1 Ndien idahaemi, edikem ete ke ini edidem Mosiah ama ekenyene emem ke ufaŋ isua ita, enye ama enyene udɔŋ ndifiɔk mbaŋa mbon emi ekedɔkde eka ndiduŋ ke isɔŋ Lehi-Nephi, mme ke obio Lehi-Nephi; koro ikɔt esie ikikopke ŋkpɔ ndomo kiet ito mmɔ tɔŋɔ ke ini emi mmɔ ekekpɔŋde isɔŋ Zarahemla; ke ntre, mmɔ ema efina enye ye mme mbume mmɔ.

2 Ndien edikem ete edidem Mosiah ayak ete mkpɔsɔŋ owo mmɔ efutekiet edɔk eka isɔŋ Lehi-Nephi, ndinam nduŋɔre mbaŋa nditɔ eka mmɔ.

3 Ndien edikem ete ke mkpɔŋ mmɔ etɔŋɔ ndidɔk ŋka, enyene ye mmɔ owo kiet Ammon, enye ekedi enyene odudu ye ɔkpɔsɔŋ owo, ye eke ubon Zarahemla; ndien enye ŋko ekedi ada usuŋ mmɔ.

4 Ndien idahaemi, mmɔ ikifiɔkke usuŋ emi mmɔ anade nte esaŋa ke wilderness man edɔk eka isɔŋ Lehi-Nephi; ke ntre mmɔ eyo ke ediwak usen ke ikɔt, kpa usen aba ke mmɔ ekeyo.

5 Ndien ke ini mmɔ ema ekeyo ke usen aba mmɔ edisim obot kiet, emi edide ke edem edere isɔŋ Shilom, ndien do ke mmɔ ekewuk mme tent mmɔ.

6 Ndien Ammon ada nditɔ eka esie ita, ndien enyiŋ mmɔ ekedi Amaleki, Helem, ye Hem, ndien mmɔ esuhɔre eka ke isɔŋ Nephi.

7 Ndien sese, mmɔ esobo ye edidem mbon emi ekedude ke isɔŋ Nephi, ye ke isɔŋ Shilom; ndien mbon ukpeme edidem ekanare mmɔ ekuk, enyuŋ emum mmɔ, enyuŋ ebɔp mmɔ, enyuŋ esin mmɔ ke ufɔk ŋkpɔkɔbi.

8 Ndien edikem ke ini mmɔ ekedude ke ufɔk ŋkpɔkɔbi ke usen iba efiak eda mmɔ edi ke iso edidem, ndien etat mmɔ mme uruk; ndien mmɔ eda ke iso edidem, ndien eyak, mme enɔ uyo, ete mmɔ ebɔrɔ mme mbume emi enye edibupde mmɔ.

9 Ndien enye ɔdɔhɔ mmɔ ete: Sese, ami ndi Limhi, eyen Noah, emi ekedide eyen Zeniff, emi ɔkɔdɔkde ɔwɔrɔ ke isɔŋ Zarahemla edida isɔŋ emi enyene, emi ekedide isɔŋ mme ete mmɔ, emi ekenimde edidem ke uyo mme owo.

10 Ndien idahaemi, ami nyom ndidiɔŋɔ ntak emi mbufo ekesɔŋde enyin ekem ndisaŋa mkpere mme ibibene obio emi, ke ini ami, ke idem mi, ŋkodude ye mbon ukpeme mi ke aŋwa inua otop?

11 Ndien idahaemi, ke ntak emi ke ami ŋkayak nte etim mbufo enim, man ami nduŋɔde nto mbufo, mikpidihe ntre ami mkpanam nte mbon ukpeme mi ewot mbufo. Enɔ mbufo ufaŋ nditiŋ ikɔ.

12 Ndien idahaemi, ke ini Ammon okokutde ete ke eyak enye etiŋ ikɔ, enye aka onyuŋ osuk idem esie ke iso edidem; ndien ke afiakde adahada enye ɔdɔhɔ ete: O edidem, ami mɔnɔ ekɔm eti eti ke iso Abasi mfin emi koro ami nsuk ndude uwem, ndien eyak mi ntiŋ ikɔ; ndien ami nyodomo ukeme nditiŋ ikɔ ye odudu;

13 Koro ami mɔfiɔk nte ke ekpedi afo ama ɔfiɔk mi afo ukpuyakke ete ami nsine mme uruk emi. Koro ami ndi Ammon, ndien nto Zarahemla, ndien ndɔk ŋwɔrɔ ke isɔŋ Zarahemla ndi ndinam nduŋɔde mbaŋa nditɔ eka nnyin, emi Zeniff akadade ɔdɔk ɔwɔrɔ ke isɔŋ oro.

