1 Ndien idahaemi edidem Mosiah anam ete yak kpukpru owo esobo ɔtɔ kiet.

2 Idahaemi nditɔ Nephi ikidihe ata ediwak, mme ata ediwak mmɔ emi ekedide eke ubon Nephi, nte ekedide eke mbon Zarahemla, emi ekedide eke ubon Mulek, ye mbon emi ekedide ye enye ediduk wilderness.

3 Ndien mbon Nephi ye mbon Zarahemla ikedihe ata ediwak nte mme Lamanite; iŋ, mmɔ ikewakke ke ibio.

4 Ndien idahaemi kpukpru mbon Nephi ema esobo ɔtɔ kiet, ŋko ye kpukpru mbon Zarahemla, ndien mmɔ ekesobo ɔtɔ kiet ke eboho iba.

5 Ndien edikem ete Mosiah ama okot, onyuŋ anam ekot, mme ŋwed Zeniff enɔ ikɔt esie; iŋ, enye ama okot mme ŋwed ikɔt Zeniff, tɔŋɔ ke ini mmɔ ekekpɔŋde isɔŋ Zarahemla tutu mmɔ efiak enyɔŋ edi.

6 Ndien enye ŋko okot mbuk Alma ye nditɔ eka esie, ye kpukpru ukut mmɔ, tɔŋɔ ke ini emi mmɔ ekekpɔŋde isɔŋ Zarahemla tutu ini emi mmɔ ekefiakde enyɔŋ edi.

7 Ndien idahaemi, ke ini Mosiah ekesimde utit ŋdikot mme ŋwed emi, ikɔt esie emi ekesuhɔde ke isɔŋ ema edu ke utibe ye mkpaidem.

8 Koro mmɔ ikifiɔke se ekpekerede; koro ke ini mmɔ ekesede mbon emi ekenamde ebɔhɔ ewɔrɔ ke ufin mmɔ ema eyɔhɔ ye ata akwa idaresit.

9 Ndien ŋko, ke ini mmɔ ekekerede ebaŋa nditɔ eka mmɔ emi mme Lamanite ekewotde mmɔ ema eyɔhɔ ye mfuhɔ, tutu enyuŋ eduɔk ediwak mmɔŋeyet mfuhɔ.

10 Ndien ŋko, ke ini mmɔ ekekerede ebaŋa ndondo ima Abasi, ye odudu esie ke ndinam Alma ye nditɔ eka esie ebɔhɔ ewɔrɔ ke ubɔk mme Lamanite ye ufin, mmɔ ema emenere uyo mmɔ enyuŋ enɔ Abasi ekɔm.

11 Ndien ŋko, ke ini mmɔ ekekerede ebaŋa mme Lamanite, emi ekedide nditɔ eka mmɔ, ebaŋa idiɔk ye ndedehe edu mmɔ, mmɔ eyɔhɔ ye ubiak ye mfuhɔ ebaŋa unwam ukpɔŋ mmɔ.

12 Ndien edikem ete mbon emi ekedide nditɔ Amulon ye nditɔ eka esie, emi ekedɔde nditɔ iban mme Lamanite, ikinemke esit ye edinam mme ete mmɔ, ndien ikiyomke ekot mmɔ edian enyiŋ mme ete mmɔ aba, ke ntak oro mmɔ ema eda enɔ idem mmɔ enyiŋ Nephi, man ekot mmɔ nditɔ Nephi enyuŋ ebat mmɔ esin ke otu mbon ekekotde mme Nephi.

13 Ndien idahaemi ekebat kpukpru mbon Zarahemla esin ye mme Nephite, ndien emi ke ntak emi owo mikinɔhɔ owo ndomo kiet ukara ibɔhɔke mbon emi ekedide eke ubon Nephi.

14 Ndien idahaemi edikem ete ke ini Mosiah amakesim utit nditiŋ ikɔ nyuŋ ŋkot nnɔ mme owo, enye enyene udɔŋ ete yak Alma ŋko etiŋ ikɔ ɔnɔ mme owo.

15 Ndien Alma onyuŋ etiŋ ikɔ ɔnɔ mmɔ, ke ini mmɔ ekesobode ɔtɔ kiet ke mme akamba otu, ndien enye asaŋa oto ke otu kiet esim efen, ɔkwɔrɔ erikabare esit ye mbuɔtidem ke Jehovah ɔnɔ mme owo.

16 Ndien enye onyuŋ ɔnɔ mbon Limhi ye nditɔ eka esie item, ye kpukpru mbon emi ekenamde ebɔhɔ ewɔrɔ ke ufin, ete yak mmɔ eti ete ke ekedi Jehovah akanam mmɔ ebɔhɔ.

17 Ndien edikem ete ke ini Alma ama ekekpep mme owo ediwak ŋkpɔ, ndien onyuŋ esimde utit nditiŋ ikɔ nnɔ mmɔ, ete ke edidem Limhi ama enyene udɔŋ ete eduɔk enye mmɔŋ; ndien kpukpru ikɔt esie enyene udɔŋ ete eduɔk mmɔ mmɔŋ ŋko.

18 Ke ntak oro, Alma ama oduk mmɔŋ onyuŋ ɔduɔk mmɔ mmɔŋ; iŋ, enye ama ɔduɔk mmɔ mmɔŋ ke ukem ukem usuŋ emi enye akanamde ye nditɔ eka esie ke mme mmɔŋ Mormon; iŋ, ndien kpa nte ediwak emi enye ɔkɔduɔkde mmɔŋ ema eduk ufɔk Abasi; ndien emi ke ntak mmɔ ndinim mme ikɔ Alma ke akpanikɔ.

19 Ndien edikem ete edidem Mosiah ayak Alma ete enye asiak mme ufɔk Abasi ke ofuri isɔŋ Zarahemla; onyuŋ ɔnɔ enye odudu ete enim mme oku ye mme andikpep ke ofuri ufɔk Abasi.

20 Idahaemi ekenam emi koro ata ediwak owo ema edu tutu ete ke andikpep kiet ikikemeke ndikara kpukpru mmɔ; ndien kpukpru mmɔ ikikemeke ndikop ikɔ Abasi ke esop kiet;

21 Ke ntak oro mmɔ ema esobo idem mmɔ ke nsio nsio otu, emi ekekotde mme ufɔk Abasi; ufɔk Abasi kiet kiet enyene mme oku mmɔ ye mme andikpep mmɔ, ndien kpukpru oku ɔkwɔrɔ ikɔ asaŋa nte eketiŋde enɔ enye ke inua Alma.

22 Ndien ntem, isehe ke ediwak ufɔk Abasi ema edu kpukpru mmɔ ekedi ufɔk Abasi kiet, iŋ, kpa ufɔk Abasi Abasi; koro owo ikikwɔrɔke ŋkpɔ ndomo kiet ke ofuri ufɔk Abasi ibɔhɔke ekedi erikabare esit ye mbuɔtidem ke Abasi.

23 Ndien idahaemi ufɔk Abasi itiaba ekedu ke isɔŋ Zarahemla. Ndien edikem ete owo ekededi emi ekenyenede udɔŋ ndida enyiŋ Christ nnɔ idem mmɔ, mme Abasi, mmɔ ema eduk mme ufɔk Abasi emi;

24 Ndien ekot mmɔ ikɔt Abasi. Ndien Jehovah onyuŋ aŋwaŋa Sprit esie ɔnɔ mmɔ, ndien ediɔŋ mmɔ, ndien mmɔ eforo ke isɔŋ.