1 Ndien idahaemi, edikem ete ke ini edidem Benjamin ama eketre nditiŋ mme ikɔ emi angel Jehovah ɔkɔnɔde enye, ete enye emenere enyin esie ese otu owo, ndien sese mmɔ ema eduɔ ke isɔŋ, koro uteŋe Jehovah ama esim mmɔ.

2 Ndien mmɔ ema ekut idem mmɔ ke idaha obukidem mmɔ, kpa nte ke ɔsuhɔre akan ntan isɔŋ. Ndien kpukpru mmɔ efiori ke ɔkpɔsɔŋ uyo kiet, ete: O tua mbɔm, nyuŋ da iyip usio-isop Christ man nnyin ikeme ndibɔ erifen ke mme idiɔk ŋkpɔ nnyin, ndien enam esit nnyin esana; koro nnyin ibuɔtde idem ke Jesus Christ, Eyen Abasi, emi okobotde enyɔŋ ye isɔŋ, ye kpukpru ŋkpɔ; emi edisuhɔre idi ke ufɔt nditɔ owo.

3 Ndien edikem ete ke ini mmɔ ema eketiŋ mme ikɔ emi Spirit Jehovah odoro mmɔ ke idem, ndien mmɔ eyɔhɔ ye idaresit, sia ekebɔde erifen ebaŋa mme idiɔk ŋkpɔ mmɔ, ndien ema enyene emem ke esit, ke ntak akamba mbuɔtidem emi mmɔ ekenyenede ke Jesus Christ emi edidide, nte asaŋade ye mme ikɔ emi edidem Benjamin eketiŋde ɔnɔ mmɔ.

4 Ndien edidem Benjamin afiak ɔkubɔde inua esie onyuŋ ɔtɔŋɔ nditiŋ nnɔ mmɔ, ete: Mme ufan mi ye nditɔ eka mi, iman mi ye ikɔt mi, ami nyefiak nyom mbufo ekpaŋutɔŋ, man mbufo ekop enyuŋ efiɔk mme nsuhɔ ikɔ mi emi ami nditiŋde nnɔ mbufo.

5 Koro sese, edieke ifiɔk ima Abasi ke ini emi edemere mbufo abaŋa ikpikpu idaha mbufo, ye unana edidot ye itie iduɔ mbufo—

6 Ami ndɔhɔ mbufo, edieke mbufo edisimde ifiɔk ima Abasi, ye anana mbiet odudu esie, ye ifiɔk esie, ye ime esie, ye anyan ime esie kabaŋa nditɔ owo; ŋko ye, usio-isop emi ekenimde tɔŋɔ ke eritɔŋɔ ererimbot, man otodo erinyaŋa edi ɔnɔ enye emi edisinde mbuɔtidem esie ke Jehovah, onyuŋ esin ifik ke ndinim mme ibet esie, onyuŋ aka iso ke mbuɔtidem tutu utit uwem esie, ami ndɔhɔ uwem idem eke mkpa—

7 Ami ndɔhɔ, nte ke emi edi owo emi ɔbɔde erinyaŋa, oto ke usio-isop emi ekenimde tɔŋɔ ke eritɔŋɔ ererimbot enɔ kpukpru owo, emi akananam odude tɔŋɔ ke iduɔ Adam, mme emi edude, mme emi edidude, tutu esim utit ererimbot.

8 Ndien emi edi usuŋ emi erinyaŋa editode. Ndien baba erinyaŋa efen iduhe ibɔhɔke edi emi emi eketiŋde ebaŋa; ndien mme ŋkpɔ efen iduhe emi owo ekemede ndibɔ erinyaŋa ibɔhɔke mme ŋkpɔ emi ami ntiŋde nnɔ mbufo.

9 Ebuɔtidem ke Abasi; ebuɔtidem ke enye odu, ndien ete ke enye okobot kpukpru ŋkpɔ, ke enyɔŋ ye isɔŋ; ebuɔtidem ete ke enye enyene kpukpru ifiɔk, ye kpukpru odudu, ke enyɔŋ ye isɔŋ; ebuɔtidem ete ke owo ikemeke ndifiɔk kpukpru ŋkpɔ emi Jehovah ekemede ndifiɔk.

10 Ndien ŋko, ebuɔtidem ete ke ana nte mbufo ekabare esit ebaŋa mme idiɔk ŋkpɔ mbufo enyuŋ ekpɔŋ mmɔ, enyuŋ esuhɔre-idem mbufo ke iso Abasi; enyuŋ ebeŋe ke esit akpanikɔ ete enye efen ɔnɔ mbufo; ndien idahaemi, edieke mbufo ebuɔtde idem ke kpukpru ŋkpɔ emi ekut ete ke mbufo emenam mmɔ.

