1 Ndien idahaemi edikem ete ke ini Abinadi ama eketiŋ mme ikɔ emi ama, ete edidem ɔnɔ uyo ete yak mme oku emum enye enyuŋ enam ete ewot enye.

2 Edi kiet ama odu ke otu mmɔ emi enyiŋ esie ekedide Alma, enye ŋko okoto ubon Nephi. Ndien enye ekedi akparawa, ndien enye ama ɔbuɔtidem ke mme ikɔ emi Abinadi eketiŋde, koro enye ama ɔfiɔk abaŋa ukwaŋ-ŋkpɔ emi Abinadi eketiede ntiense abaŋa mmɔ; ke ntak oro enye ɔtɔŋɔ ndikpe edidem ubɔk ete okuyatesit ye Abinadi, edi ayak ete enye ɔnyɔŋ ke emem.

3 Edi edidem etim ayatesit, onyuŋ anam ete yak ebin Alma esio ke otu mmɔ, onyuŋ ɔdɔŋ nditɔ ufɔk esie ete etiene enye man mmɔ ewot enye.

4 Edi enye efehe ɔkpɔŋ iso mmɔ onyuŋ edibe man mmɔ ekukut enye. Ndien ke ini enye edibede ke ediwak usen ama ewet kpukpru mme ikɔ emi Abinadi eketiŋde.

5 Ndien edikem ete edidem anam ete mbon ukpeme esie ekanare Abinadi ekuk enyuŋ emum enye; ndien mmɔ ebɔp enye enyuŋ etop enye esin ke ufɔk ŋkpɔkɔbi.

6 Ndien ke usen ita ama ekebe, ke ama ɔkɔbɔ item oto mme oku esie, enye anam ete efiak eda enye edi ke iso esie.

7 Ndien enye ɔdɔhɔ enye ete: Abinadi, nnyin imenyene ikɔ etiŋde edian fi, ndien afo omodot mkpa.

8 Koro afo emedɔhɔ ete ke Abasi ke idem esie ana ɔsuhɔre edi ke otu nditɔ owo; ndien idahaemi, ke ntak emi eyewot fi ibɔhɔke afo eyesin kpukpru mme ikɔ emi afo etiŋde idiɔk abaŋa mi ye ikɔt mi.

9 Ndien Abinadi ɔdɔhɔ enye ete: Ami ndɔhɔ fi, ami ndisinke mme ikɔ emi ami ntiŋde nnɔ fi mbaŋa mbon emi, koro mmɔ edi akpanikɔ; ndien man afo ɔfiɔk ke mmɔ edi akpanikɔ ami mayak idem mi nte ami nduɔ nduk ke ubɔk mbufo.

10 Iŋ, ndien ami nyɔbɔ ndutuhɔ tutu mkpa, ndien ami ndisinke mme ikɔ mi, ndien mmɔ eyeda nte ikɔ ntiense ebaŋa mbufo. Ndien edieke mbufo ewotde mi mbufo eduɔk iyip owo eke miduehe isop, ndien emi ŋko ayada nte ikɔ ntiense abaŋa mbufo ke akpatre usen.

11 Ndien idahaemi edidem Noah ama ebeŋe idem ndiyak enye, koro enye ama abak ikɔ esie; koro enye ama abak ete mme ubiere ikpe Abasi eyedoro enye ke idem.

12 Edi mme oku emenere uyo mmɔ ebaŋa enye, enyuŋ etɔŋɔ ndidori enye ikɔ, ete: Enye osuŋi edidem. Ke ntak oro edidem edemere ke iyatesit abaŋa enye, ndien enye asana enye ayak ete ewot enye.

13 Ndien edikem ete mmɔ emum enye enyuŋ ebɔp enye, enyuŋ emia ikpɔk idem esie ye mme ikpa, iŋ, tutu enye akpa.

14 Ndien idahaemi ke ini mme edeme ikaŋ etɔŋɔde ndita enye, enye osio mkpo ɔnɔ mmɔ, ete:

15 Sese, kpa nte mbufo enamde ye ami, ntre ke edikem ete ubon mbufo eyenam ete ediwak eyɔ mme ubiak emi ami nyɔde, kpa mme ubiak mkpa ke ikaŋ; ndien emi ke ntak emi mmɔ ebuɔtde idem ke erinyaŋa Jehovah Abasi mmɔ.

16 Ndien eyedikem ete ke eyekut mbufo ye kpukpru utɔ udɔŋɔ ke ntak mme ukwaŋ-ŋkpɔ mbufo.

17 Iŋ, ndien eyemia mbufo ke ofuri nkaŋ, enyuŋ ebin enyuŋ esuan mbufo enɔ iso ye edem, kpa nte mme unam ikɔt ye mme unam obom ebinde ufene ikɔt.

18 Ndien ke usen oro eyebine mbufo, ndien ubɔk mme asua mbufo oyomum mbufo, ndien ke ini oro mbufo eyeyɔ, nte ami nyɔde, mme ubiak mkpa ke ikaŋ.

19 Ke ntem Abasi osio usiene ke idem mbon emi esobode ikɔt esie. O Abasi, bɔ ukpɔŋ mi.

20 Ndien idahaemi, ke ini Abinadi ama eketiŋ mme ikɔ emi, enye ɔduɔ, ke eke akpade ke ikaŋ; iŋ, ke ekewotde enye ke ntak emi enye mikaŋke mme ibet Abasi, ke eke ɔsɔŋɔde akpanikɔ eke mme ikɔ esie ke mkpa esie.