1 Ndien ke ndidian do nditɔ eka mi, ami nyoyom mbufo ekpaŋutɔŋ, koro ami menyene ekpri ikɔ efen nditiŋ nnɔ mbufo; koro sese, ami menyene mme ŋkpɔ nditiŋ nnɔ mbufo kabaŋa se ididide.

2 Ndien mme ŋkpɔ emi ami nditiŋde nnɔ mbufo edi angel Abasi akanam mi mfiɔk mmɔ. Ndien enye ɔdɔhɔ mi ete: Demere; ndien ami ndemere, ndien sese enye ada mi ke iso.

3 Ndien enye ɔdɔhɔ mi ete: Demere, nyuŋ kop mme ikɔ emi ami nditiŋde nnɔ fi; koro sese, ami ndi nditiŋ nnɔ fi eti mbuk akwa idaresit.

4 Koro Jehovah ama okop mme akam fo, onyuŋ ebiere ikpe ɔnɔ fi kabaŋa nnen nnen ido fo, ndien ɔdɔŋ mi ete ntiŋ nnɔ fi man afo adaresit; ŋko man afo etiŋ ɔnɔ ikɔt fo, man mmɔ ŋko ekpeyɔhɔ ye idaresit.

5 Koro sese, ini kedi, ndien idibihike, emi ye odudu, Jehovah Andikara Kpukpru Ŋkpɔ emi akarade, emi okodude, onyuŋ odu tɔŋɔ ke kpukpru nsinsi tutu kpukpru nsinsi, ɔyɔsuhɔre ke heaven edi ke ufɔt nditɔ owo, ndien oyoduŋ ke ataya ntan, ndien ayaka ke ufɔt mme owo, anam ikpɔ utibe ŋkpɔ, nte ndikɔk owo udɔŋɔ, ndinam akpa-mkpa eset, ndinam mbuŋɔ asaŋa isaŋ, nnan okut usuŋ, ndien inan okop ŋkpɔ, onyuŋ ɔkɔk kpukpru utɔ udɔŋɔ.

6 Ndien enye eyebin mme andidiɔk osio, mme mme idiɔk spirit emi eduŋde ke esit nditɔ owo.

7 Ndien sese, enye ɔyɔyɔ mme idomo, ye ubiak ke idem, biɔŋ, ye mmem idem, tutu akan se owo ekemede ndiyɔ, ibɔhɔke edi ke mkpa; koro sese, iyip ɔwɔrɔ ke kpukpru ndudu ke idem, ndutuhɔ esie oyokpon eti eti ke ntak ibak ye mme mbubiam ikɔt esie.

8 Ndien edikot enye Jesus Christ, Eyen Abasi, Ete enyɔŋ ye isɔŋ, Andibot kpukpru ŋkpɔ tɔŋɔ ke eritɔŋɔ; ndien edikot eka esie Mary.

9 Ndien sese, enye ekedi etiene ekesie, man erinyaŋa ekpekeme ndidi ntiene nditɔ owo oto ke mbuɔtidem ke enyiŋ esie; ndien ke ini kpukpru emi ama ebe mmɔ eyeda enye nte owo, enyuŋ edɔhɔ ete ke enye enyene demon, ndien emia enye, enyuŋ ewot enye ke cross.

10 Ndien enye eyeset ke ɔyɔhɔ usen ita ke mkpa; ndien sese, enye ada ndibiere ikpe nnɔ ererimbot; ndien sese, enam kpukpru ŋkpɔ emi man nnen nnen ubiere ikpe ekeme ndidi nnɔ nditɔ owo.

11 Koro sese, ndien ŋko iyip esie afak mme idiɔk ŋkpɔ mbon emi eduɔde ke ntak ndudue Adam, emi ekekpade ke ini mifiɔkke uduak Abasi kabaŋa mmɔ, mme emi ekenamde idiɔk ŋkpɔ ke unana ifiɔk.

12 Edi ɔyɔdɔdiɔk, ɔyɔdɔdiɔk ɔnɔ enye emi ɔfiɔkde ete ke enye ɔsɔŋ ibuot ye Abasi! Koro erinyaŋa inyeneke utɔ emi ibɔhɔke oto erikabare esit ye mbuɔtidem ke Jehovah Jesus Christ.

13 Ndien Jehovah Abasi ɔdɔŋ mme ndisana prophet esie ke ufɔt nditɔ owo, editiŋ mme ŋkpɔ emi enɔ kpukpru iman, idut, ye usem, man otodo owo ekededi emi edinimde ke Christ eyedi, ukem oro edibɔ erifen ke mme idiɔk ŋkpɔ mmɔ, enyuŋ adaresit ye ata akamba idaresit, kpa nte ke enye edi kaŋa ke ufɔt mmɔ.

14 Edi Jehovah Abasi ama okut ete ke ikɔt esie ekedi mme ɔsɔŋ-ibuot owo, ndien enye enim mbet ɔnɔ mmɔ, kpa ibet Moses.

15 Ndien ediwak idiɔŋɔ, ye mme utibe ŋkpɔ, ye mme utɔ, ye mme mbiet ke enye okowut mmɔ, kabaŋa edidi esie; ndien ŋko mme ndisana prophet ema etiŋ ikɔ enɔ mmɔ kabaŋa edidi esie; ndien edi mmɔ esɔŋ esit mmɔ, inyuŋ ifiɔkke ite ke ibet Moses inyeneke ufɔn ibɔhɔke oto ke usio-isop iyip esie.

