1 Ndien edikem ete ke ini edidem Limhi ama eketre nditiŋ ikɔ nnɔ ikɔt esie, koro enye ama etiŋ ediwak ŋkpɔ ɔnɔ mmɔ ndien mmɔ ifaŋ ke ami ŋwet ke ŋwed emi, enye ama etiŋ ɔnɔ ikɔt esie kpukpru ŋkpɔ kabaŋa nditɔ eka mmɔ emi ekedude ke isɔŋ Zarahemla.

2 Ndien enye anam ete Ammon ada ke iso otu owo, onyuŋ ɔdɔhɔ mmɔ kpukpru se ikitibede inɔ nditɔ eka mmɔ tɔŋɔ ke ini emi Zeniff ɔkɔdɔkde ɔwɔrɔ ke isɔŋ oro tutu esim ini emi enye ke idem esie ɔkɔdɔkde ɔwɔrɔ ke isɔŋ oro.

3 Ndien enye ŋko etiŋ ɔnɔ mmɔ mme akpatre ikɔ emi edidem Benjamin ekekpepde mmɔ, onyuŋ anam mmɔ aŋwaŋa ikɔt edidem Limhi, man mmɔ efiɔk kpukpru mme ikɔ emi enye eketiŋde.

4 Ndien edikem ete ke ini enye ama akanam kpukpru ŋkpɔ emi, ete edidem Limhi asuan otu owo, onyuŋ anam ete mmɔ kie kiet enyɔŋ ufɔk mmɔ.

5 Ndien edikem ete enye anam ete eda mme usan emi ɔkɔdɔŋɔde ŋwed ikɔt esie tɔŋɔ ke ini emi mmɔ ekekpɔŋde isɔŋ Zarahemla, edi ke iso Ammon, man enye okot mmɔ.

6 Idahaemi, ke ini emi Ammon okokotde ŋwed oro, edidem obup oto enye ndifiɔk mme enye ekeme ndikabare mme usem, ndien Ammon ɔdɔhɔ enye ete ke enye ikemeke.

7 Ndien edidem ɔdɔhɔ enye ete: Ke ntak mfuhɔde mbaŋa mme ukut ikɔt mi, ami nnam nte ikɔt mmi aba ye ita eda isaŋ eduk wilderness, man otodo mmɔ eyom isɔŋ Zarahemla, man nnyin iseme inɔ nditɔ eka nnyin ete enam nnyin ibɔhɔ iwɔrɔ ke ufin.

8 Ndien mmɔ ema esop ke wilderness ke ufaŋ ediwak usen, edi mmɔ ema esin ifik, ndien ikwe isɔŋ Zarahemla edi enyɔŋ edi isɔŋ emi, ke ema ekesaŋa ke isɔŋ ke ufɔt ediwak mmɔŋ, ke ema ekekut isɔŋ emi ɔkɔyɔhɔde ye mme ɔkpɔ owo, ye mme unam ikɔt, ndien eyɔhɔ ŋko ye mme ŋwure ufɔk ke utɔ ke utɔ, ke ema ekekut isɔŋ emi ɔkɔyɔhɔde ye mme owo emi ekewakde nte udim Israel.

9 Ndien nte ikɔ ntiense ke mme ŋkpɔ emi mmɔ eketiŋde edi akpanikɔ mmɔ eda mme usan edip ye inaŋ emi eyɔhɔde ye se ekapde, ndien mmɔ edi eke ata gold.

10 Ndien sese, ŋko, mmɔ eda mme ukwak ikpanesit edi, emi ekponde, ndien mmɔ edi eke brass ye eke copper, ndien mmɔ efɔn eti eti.

11 Ndien ŋko, mmɔ eda mme ofut edi, mme ito mmɔ ema etak, ndien mme mbubara mmɔ ema etaha ye ŋkarafaŋ; ndien owo ndomo kiet iduhe ke isɔŋ oro emi ekemede ndikabare usem mme se ekapde emi edude ke mme usan oro. Ke ntak oro ami ndɔhɔ fi nte: Ndi afo ukemeke ndikabare ikɔ?

