1 Ndien idahaemi ke ini edidem ama okokop mme ikɔ emi, enye ɔdɔhɔ mme oku esie ete: Emen erenowo emi esio, enyuŋ ewot enye; koro nso ke nnyin inyene ndinam ye enye, koro enye adama.

2 Ndien mmɔ ewɔrɔ eda enyuŋ eyom ndimum enye; edi enye ada nka nka ye mmɔ, onyuŋ ɔdɔhɔ mmɔ ete:

3 Ekutuk mi, koro Abasi ayamia mbufo ufen edieke mbufo emumde mi, koro ami nnɔhɔ kaŋa etop emi Jehovah ɔkɔdɔŋde mi ete ndinɔ; ŋko ami ndɔhɔke mbufo se mbufo ekeyomde ete ami ndɔhɔ mbufo; ke ntak oro, Abasi idiyakke ete ewot mi ke ini emi.

4 Edi ana ami nnam mme ibet emi Abasi ɔkɔnɔde mi uyo; ndien ke ntak emi ami ntiŋde akpanikɔ nnɔ mbufo mbufo eyaresit ye ami. Ndien nko, ke ntak emi ami ntiŋde ikɔ Abasi mbufo ebiere ikpe enɔ mi ete ke ami madama.

5 Ndien edikem ete ke ini emi Abinadi ama eketiŋ mme ikɔ emi ete ikɔt edidem Noah ikanke imum enye, koro Spirit Jehovah okodude ye enye; ndien iso esie ayama ata etieti, kpa nte eke Moses ekedide ke obot Sinai, ke ini eketiŋde ikɔ ye Jehovah.

6 Ndien enye etiŋ ikɔ ye odudu ye unen oto Abasi; ndien enye aka iso ke mme ikɔ esie, ete:

7 Mbufo emekut ete ke mbufo inyeneke odudu ndiwot mi, ke ntak oro ami ŋkure etop mi. Iŋ, ndien ami mokut nte ke esibe mbufo esim esit mbufo ke ntak emi ami ndɔhɔde mbufo akpanikɔ mbaŋa mme ukwaŋ-ŋkpɔ mbufo.

8 Iŋ, ndien mme ikɔ mi ɔyɔhɔ mbufo ye mme utibe ŋkpɔ ye mkpaidem, nko ye iyaresit.

9 Edi ŋkure etop mi; ndien ke ekurede idihe akpanŋkpɔ ebiet emi ami nkade, edieke anade nte enyaŋa mi.

10 Edi emi ke ami ndɔhɔ mbufo, se mbufo enamde ye ami, ke emi ama ebe, eyedi utɔ ye mbiet mme ŋkpɔ emi edidide.

11 Ndien idahaemi ami nkot nnɔ mbufo mme nsuhɔ ibet Abasi, koro ami mada nkut nte ke mmɔ iwereke ke esit mbufo; ami mada nkut nte ke mbufo emeduŋɔre enyuŋ ekpep ukwaŋ-ŋkpɔ ke ediwak ubak uwem mbufo.

12 Ndien idahaemi, mbufo eti ete ke ami mma ndɔhɔ mbufo nte: Mbufo ekunam unɔ idem mbufo edisɔi ŋkpɔ ndomo kiet, mme mme mbiet ŋkpɔ ndomo kiet emi edude ke heaven ke enyɔŋ, mme emi edude ke isɔŋ ke idak, mme emi odude ke mmɔŋ ke idak isɔŋ.

13 Ndien nko: Mbufo ekunuhɔ unɔ mmɔ, ekunyuŋ unam ŋkpɔ unɔ mmɔ; koro ami Jehovah Abasi mbufo ndi Abasi ufup, nda mme ukwaŋ-ŋkpɔ mme ete ndori nditɔ ke idem, ndori ɔyɔhɔ emana mmɔ ita ye inaŋ eke esuade mi;

14 Nyuŋ nyene mbɔm nnɔ mme tɔsin emana mmɔ emi emade mi enyuŋ enimde mme ibet mi.

15 Mbufo ekumen enyiŋ Jehovah Abasi mbufo etomo ke ikpikpu; koro Jehovah midiyakke enye emi otomode enyiŋ esie ke ikpikpu okudue.

16 Eti usen sabbath, ndinim enye ke edisana.

17 Usen itiokiet ke mbufo edinam utom, enyuŋ enam kpukpru utom mbufo;

18 Edi ɔyɔhɔ usen itiaba, sabbath Jehovah Abasi mbufo, mbufo ekunam utom ndomo kiet, mbufo, mme eyen eren mbufo, mme eyen aŋwan mbufo, ofin eren mbufo, mme ofin aŋwan mbufo, mme ufene mbufo, mme esen owo mbufo emi odude ke ufɔk mbufo;

19 Koro ke usen itiokiet ke Jehovah akanam enyɔŋ ye isɔŋ, ye inyaŋ, ye kpukpru se idude mmɔ ke esit; ke ntre Jehovah ɔdiɔŋ usen sabbath, onyuŋ enim enye ke edisana.

