1 Ndien idahaemi, edikem ete Alma, emi ekefehede ɔkpɔŋ nditɔ ufɔk edidem Noah, ama akabare esit ke mme idiɔk ŋkpɔ ye mme ukwaŋ-ŋkpɔ esie, onyuŋ asaŋa ke ndibe ke otu mme owo, onyuŋ ɔtɔŋɔ ndikpep mme ikɔ Abinadi—

2 Iŋ, kabaŋa emi akanade nte edi, ndien ŋko kabaŋa eriset ke mkpa, ye erifak mme owo, emi akanade nte enam etibe oto odudu, ye mme ufen, ye mkpa Christ, ye eriset ke mkpa esie ye edidɔk ke heaven.

3 Ndien kpa nte ediwak emi ekpaŋde utɔŋ enɔ mme ikɔ esie enye ekpep mmɔ. Ndien enye ekpep mmɔ ke ndibe, man edidem okunyene ifiɔk ubaŋa. Ndien ediwak ema ebuɔtidem ke mme ikɔ esie.

4 Ndien edikem ete kpa nte ediwak emi ekebuɔtde idem ke enye ema eka ebiet emi ekekotde Mormon, ke ɔkɔbɔde enyiŋ esie oto edidem, emi odude ke mme adaŋa isɔŋ emi ɔkɔyɔhɔde, usuk ini, mme ke ini ke ini, ye mme unam ikɔt.

5 Idahaemi, ntɔŋɔ edisana mmɔŋ ama odu ke Mormon, ndien Alma aka do, do emi mfuhɔ mkpri eto ekekperede mmɔŋ oro, emi enye ekedipde idem esie ke uwemeyo mbak mme uyom edidem.

6 Ndien edikem ete kpa nte ediwak emi ekebuɔtde idem ke enye ema eka do ekekop mme ikɔ esie.

7 Ndien edikem ete ediwak usen ema ekebe ema edu ediwak ibat mme owo esobode ke ɔtɔ kiet ke itie Mormon, ndikop mme ikɔ Alma. Iŋ, kpukpru ema esobo ke ɔtɔ kiet emi ekebuɔtde idem ke ikɔ esie, ndikop enye. Ndien enye ama ekpep mmɔ, onyuŋ ɔkwɔrɔ erikabare esit ɔnɔ mmɔ, ye erifak, ye mbuɔtidem ke Jehovah.

8 Ndien edikem ete enye ɔdɔhɔ mmɔ ete: Sese, emi edi mme mmɔŋ Mormon (koro ntem ke ekekot mmɔ) ndien idahaemi, nte mbufo enyenede udɔŋ ndididuk mboho Abasi, ye ndi kere ikɔt esie, enyuŋ enyime ndibiom mbiomo kiet eken, man mmɔ efere;

9 Iŋ, enyuŋ enyime ndifuhɔ ye mmɔ emi efuhɔde; iŋ, enyuŋ edɔŋ mbon emi eyomde ndɔŋesit esit, enyuŋ eda nte mme ntiense enɔ Abasi ke kpukpru ini ye ke kpukpru ŋkpɔ, ye ke kpukpru ebiet emi mbufo edidude, tutu ke mkpa, man Abasi afak mbufo, enyuŋ ebat mbufo ye mme akpa eriset ke mkpa, man mbufo enyene nsinsi uwem—

10 Idahaemi ami ndɔhɔ mbufo, edieke emi edide udɔŋ esit mbufo, nso ikpan mbufo ndina uduɔk mmɔŋ ke enyiŋ Jehovah, nte ntiense ke iso esie ete ke mbufo emeduk ediomi ye enye, ete ke mbufo eyenam utom enɔ enye enyuŋ enim mme ibet esie, man enye aŋwaŋa Spirit esie ata etieti odori mbufo?

11 Ndien idahaemi ke ini mme owo ekekopde mme ikɔ emi, mmɔ ekwak ubɔk mmɔ ke idaresit, enyuŋ efiori ete: Emi edi udɔŋ esit nnyin.

