1 Ndien idahaemi edikem ete Ammon ye edidem Limhi etɔŋɔ ndikɔk ibuot ye mme owo mbaŋa nte mmɔ ediyaŋade idem mmɔ iwɔrɔ ke ufin; ndien tutu mmɔ enam ete kpukpru owo esobo idem mmɔ ɔtɔ kiet; ndien emi mmɔ ekenam man mmɔ ekop uyo mme owo ke abaŋa ŋkpɔ emi.

2 Ndien edikem ete mmɔ ikanke ikut usuŋ ndinam idem mmɔ ebɔhɔ ewɔrɔ ke ufin, ibɔhɔke ke ekedi nditaŋ iban ye nditɔ mmɔ, ye mme ufene mmɔ, ye mme enaŋ mmɔ, ye mme tent mmɔ, nyuŋ ŋwɔrɔ nka wilderness; koro mme Lamanite ekedide ata ediwak, usuŋ ikiduhe inɔ ikɔt Limhi ndiŋwana ye mmɔ, ndikere ndinam idem mmɔ ebɔhɔ ewɔrɔ ke ufin ke ndiŋwana ekɔŋ.

3 Idahaemi edikem ete Gideon aka akada ke iso edidem, onyuŋ ɔdɔhɔ enye ete: Idahaemi O edidem, ediwak ini afo ama esikpaŋ utɔŋ ɔnɔ mme ikɔ mi ke ini nnyin ikisiŋwanade ye nditɔ eka nnyin, mme Lamanite.

4 Ndien idahaemi O edidem, edieke afo mukusehe mi nte ịfin emi midotke, mme edieke afo ekesikpaŋde utɔŋ ɔnɔ mme ikɔ mi ke usuŋ ndomo kiet, ndien mmɔ eŋwam fi, kpa ntre ke ami nyom nte yak afo akpaŋ-utɔŋ ɔnɔ mme ikɔ mi idahaemi, ndien ami nyedi owo fo nyuŋ nnam mbon emi ebɔhɔ ewɔrɔ ke ufin.

5 Ndien edidem ayak enye ete enye etiŋ ikɔ. Ndien Gideon ɔdɔhɔ enye ete:

6 Sese usuŋ edem-esa, ke ibibene edem-esa, ke edem-esa obio. Mme Lamanite, mme mbon ukpeme mme Lamanite, ekpa mmin ke okoneyo; ke ntre yak nnyin inɔ ntɔt ke otu kpukpru mbon emi man mmɔ etaŋ mme ufene ye mme enaŋ mmɔ; man mmɔ ebin mmɔ esin ke wilderness ke okoneyo.

7 Ndien ami nyaka nte asaŋade ye uyo fo nyuŋ mkpe akpatre utomo ke wine nnɔ mme Lamanite, ndien mmɔ eyekpa mmin; ndien nnyin iyebe ke ndedibe usuŋ ke ubɔk ufien nna-ekɔŋ mmɔ ke ini mmɔ ekpade mmin enyuŋ edede idap.

8 Ke ntem nnyin iyiyɔŋ ye iban nnyin ye nditɔ nnyin, ye mme ufene nnyin, ye mme enaŋ nnyin ika ke wilderness; ndien nnyin iyisaŋa ikanare isɔŋ Shilom.

9 Ndien edikem ete edidem akpaŋutɔŋ ɔnɔ mme ikɔ Gideon.

10 Ndien edidem Limhi anam ete ikɔt esie ebono mme ufene mmɔ ɔtɔ kiet; ndien enye ɔnɔ utomo wine ɔsɔk mme Lamanite; ndien enye ŋko adian wine, nte enɔ ɔnɔ mmɔ; ndien mmɔ eŋwɔŋ nte emama wine emi edidem Limhi ɔkɔnɔde ɔsɔk mmɔ.

11 Ndien edikem ete ikɔt edidem Limhi ewɔrɔ ke okoneyo eka ke wilderness ye mme ufene mmɔ ye mme enaŋ mmɔ, ndien mmɔ esaŋa ekanare isɔŋ Shilom eduk wilderness, ndien mmɔ eŋwɔŋɔre ke usuŋ isaŋ mmɔ eka isɔŋ Zarahemla, ndien edi Ammon ye ikɔt esie ekeda usuŋ.

12 Ndien mmɔ ema etaŋ kpukpru gold mmɔ, ye sidibe, ye mme ŋkpɔ uto mmɔ, emi mmɔ ekekande etaŋ, ŋko ye ŋkpɔ udia mmɔ ye mmɔ, eduk wilderness; ndien mmɔ eka iso ke isaŋ mmɔ.

13 Ndien ke ema ekedu ke ediwak usen ke wilderness mmɔ esim isɔŋ Zarahemla, enyuŋ ediana ye ikɔt Mosiah, enyuŋ ekabare edi ikɔt esie.

14 Ndien edikem ete Mosiah ɔkɔm mmɔ ye idaresit; ndien enye ŋko ɔbɔ mme ŋwed mmɔ, ŋko ye mme ŋwed emi ikɔt Limhi ekekutde.

15 Ndien idahaemi edikem ke ini emi mme Lamanite ema ekefiɔk ete ke ikɔt Limhi ewɔrɔ ke isɔŋ oro ke okoneyo, ete mmɔ edɔŋ mbon ekɔŋ ebine mmɔ ke wilderness;

16 Ndien ke mmɔ ema ekebine mmɔ ke usen iba, mmɔ ikanke itiene usuŋ isaŋ mmɔ aba; ke ntak oro mmɔ esop ke wilderness.