ndien mmɔ ema esop ke wilderness.

26 Edi mmɔ ema ekut isɔŋ emi mme owo ekedude; iŋ, isɔŋ emi ɔkɔyɔhɔde ye nsat ɔkpɔ; iŋ, isɔŋ emi mme owo ekedude ye emi ekesobode; ndien mmɔ, ke ekekerede ete ke edi isɔŋ Zarahemla, enyɔŋ eka isɔŋ Nephi, ke ekesimde adaŋa isɔŋ oro usen mikiwakke mbemiso edidi Ammon.

27 Ndien mmɔ eda ŋwed edi ye mmɔ, kpa ŋwed mbon oro emi mmɔ ekekutde ɔkpɔ mmɔ; ndien ekemiŋ enye ke mme usan ukwak.

28 Ndien idahaemi Limhi ama afiak ɔyɔhɔ ye idaresit ke ɔkɔfiɔkde oto inua Ammon ete ke edidem Mosiah ama enyene enɔ oto Abasi, emi enye akakande akabare se ekemiŋde oro; iŋ, ndien Ammon ŋko ama adaresit.

29 Edi Ammon ye nditɔ eka esie ekeyɔhɔ ye mfuhɔ koro ema ewot ediwak nditɔ eka mmɔ;

30 Ndien ŋko ke edidem Noah ye mme oku esie ema enam mme owo enam ata ediwak idiɔk ŋkpɔ ye mme ukwaŋ-ŋkpɔ edue Abasi; ndien mmɔ nko efuhɔ ebaŋa mkpa Abinadi; ŋko ye edinyɔŋ Alma ye mbon ekesaŋade ye enye, emi ekesiakde ufɔk Abasi eto ukeme ye odudu Abasi, ye mbuɔtidem ke mme ikɔ emi Abinadi eketiŋde.

31 Iŋ, mmɔ ema efuhɔ ebaŋa unyɔŋ mmɔ, koro mmɔ ikifiɔkke ebiet emi mmɔ efehede eka. Idahemi mmɔ ekpediana ye mmɔ ke inemesit, koro mmɔ ke idem mmɔ ema eduk ke ediomi ye Abasi ndinam utom nnɔ enye nyuŋ nnim mme ibet esie.

32 Ndien idahaemi tɔŋɔ ke Ammon ekedi, edidem Limhi ŋko ama oduk ke ediomi ye Abasi, ŋko ye ediwak ikɔt esie, ndinam utom nnɔ enye nyuŋ nnim mme ibet esie.

33 Ndien edikem ete ke edidem Limhi ye ediwak ikɔt esie ema enyene udɔŋ ndiduɔk mmɔŋ; edi owo ndomo kiet ikiduhe ke isɔŋ oro emi ekenyenede unen oto Abasi. Ndien Ammon esin ndinam ŋkpɔ emi, ese idem esie nte owo emi midotke.

34 Ke ntak oro mmɔ ke ini oro ikisoboke idem mmɔ nte ufɔk Abasi, edi ebet Spirit Jehovah. Idahaemi mmɔ ema enyene udɔŋ nditie nte Alma ye nditɔ eka esie, emi ekefehede eduk wilderness.

35 Mmɔ ema enyene udɔŋ ndiduɔk mmɔŋ nte ntiense ye ikɔ ntiense ete ke mmɔ enyime ndinam utom nnɔ Abasi ye ofuri esit mmɔ; edi mmɔ ema ebiat ini; ndien eyenɔ mbuk uduɔk mmɔŋ mmɔ ke emi ama ebe.

36 Ndien idahaemi kpukpru ifik Ammon ye ikɔt esie, ye edidem Limhi ye ikɔt esie, ekedi ndinam idem mmɔ ebɔhɔ ewɔrɔ ke ubɔk mme Lamanite ye ke ufin.