1 Idahaemi Alma, ke Jehovah ama akasian enye ete ke mbon ekɔŋ edidem Noah eyediŋwana ye mmɔ, ndien ke ama akanam ikɔt esie enyene ifiɔk, ke ntak oro mmɔ etaŋ mme ufene mmɔ, enyuŋ emen mkpasip mmɔ, enyuŋ ewɔrɔ eka wilderness ebem mbon ekɔŋ edidem Noah iso.

2 Ndien Jehovah ama ɔsɔŋɔ mmɔ idem, tutu ikɔt edidem Noah ikikemeke ndibe mmɔ man ewot mmɔ.

3 Ndien mmɔ efehe ke isaŋ usen itiaita eduk ke wilderness.

4 Ndien mmɔ edisim isɔŋ oro, iŋ, kpa ata ediye ye isɔŋ emi emade, isɔŋ edisana mmɔŋ.

5 Ndien mmɔ ema ewuk mme tent mmɔ, enyuŋ etɔŋɔ nditibi isɔŋ, enyuŋ etɔŋɔ ndibɔp mme ufɔk; iŋ, mmɔ esin ifik enam utom, enyuŋ enam utom ata eti eti.

6 Ndien mme owo ema enyene udɔŋ ete Alma edi edidem mmɔ, koro mme owo ekemade enye.

7 Edi enye ɔdɔhɔ mmɔ ete: Sese, ifɔnke ete yak nnyin inyene edidem; koro ntem ke Jehovah ɔdɔhɔ: Mbufo ekuse owo kiet nte ke okoŋ akan efen, mme owo kiet okuse idem esie nte imikoŋ ikan owo efen; ke ntak oro ami ndɔhɔ mbufo nte ke ifɔnke ete yak mbufo enyene edidem.

8 Edi, edieke ekpekemede ete ke eyeyene ndinen owo kpukpru ini ndidi ndidem mbufo ɔkpɔfɔn ete mbufo enyene edidem.

9 Edi eti ukwaŋ-ŋkpɔ edidem Noah ye mme oku esie; ndien ami ke idem mi afia ama omum, nyuŋ nnam ediwak ŋkpɔ emi ekedide mbubiam ke iso Jehovah, emi akanamde mi nyene akamba erikabare esit.

10 Edi, ke mma ŋkenyene ediwak ukut, Jehovah ama okop mme eseme mi, onyuŋ eyere mme akam mi, ndien anam mi ndi ŋkpɔ utom ke mme ubɔk esie ke ndida ata ediwak mbufo nsim ifiɔk akpanikɔ esie.

11 Edi, ami mbɔhɔ ubɔŋ ke ŋkpɔ emi, koro ami ndotke ubɔŋ ke idem mi.

12 Ndien idahaemi ami ndɔhɔ mbufo, edidem Noah ama efik mbufo, enyuŋ edu ke ufin esie ye mme oku esie, mmɔ enyuŋ eda mbufo esin ke ukwaŋ-ŋkpɔ; ke ntak oro ema ebɔp mbufo ye mme uruk ukwaŋ-ŋkpɔ.

13 Ndien idahaemi ke ntak emi odudu Abasi akanamde mbufo ebɔhɔ ewɔrɔ ke mme uruk emi; iŋ, kpa ke mme ubɔk edidem Noah ye ikɔt esie, ŋko ye ke mme uruk ukwaŋ-ŋkpɔ, kpa ntre ke ami nyene udɔŋ nte mbufo esɔŋɔ eda ke uwɔrɔ ifin emi ekesiode mbufo, ŋko nte mbufo ekudori enyin ke owo ndomo kiet ete edi edidem ukara mbufo.

14 Ndien ŋko ekudori enyin ke owo ndomo kiet ete edi anikpep mbufo mme asaŋa-utom mbufo, ibɔhɔke enye edi owo Abasi, emi asaŋade ke mme usuŋ esie onyuŋ enimde mme ibet esie.

15 Ntem ke Alma ekekpep ikɔt esie, ete owo kiet kiet ama mbɔhɔiduŋ esie nte idem esie, ete yak eneni okudu ke ufɔt mmɔ.

16 Ndien idahaemi, Alma ekedi akwa oku mmɔ, ke ntak emi enye ekedide andisiak ufɔk Abasi mmɔ.

17 Ndien edikem ete ke owo ndomo kiet ikibɔhɔ unen ndikwɔrɔ ikɔ mme ndikpep ibɔhɔke enye emi otode Abasi. Ke ntak oro enye osio kpukpru mme oku mmɔ enim ye kpukpru andikpep mmɔ, ndien owo ikisioho owo ndomo kiet inim ibɔhɔke mmɔ ekedi ndinen owo.