12 Ndien idahaemi edikem ete Alma ada Helam, enye emi edide kiet ke akpa, ndien aka onyuŋ ada ke mmɔŋ, onyuŋ ebeŋe, ete: O Jehovah, ŋwaŋa Spirit fo nnɔ owo fo, man enye anam utom emi ye edisana esit.

13 Ndien ke ini enye ama eketiŋ mme ikɔ emi, Spirit Jehovah ama odoro enye ke idem, ndien enye ɔdɔhɔ ete: Helam, ami nduɔk fi mmɔŋ, ke nyenede unen nto Abasi Ibom, nte ikɔ ntiense nte ke afo omoduk ke ediomi ndinam utom nnɔ enye tutu afo akpa ke idem eke mkpa; ndien yak eŋwaŋa Spirit Jehovah edori fi; ndien yak enye ɔnɔ fi nsinsi uwem, oto ke erifak Christ, emi enye ekenimde tɔŋɔ ke eritɔŋɔ ererimbot.

14 Ndien ke ini Alma ama eketiŋ mme ikɔ emi, ema ebuk Alma ye Helam mbiba ke mmɔŋ; ndien mmɔ edaha eda enyuŋ ewɔrɔ ke mmɔŋ ye idaresit, eyɔhɔ ye Spirit.

15 Ndien nko, Alma ada owo efen, onyuŋ aka ɔyɔhɔ ikaba ke mmɔŋ, onyuŋ ɔduɔk enye mmɔŋ nte akpa owo, edi enye ikifiakke inyini idem esie ke mmɔŋ.

16 Ndien ke utɔ usuŋ emi ke enye ekenim kpukpru owo emi ekekade ke ebiet Mormon uduɔk mmɔŋ; ndien ibat mmɔ ekedi ŋkpɔ nte owo ikie iba ye inaŋ; iŋ, ndien ekeduɔk mmɔ mmɔŋ ke mme mmɔŋ Mormon, ndien mmɔ eyɔhɔ ye mfɔn Abasi.

17 Ndien ekekot mmɔ mbon ufɔk Abasi, mme mbon ufɔk Abasi Christ, tɔŋɔ ke ini oro ka iso. Ndien edikem ete ke owo ekededi emi ɔkɔduɔkde mmɔŋ ke odudu ye unen Abasi ke ema edian enɔ ufɔk Abasi.

18 Ndien edikem ete Alma, ke ama ekenyene unen oto Abasi, enim mme oku; kpa oku kiet ke kpukpru aba ye duop eke ibat mmɔ ke enye ekenim ete ekwɔrɔ ikɔ enɔ mmɔ, enyuŋ ekpep mmɔ ebaŋa mme ŋkpɔ abaŋade obio ubɔŋ Abasi.

19 Ndien enye ɔnɔ mmɔ uyo ete mmɔ ekukpep ŋkpɔ ndomo kiet ibɔhɔke edi mme ŋkpɔ emi enye ekekpepde, ye emi eketiŋde ke inua mme ndisana prophet.

20 Iŋ, ndien enye ɔnɔ mmɔ uyo ete mmɔ ekukwɔrɔ ŋkpɔ ndomo kiet ibɔhɔke edi erikabare esit ye mbuɔtidem ke Jehovah, emi akafakde ikɔt esie.

21 Ndien enye ɔnɔ mmɔ uyo ete yak eneni okudu kiet ye eken, edi ete yak mmɔ etiŋ enyin nte kiet ese, enyene mbuɔtidem kiet ye uduɔk mmɔŋ kiet, ekim esit mmɔ edian kiet ke ndidi kiet ye ke ima ebaŋa kiet eken.