12 Ndien ami mfiak ndɔhɔ fi nte: Ɔmɔfiɔk owo ndomo kiet emi ekemede ndikabare ikɔ? Koro ami menyene udɔŋ nte ekabare mme ŋwed emi esin ke usem nnyin; koro, ekeme ndidi, mmɔ eyenɔ nnyin ifiɔk ebaŋa nsuhɔ mbon emi ekesobode, ke ebiet emi mme ŋwed emi etode edi; mme, ekeme ndidi, mmɔ eyenɔ nnyin ifiɔk ebaŋa mbon emi emi ema ekesobo; ndien ami menyene udɔŋ ndifiɔk ntak nsobo mmɔ.

13 Idahaemi Ammon ɔdɔhɔ enye ete: Ami mekeme ndinehede ntiŋ nnɔ fi, O edidem, owo emi ekemede ndikabare mme ŋwed emi; koro enye enyene se enye ekemede ndise, ndien akabare kpukpru mme ŋwed emi edide eke usen eset; ndien edi enɔ otode Abasi. Ndien mme ŋkpɔ emi ekot mme akabare ikɔ, ndien owo ndomokiet ikemeke ndise ibɔhɔke enɔ enye uyo, midihe ntre enye eye ese ŋkpɔ minaha nte enye ese ndien enye ayatak. Ndien owo ekededi emi enɔde uyo ete ese mmɔ, ukem oro ke ekot okut ŋkukut.

14 Ndien sese, edidem mbon emi edude ke isɔŋ Zarahemla edi owo emi enɔde uyo ndinam mme ŋkpɔ emi, ye emi enyenede akamba enɔ emi otode Abasi.

15 Ndien edidem ɔdɔhɔ ete ke okut ŋkukut okpon akan prophet.

16 Ndien Ammon ɔdɔhɔ ete ke okut ŋkukut edi andiyarare ye prophet ŋko; ndien enɔ emi okponde akan owo ndomo kiet ikemeke ndinyene, ibɔhɔke enye enyene odudu Abasi, emi owo ndomo kiet mikemeke; edi owo ekeme ndinyene akamba odudu emi Abasi ɔnɔde.

17 Edi okut ŋkukut ekeme ndifiɔk mme ŋkpɔ emi ekebede, ŋko ye mme ŋkpɔ emi anade nte edi, ndien oto ke mmɔ ke ediyarare kpukpru ŋkpɔ, mme, midihe, ke ediyarare mme ndedibe ŋkpɔ, ndien mme ŋkpɔ emi edipde eye ɔwɔrɔ edi uŋwana, ndien mme ŋkpɔ emi owo mifiɔkke mmɔ eyenam efiɔk, ndien ŋko mmɔ eyenam efiɔk mme ŋkpɔ emi owo mikpifiɔkke.

18 Ke ntre Abasi ɔnɔ usuŋ ete owo, otode ke mbuɔtidem, ekeme ndinam ikpɔ utibe ŋkpɔ; ke ntak oro enye akabare edi akamba ufɔn ɔnɔ mme owo nte enye.

19 Ndien idahaemi, ke ini Ammon ama eketre nditiŋ mme ikɔ emi edidem adaresit ata eti eti, onyuŋ ɔnɔ Abasi ekɔm, ete: Eyihe iduhe ete ke akamba ndedibe ŋkpɔ odu ke mme usan emi, ndien eyihe iduhe ke mme akabare ikɔ emi ke eketim mmɔ enim ke ntak ndiyarare kpukpru mme ndedibe ŋkpɔ ntem nnɔ nditɔ owo.

20 O didie ke mme utom Jehovah edi utibe, ndien ke anyan ini didie ke enye edibɔ ndutuhɔ ye ikɔt esie; iŋ, didie ke ifiɔk nditɔ owo edi nnan onyuŋ anana ndikut; koro mmɔ iyomke ifiɔk, ŋko mmɔ inyeneke udɔŋ ete enye akara mmɔ!

21 Iŋ, mmɔ etie nte ufene ikɔt emi efehede ekpemerɔŋ, enyuŋ esuanade, ndien ebin, ndien mme unam ikɔt eta mmɔ.