11 Ndien ŋko ami ndɔhɔ mbufo nte ŋkɔdɔhɔde ke akpa, kpa nte mbufo edisimde ifiɔk ubɔŋ Abasi, mme edieke mbufo efiɔkde ima esie enyuŋ etabide ima esie, enyuŋ ebɔ erifen ebaŋa mme idiɔk ŋkpɔ mbufo, emi anamde ata akamba idaraesit ntem ke ukpɔŋ mbufo, kpa ntre ami nyom nte mbufo eti, enyuŋ eti kpukpru ini, odudu Abasi, ye ikpikpu mbufo, ye ima ye anyan ime esie kabaŋa mbufo, mme owo emi midotke, enyuŋ esuhɔre idem mbufo kpa ke ntɔtuŋɔ nsuhɔre-idem, ekot enyiŋ Jehovah ke usen ke usen, enyuŋ esɔŋɔ eda ke mbuɔtidem ebaŋa enye emi edidide, emi inua angel eketiŋde.

12 Ndien sese, ami ndɔhɔ mbufo nte ke edieke mbufo enamde emi ke mbufo eyedaresit kpukpru ini, enyuŋ eyɔhɔ ye ima Abasi, enyuŋ enyene erifen kpukpru ini ebaŋa mme idiɔk ŋkpɔ mbufo; ndien mbufo eyekɔri ke ifiɔk enye emi okobotde mbufo, mme ke ifiɔk enye emi emi edide edinen ye akpanikɔ.

13 Ndien mbufo idinyeneke esit ndinɔ kiet eken unan, edi ndiduŋ ke emem, enyuŋ enam enɔ owo kiet kiet nte asaŋade ye se enye odotde.

14 Ndien mbufo idiyakke nditɔ mbufo ete mmɔ esaŋa biɔŋ, mme iferi; ŋko mbufo idiyakke ete mmɔ edue mme mbet Abasi, enyuŋ eŋwana enyuŋ etɔhɔ ye kiet eken, enyuŋ enam utom enɔ satan, emi edide etubom idiɔk ŋkpɔ, mme emi edide idiɔk spirit emi mme ete nnyin eketiŋde ebaŋa, enye emi edide asua ɔnɔ kpukpru nnen nnen ido.

15 Edi mbufo eyekpep mmɔ ndisaŋa ke mme usuŋ akpanikɔ ye uteŋe; mbufo eyekpep mmɔ ndima kiet eken, ye ndinam ŋkpɔ nnɔ kiet eken.

16 Ndien ŋko, mbufo ke idem mbufo eyenwam mbon emi eyomde unwam mbufo; mbufo eyenɔ enye emi odude ke unana inyene mbufo; ndien mbufo idiyakke ete ebeŋe-ebeŋe ekpe mbufo ubɔk ke ikpikpu, ndien ebin enye esio ete atak.

17 Ekeme ndidi ke mbufo eyedɔhɔ ete: Owo emi ada ukut esie ɔnɔ idem esie; ke ntre ami nyemum ubɔk mi, ndien ndinɔhɔ enye udia mi, ŋko nnɔhɔ enye inyene mi man enye idibɔ ndutuhɔ, koro mme ufen esie edi edinen—

18 Edi ami ndɔhɔ mbufo, O owo, owo ekededi emi anamde emi ukem oro enyene akamba ntak ndikabare esit; ndien ibɔhɔke enye akabare esit abaŋa se enye anamde enye ayatak ke nsinsi, ndien inyeneke itie ke obio ubɔŋ Abasi.

19 Koro sese, ndi kpukpru nnyin idihe mme ebeŋe-ebeŋe? Ndi kpukpru nnyin idorike enyin ke Enye oro, kpa Abasi, ibaŋa kpukpru inyene emi nnyin inyenede, ibaŋa udia ye edisine-ŋkpɔ, ye gold, ye silver, ye kpukpru inyene emi nnyin inyenede ke utɔ ke utɔ?

20 Ndien sese, kpa ke ini emi, mbufo ke esikot enyiŋ esie, enyuŋ ebeŋe erifen enɔ mme idiɔk ŋkpɔ mbufo. Ndien ndi enye ayak ete mbufo ebeŋe ke ikpikpu? Iŋ iŋ, enye aŋwaŋa spirit esie ɔnɔ mbufo, onyuŋ anam ete esit mbufo eyɔhɔ ye idaresit, onyuŋ anam ete inua mbufo ɔkubɔ man mbufo ekukan ikɔ utiŋ, ata akamba ekedi idaresit mbufo.

