1 Ndien edikem ete ke Amulon okut ufɔn ke enyin edidem mme Lamanite; ke ntak oro, edidem mme Lamanite ayak enye ye nditɔ eka esie ete emek mmɔ nte mme andikpep ikɔt esie, iŋ, enɔ kpa mbon emi ekedude ke isɔŋ Shemlon, ye ke isɔŋ Shilom, ye ke isɔŋ Amulon.

2 Koro mme Lamanite ema eda mme isɔŋ emi enyene; ke ntak oro, edidem mme Lamanite emek ndidem ke mme isɔŋ emi.

3 Ndien idahaemi enyiŋ edidem mme Lamanite ekedi Laman, ke ekotde edian enyiŋ ete esie; ndien ke ntak oro ekot enye edidem Laman. Ndien enye ekedi edidem ɔnɔ ediwak owo.

4 Ndien enye emek nditɔ eka Amulon nte mme andikpep ke kpukpru isɔŋ emi ikɔt esie ekenyenede; ndien ke ntem etɔŋɔ ndikpep usem Nephi ke ufɔt kpukpru mme Lamanite.

5 Ndien mmɔ ekedi mbon edide ufan ye kiet eken; edi mmɔ ikifiɔkke Abasi; ŋko nditɔ eka Amulon ikịkpepke mmɔ ŋkpɔ ndomo kiet ibaŋa Jehovah Abasi mmɔ, mme ibet Moses; ŋko mmɔ ikikpepke mmɔ mme ikɔ Abinadi;

6 Edi mmɔ ekpep mmɔ ete yak ewet mbuk mmɔ, ndien ete ke mmɔ ekeme ndiwet ŋwed nnɔ kiet eken.

7 Ndien ntem mme Lamanite etɔŋɔ ndikɔri ke inyene, enyuŋ etɔŋɔ ndiyam urua ye kiet eken enyuŋ ekɔri ekpon, enyuŋ etɔŋɔ ndidi mbon ŋkari ye ifiɔk, ke ifiɔk ererimbot, iŋ, ata mbon ŋkari, ekop inemesit ke kpukpru utɔ ibak ye nkan-ubɔk, ibɔhɔke edi ke ufɔt nditɔ eka mmɔ.

8 Ndien idahaemi edikem ete Amulon ɔtɔŋɔ ndinyene unen ke idem Alma ye nditɔ eka esie, onyuŋ ɔtɔŋɔ ndikɔbɔ mmɔ, onyuŋ anam ete yak nditɔ esie ekɔbɔ nditɔ mmɔ.

9 Koro Amulon ama ɔfiɔk Alma ete ke enye ekedi kiet ke otu mme oku edidem, ndien ete ke edi enye ɔkɔɔbuɔtidem ke mme ikɔ Abinadi enyuŋ ebin enye esio ke iso edidem, ndien ke ntak oro enye ama ayaresit ye enye; koro enye okodu ke idak edidem Laman, edi enye ama enyene unen ke idem mmɔ, onyuŋ ɔnɔ mmɔ utom, onyuŋ enim mme etubom mbon utom ete ese mmɔ.

10 Ndien edikem ete mme ukut mmɔ ema ekpon ata eti eti tutu mmɔ etɔŋɔ ndiseme ke ɔkpɔsɔŋ nnɔ Abasi.

11 Ndien Amulon ɔnɔ mmɔ uyo ete mmɔ etre eseme mmɔ; ndien enye obon mbon ukpeme ekpere mmɔ man eyep mmɔ, man ewot owo ekededi emi ekutde nte okotde enyiŋ Abasi.

12 Ndien Alma ye ikɔt esie ikemenekere uyo mmɔ inɔ Jehovah Abasi mmɔ, edi eŋwaŋa esit mmɔ enɔ enye; ndien enye onyuŋ ɔfiɔk mme ekikere esit mmɔ.

13 Ndien edikem ete uyo Jehovah edisim mmɔ ke mme ukut mmɔ, ete: Emenere ibuot mbufo enyuŋ edu ke eti idɔŋesit, koro ami mɔfiɔk ediomi emi mbufo enamde ye ami; ndien ami nyodiomi ye ikɔt mi nyuŋ nnam mmɔ ebɔhɔ ewɔrɔ ke ufin.

