1 Ndien idahaemi edikem ete mme ukɔbɔ emi mbon unana mbuɔtidem ekekɔbɔde mbon ufɔk Abasi ama okpon eti eti tutu ufɔk Abasi etɔŋɔ ndikuni, enyuŋ etɔt enɔ mme ada usuŋ mmɔ kabaŋa ŋkpɔ emi; ndien mmɔ etɔt enɔ Alma. Ndien Alma enim ŋkpɔ emi ke iso edidem mmɔ, Mosiah. Ndien Mosiah ɔkɔk ibuot ye mme oku esie.

2 Ndien edikem ete edidem Mosiah ɔnɔ ntɔt ke ofuri ŋkanare isɔŋ ete yak mbon unana mbuɔtidem ndomo kiet ekukɔbɔ owo ndomo kiet emi esinede ke ufɔk Abasi Abasi.

3 Ndien ɔkpɔsɔŋ uyo ama odu ke kpukpru mme ufɔk Abasi ete yak mme ukɔbɔ okudu ke ufɔt mmɔ, ete yak kpukpru owo edi ukem ukem;

4 Ete yak mmɔ ekuyak ntaŋidem ye ŋkutidem etimere emem mmɔ; ete yak kpukpru owo ese mbɔhɔiduŋ esie nte idem esie, enam utom ye ubɔk mmɔ man eŋwam idem mmɔ.

5 Iŋ, ndien kpukpru mme oku ye mme andikpep ana enam utom ye ubɔk mmɔ man eŋwam idem mmɔ, ke kpukpru idaha ibɔhɔke edi ke udɔŋɔ, mme ke ɔkpɔsɔŋ unana; ndien ke ekenamde mme ŋkpɔ emi, mmɔ ema eyɔhɔ ye mfɔn Abasi.

6 Ndien ata emem afiak ɔtɔŋɔ ndidu ke isɔŋ oro; ndien mme owo etɔŋɔ ndiwak eti eti, enyuŋ etɔŋɔ ndisuana ke aŋwa ke iso isɔŋ, iŋ, ke edem edere ye ke usuk usuk, ye ke edem usiaha utin ye ke edem usop utin, ebɔp ikpɔ obio ye mme efak ke ofuri mbaŋ isɔŋ.

7 Ndien Jehovah ama edise mmɔ onyuŋ anam mmɔ eforo, ndien mmɔ ewak enyuŋ edi mbon inyene.

8 Idahaemi ema ebat nditɔ iren Mosiah esin ke mbon unana mbuɔtidem; ndien ŋko ema ebat eyen eren Alma kiet esin ke otu mmɔ, enye emi ekekotde Alma, edian ete esie; edi, enye akakabare edi ata idiɔk ye owo ndem. Ndien enye ekedi owo uwak ikɔ, onyuŋ etiŋ ediwak inem ikɔ ɔnɔ mme owo; ke ntre enye ada ediwak owo ete enam nte asaŋade ye mme ukwaŋ-ŋkpɔ esie.

9 Ndien enye akabare edi akwa ŋkpɔ iduɔ ɔnɔ ŋkɔri ufɔk Abasi Abasi; enye eyip mme esit owo; esin ediwak eneni ke otu mme owo; ɔnɔ asua Abasi ufaŋ ndinyene odudu ke idem mmɔ.

10 Ndien idahaemi edikem ete ke ini enye asaŋade osobo ufɔk Abasi Abasi, koro enye ama asaŋa ke ndibe ye nditɔ iren Mosiah oyom ndisobo ufɔk Abasi, ye ndida ikɔt Jehovah ŋwɔrɔ mkpɔŋ usuŋ, nte misaŋake ye mme ibet Abasi, mme eke edidem—

11 Ndien nte ami ŋketiŋde nnɔ mbufo, nte mmɔ ekesaŋade eŋwana ye Abasi, sese, angel Jehovah ɔbiɔŋɔde ɔnɔ mmɔ; ndien enye ɔsuhɔre etie nte obubit enyɔŋ; ndien enye etiŋ ikɔ etie nte uyo obuma, emi akaanamde isɔŋ emi mmɔ ekedade enyek;

12 Ndien mkpaidem mmɔ ama okpon eti eti, tutu mmɔ eduɔ ke isɔŋ, ndien ifiɔkke mme ikɔ emi enye eketiŋde ɔnɔ mmɔ.

13 Edi enye afiak ofiori, ete: Alma, dahada nyuŋ ŋwɔrɔ di, ntak emi afo ɔkɔbɔde ufɔk Abasi Abasi? Koro Jehovah ama ɔdɔhɔ ete: Emi edi ufɔk Abasi mi, ndien ami nyasiak enye; ndien ŋkpɔ ndomo kiet idibiatke enye, ibɔhɔke edi ndudue ikɔt mi.

