ພາກທີ 100
ການເປີດເຜີຍທີ່ມອບໃຫ້ແກ່ໂຈເຊັບ ສະມິດ ຜູ້ເປັນສາດສະດາ ແລະ ຊິດນີ ຣິກດອນ, ທີ່ເມືອງແພຣີສະເບີກ, ລັດນິວຢອກ, ວັນທີ 12 ເດືອນຕຸລາ, 1833. ອ້າຍນ້ອງສອງຄົນ, ໂດຍທີ່ບໍ່ໄດ້ຢູ່ກັບຄອບຄົວຂອງເຂົາເຈົ້າຫລາຍມື້, ຮູ້ສຶກເປັນຫ່ວງເປັນໃຍນຳພວກເຂົາ.
1–4, ໂຈເຊັບ ແລະ ຊິດນີ ຕ້ອງສັ່ງສອນພຣະກິດຕິຄຸນເພື່ອຄວາມລອດຂອງຈິດວິນຍານ; 5–8, ມັນຈະຖືກມອບໃຫ້ແກ່ພວກເພິ່ນໃນຊົ່ວໂມງນັ້ນເອງ ສິ່ງທີ່ພວກເພິ່ນຄວນກ່າວ; 9–12, ຊິດນີຕ້ອງເປັນຄົນກ່າວ ແລະ ໂຈເຊັບຕ້ອງເປັນຜູ້ເປີດເຜີຍ ແລະ ມີພະລັງໃນປະຈັກພະຍານ; 13–17, ພຣະຜູ້ເປັນເຈົ້າຈະຍົກຜູ້ຄົນບໍລິສຸດຂຶ້ນ, ແລະ ຄົນທີ່ເຊື່ອຟັງຈະໄດ້ຮັບການຊ່ວຍໃຫ້ລອດ.
1 ຕາມຄວາມຈິງແລ້ວ, ພຣະຜູ້ເປັນເຈົ້າໄດ້ກ່າວດັ່ງນີ້ກັບພວກເຈົ້າ, ເພື່ອນຂອງເຮົາ ຊິດນີ ແລະ ໂຈເຊັບ, ຄອບຄົວຂອງພວກເຈົ້າສະບາຍດີ; ພວກເຂົາຢູ່ໃນມືຂອງເຮົາ, ແລະ ເຮົາຈະຈັດການກັບພວກເຂົາດັ່ງທີ່ເຮົາເຫັນວ່າດີ; ເພາະເຮົາມີອຳນາດໃນທຸກສິ່ງທັງປວງ.
2 ສະນັ້ນ, ຈົ່ງຕາມເຮົາມາ, ແລະ ຟັງຄຳແນະນຳຊຶ່ງເຮົາຈະມອບໃຫ້ແກ່ພວກເຈົ້າ.
3 ຈົ່ງເບິ່ງ, ແລະ ເບິ່ງແມ, ເຮົາມີຜູ້ຄົນຢ່າງຫລວງຫລາຍຢູ່ໃນບ່ອນນີ້, ໃນພາກພື້ນຕ່າງໆທີ່ອ້ອມຮອບ; ແລະ ປະຕູທີ່ມີປະສິດທິພາບຈະເປີດໃນພາກພື້ນຕ່າງໆທີ່ອ້ອມຮອບ ໃນພາກຕາເວັນອອກຂອງແຜ່ນດິນນີ້.
4 ສະນັ້ນ, ເຮົາ, ພຣະຜູ້ເປັນເຈົ້າ, ຈຶ່ງຍອມໃຫ້ພວກເຈົ້າມາບ່ອນນີ້; ເພາະເຮົາເຫັນວ່າເໝາະສົມເພື່ອ ຄວາມລອດຂອງຈິດວິນຍານ.
5 ສະນັ້ນ, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ຈົ່ງເປັ່ງສຽງຂອງພວກເຈົ້າແກ່ຜູ້ຄົນພວກນີ້; ກ່າວຄວາມຄິດທີ່ເຮົາຈະເອົາໃສ່ໃນໃຈຂອງພວກເຈົ້າ, ແລະ ພວກເຈົ້າຈະບໍ່ຖືກເຮັດໃຫ້ຈຳນົນຢູ່ຕໍ່ໜ້າມະນຸດ;
6 ເພາະມັນຈະຖືກ ມອບໃຫ້ພວກເຈົ້າໃນຊົ່ວໂມງນັ້ນເອງ, ແທ້ຈິງແລ້ວ, ໃນເວລານັ້ນເອງ, ສິ່ງທີ່ພວກເຈົ້າຈະກ່າວ.
7 ແຕ່ເຮົາຈະມອບບັນຍັດຂໍ້ໜຶ່ງໃຫ້ແກ່ພວກເຈົ້າວ່າ ພວກເຈົ້າຈະ ປະກາດສິ່ງໃດກໍຕາມທີ່ພວກເຈົ້າປະກາດໃນນາມຂອງເຮົາ, ດ້ວຍໃຈທີ່ນອບນ້ອມ, ດ້ວຍວິນຍານຂອງ ຄວາມອ່ອນໂຍນ, ໃນທຸກສິ່ງທັງປວງ.