14 Ndien idahaemi, edikem ete ke ini Limhi ama okokop mme ikɔ Ammon, enye ama enem esit ata eti eti, onyuŋ ɔdɔhɔ ete: Idahaemi, ami mɔfiɔk ke akpanikɔ nte ke nditɔ eka mi emi ekedude ke isɔŋ Zarahemla esuk edu ke uwem. Ndien idahaemi, ami nyadaresit; ndien mkpɔŋ ami nyanam nte ikɔt mi edaresit ŋko.

15 Koro sese, nnyin idu ke ifin inɔ mme Lamanite, enyuŋ enɔ etibe emi ɔsɔŋde ndikpe. Ndien idahaemi, sese, nditɔ eka nnyin eyenam nnyin ibɔhɔ ke ifin nnyin, mme ke mme ubɔk mme Lamanite, ndien nnyin iyidi ifin mmɔ; koro ɔfɔn ete nnyin idi ifun inɔ mme Nephite akan ndikpe utomo nnɔ edidem mme Lamanite.

16 Ndien idahaemi, edidem Limhi ɔnɔ mbon ukpeme esie uyo ete mmɔ ukubɔp Ammon ye nditɔ eka esie aba, edi anam ete mmɔ eka obot emi okodude ke edem edere Shilom, enyuŋ eda nditɔ eka mmɔ edi obio, man otodo mmɔ edia, eŋwɔŋ, enyuŋ eduɔk odudu ke mme utom isaŋ mmɔ; koro mmɔ ema ekut ndutuhɔ ke ediwak ŋkpɔ; mmɔ ema ekut ndutuhɔ ke biɔŋ, nsat-itɔŋ, ye mmem idem.

17 Ndien idahaemi, edikem ke mkpɔŋ ete edidem Limhi ɔnɔ ntɔt ke ufɔt ikɔt esie, man otodo mmɔ esobo idem mmɔ ɔtɔkiet ke temple, man ekop mme ikɔ emi enye editiŋde inɔ mmɔ.

18 Ndien edikem ete ke ini mmɔ ema ekesobo idem mmɔ ɔtɔkiet ete ke enye etiŋ ikɔ ɔnɔ mmɔ ke utɔ usuŋ emi, ete: O mbufo, ikɔt mi, emenere ibuot mbufo enyuŋ ekop ndɔŋ-esit; koro sese, ini ke ekpere, mme mibihike, emi nnyin mididuhe aba ke idak mme asua nnyin, isehe ediwak eŋwan nnyin, emi edide ke ikpikpu; edi ami menim ke ɔsuhɔ akpan eŋwan emi anade iŋwana.

19 Ke ntak oro, emenere ibuot mbufo, enyuŋ edaresit, enyuŋ edori enyin ke Abasi, ke Abasi oro emi ekedide Abasi Abraham, ye Isaac, ye Jacob; ko ye, Abasi oro emi akadade nditɔ Israel ɔwɔrɔ ke isɔŋ Egypt, onyuŋ anam ete mmɔ esaŋa ke Ididuot Inyaŋ ebe ke nsat isɔŋ, onyuŋ ɔbɔk mmɔ ye manna man mmɔ ekutak ke wilderness; ye ediwak ŋkpɔ efen ke enye akanam ɔnɔ mmɔ.

20 Ndien ŋko, kpa Abasi oro akada mme ete nnyin ɔwɔrɔ ke isɔŋ Jerusalem, ndien ekpeme onyuŋ etim ikɔt esie enim tutu idahaemi; ndien sese, edi ke ntak mme ukwaŋ-ŋkpɔ ye mme mbubiam ido nnyin ke enye ada nnyin esin ke ufin.