18 Ke ntak oro mmɔ ema ese ikɔt mmɔ, enyuŋ ebɔk mmɔ ye mme ŋkpɔ emi abaŋade nnen nnen ido.

19 Ndien edikem ete mmɔ etɔŋɔ ndiforo ata eti eti ke isɔŋ oro; ndien mmɔ ekot isɔŋ oro Helam.

20 Ndien edikem ete mmɔ etɔt enyuŋ eforo ata eti eti ke isɔŋ Helam; ndien mmɔ ebɔp obio, emi mmɔ ekekotde obio Helam.

21 Edi Jehovah okut ete ke ɔfɔn nditunɔ ikɔt esie; iŋ, enye odomo ime mmɔ ye mbuɔtidem mmɔ ese.

22 Edi—owo ekededi emi esinde mbuotidem esie ke enye kpa oro ke edimenere ke akpatre usen. Iŋ, ndien ntem ke ekedi ye mbon emi.

23 Koro sese, ami nyowut mbufo nte ke ema eda mmɔ esin ke ufin, ndien owo ndomo kiet ikikemeke ndinam mmɔ ebɔhɔ ibɔhɔke Jehovah Abasi mmɔ, iŋ, kpa Abasi Abraham ye Isaac ye eke Jacob.

24 Ndien edikem ete enye ama anam mmɔ ebɔhɔ, ndien enye ama owut mmɔ akwa odudu esie, ndien mme idaresit mmɔ ekedi akwa.

25 Koro sese, edikem ete ke ini mmɔ ekedude ke isɔŋ Helam, iŋ, ke obio Helam, ke ini eketibide isɔŋ ekanare, sese mbon ekɔŋ mme Lamanite ema edu ke mme adaŋa isɔŋ oro.

26 Idahaemi edikem ete nditɔ eka Alma efehe ekpɔŋ mme iŋwaŋ mmɔ, enyuŋ esobo idem mmɔ ɔtɔ kiet ke obio Helam; ndien mmɔ ema efehe ndik eti eti ke ntak nwɔrɔ nwut idem mme Lamanite.

27 Edi Alma aka iso onyuŋ ada ke ufɔt mmɔ, onyuŋ ɔnɔ mmɔ item ete yak mmɔ ekufehe ndik, edi ete yak mmɔ eti Jehovah Abasi mmɔ ndien ke enye ayanam mmɔ ebɔhɔ.

28 Ke ntak oro mmɔ etre ndifehe ndik, enyuŋ etɔŋɔ ndiseme nnɔ Jehovah ete enye anam esit emem mme Lamanite, man mmɔ esuhɔ mmɔ, ye iban mmɔ, ye nditɔ mmɔ.

29 Ndien edikem ete ke Jehovah ama anam esit emem mme Lamanite. Ndien Alma ye nditɔ eka esie eka iso enyuŋ eyak idem mmɔ esin ke mme ubɔk mmɔ; ndien mme Lamanite eda isɔŋ Helam enyene.

30 Idahaemi mbon ekɔŋ mme Lamanite, emi eketienede ikɔt edidem Limhi, ema esop ke wilderness ke ediwak usen.

31 Ndien sese, mmɔ ema ekut mme oku edidem Noah oro, ke ebiet emi mmɔ ekekotde Amulon; ndien mmɔ ema etɔŋɔ ndinyene isɔŋ Amulon enyuŋ etɔŋɔ nditibi isɔŋ.

32 Idahaemi ada ibuot mme oku oro ekedi Amulon.

33 Ndien edikem ete Amulon ama ekpe mme Lamanite ubɔk; ndien enye ŋko ama ada iban mmɔ edi, emi ekedide nditɔ iban mme Lamanite, ete edikpe nditɔ eka mmɔ ubɔk, ete mmɔ ekuwot ebe mmɔ.

34 Ndien mme Lamanite ema enyene mbɔm ebaŋa Amulon ye nditɔ eka esie, inyuŋ iwotke mmɔ, ke ntak iban mmɔ.

35 Ndien Amulon ye nditɔ eka esie ema ediana ye mme Lamanite, ndien mmɔ ekesaŋa ke wilderness eyom isɔŋ Nephi ke ini mmɔ ekekutde isɔŋ Helam, emi Alma ye nditɔ eka esie ekenyenede.

36 Ndien edikem ete mme Lamanite eŋwɔŋɔ enɔ Alma ye nditɔ eka esie, ete edieke mmɔ ediwutde mmɔ usuŋ emi edade eka isɔŋ Nephi ete ke mmɔ eyeyak mmɔ enyene uwem mmɔ ye uwɔrɔ ufin mmɔ.

37 Edi ke ini Alma ama okowut mmɔ usuŋ emi edade eka isɔŋ Nephi mme Lamanite ikimaha ndinim eŋwɔŋɔ mmɔ; edi mmɔ enim mbon ukpeme ekanare isɔŋ Helam, ekara Alma ye nditɔ eka esie.

38 Ndien nsuhɔ mmɔ eka isɔŋ Nephi; ndien ubak mmɔ enyɔŋ eka isɔŋ Helam, ndien ŋko eda ye mmɔ mme iban ye nditɔ mbon ukpeme emi ekekpɔŋde ke isɔŋ oro.

39 Ndien edidem mme Lamanite ayak Amulon ete enye edi edidem ye andikara ikɔt esie, emi ekedude ke isɔŋ Helam; edi yak enye okunyene odudu ndinam ŋkpɔ ndomo kiet emi misaŋake ye uduak edidem mme Lamanite.