14 Ndien ŋko, angel oro ɔdɔhɔ ete: Sese, Jehovah okop mme akam ikɔt esie, ŋko ye akam owo esie, Alma, emi edide ete fo; koro enye ɔbɔŋ akam ye akwa mbuɔtidem abaŋa fi ete eda fi edi ifiɔk akpanikɔ; ke ntak oro, ke ntak emi ke ami ndi ndinam fi ɔfiɔk odudu ye unen Abasi, man ebɔrɔ mme akam ikɔt esie nte asaŋade ye mbuɔtidem mmɔ.

15 Ndien idahaemi sese, ndi mbufo emekeme ndineni odudu Abasi? Koro sese, ndi uyo mi inyeke isɔŋ? Ndien ndi mbufo ŋko ikwe mi ke iso mbufo? Edɔŋ mi eto Abasi.

16 Idahaemi ami ndɔhɔ fi nte: Ka, nyuŋ ti ŋkpɔkɔbi mme ete mbufo ke isɔŋ Helam, ye ke isɔŋ Nephi; nyuŋ ti mme ikpɔ ŋkpɔ emi enye anamde ɔnɔ mmɔ; koro mmɔ ekedu ke ufin, ndien enye anam mmɔ ebɔhɔ. Ndien idahaemi ami ndɔhɔ fi, Alma, nte fi ka, ndien kuyom ndisobo ufɔk Abasi aba, man ebɔrɔ mme akam mmɔ, ndien nnam kpa emi ke idem fo edieke anade nte ebin fi eduɔk.

17 Ndien idahaemi edikem ete ke emi ekedi mme akpatre ikɔ emi angel oro eketiŋde ɔnɔ Alma, ndien enye ɔnyɔŋ.

18 Ndien idahaemi Alma ye kpukpru mbon emi ekedude ye enye efiak eduɔ ke isɔŋ, koro akwa ke mkpaidem mmɔ ekedi; koro ye enyin mmɔ mmɔ ema ekut angel Jehovah; ndien uyo esie eketie nte obuma, emi ekenyekde isɔŋ; ndien mmɔ efiɔk ete ke ŋkpɔ ndomo kiet iduhe ibɔhɔke edi odudu Abasi ekeme ndinyek isɔŋ nyuŋ nnam enye enyek nteakpabaharede iba.

19 Ndien idahaemi mkpaidem Alma ama okpon eti eti tutu enye akabare edi imum, tutu enye ikemeke ndikubɔre inua esie; iŋ, ndien idem emem enye, tutu ete enye ikemeke ndimenere mme ubɔk esie; ke ntak oro mbon emi ekedude ye enye emum enye, enyuŋ emen enye koro mikikemeke ndinyaŋa idem esie, tutu enim enye ke iso ete esie.

20 Ndien mmɔ edɔhɔ ete esie kpukpru se ikitibede inɔ mmɔ; ndien ete esie adaresit, koro enye ama ɔfiɔk ete ke ekedi odudu Abasi.

21 Ndien enye anam ete yak otu owo eboho ɔtɔ kiet man mmɔ edi ntiense ebaŋa se Jehovah anamde ɔnɔ eyen esie, ŋko ye mbon emi ekedude ye enye.

22 Ndien enye anam ete yak mme oku esobo idem mmɔ ɔtɔ kiet; ndien mmɔ etɔŋɔ utre udia, ye ndibɔŋ akam nnɔ Jehovah Abasi mmɔ man enye ɔkubɔre inua Alma, man enye etiŋ ikɔ, ndien ŋko man ndido esie ebɔ odudu—man enyin mme owo etara man ekut enyuŋ efiɔk mfɔn ye ubɔŋ Abasi.

23 Ndien edikem ete ke ini mmɔ ema eketre udia enyuŋ ebɔŋ akam ke ufaŋ usen iba ye okoneyo iba, ndido Alma ebɔ odudu mmɔ, ndien enye adahada ke enyɔŋ onyuŋ ɔtɔŋɔ nditiŋ ikɔ nnɔ mmɔ, ɔdɔhɔ mmɔ ete esɔŋ esit.