20 Ekpono ete mbufo ye eka mbufo, man usen mbufo ebigi ke isɔŋ emi Jehovah Abasi mbufo ɔnɔde mbufo.

21 Mbufo ekuwot owo.

22 Mbufo ekusin efibe. Mbufo ekuyip inɔ.

23 Mbufo ekutie ntiense nsu ebaŋa mbɔhiduŋ mbufo.

24 Mbufo ekusin esit ke ufɔk mbɔhiduŋ mbufo, mbufo ekusin esit ke ŋwan mbɔhiduŋ mbufo, mme ofin eren esie, mme ofin aŋwan esie, mme ox esie, mme ass esie, mme ŋkpɔ ndomo kiet emi edide eke mbɔhiduŋ mbufo.

25 Ndien edikem ete ke ini Abinadi ama eketre nditiŋ mme ŋkpɔ emi ete enye ɔdɔhɔ mmɔ ete: Ndi mbufo emekpep mbon emi ete ke ana mmɔ enam kpukpru mme ŋkpɔ emi man enim mme ibet emi?

26 Ami ndɔhɔ mbufo nte, Iŋ iŋ; koro edieke mbufo ekenamde, Jehovah ikpikinamke mi ŋwɔrɔ ndi nyuŋ ntiŋ idiɔk nte prophet mbaŋa mbon emi.

27 Ndien idahaemi mbufo emedɔhɔ ete ke erinyaŋa oto ke ibet Moses. Ami ndɔhɔ mbufo ke edi akpanŋkpɔ ete mbufo enim ibet Moses kaŋa; edi ami ndɔhɔ mbufo, nte ke ini eyedi emi mididige akpanŋkpɔ aba ndinim ibet Moses.

28 Ndien ke ediande do, ami ndɔhɔ mbufo, nte ke erinyaŋa itoho ke mbet ikpɔŋ; ndien edieke mikpidige ke ntak usio-isop, emi Abasi ke idem esie edinamde inɔ mme idiɔk ŋkpɔ ye mme ukwaŋ-ŋkpɔ ikɔt esie, ete ke mmɔ ikpikanke inyaŋa editak, isehe ibet Moses.

29 Ndien idahaemi ami ndɔhɔ mbufo nte ke ekedi akpan-ŋkpɔ ete enɔ nditɔ Israel mbet, iŋ, kpa ata ɔkpɔsɔŋ mbet; koro mmɔ ekedide mbon nsɔŋ-ibuot, esɔp ndinam ukwaŋ-ŋkpɔ, edi isɔpke nditi Jehovah Abasi mmɔ;

30 Ke ntak oro ema enɔ mmɔ mbet, iŋ, mbet mme edinam ye mme edinam, mbet emi akanade nte mmɔ ekpeme ndinim ke usen ke usen, man enim mmɔ ke nditi Abasi ye utom mmɔ kabaŋa enye.

31 Edi sese, ami ndɔhɔ mbufo, nte ke kpukpru ŋkpɔ emi ekedi mme utɔ ŋkpɔ emi edidide.

32 Ndien idahaemi, ndi mbet ama aŋwaŋa mmɔ? Ami ndɔhɔ mbufo nte, Iŋ iŋ, mbet ikiwaŋake kpukpru mmɔ; ndien emi ke ntak isɔŋesit mmɔ; koro mmɔ ikifiɔkke ete ke baba owo ndomo kiet idibɔhɔ erinyaŋa ibɔhɔke oto ke erifak Abasi.

33 Koro sese, ndi Moses ikitiŋke nte prophet inɔ mmɔ ibaŋa edidi eke Messiah, ndien ke Abasi ayafak ikɔt esie? Iŋ, nko kpa ye kpukpru mme prophet emi eketiŋde nte prophet tɔŋɔ ke eritɔŋ ererimbot—ndi mmɔ itiŋke uwak ikɔ mme mkpri ibaŋa mme ŋkpɔ emi?

34 Ndi mmɔ idɔhɔke ete ke Abasi ke idem esie ɔyɔsuhɔre edi ke otu nditɔ owo, onyuŋ ada ɔnɔ idem esie mbiet owo, onyuŋ asaŋa ke ɔkpɔsɔŋ odudu ke iso isɔŋ?

35 Iŋ, ndien ndi mmɔ idɔhɔke ŋko ete ke enye ayanam eriset ke mkpa etibe, ndien ete ke enye, ke idem esie, ke eyefik enyuŋ enam okut ukut?