1 Ndien idahaemi, edikem ete ke ini Abinadi ama eketiŋ mme ikɔ emi enye anyan ubɔk esie onyuŋ ɔdɔhɔ ete: Ini eyedi emi kpukpru owo edikutde erinyaŋa Jehovah; ke ini kpukpru idut, iman, usem, ye mme owo edikutde enyin ye enyin ndien eyarade ke iso Abasi ete ke mme ubiere ikpe esie edi edinen.

2 Ndien ke ini oro ke edibin idiɔk owo isio, ndien mmɔ eyenyene ntak nditua, nyuŋ nseme, enyuŋ nsio mkpo, nyuŋ nta edet mmɔ; ndien emi ke ntak emi mmɔ mikpaŋke utɔŋ inɔ uyo Jehovah; ke ntak oro Jehovah ifakke mmɔ.

3 Koro mmɔ edide obukidem ye se idiɔkde, ndien satan enyene odudu ke idem mmɔ; iŋ, kpa akani urukikɔt oro emi akabiaŋade akpa ete ye eka nnyin, emi ekedide ntak iduɔ mmɔ; emi ekedide ntak emi kpukpru ubon owo ekekabare edi obukidem, eke obukidem, se idiɔkde, efiɔk eti ye idiɔk, eyak idem mmɔ enɔ satan.

4 Ke ntem kpukpru ubon owo ema esop; ndien sese, mmɔ ekpekesop ke nsinsi ekpedi idige ke Abasi ama afak ikɔt esie osio ke edisop ye iduɔ mmɔ.

5 Edi eti ete ke enye emi akade iso ke uduot obukidem esie, onyuŋ akade iso ke mme usuŋ idiɔk ŋkpɔ ye nsɔŋ ibuot ye Abasi, osuk odu ke itie iduɔ esie ndien satan enyene kpukpru odudu ke idem esie. Ke ntak oro enye edi nte erifak ikiduhe, edi asua ɔnɔ Abasi; ndien ŋko satan edi asua ɔnɔ Abasi.

6 Ndien idahaemi edieke Christ mikidihe ererimbot, ntiŋ ikɔ mbaŋa mme ŋkpɔ emi edidide nte ke mmɔ ema ededi, erifak ikpiduhe.

7 Ndien edieke Christ mikisetke ke mkpa, mme esibe mme uruk mkpa man udi okunyene erikan, ndien man mkpa okunyene ifɔt, eriset ikpiduhe.

8 Edi eriset odu, ke ntak oro udi inyeneke erikan, ndien Christ emen ifɔt mkpa.

9 Enye edi uŋwana ye uwem ererimbot; iŋ, uŋwana emi minyeneke utit, emi mikemeke ndikim; iŋ, ŋko ye uwem emi minyeneke utit, man mkpa okudu aba.

10 Kpa eke mkpa emi eyesine uwem emi mkpa miduhe, ndien mbiara emi eyesine se mikemeke ndibiara, ndien eyeda mmɔ edida ke iso ebiet uda ikpe ke esop Abasi, man enye ebiere ikpe nte mme utom mmɔ edide mme mmɔ edi eti mme mme mmɔ edi idiɔk—

11 Edieke mmɔ edide eti, eset ke anana utit uwem ye inemesit; ndien edieke mmɔ edide idiɔk, eset ke anana utit ubiom ikpe, eyak mmɔ enɔ satan, emi ekesinde mmɔ ke idak esie, emi edide ubiom ikpe—

12 Ke ekenamde nte asaŋade ye mme uduak obukidem ye udɔŋ mmɔ; ke akanam mikotke Jehovah ke ini ubɔk mbɔm esie eke anyanare ɔnɔ mmɔ; koro ubɔk mbɔm esie ama anyanare ɔnɔ mmɔ, ndien mmɔ iyomke; koro ema ekpan mmɔ ebaŋa mme ukwaŋ-ŋkpɔ mmɔ ndien edi mmɔ ikpɔŋke mmɔ; ndien ema enɔ mmɔ uyo ete ekabare esit ndien edi mmɔ ikikabakere esit.

13 Ndien idahaemi, ndi mbufo ikpinyekke idem enyuŋ ekabare esit ebaŋa mme idiɔk ŋkpɔ mbufo, enyuŋ eti ite ke oto onyuŋ ebe ke Christ ke mbufo edibɔ erinyaŋa?

14 Ke ntak oro, edieke mbufo ekpepde ibet Moses, ekpep ŋko ete ke edi mbiet mme ŋkpɔ emi edidide—

15 Ekpep mmɔ ete ke erifak oto ke Christ Jehovah, emi edide ata Nsinsi Ete. Amen.