21 Ndien idahaemi, edieke Abasi, emi okobotde mbufo, emi mbufo eberede edem ebaŋa uwem mbufo ye kpukpru se mbufo enyenede enyuŋ edide, ɔnɔde mbufo ŋkpɔ ekededi emi mbufo ebeŋede emi edide nnen nnen, ke mbuɔtidem, enim ete ke mbufo eyebɔ, O ndien, didie ke akpana mbufo enɔ kiet eken inyene emi mbufo enyenede.

22 Ndien edieke mbufo ebierede ikpe enɔ owo emi ekpede mbufo ubɔk oyom inyene mbufo man enye iditak, enyuŋ etip enye ikpe, didie ke ubiom ikpe mbufo edidi edinen ikan ke emumde inyene mbufo ekama, emi midihe mbufo enyene edi edi Abasi enyene, emi enyenede uwem mbufo ŋko; ndien edi mbufo ikpehe enye ubɔk, inyuŋ ikabakere esit ibaŋa ŋkpɔ emi mbufo enamde.

23 Ami ndɔhɔ mbufo, ke ɔyɔdɔdiɔk ɔnɔ owo oro, koro inyene esie ayatak ye enye; ndien idahaemi, ami ntiŋ mme ŋkpɔ emi nnɔ mbon emi enyenede ŋkpɔ kabaŋa mme ŋkpɔ ererimbot emi.

24 Ndien ŋko, ami ndɔhɔ mme ubuene, mbufo emi minyeneke ndien edi ke emenyene se ikemde, man mbufo edu uwem ke usen ke usen; ami ndɔhɔ kpukpru mbufo emi ekaŋde ebeŋe-ebeŋe, ke ntak emi mbufo minyeneke; ami moyom nte mbufo edɔhɔ ke esit mbufo ete: Ami nnɔhɔ koro menyeneke, edi edieke mkpenyenede ami mkpɔnɔ.

25 Ndien idahaemi, edieke mbufo etiŋde emi ke esit mbufo mbufo iduehe, midihe ntre ikpe etip mbufo; ndien ubiom ikpe mbufo edi edinen koro mbufo esinde esit ke ŋkpɔ emi mbufo mibɔhɔ.

26 Ndien idahaemi, ke ntak mme ŋkpɔ emi emi ami ntiŋde nnɔ mbufo—oro edi, ke ntak ndinyene erifen mbaŋa mme idiɔk ŋkpɔ mbufo ke usen ke usen, man mbufo ekudue ke iso Abasi—ami nyom nte mbufo enɔ ubuene inyene mbufo, kpukpru owo nte asaŋade ye se enye enyenede, nte ndinɔ owo ɔbiɔŋ udia, ndisin iferi ɔfɔŋ, ndise ɔdɔŋɔ-udɔŋɔ nyuŋ nnam ŋkpɔ ndinwam mmɔ, ke spirit ye ke obukidem, nte asaŋade ye se mmɔ eyomde.

27 Ndien ekut ete ke enam kpukpru ŋkpɔ emi ke ifiɔk ye ke nnen nnen; koro ifɔnke ete ke ana owo efehe itɔk ɔsɔp akan nte enye enyenede ukeme. Ndien ŋko, ɔfɔn ete enye esin ifik, man otodo enye ɔbɔ utip; ke ntre, ana enam kpukpru ŋkpɔ ke nnen nnen.

28 Ndien ami nyom nte mbufo eti, ete owo ekededi ke ufɔt mbufo emi ɔbuɔtde oto mbɔhiduŋ esie ana ɔkɔnɔ ŋkpɔ emi enye kɔbuɔtde, nte enye ekenyimede, mme edieke midihe ntre afo anam idiɔk ŋkpɔ; ndien ekeme ndidi ke afo ayanam mbɔhiduŋ fo anam idiɔk ŋkpɔ ŋko.

29 Ndien ke akpatre, ami ŋkemeke ndidɔhɔ mbufo kpukpru ŋkpɔ emi mbufo ekemede ndida nnam idiɔk ŋkpɔ; koro ediwak usuŋ ye ŋkpɔ edu, ewak tutu ete ami ŋkemeke ndibat mmɔ.

30 Edi ediwak emi ke ami ŋkeme ndidɔhɔ mbufo, nte ke edieke mbufo mikpemeke idem mbufo, ye ekikere mbufo, ye ikɔ mbufo, ye edinam mbufo, enyuŋ enim mme ibet Abasi, enyuŋ eka iso ke mbuɔtidem kabaŋa se mbufo ekopde ebaŋa edidi Jehovah nnyin, tutu esim utit uwem mbufo, ana mbufo etak. Ndien idahaemi, O owo, ti, kunyuŋ utak.