1 Ndien idahaemi, edikem ete ke ini edidem Benjamin ama eketiŋ ikɔ ntem ɔnɔ ikɔt esie, enye ɔdɔŋ etop ke ufɔt mmɔ, enyene udɔŋ ndifiɔk nto ikɔt esie mme mmɔ ebuɔtidem ke mme ikɔ emi enye eketiŋde ɔnɔ mmɔ.

2 Ndien kpukpru mmɔ efiori ye uyo kiet, ete: Iŋ, nnyin imibuɔt idem ke kpukpru ikɔ emi afo eketiŋde ɔnɔ nnyin; ndien ŋko, nnyin imifiɔk ke mmɔ edi ntre ye akpanikɔ, ke ntak Spirit Jehovah Andikara Kpukpru Ŋkpɔ, emi anamde akamba ukpuhɔre ke nnyin, mme ke esit nnyin, ndien nnyin inyeneke udɔŋ aba ndinam idiɔk, edi ndinam eti kpukpru ini.

3 Ndien nnyin, ke idem nnyin, ŋko, oto ke anana utit ima Abasi, ye mme eriyarare Spirit esie, ikut akamba ŋkpɔ emi anade nte edi; ndien edieke ɔkpɔfɔnde, nnyin ikpitiŋ nte prophet ibaŋa kpukpru ŋkpɔ.

4 Ndien edi mbuɔtidem emi nnyin ikinyenede ke mme ŋkpɔ emi edidem nnyin eketiŋde ɔnɔ nnyin ada akamba ifiɔk emi ɔnɔ nnyin, ke ntre nnyin idaresit ye ata akamba idaresit.

5 Ndien nnyin iminyime ndiduk ke ediomi ye Abasi nnyin ke ndinam uduak esie, ye ke ndisuk ibuot nnɔ mme ibet esie ke kpukpru ŋkpɔ emi enye edinɔde nnyin uyo, ke kpukpru nsuhɔ usen nnyin, man nnyin ikuda unɔ idem nnyin anana utit ndutuhɔ, nte angel eketiŋde, man nnyin ikuŋwɔŋ uto cup iyaresit Abasi.

6 Ndien idahaemi, emi edi mme ikɔ emi edidem Benjamin okoyomde oto mmɔ; ndien ke ntre enye ɔdɔhɔ mmɔ ete: Mbufo emetiŋ mme ikɔ emi ami nkoyomde; ndien ediomi emi mbufo ekenamde edi nnen nnen ediomi.

7 Ndien idahaemi, ke ntak ediomi emi mbufo ekenamde eyekot mbufo nditɔ Christ, nditɔ iren esie, ye nditɔ iban esie; koro sese, mfin emi enye obon mbufo ke spirit; koro mbufo edɔhɔ ete ke esit mbufo ɔkpuhɔre oto ke mbuɔtidem ke enyiŋ esie; ke ntre, mbufo emana eto enye enyuŋ ekabare nditɔ iren esie ye nditɔ iban esie.

8 Ndien ke idak ibuot esie ke enam mbufo ebɔhɔ, ndien ibuot efen iduhe emi ekemede ndinam mbufo ebɔhɔ. Enyiŋ efen iduhe emi enɔde emi erinyaŋa otode; ke ntre, ami nyom nte mbufo eda enɔ idem mbufo enyiŋ Christ, kpukpru mbufo emi ekedukde ediomi ye Abasi ete ke mbufo eyesuk ibuot tutu utit uwem mbufo.

9 Ndien eyedikem ete owo ekededi emi anamde emi oyodu ke ubɔk nnasia Abasi, koro enye ɔyɔfiɔk enyiŋ emi ekotde enye; koro eyekot enye ke enyiŋ Christ.

10 Ndien idahaemi eyedikem, ete owo ekededi emi midaha inɔ idem esie enyiŋ Christ ana ekot enye ke enyiŋ efen; ke ntre, enye okut idem esie ke ubɔk ufien Abasi.

11 Ndien ami nyom nte mbufo eti ŋko, ete ke emi edi enyiŋ emi ami ŋkɔdɔhɔde ke ami nyɔnɔ mbufo nte tutu amama owo isɔhike isio, ibɔhɔke oto ke ndudue; ke ntre, ekpeme man mbufo idudue, man esɔhi enyiŋ emi esio ke esit mbufo.

12 Ami ndɔhɔ mbufo, ke ami nyom nte mbufo eti ndinim kpukpru ini ke esit mbufo enyiŋ emi ewetde, man ekukut mbufo ke ubɔk ufien Abasi, edi ete mbufo ekop enyuŋ efiɔk uyo emi edikotde mbufo, ko ye, enyiŋ emi enye edikotde mbufo.

13 Koro didie ke owo ɔfiɔk ete-ufɔk emi enye minamke ŋkpɔ inɔ, ye emi edide esen-owo ɔnɔ enye, onyuŋ edi nsan-nsan ɔnɔ mme ekikere ye mme uduak esit esie?

14 Ndien ŋko, ndi owo emen ass emi edide eke mbɔhiduŋ esie, onyuŋ ekpeme enye? Ami ndɔhɔ mbufo nte, Iŋ iŋ; enye idiyakke ete enye adia ŋkpɔ ye ufene esie, edi ebin enye osio, onyuŋ ebin enye ɔduɔk. Ami ndɔhɔ mbufo, nte kpa ntem ke edidi ke ufɔt mbufo edieke mbufo mifiɔkke enyiŋ emi ekotde mbufo.

15 Ke ntre, ami nyom nte mbufo esɔŋɔ eda ekunyuŋ usik, eyɔhɔ ye nti utom kpukpru ini, man Christ, Ɔbɔŋ Abasi Andikara Kpukpru Ŋkpɔ, adian mbufo nte esie, man eda mbufo edi heaven, man mbufo enyene nsinsi erinyaŋa ye nsinsi uwem, eto ifiɔk, ye odudu, ye nnen nnen, ye mbɔm esie emi okobotde kpukpru ŋkpɔ, ke enyɔŋ ye isɔŋ, emi edide Abasi andikpon nkan kpukpru ŋkpɔ. Amen.