Ibuot 14
Isaiah etiŋ ikɔ nte andinyaŋa—Etiŋ ebaŋa esuene ye ufen Messiah—Enye anam ukpɔŋ Esie edi uwa ɔnɔ idiɔk ŋkpɔ onyuŋ ekpe ubɔk ɔnɔ mme edue ibet—Domo ye Isaiah 53. Ŋkpɔ nte 148–421 M.C.
1 Iŋ, ndi ke nte Isaiah idɔhɔke ete: Anie owo ikibuɔt idem ke etop nnyin, ndien anie owo ke ubɔk Jehovah ayarare ɔnɔ?
2 Koro enye ɔyɔkɔri ke iso esie nte nsek eto, ye nte oruŋ okotode nsat isɔŋ; enye inyeneke ubɔŋ mme uyai; ndien ke ini nnyin idikutde enye uyai iduhe ete nnyin inyene udɔŋ inɔ enye.
3 Mme owo ese enye ke ndek enyuŋ esin enye; erenowo ukut, onyuŋ emehe ye mfuhɔ; ndien eketie nte nnyin idip enye iso nnyin; ese enye ke ndek, ndien nnyin ibatke enye nte owo.
4 Ke akpanikɔ enye ɔyɔ mme mfuhɔ nnyin, onyuŋ obiom mme ukut nnyin; edi nnyin ise ite ke Abasi ɔkɔtɔ enye, amia enye, onyuŋ anam ukut esim enye.
5 Edi enɔ enye unan ke ntak ndudue nnyin, enuak enye ke ntak ukwaŋ-ŋkpɔ nnyin; etunɔ enye man nnyin inyene emem; ndien ye inia esie ke ekɔk nnyin.
6 Kpukpru nnyin, nte erɔŋ, imiyo; nnyin kiet kiet iŋwɔŋɔre iduk usuŋ nnyin; ndien Jehovah odori enye ke idem mme ukwaŋ-ŋkpɔ nnyin kpukpru.
7 Ema etuk enye, enyuŋ enam ukut esim enye, edi enye itatke inua esie; eda enye nte eyen erɔŋ eka ndiwot, ndien kpa nte erɔŋ mitatke inua ke iso mme andifat mmɔ ntre ke enye mitatke inua esie.
8 Esio enye ke ufɔk ŋkpɔkɔbi ye ke ubiere ikpe; ndien anie edibuk emana esie? Koro ema esibe enye esio efep ke isɔŋ mme odu uwem; ke ntak mme ndudue ikɔt mi ke ekemia enye ufen.
9 Ndien enye enim udi esie ye mme idiɔk owo, onyuŋ odu ye owo inyene ke mkpa esie; ke ntak emi enye mikinamke baba idiɔk, ndien abiaŋa ikiduhe enye ke inua.
10 Edi enem Jehovah ndinuak enye; enye anam enye ɔfuhɔ; ke ini afo edinamde ukpɔŋ esie edi uwa ɔnɔ idiɔk ŋkpɔ enye oyokut ubon esie, enye ayanam mme usen esie ebigi, ndien inemesit Jehovah oyoforo enye ke ubɔk.
11 Enye oyokut ukut ukpɔŋ esie, oyoyuŋ ɔyuhɔ; ke ifiɔk esie ke edinen owo mi editebe ediwak owo; koro enye oyobiom mme ukwaŋ-ŋkpɔ mmɔ.
12 Ke ntak oro ke ami ndideme ŋkpɔ nnɔ enye ke otu ikpɔ owo, ndien enye eyedeme mbume ye mkpɔsɔŋ owo; koro enye ama aŋwaŋa ukpɔŋ esie ɔnɔ mkpa; enyuŋ ebat enye esin ke otu mme edue ibet; ndien enye ama obiom mme idiɔk ŋkpɔ ediwak owo, onyuŋ anam mkpe-ubɔk ɔnɔ mme edue ibet.