8 ແລະ ເຮົາຈະມອບຄຳສັນຍານີ້ໃຫ້ແກ່ພວກເຈົ້າ, ວ່າຕາບໃດທີ່ພວກເຈົ້າເຮັດສິ່ງນີ້ ພຣະວິນຍານບໍລິສຸດ ຈະຖືກສົ່ງໄປໃຫ້ ໃນການເປັນພະຍານເຖິງທຸກສິ່ງທັງປວງສິ່ງໃດກໍຕາມທີ່ພວກເຈົ້າຈະກ່າວ.
9 ແລະ ເຮົາເຫັນສົມຄວນທີ່ພວກເຈົ້າ, ຜູ້ຮັບໃຊ້ຂອງເຮົາ ຊິດນີ, ຄວນເປັນ ຜູ້ກ່າວຕໍ່ຜູ້ຄົນພວກນີ້; ແທ້ຈິງແລ້ວ, ຕາມຄວາມຈິງ, ເຮົາຈະແຕ່ງຕັ້ງເຈົ້າສູ່ການເອີ້ນນີ້, ແມ່ນແຕ່ເປັນຜູ້ກ່າວໃຫ້ແກ່ຜູ້ຮັບໃຊ້ຂອງເຮົາ ໂຈເຊັບ.
10 ແລະ ເຮົາຈະມອບອຳນາດໃຫ້ແກ່ລາວເພື່ອຈະມີພະລັງໃນ ປະຈັກພະຍານ.
11 ແລະ ເຮົາຈະມອບອຳນາດໃຫ້ແກ່ເຈົ້າ ເພື່ອຈະມີ ພະລັງໃນການອະທິບາຍພຣະຄຳພີທັງໝົດ, ເພື່ອວ່າເຈົ້າຈະໄດ້ເປັນຜູ້ກ່າວໃຫ້ແກ່ລາວ, ແລະ ລາວຈະເປັນ ຜູ້ເປີດເຜີຍໃຫ້ແກ່ເຈົ້າ, ເພື່ອວ່າເຈົ້າຈະໄດ້ຮູ້ເຖິງຄວາມແນ່ນອນໃນທຸກສິ່ງທັງປວງກ່ຽວກັບສິ່ງ ທີ່ເປັນຂອງອານາຈັກຂອງເຮົາຢູ່ເທິງແຜ່ນດິນໂລກ.
12 ສະນັ້ນ, ພວກເຈົ້າຈົ່ງເດີນທາງຕໍ່ໄປ ແລະ ປິຕິຍິນດີເຖີດ; ເພາະຈົ່ງເບິ່ງ, ແລະ ເບິ່ງແມ, ເຮົາຢູ່ກັບພວກເຈົ້າ ແມ່ນແຕ່ຈົນເຖິງທີ່ສຸດ.
13 ແລະ ບັດນີ້ ເຮົາຈະມອບຄຳໜຶ່ງໃຫ້ແກ່ພວກເຈົ້າກ່ຽວກັບ ຊີໂອນ. ຊີໂອນຈະຖືກ ໄຖ່, ເຖິງແມ່ນວ່ານາງ ຈະຖືກຕີສອນຊົ່ວໄລຍະໜຶ່ງ.
14 ອ້າຍນ້ອງຂອງພວກເຈົ້າ, ຜູ້ຮັບໃຊ້ຂອງເຮົາ ອໍສັນ ຮາຍດ໌ ແລະ ຈອນ ກູນ, ແມ່ນຢູ່ໃນມືຂອງເຮົາ; ແລະ ຕາບໃດທີ່ພວກເຂົາຍັງຮັກສາບັນຍັດຂອງເຮົາ ພວກເຂົາຈະລອດ.
15 ສະນັ້ນ, ຈົ່ງສະບາຍໃຈເຖີດ; ເພາະ ທຸກສິ່ງທັງປວງຈະທຳງານນຳກັນເພື່ອຄວາມດີຕໍ່ຄົນທີ່ເດີນໄປຢ່າງພາກພູມໃຈ, ແລະ ເພື່ອການຊຳລະສາດສະໜາຈັກໃຫ້ບໍລິສຸດ.
16 ເພາະເຮົາຈະຍົກຜູ້ຄົນທີ່ ບໍລິສຸດຂຶ້ນໃຫ້ແກ່ເຮົາ, ທີ່ຈະຮັບໃຊ້ເຮົາໃນຄວາມຊອບທຳ;
17 ແລະ ທຸກຄົນທີ່ ເອີ້ນຫາພຣະນາມຂອງພຣະຜູ້ເປັນເຈົ້າ, ແລະ ຮັກສາພຣະບັນຍັດຂອງພຣະອົງຈະລອດ. ແມ່ນເປັນດັ່ງນັ້ນ. ອາແມນ.