22 Ndien ntem ke enye ɔkɔnɔ mmɔ uyo ete ekwɔrɔ. Ndien ntem mmɔ ekabare edi nditɔ Abasi.

23 Ndien enye ɔnɔ mmɔ uyo ete mmɔ ekpono usen sabbath, enyuŋ enim enye ke edisana, ndien ŋko yak mmɔ enɔ Jehovah Abasi mmɔ ekɔm kpukpru usen.

24 Ndien enye ŋko ɔnɔ mmɔ uyo ete mme oku emi enye ekenimde enam utom ye ubɔk mmɔ man ekama idem mmɔ.

25 Ndien usen kiet ama odu ke kpukpru urua emi ekesiode enim man mmɔ esobo idem mmɔ ɔtɔ kiet man ekpep mme owo ŋkpɔ, enyuŋ ekpono Jehovah Abasi mmɔ, ndien ŋko, nte ediwak ini nte okpodude ke odudu mmɔ, ndisobo idem mmɔ ɔtɔ kiet.

26 Ndien ikinaha nte mme oku eberedem ke mme owo ebaŋa ukama mmɔ; edi ke utom mmɔ ke akana nte mmɔ ebɔ mfɔn Abasi, man mmɔ ekop odudu ke Spirit, enyenede ifiɔk Abasi, man mmɔ ekpep ye odudu ye unen eto Abasi.

27 Ndien nko Alma ama ɔnɔ uyo ete yak mbon ufɔk Abasi enɔ inyene mmɔ, owo kiet kiet nte asaŋade ye se enye enyenede; edieke enye enyenede awak yak enye ɔnɔ awak; ndien enye emi enyenede ekpri, yak ebɔ ekpri; ndien enye emi minyeneke yak enɔ.

28 Ndien ntem yak mmɔ enɔ inyene mmɔ ke unyime esit mmɔ ye mme eti udɔŋ ebaŋa Abasi, ye mme oku oro eke enanade, iŋ, ye kpukpru mbon unana, mbon iferi.

29 Ndien emi enye ɔkɔdɔhɔ mmɔ, ke ekebɔde uyo eto Abasi; ndien mmɔ ema esaŋa nnen nnen ke iso Abasi, enɔ kiet eken ke obukidem ye ke spirit nte asaŋade ye se mmɔ enanade ye se mmɔ eyomde.

30 Ndien edikem ete ke ekenam kpukpru emi ke Mormon, iŋ, ke mme mben mmɔŋ Mormon, ke akai emi ekekperede mme mmɔŋ Mormon; iŋ, ebiet Mormon, mme mmɔŋ Mormon, akai Mormon, didie ke mmɔ eye ke enyin mmɔ emi eke edinyenede ifiɔk Andifak mmɔ do; iŋ, ndien didie ke edifɔn inɔ mmɔ, koro mmɔ eyekwɔ itoro esie ke nsinsi.

31 Ndien ekenam mme ŋkpɔ emi ke mme adaŋa isɔŋ, man edidem okunyene ifiɔk ubaŋa mmɔ.

32 Edi sese, edikem ete edidem, ke ama okokut isaŋ ke otu mme owo, ɔdɔŋ nditɔ ufɔk esie ete eyep mmɔ. Ke ntak oro ke usen emi mmɔ ekesobode idem mmɔ ɔtɔ kiet ndikop ikɔ Jehovah ema eyarade mmɔ enɔ edidem.

33 Ndien idahaemi edidem ama ɔdɔhɔ ete ke Alma obumere mme owo ete esɔŋ ibuot ye enye; ke ntak oro enye ɔdɔŋ mbon ekɔŋ esie ete esobo mmɔ.

34 Ndien edikem ete ke ema edɔhɔ Alma ye ikɔt Jehovah ebaŋa edidi mbon ekɔŋ edidem; ke ntak oro mmɔ etaŋ mme tent mmɔ ye ikɔt ufɔk mmɔ enyuŋ eduk eka wilderness.

35 Ndien ke ibat mmɔ ekedi ŋkpɔ nte owo ikie inaŋ ye aba ye duop.