1 Ndien edikem ete ke ini Mosiah ama akanam nte ete esie ɔnɔde enye uyo, onyuŋ ɔnɔ ntɔt ke ofuri isɔŋ, ete mme owo esobo idem mmɔ kiet ke kpukpru ofuri isɔŋ, man mmɔ edɔk eka ke temple ekekop mme ikɔ emi edidem Benjamin editiŋde inɔ mmɔ.

2 Ndien ekedi akamba ibat, ewak tutu ete mmɔ ikibatke mmɔ; koro mmɔ ema etɔt ata eti eti enyuŋ ekɔri ewak ke isɔŋ.

3 Ndien mmɔ ŋko eda akpa nditɔ ŋkpri ufene mmɔ, man mmɔ ewa uwa ye mme edifɔp uwa nte asaŋade ye mbet Moses;

4 Ndien ŋko man mmɔ enɔ Jehovah Abasi mmɔ ekɔm, emi akadade mmɔ ɔwɔrɔ ke isɔŋ Jerusalem, ye emi akanamde mmɔ ebɔhɔ ke ubɔk mme asua mmɔ, onyuŋ ekemekde ndinen owo ete edi mme andikpep mmɔ, ŋko ye edinen owo ete edi edidem mmɔ, emi ekesinde emem ke isɔŋ Zarahemla, ye emi ekekpepde mmɔ ndinim mme ibet Abasi, man mmɔ edaresit enyuŋ eyɔhɔ ye ima enɔ Abasi ye kpukpru owo.

5 Ndien edikem ete ke ini mmɔ ema ekedɔk edi ke temple, mmɔ ewuk mme tent mmɔ ekanare, owo kiet kiet etiene ufɔk emana esie, emi esinede ŋwan esie, ye nditɔ iren esie, ye nditɔ iban esie, ye nditɔ iren mmɔ, ye nditɔ iban mmɔ, ɔtɔŋɔde ke enye emi okponde akan ɔsuhɔre esim enye emi ekpride akan, kpukpru ufɔk emana edi isio ye kiet eken.

6 Ndien mmɔ ewuk mme tent mmɔ ekanare temple ekuk, kpukpru owo enyene tent esie ye usuŋ esie esede temple, man oto do mmɔ edu ke mme tent mmɔ enyuŋ ekop mme ikɔ emi edidem Benjamin editiŋde inɔ mmɔ.

7 Koro otu owo ema ewak eti eti tutu edidem Benjamin ikanke ikpep kpukpru mmɔ ke esit temple, ke ntre enye anam ebɔp tower, man oto do ikɔt esie ekeme ndikop mme ikɔ emi enye editiŋde inɔ mmɔ.

8 Ndien edikem ete enye ada ke tower ɔtɔŋɔ nditiŋ ikɔ nnɔ ikɔt esie; ndien kpukpru mmɔ ikanke ikop mme ikɔ esie ke ntak emi mme owo ekewakde eti eti; ke ntre enye anam ete ewet mme ikɔ emi enye etiŋde enyuŋ enɔ esɔk mbon emi mikikopke uyo esie, man mmɔ ŋko ebɔ mme ikɔ esie.

9 Ndien emi edi mme ikɔ emi enye eketiŋde onyuŋ anamde ete ewet, ete: Nditɔ eka mi, kpukpru mbufo emi esobode idem mbufo ɔtɔkiet, mbufo emi ekande ekop mme ikɔ mi emi ami nditiŋde nnɔ mbufo mfin emi; koro ami nnɔhɔ mbufo uyo nte edɔk edi mi edida mfefere mfefere mme ikɔ emi ami nditiŋde, edi nte yak mbufo ekpaŋutɔŋ enɔ mi, enyuŋ etat mme utɔŋ mbufo man mbufo ekop, ye esit mbufo man aŋwaŋa mbufo, ye ekikere mbufo man eyarare mme ndibe ŋkpɔ Abasi enɔ mbufo ekut.

10 Ami nnɔhɔ mbufo uyo nte edɔk edi mi man mbufo ebak mi, mme nte yak mbufo ekere ete ke ami ke idem mi ke ami makan owo eke mkpa.

11 Edi ami ntie nte mbufo, ndu ke idak kpukpru utɔ udɔŋɔ ke idem ye ke esit; edi mbon emi ekemek mi, ndien ete mi osio mi enim, ndien ubɔk Jehovah ayak mi ete ami ndi andikara ye edidem nnɔ mbon emi; ndien anana mbiet odudu esie ekpeme onyuŋ etim mi enim, ndinam utom nnɔ mbufo ye kpukpru ukeme, esit ye odudu emi Jehovah ɔnɔde mi.