24 Ndien, enye ɔdɔhɔ, ami makabare esit kabaŋa mme idiɔk ŋkpɔ mi, ndien Jehovah afak mi; sese ami mamana nto Spirit.

25 Ndien Jehovah ɔdɔhɔ mi ete: Kukpa idem ke kpukpru owo, iŋ, iren ye iban, kpukpru idut, mme iman, mme usem ye mme owo, ana nte etɔŋɔntak emana; iŋ, emana ke Abasi, ekpuhɔre ewɔrɔ ke obukidem mmɔ ye itie iduɔ mmɔ, eka itie nnen nnen ido, emi Abasi akafakde, ekabare edi nditɔ iren ye nditɔ iban esie;

26 Ndien ke ntem mmɔ ekabare edi mbufa owo; ndien ibɔhɔke mmɔ enam emi, mmɔ ikemeke ndida obio ubɔŋ Abasi nyene.

27 Ami ndɔhɔ fi nte, ibɔhɔke edi ntre, ana nte ebin mmɔ eduɔk; ndien emi ami mɔfiɔk, koro ekpeke ebin mi eduɔk.

28 Edi, ke ini mma ŋkebe ediwak ukut, ŋkabade esit tutu mkpere mkpa, Jehovah ke mbɔm okut ete ke ɔfɔn ndiwamade mi nsio ke nsinsi utaikaŋ, ndien ami mmana ke Abasi.

29 Ema efak ukpɔŋ mi esio ke ata ndot-ndot ye mme uruk ukwaŋ-ŋkpɔ. Ami nkodu ke obube emi ekimde akan; edi idahaemi ami mokut utibe uŋwana Abasi. Ukpɔŋ mi ɔkɔyɔhɔ ye mfina nsinsi ndutuhɔ; edi ewamade mi, ndien ukpɔŋ mi ikopke ubiak aba.

30 Ami mma nsin Andifak mi, nyuŋ ŋkaŋ se mme ete nnyin eketiŋde; edi idahaemi man mmɔ eda ekut ete ke enye eyedi, ndien ete ke enye eti kpukpru ŋkpɔ emi enye okobotde, enye eye anam idem esie ayarare ɔnɔ kpukpru.

31 Iŋ, kpukpru edɔŋ eyetɔŋɔ, ndien kpukpru edeme eyeyarede ke iso esie. Iŋ, kpa ke akpatre usen, ke ini kpukpru owo edidade man enye ebiere ikpe ɔnɔ mmɔ, ke ini oro ke mmɔ ediyarede ke enye edi Abasi; ke ini oro ke mmɔ ediyarede, eke mikinyeneke Abasi ke ererimbot emi, man ubiere ikpe nsinsi ufen edi edinen ɔnɔ mmɔ; ndien mmɔ eyenyek, enyuŋ eduai, enyuŋ efiak ke ndik ke idak enyin esie emi okutde kpukpru ŋkpɔ.

32 Ndien idahaemi edikem ete Alma ɔtɔŋɔ ke ini emi ka iso ndikpep mme owo ŋkpɔ, ndien mbon emi ekedude ye Alma ke ini angel okowutde mmɔ idem, esaŋa ekanare ke ofuri obio, edɔhɔ kpukpru owo mme ŋkpɔ emi mmɔ ekekopde enyuŋ ekutde, enyuŋ ekwɔrɔ ikɔ Abasi ye ɔkpɔsɔŋ ukut, ke ntak mbon unana mbuɔtidem ekekɔbɔde mmɔ eti eti, ke ntak ediwak mmɔ ekemiade mmɔ.

33 Edi ke misehe kpukpru emi, mmɔ ema enɔ ufɔk Abasi ediwak uŋwam, esɔŋɔ mbuɔtidem mmɔ, enyuŋ enɔ mmɔ item ye anyan ime ye ɔkpɔsɔŋ ukut ete enim mme ibet Abasi.

34 Ndien owo mmɔ inaŋ ekedi nditɔ iren Mosiah; ndien enyiŋ mmɔ ekedi Ammon, ye Aaron, ye Omner, ye Himni; emi ekedi enyiŋ nditɔ iren Mosiah.

35 Ndien mmɔ esaŋa ke ofuri isɔŋ Zarahemla, ye ke ufɔt kpukpru owo emi ekedude ke idak ukara edidem Mosiah, esin ifik ndidiɔŋ kpukpru ukwaŋ-ŋkpɔ emi mmɔ ekenamde ke ufɔk Abasi, eyarade kpukpru idiɔk ŋkpɔ mmɔ, enyuŋ ekwɔrɔ kpukpru ŋkpɔ emi mmɔ ekekutde, enyuŋ enam mme prophecy ye mme ŋwed Abasi aŋwaŋa kpukpru mbon ekenyenede udɔŋ ndikop mmɔ.

36 Ndien ke ntem mmɔ ekedi mme ŋkpɔ utom ke ubɔk Abasi ke ndida ediwak ndi ifiɔk akpanikɔ, iŋ, ndiifiɔk Andifak mmɔ.

37 Ndien didie ke edifɔn inɔ mmɔ! Koro mmɔ ema ekwɔrɔ emem; mmɔ ema ekwɔrɔ eti mbuk eti; ndien mmɔ ema edɔhɔ mme owo ete ke Jehovah ada ukara.