1 Idahaemi edikem ete ke ediwak emana emi edɔkde edi ema edu emi mikikemeke ndifiɔk mme ikɔ edidem Benjamin, ke ekedide mkpri nditɔ ke ini enye eketiŋde ikɔ ɔnɔ ikɔt esie; ndien mmɔ ikibuɔtke idem ke ido mme ete mmɔ.

2 Mmɔ ikibuɔtke idem ke se eketiŋde ebaŋa eriset ke mkpa, ŋko mmɔ ikibuɔtke idem kabaŋa edidi Christ.

3 Ndien idahaemi ke ntak unana mbuɔtidem mmɔ mmɔ ikemeke ifiɔk ikɔ Abasi; ndien esit mmɔ ema ɔsɔŋ.

4 Ndien mmɔ esin ndiduɔk mmɔŋ; mmɔ enyuŋ esin ndiduk ufɔk Abasi. Ndien mmɔ ekedi mme nsionsio owo kabaŋa mbuɔtidem mmɔ, ndien eka iso edi ntre, kpa ke obukidem ye ke idiɔk ido mmɔ; koro mmɔ ema esin ndikot Jehovah Abasi mmɔ.

5 Ndien idahaemi ke ukara Mosiah mmɔ ikiwakke ke mbahare iba nte ikɔt Abasi; edi ke ntak mme eneni ke ufɔt mbon ufɔk Abasi mmɔ ekabare ewak eti eti.

6 Koro ete mmɔ ema ebiaŋa ediwak owo ye mme nnem-inua ikɔ mmɔ, emi ekedude ke ufɔk Abasi, enyuŋ enam mmɔ enam ediwak idiɔk ŋkpɔ; ke ntak oro ama ɔfɔn ete mbon emi ekenamde idiɔk ŋkpɔ, emi ekedude ke ufɔk Abasi, yak ufɔk Abasi ɔnɔ mmɔ item.

7 Ndien edikem ete eda mmɔ edi ke iso mme oku, ndien mme andikpep eyak mmɔ enɔ mme oku; ndien mme oku eda mmɔ edi ke iso Alma, emi ekedide akwa oku.

8 Idahaemi edidem Mosiah ama ɔnɔ Alma unen ke ufɔk Abasi.

9 Ndien edikem ete ke Alma ikifiɔkke ibaŋa mmɔ; edi ediwak ntiense ema edu ebaŋa mmɔ; iŋ, mme owo eda enyuŋ etie ntiense ebaŋa ediwak ukwaŋ-ŋkpɔ mmɔ.

10 Idahaemi akananam utɔ ŋkpɔ emi itibeke akpa ke ufɔk Abasi; ke ntak oro spirit etimere Alma, ndien enye anam ete eda mmɔ edi ke iso edidem.

11 Ndien enye ɔdɔhɔ edidem ete: Sese, emi edi ediwak emi nnyin idade idi ke iso fo, emi nditɔ eka mmɔ edoride mmɔ uyo; iŋ, ndien emum mmɔ nte enamde nsio nsio ukwaŋ-ŋkpɔ. Ndien mmɔ ikabakere esit ibaŋa mme ukwaŋ-ŋkpɔ mmɔ; ke ntak oro nnyin imida mmɔ idi ke iso fo, man afo ebiere ikpe ɔnɔ mmɔ nte asaŋade ye mme idiɔk ubiatibet mmɔ.

12 Edi edidem Mosiah ɔdɔhɔ Alma ete: Sese, ami mbiereke ikpe nnɔ mmɔ; ke ntak oro ami nyak mmɔ nsin ke mme ubɔk fo man ebiere ikpe ɔnɔ mmɔ.

13 Ndien idahaemi spirit Alma ama afiak etimere; ndien enye aka onyuŋ okobup oto Jehovah se anade nte enye anam kabaŋa ŋkpɔ emi, koro enye ama efehe ndik ke enye ekeme ndinam idiɔk ŋkpɔ ke iso Abasi.

14 Ndien edikem ete ke ini enye amakaŋwaŋa ofuri ukpɔŋ esie ɔnɔ Abasi, uyo Jehovah ama edi ɔnɔ enye, ete:

15 Ɔfɔfɔn ɔnɔ fi, Alma, onyuŋ ɔfɔfɔn ɔnɔ mmɔ emi ekenade uduɔk mmɔŋ ke mme mmɔŋ Mormon. Ediɔŋ fi ke ntak akwa mbuɔtidem fo ke mme ikɔ owo mi Abinadi ikpɔŋ.

16 Ndien ɔfɔfɔn ɔnɔ mmɔ ke ntak akamba mbuɔtidem mmɔ ke mme ikɔ ikpɔŋ emi afo eketiŋde ɔnɔ mmɔ.

17 Ndien ɔfɔfɔn ɔnɔ fi ke ntak emi afo asiakde ufɔk Abasi ke ufɔt mbon emi; ndien eyesiak mmɔ, ndien mmɔ eyedi ikɔt mi.

18 Iŋ, ediɔŋ mbon emi enyimede ndikere enyiŋ mi; koro ke enyiŋ mi ke edikot mmɔ; ndien mmɔ edi okim.

19 Ndien ke ntak emi afo obupde mi abaŋa edue ibet, ediɔŋ fi.

20 Afo edi owo mi; ndien ami nyodiomi ye afo nte afo enyene nsinsi uwem; ndien afo ayanam utom ɔnɔ mi onyuŋ asaŋa ke enyiŋ mi, onyuŋ ataŋ erɔŋ mi obok ɔtɔ kiet.