21 Ndien kpukpru mbufo edi ntiense mfin emi, ete ke Zeniff, emi ekenamde edidem enɔ ikɔt esie, enye ɔkɔdɔrɔ itɔŋ ndida isɔŋ mme ete esie nyene, ke ntak ndibiaŋa otode ke nsu ye ŋkari edidem Laman, emi ekenyenede ediomi ye edidem Zeniff, onyuŋ ayakde esin ke ubɔk esie ete enyene ubak isɔŋ, mme kpa obio Lehi-Nephi, ye obio Shilom; ye isɔŋ emi akanarede okuk—

22 Ndien kpukpru emi ke enye akanam ke iso ntak ndida mbon emi nsin ke idak esie mme ke ufin. Ndien sese, nnyin ke idahaemi ikpe utomo inɔ edidem mme Lamanite, emi esimde ibio ibokpot nnyin, ye barley nnyin, ye kpukpru utɔ mkpasip, ye ibio udori ufene nnyin ye mme enaŋ nnyin; ye ibio kpukpru se nnyin ikamade mme inyenede ke edidem mme Lamanite oyom oto nnyin, mme uwem nnyin.

23 Ndien idahaemi, ndi emi idobike ndibiom? Ndien ndi emi, ukut nnyin, ikponke? Idahaemi sese, nso utɔ akamba ntak ke nnyin inyene ndifuhɔ.

24 Iŋ, ami ndɔhɔ mbufo, ntak okpon emi anade nte nnyin ifuhɔ; koro sese nditɔ eka nnyin ifaŋ ke ewot, ndien eduɔk iyip mmɔ ke ikpikpu, ndien kpukpru ke ntak ukwaŋ-ŋkpɔ.

25 Koro edieke mbon emi mikiduɔhɔ iduk ke ndudue Jehovah ikpiyakke ete akamba idiɔk emi edisim mmɔ. Edi sese, mmɔ ikpaŋke utɔŋ inɔ mme ikɔ esie; edi eneni odu ke ufɔt mmɔ, awak tutu mmɔ eduɔk iyip ke ufɔt idem mmɔ.

26 Ndien prophet Jehovah ke mmɔ ewot; iŋ, owo emi Abasi emekde, emi ɔkɔdɔhɔde mmɔ abaŋa ibak ye mme mbubiam ido mmɔ, onyuŋ etiŋ nte prophet abaŋa ediwak ŋkpɔ emi edidide, iŋ, kpa edidi Christ.

27 Ndien ke ntak emi enye ɔkɔdɔhɔde mmɔ ete ke Christ ekedi Abasi, Ete kpukpru ŋkpɔ, onyuŋ ɔdɔhɔ ete ke ana enye ada ɔnɔ idem esie mbiet owo, ndien ke ana nte edi mbiet nte ekebotde owo ke eritɔŋɔ; mme ke usuŋ efen, enye ɔdɔhɔ ete ke ekebot owo ke mbiet Abasi, ndien ke ana Abasi ɔsuhɔre edi ke ufɔt nditɔ owo, onyuŋ ada ɔnɔ idem esie obuk ye iyip, onyuŋ aka ke iso isɔŋ—

28 Ndien idahaemi, ke ntak emi enye eketiŋde emi, mmɔ ewot enye; ndien ediwak ŋkpɔ efen ke mmɔ ekenam emi ekemende iyaresit Abasi ɔsuhɔre esim mmɔ. Ke ntak, anie ikpa-idem ite ke mmɔ edu ke ufin, ndien ke emia mmɔ ye mme idiɔk ukut?

29 Koro sese, Jehovah ama ɔdɔhɔ ete: Ami ndinwamke ikɔt mi ke usen ndudue mmɔ; edi ami nyesiri usuŋ mmɔ mman mmɔ ekuforo; ndien mme edinam mmɔ eyedi itiat utuaha nduɔ ke iso mmɔ.

30 Ndien ŋko, enye ɔdɔhɔ ete: Edieke ikɔt mi editɔde ndek mmɔ eyedɔk mbio eto ke oyobio; ndien enye edi idiɔk ibɔk emi abiatde uwem.

31 Ndien ŋko enye ɔdɔhɔ ete: Edieke ikɔt mi editɔde ndek mmɔ eyedɔk ofum edem usiaha utin, emi adade nsobo edi usɔp-usɔp.

32 Ndien idahaemi, sese, eŋwɔŋɔ Jehovah osu, ndien emia enyuŋ ekut mbufo.

33 Edi edieke mbufo edifiakde ibine Jehovah ye ɔyɔhɔ uduak ke esit, enyuŋ esin idorenyin mbufo ke enye, enyuŋ enam ŋkpɔ enɔ enye ye ofuri ifik ke esit, edieke mbufo enamde emi, enye eye, nte asaŋade ye uduak ye inemesit esie, anam mbufo ewɔrɔ ke ufin.