16 Ndien edieke ekpedide ete ke mkpri nditɔ ekeme ndinam idiɔk ŋkpɔ owo ikpikanke inyaŋa mmɔ; edi ami ndɔhɔ mbufo nte ke ediɔŋ mmɔ; koro sese, kpa nte ke Adam, mme nte obot edide, mmɔ eduɔ, kpa ntre iyip Christ afak mme idiɔk ŋkpɔ mmɔ.

17 Ndien ke ndidian do, ami ndɔhɔ mbufo, nte ke enyiŋ efen ididuhe emi enɔde mme usuŋ efen mme ŋkpɔ efen emi erinyaŋa editode itiene nditɔ owo, ibɔhɔke oto ye ke enyiŋ Christ, Jehovah Andikara Kpukpru Ŋkpɔ.

18 Koro sese enye ebiere ikpe, ndien ubiere ikpe esie edi edinen; ndien nsek-eyen itakke emi akakpade ke nsek; edi mme owo eŋwɔŋ ubiom ikpe enɔ ukpɔŋ mmɔ ibɔhɔke mmɔ esuhɔre-idem mmɔ enyuŋ ekabare etie nte mkpri nditɔ, enyuŋ ebuɔtidem ete ke erinyaŋa ama odu, onyuŋ odu, ndien ke eyedi, oto ye ke iyip usio-isop Christ, Jehovah Andikara Kpukpru Ŋkpɔ.

19 Koro owo nte obot edide edi asua ye Abasi, ndien amadi tɔŋɔ ke iduɔ Adam, ndien eyedi, ke nsinsi ye ke nsinsi, ibɔhɔke enye osuk ibuot ɔnɔ ntuk Edisana Spirit, onyuŋ osio owo nte obot edide enim onyuŋ akabare edi edisana owo oto ke usio-isop Christ Jehovah, onyuŋ akabare etie nte eyen-ɔwɔŋ, osuk-ibuot, suŋ-suŋ, ɔsuhɔre-idem, enyene ime, ɔyɔhɔ ye ima, enyime ndisuk ibuot nnɔ kpukpru ŋkpɔ emi Jehovah okutde ete ke ɔfɔn ndinam enye, kpa nte eyen-ɔwɔŋ osukde ibuot ɔnɔ ete esie.

20 Ndien ke ndidian do, ami ndɔhɔ mbufo, nte ke ini eyedi emi ifiɔk Andinyaŋa edisuanade ke ofuri idut, iman, usem, ye mme owo.

21 Ndien sese, ke ini oro edide, iduhe owo ndomo kiet emi ikpe miditipke ke iso Abasi, ibɔhɔke mkpri nditɔ, oto ke ŋkabare esit ye mbuɔtidem ke enyiŋ Ɔbɔŋ Abasi Andikara Kpukpru Ŋkpɔ.

22 Ndien kpa ke ini emi, ke ini afo ama ekekpep ikɔt fo mme ŋkpɔ emi Jehovah Abasi fo ɔkɔnɔde fi uyo, kpa ke ini oro ke ikpe miditipke mmɔ aba ke iso Abasi, nte asaŋade ikpɔŋ ye mme ikɔ emi ami ntiŋde nnɔ fi.

23 Ndien idahaemi ami metiŋ mme ikɔ emi Jehovah Abasi ɔkɔnɔde mi uyo.

24 Ndien ntem ke Jehovah ɔdɔhɔ: Mmɔ eyeda nte ikɔ ntiense emi aŋwaŋade ebaŋa mbon emi, ke usen ubiere ikpe; ke ntre eyebiere ikpe enɔ mmɔ, owo kiet kiet nte utom esie edide, mme mmɔ efɔn, mme mme mmɔ edi idiɔk.

25 Ndien edieke mmɔ edide idiɔk esin mmɔ ke idiɔk ekikere kabaŋa ndudue ye mme mbubiam mmɔ, emi anamde mmɔ efehe ekpɔŋ iso Jehovah eduk idaha ukut ye anana utit ndutuhɔ, emi mmɔ mikemeke ndifiak edem, ke ntak oro mmɔ eŋwɔŋ ubiom ikpe enɔ ukpɔŋ mmɔ.

26 Ke ntak oro, mmɔ eŋwɔŋ eto cup iyaresit Abasi, emi nnen nnen ido mikanke ikaŋ inɔ mmɔ aba ikan nte enye akpakaŋde ete Adam ɔduɔ ke ntak emi enye akadiade mfri emi ekekpande ete ekudia; ke ntre, mbɔm ikpinyeneke odudu inɔ mmɔ aba ke nsinsi.

27 Ndien ndutuhɔ mmɔ etie nte ŋkpɔdiɔhɔ ikan ye brimstone, emi mme edeme ikaŋ esie owo mikemeke ndinime, ye emi nsuŋikaŋ esie ɔdɔkde ke nsinsi ye ke nsinsi. Ntem ke Jehovah ɔkɔnɔ mi uyo. Amen.