12 Ami ndɔhɔ mbufo nte ke nte eyakde mi mbiat mme usen mi ke utom mbufo, tutu esim ini emi, nyuŋ nyomke gold mme silver mme utɔ inyene ekededi nto mbufo;

13 Ŋko ami nyakke ete ekɔbi mbufo ke mme obube, mme nte yak mbufo enam kiet eken ifin, mme nte mbufo ewot owo, mme ekan owo ubɔk, mme eyip inɔ, mme esin efube; mme kpa ke ami mayak nte mbufo enam utɔ ibak ndomo kiet, nyuŋ mkpep mbufo nte yak mbufo enim mme ibet Jehovah, ke kpukpru ŋkpɔ emi enye ɔnɔde mbufo uyo—

14 Ndien kpa ami, ke idem mi, manam utom ye mme ubɔk mi man ami nnam utom nnɔ mbufo, ŋko nte yak ekunɔ mbufo mme etibe ete ebiom, ndien nte ŋkpɔ ndomo kiet ukusim mbufo emi ɔsɔŋde ndinam—ndien kpukpru ŋkpɔ emi emi ami ntiŋde, mbufo ke idem mbufo edi mme ntie nse mfin emi.

15 Edi, nditɔ eka mi, ami nnamke mme ŋkpɔ emi man ami mbure mbure, ŋko ami ntiŋke mme ŋkpɔ emi man oto do ami ndori mbufo ikɔ; edi ami ndɔhɔ mbufo mme ŋkpɔ emi man mbufo efiɔk ete ke ami mekeme ndibɔrɔ ye eti esit ke iso Abasi mfin emi.

16 Sese, ami ndɔhɔ mbufo nte ke ntak emi ami ndɔhɔde mbufo nte ke ami mebiat mme usen mi ke ndinam utom nnɔ mbufo, ami nyeneke udɔŋ ndibure mbure, koro ami ŋkodu ke utom Abasi.

17 Ndien sese, ami ndɔhɔ mbufo mme ŋkpɔ emi man mbufo ekpep ifiɔk; man mbufo ekpep ete ke ini mbufo edude ke utom owo ke mbufo edu ke utom Abasi mbufo.

18 Sese, mbufo ekot mi edidem mbufo; ndien edieke ami, emi mbufo ekotde edidem mbufo, ŋwanade ndinam utom nnɔ mbufo, ndien ndi mbufo ikpiŋwanake ndinam utom nnɔ kiet eken?

19 Ndien sese ŋko, edieke ami, emi mbufo ekotde edidem mbufo, emi abiatde mme usen esie ke utom mbufo, edi ndien odu ke utom Abasi, odotde ekɔm oto mbufo, O didie ke mbufo ekpena nte ekɔm Edidem mbufo ke heaven!

20 Ami ndɔhɔ mbufo, nditɔ eka mi, nte edieke mbufo enɔde kpukpru ekɔm ye itoro emi ofuri ukpɔŋ mbufo enyenede odudu ndinyene, Abasi oro emi okobotde mbufo, onyuŋ ekpemede onyuŋ etimde mbufo enim, onyuŋ anamde ete mbufo edaresit, onyuŋ anamde ete mbufo edu ke emem ye kiet eken—

21 Ami ndɔhɔ mbufo nte edieke mbufo edinamde utom inɔ enye emi okobotde mbufo tɔŋɔ ke eritɔŋɔ, ndien ke etim mbufo enim ke usen ke usen, ke ndinɔ mbufo ibifik, man mbufo edu uwem enyuŋ esaŋa enyuŋ enam nte asaŋade ye uduak mbufo, ndien onyuŋ aŋwam mbufo ke ini ke ini—Ami ndɔhɔ, edieke mbufo edinamde ŋkpɔ inɔ enye ye kpukpru ofuri ukpɔŋ mbufo edi mbufo eyedi ifin emi minamke utom ibe adaŋa.

22 Ndien sese, kpukpru se enye oyomde oto mbufo edi ndinim ibet esie; ndien enye ɔŋwɔŋɔ ɔnɔ mbufo ete edieke mbufo edinimde ibet esie mbufo eyeforo ke isɔŋ; ndien akananam enye ikpuhɔke ikpɔŋ se enye ama eketiŋ; ke ntre, edieke mbufo enimde ibet esie enye ɔyɔdiɔŋ mbufo onyuŋ anam mbufo eforo.