14 Ndien ami ŋko nyanam mbiomo mbufo efere emi edoride ke afara mbufo, tutu ete mbufo ikopke udobi mmɔ ke edem mbufo, kpa ke ini edude ke ufin; ndien emi ke ami ndinam man mbufo eda nte mme ntiense enɔ mi ke emi ama ebe efep, ndien man mbufo efiɔk ke akpanikɔ ete ke ami, Jehovah Abasi, mesise ikɔt mi ke ukut mmɔ.

15 Ndien idahaemi edikem ete ema enam mme mbiomo emi ekedoride Alma ye nditɔ eka esie ke idem efere; iŋ, Jehovah ɔsɔŋɔ mmɔ idem man mmɔ ekan eyɔ mme mbiomo mmɔ ke ifure, ndien mmɔ esuk ibuot ke inemesit ye ke ime enɔ kpukpru uduak Jehovah.

16 Ndien edikem ete mbuɔtidem mmɔ ama okpon eti eti ye ime mmɔ ete uyo Jehovah afiak edi etiene mmɔ, ete: Edu ke eti idɔŋesit, koro mkpɔŋ ami nyanam mbufo ebɔhɔ ewɔrɔ ke ufin.

17 Ndien enye ɔdɔhɔ Alma ete: Afo ayasaŋa ke iso mbon emi, ndien ami nyasaŋa ye afo nyuŋ nnam mbon emi ebɔhɔ ewɔrɔ ke ufin.

18 Idahaemi edikem ete Alma ye ikɔt esie ke ini okoneyo etaŋ ufene mmɔ ebok ɔtɔ kiet, ŋko ye mkpasip mmɔ; iŋ, kpa ofuri ini okoneyo ke mmɔ eketaŋ ufene mmɔ ebok ɔtɔ kiet.

19 Ndien ke usenubɔk Jehovah anam ɔkpɔsɔŋ idap omum mme Lamanite, iŋ, ndien kpukpru mme etubom utom mmɔ edu ke ɔkpɔsɔŋ idap.

20 Ndien Alma ye ikɔt esie ewɔrɔ eka wilderness; ndien ke ini mmɔ ema ekesaŋa ke ofuri usen mmɔ ewuk mme tent mmɔ ke ebedeŋ kiet, ndien mmɔ ekot ebedeŋ oro Alma, ke ntak emi enye akadade mmɔ usuŋ ɔwɔrɔ ke wilderness.

21 Iŋ, ndien ke ebedeŋ Alma ke mmɔ ekeŋwaŋa mme ekɔm mmɔ enɔ Abasi koro enye ama enyene mbɔm abaŋa mmɔ, onyuŋ anam mme mbiomo mmɔ efere, onyuŋ anam mmɔ ebɔhɔ ewɔrɔ ke ufin; koro mimɔ ikodu ke ufin, ndien owo ndomo kiet ikikemeke ndinam mmɔ ebɔhɔ ibɔhɔke ekedi Jehovah Abasi mmɔ.

22 Ndien mmɔ enɔ Abasi ekɔm, iŋ, kpukpru iren mmɔ ye kpukpru iban mmɔ ye kpukpru nditɔ mmɔ emi ekekemede nditiŋ ikɔ ema emenere uyo mmɔ ke ekɔm enɔ Abasi mmɔ.

23 Ndien idahaemi Jehovah ɔdɔhɔ Alma ete: Sɔp idem nyuŋ da idem fo ye mbon emi ewɔrɔ ke isɔŋ emi, koro mme Lamanite edemere ndien kebine mbufo; ke ntak oro ewɔrɔ ke isɔŋ emi, ndien ami nyetre mme Lamanite ke ebedeŋ emi man mmɔ ekudi aba ubine mbon emi.

24 Ndien edikem ete mmɔ ewɔrɔ ke ebedeŋ oro, enyuŋ eda isaŋ mmɔ eka wilderness.

25 Ndien ke mmɔ ema ekedu ke wilderness ke usen duopeba mmɔ ema esim isɔŋ Zarahemla; ndien edidem Mosiah ama onyuŋ ɔkɔm mmɔ ye idaresit.