21 Ndien enye emi edikopde uyo mi eyedi erɔŋ mi; ndien enye ke afo edibɔ isin ke ufɔk Abasi, ndien enye ŋko ke ami ndibɔ.

22 Koro sese, emi edi ufɔk Abasi mi, owo ekededi emi ɔduɔkde mmɔŋ eyeduɔk enye mmɔŋ enɔ erikabare esit. Ndien owo ekededi emi ɔbuɔtde idem ke enyiŋ mi; enye ŋko ke ami ndifen nnɔ nte mmamma.

23 Koro edi ami mmen mme idiɔk ŋkpɔ ererimbot ndori ke idem mi; koro ami ŋkobot mmɔ; ndien edi ami ŋkɔnɔ enye emi ɔkɔbuɔtde idem tutu esim utit itie ke ubɔk nnasia mi.

24 Koro sese, ke enyiŋ mi ke ekot mmɔ; ndien edieke mmɔ efiɔkde mi mmɔ eyedi, eyenyuŋ enyene itie ke nsinsi ke ubɔk nnasia mi.

25 Ndien eyedikem ete ke ini ɔyɔhɔ obukpoŋ iba edisiorode uyo ke ini oro ke mmɔ emi mikifiɔkke mi edidi inyuŋ ida ke iso mi.

26 Ndien ke ini oro ke mmɔ edifiɔk ete ke ami ndi Jehovah Abasi mmɔ, ete ke ami ndi Andifak mmɔ; edi ndifakke mmɔ.

27 Ndien ke ini oro ke ami ndiyarade nnɔ mmɔ nte ke ami ŋkɔfiɔkke mmɔ; ndien mmɔ eyewɔrɔ eduk ke nsinsi ikaŋ emi ekenimde enɔ satan ye mme angel esie.

28 Ke ntak oro ke ami ndɔhɔ fi, nte ke enye emi midikopke uyo mi, ukem oro ke afo mudubɔhɔ usin ke ufɔk Abasi mi, koro enye ke ami mendibɔhɔ ke akpatre usen.

29 Ke ntak oro ke ami ndɔhɔ fi nte, Ka; ndien owo ekededi emi eduede mi, enye ke afo edibiere ikpe inɔ nte asaŋade ye mme idiɔk ŋkpɔ emi enye anamde; ndien edieke enye ayarade idiɔk ŋkpɔ esie ke iso fo ye ami, onyuŋ akabare esit esie ke esit akpanikɔ, enye ke afo edifen inɔ, ndien ami nyefen nnɔ enye ŋko.

30 Iŋ, ndien ke adaŋa ini nte ikɔt mi ekabarede esit ke ami ndifen mme ndudue emi mmɔ eduede mi.

31 Ndien mbufo ŋko eyefen enɔ kiet eken ke mme ndudue mbufo; koro ke akpanikɔ ke ami ndɔhɔ mbufo, owo emi mifenke inɔ mme ndudue mbɔhɔiduŋ esie ke ini enye ɔdɔhɔde ete ke enye akabare esit, ukem oro esin idem esie ke idak ubiom ikpe.

32 Idahaemi ami ndɔhɔ fi nte, Ka; ndien owo ekededi emi midikabakere esit kabaŋa mme idiɔk ŋkpɔ esie ukem oro ke owo midibatke isin ke otu ikɔt mi; ndien emi ke edinam tɔŋɔ ke ini emi ka iso.

33 Ndien edikem ke ini Alma ama okokop mme ikɔ emi enye ewet mmɔ enim man enye enyene mmɔ, ndien man enye ebiere ikpe ɔnɔ mme mbon ufɔk Abasi oro nte asaŋade ye mme ibet Abasi.

34 Ndien edikem ete Alma aka onyuŋ ebiere ikpe ɔnɔ mmɔ emi ekemumde nte enamde ukwaŋ-ŋkpɔ, nte asaŋade ye ikɔ Jehovah.

35 Ndien owo ekededi emi akakabarede esit kabaŋa mme idiɔk ŋkpɔ mmɔ enyuŋ eyaredede mmɔ, mmɔ ke enye akabat esin ke mbon ufɔk Abasi;

36 Ndien mmɔ emi mikiyarakede mme idiɔk ŋkpɔ mmɔ inyuŋ ikabakere esit ibaŋa ukwaŋ-ŋkpɔ mmɔ, ukem oro ke owo mikibatke isin ke mbon ufɔk Abasi, ndien esɔhi enyiŋ mmɔ esio.

37 Ndien edikem ete Alma eneŋede kpukpru ŋkpɔ ke ufɔk Abasi; ndien mmɔ efiak etɔŋɔ ndinyene emem ye ndiforo eti eti ke mme ŋkpɔ ufɔk Abasi, esaŋa ye itiŋ-enyin ke iso Abasi, ebɔ ediwak, enyuŋ eduɔkmmɔŋ ediwak.

38 Ndien idahaemi kpukpru ŋkpɔ emi ke Alma ye mme nsaŋa utom esie ekenam emi ekedude ke ufɔk Abasi, esaŋa ye ofuri ifik, ekpep ikɔ Abasi ke kpukpru ŋkpɔ, eyɔ utɔ kpukpru ukut, kpukpru mbon emi mikidihe mbon ufɔk Abasi ekɔbɔ mmɔ.

39 Ndien mmɔ eteme nditɔ eka mmɔ; ndien enyuŋ eteme mmɔ, owo kiet kiet ke ikɔ Abasi, nte asaŋade ye mme idiɔk ŋkpɔ esie, mme ye idiɔk ŋkpɔ emi enye akanamde, Abasi ɔnɔ uyo ete ekutre ndibɔŋ akam, nyuŋ nnɔ ekɔm ke kpukpru ŋkpɔ.