23 Ndien idahaemi, ke akpa ifet, enye ama obot mbufo, onyuŋ ɔnɔ mbufo uwem mbufo, emi mbufo emekama enye isɔn.

24 Ndien ɔyɔhɔ iba, enye oyom ete mbufo enam nte enye ɔnɔde mbufo uyo; emi edieke mbufo enamde, enye ɔdiɔŋ mbufo ini kiet; ndien ke ntre enye ama ekpe mbufo. Ndien mbufo esuk ekakama enye isɔn, ndien ekama, ndien eka iso ekama, ke nsinsi nsinsi; ke ntre, ke nso ke mbufo edibure mbure?

25 Ndien idahaemi ami mbup nte, ndi mbufo emekeme nditiŋ ŋkpɔ ndomo kiet mbaŋa idem mbufo? Ami mbɔrɔ mbufo, iŋ iŋ. Mbufo ikemeke ndidɔhɔ ke mbufo emefɔn nte ntan isɔŋ; edi ekebot mbufo eto ntan isɔŋ; edi sese, edi enye enyene enye emi okobotde mbufo.

26 Ndien ami, kpa ami, emi mbufo ekotde edidem mbufo, ami mfɔnke nkan nte mbufo edide; koro ami ŋko ndi eke ntan. Ndien mbufo emekut ete ke ami mɔsɔŋ, ndien ami mmɔŋ nyak idem eke mkpa emi nnɔ eka isɔŋ esie.

27 Ke ntre, nte ŋketiŋde nnɔ mbufo nte ke manam utom nnɔ mbufo, nsaŋa ye eti esit ke iso Abasi, kpa ntre ami ke ini emi manam nte mbufo esobo idem mbufo ɔtɔkiet, man ikpe okutip mi, ndien man iyip mbufo okudoro mi ke idem, ke ini Abasi edibierede ikpe inɔ mi kabaŋa mme ŋkpɔ emi enye ɔkɔnɔde mi uyo abaŋa mbufo.

28 Ami ndɔhɔ mbufo nte ke ami nnam nte mbufo esobo idem mbufo ɔtɔ kiet man ami nsio iyip mbufo ke mme ɔfɔŋ mi mfep, ke idaha ini emi ke ini ami nyomde ndisuhɔre ŋka udi mi, man ami nsuhɔre ŋka ke emem, ndien spirit mi emi mikemeke ndikpa oduk ŋka mme ɔkwɔ ikwɔ ke enyɔŋ man ɔkwɔ mme itoro edinen Abasi.

29 Ndien ke ndidian do, ami ndɔhɔ mbufo nte ke ami nnam mbufo esobo idem mbufo ɔtɔ kiet, man ami ntiŋ nnɔ mbufo nte ke ami ŋkanke ndi andikpep mbufo aba, mme edidem mbufo;

30 Koro kpa ke ini emi, ofuri idem mi enyek ata eti eti ke ini ndomode nditiŋ ikɔ nnɔ mbufo; edi Jehovah Abasi ada ye ami, onyuŋ ayak mi ete ami ntiŋ ikɔ nnɔ mbufo, onyuŋ ɔnɔ mi uyo ete ami ndɔhɔ mbufo mfin emi, nte ke eyen mi Mosiah edi edidem ye andikara mbufo.

31 Ndien idahaemi, nditɔ eka mi, ami nyom nte mbufo enam nte mbufo ekenamde ke akpa. Nte mbufo enimde mme ibet mi, ŋko ye mme ibet ete mi, ndien eforo, ndien ekpeme mbufo man ididuɔ iduk ke ubɔk eke mme asua mbufo, kpa ntre edieke mbufo edinimde mme ibet eyen mi, mme mme ibet Abasi emi enye ediyakde inɔ mbufo, mbufo eyeforo ke isɔŋ, ndien mme asua mbufo idinyeneke odudu ke idem mbufo.

32 Edi, O ikɔt mi, ekpeme mbak eneni ididu ke ufɔt mbufo, ndien mbufo emek ndisuk ibuot nnɔ idiɔk spirit, emi ete mi Mosiah eketiŋde abaŋa.

33 Koro sese, edɔhɔ ke ɔyɔdɔdiɔk ɔnɔ enye emi emekde ndisuk ibuot nnɔ spirit oro; koro edieke enye emekde ndisuk ibuot nnɔ enye, ndien odu onyuŋ akpa ke mme idiɔk ŋkpɔ esie, ukem oro ɔŋwɔŋ ubiom ikpe ɔnɔ ukpɔŋ esie; koro enye ɔbɔ nte utip esie nsinsi ufen, sia ekeduede mbet Abasi nte misaŋake ye ifiɔk esie.

34 Ami ndɔhɔ mbufo, nte ke ndomo kiet iduhe ke ufɔt mbufo, ibɔhɔke edi mkpri nditɔ mbufo ke owo mikpepke kabaŋa mme ŋkpɔ emi, emi mifiɔkke ete ke mbufo ekama Ete mbufo ke heaven nsinsi isɔn, ke ndinɔ enye kpukpru se mbufo enyenede ye se edide; ndien ŋko ekpep ebaŋa mme ŋwed emi edɔŋɔde mme prophecy emi mme ndisana prophet eketiŋde, tutu ɔsɔhɔre esim ini ete nnyin, Lehi, ɔkɔkpɔŋde Jerusalem;

35 Ndien ŋko, kpukpru se mme ete nnyin eketiŋde tutu esim idahaemi. Ndien sese, ŋko, mmɔ eketiŋ se Jehovah ɔkɔnɔde mmɔ uyo; ke ntre, mmɔ edi edinen ye akpanikɔ.

36 Ndien idahaemi, ami ndɔhɔ mbufo, nditɔ eka mi, nte ke ini mbufo ema efiɔk enyuŋ ekpep mbufo kpukpru ŋkpɔ emi, edieke mbufo eduede enyuŋ enamde nte misaŋake ye se eketiŋde, man mbufo esio idem mbufo ekpɔŋ Spirit Jehovah, man enye ukunyene itie ke idem mbufo ndida mbufo usuŋ ke usuŋ ifiɔk man ediɔŋ mbufo, eforo, enyuŋ etim mbufo enim—

37 Ami ndɔhɔ mbufo, nte ke owo emi anamde emi, kpa oro odu ke aŋwa-aŋwa nsɔŋ ibuot ye Abasi; ke ntre enye emek ndisuk ibuot nnɔ idiɔk spirit, onyuŋ akabare edi asua ye kpukpru nnen nnen ido; ke ntre, Jehovah inyeneke itie ke enye, koro enye miduŋke ke mme ndedehe temple.

38 Ke ntre edieke owo oro mikabakere esit, ndien odu onyuŋ akpa nte asua Abasi, se edisana nnen nnen ido oyomde eyedemere ukpɔŋ esie emi mikemeke ndikpa kabaŋa ɔkpɔsɔŋ ifiɔk ndudue esie, emi anamde enye efehe iso Jehovah, onyuŋ ɔyɔhɔ esit esie ye ndudue, ye ubiak, ye ndutuhɔ, emi etiede nte ikaŋ emi midinimeke, emi edeme esie ɔdɔkde ke nsinsi ye ke nsinsi.

39 Ndien idahaemi ami ndɔhɔ mbufo, nte ke mbɔm inyeneke odudu ke idem owo oro; ke ntre utit obot esie edi ndiyɔ ndutuhɔ emi minyeneke utit.

40 O, kpukpru mbufo ŋkani iren, ŋko ye mbufo mkparawa, ye mbufo mkpri nditɔ emi ekemede ndifiɔk mme ikɔ mi, koro ami ntiŋ ikɔ iŋwaŋ-iŋwaŋ ye mbufo man aŋwaŋa mbufo, ami mbeŋe nte mbufo edemere ebaŋa nditi idiɔk itie mbon emi eduɔde eduk ke ndudue.

41 Ndien ke ndidian do, ami nyene udɔŋ nte mbufo ekere ebaŋa itie edidiɔŋ ye eke inemesit eke mbon emi enimde mme ibet Abasi. Koro sese, ediɔŋ mmɔ ke kpukpru ŋkpɔ, eke obukidem ye eke spirit mbiba; ndien edieke mmɔ ebuɔtde idem tutu esim utit ebɔ mmɔ esin ke heaven, man otodo mmɔ eduŋ ye Abasi ke edu emi inemesit minyeneke utit. O eti, eti ete ke mme ŋkpɔ emi edi akpanikɔ; koro Jehovah Abasi etiŋ enye.