Ɔfã 103
Nyikyerɛ a wɔnam Joseph Smith Nkɔnhyɛnyi no do dze mae wɔ Kirtland, Ohio, Kwakwar 24, 1834. Nyikyerɛ yi bae wɔ ber a Parley P. Pratt na Lyman Wight fii Missouri dur Kirtland, Ohio, dɛ wɔnye Nkɔnhyɛnyi no rebɛfa apam, ehu mbrɛ wobesi ama Ahotseweefo no hɔn nsaase a wɔwɔ Jackson Mansin no ma woeenya ahotɔ na wɔasan nye hɔn aba hɔn nsaase do.
1–4, Siantsir a Ewuradze maa kwan ma wɔtseetsee Ahotseweefo no a wɔwɔ Jackson Mansin no; 5–10, Sɛ Ahotseweefo no dzi mbrasɛm no do a, wobedzi konyim; 11–20, Wɔnam tum do bɔpon Zion, na Ewuradze bedzi No nkorɔfo enyim akɔ; 21–28, Ɔwɔ dɛ Ahotseweefo no boa hɔn ano wɔ Zion, na hɔn a wɔdze hɔn nkwa to hɔ no benya no bio; 29–40, Wɔfrɛ enuanom binom dɛ wɔnhyehyɛ Zion ne nseraban, na womfi hɔ nkɛtsena Zion; wɔbɔ hɔn anohoba dɛ sɛ wodzi nokwar a wobedzi konyim.
1 Nokwar, mese hom, m’anyɛnkofo dɛ, hwɛ, medze nyikyerɛ na mbrasɛm bɛma hom aama hom eehu mbrɛ hom besi ayɛ hom edwuma a ɔfa hom nuanom a wɔabɔ hɔn apetse wɔ Zion asaase do no hɔn nkwagye na hɔn ɔpon ho;
2 Hɔn a m’atamfo wɔabɔ hɔn apetse na ahaw hɔn no, na mubohue m’ebufuhyew a wonnkosusu ho no egu hɔn do wɔ mankasa me mber mu.
3 Na maama hɔn kwan ara ebodu sesei aama wɔaahyɛ hɔn emumuyɛ mã, na hɔn kɔɔpow ayɛ mã;
4 Na aama hɔn a wɔdze me dzin ato hɔn do no, wɔdze ntsẽa a ɔyɛ dzen ara yie atsẽa hɔn hyɛber kakra, osiandɛ woenntsie me nkyerɛkyerɛ nye mbrasɛm a medze maa hɔn no.
5 Na nokwar, mese hom dɛ, mahyɛ ɔmom a ɔwɔ dɛ mo nkorɔfo hyɛ no nsew na susuampaara dɛ wodzi do fi dɛm dɔn yi ara mu dze kɔ, na wotsie afotu a Emi, Ewuradze hɔn Nyankopɔn dze bɛma hɔn no.
6 Hwɛ, ɔbɛyɛ hɔ, osiandɛ Emi na maahyɛ ho ɔmom, dza makã no bɛhyɛ ase dɔn yi mu ayɛ edwuma dze etsia m’atamfo.
7 Na sɛ wotsie na wɔyɛ nsɛm a Emi, Ewuradze hɔn Nyankopɔn mebɛkã akyerɛ hɔn no a, wonnkegyaa dɛ wobedzi konyim ekodu dɛ wɔdze wiadze mu ahenman nyina bɛhyɛ m’ananadze, na wɔdze asaase nyina ama ahotseweefo no ma wɔafa no afebɔɔ kesi afebɔɔ.
8 Mbom susuampaara dɛ wonnkedzi me mbrasɛm do na wɔnnyɛ setsie mma me nsɛm nyina no, wiadze mu ahenman bedzi hɔn do konyim.
9 Osiandɛ, wɔayɛ hom kan ama wiadze, na wɔnyɛ adasa hɔn agyenkwa.
10 Na susuampaara dɛ wɔnnkɛyɛ nyimpa hɔn agyenkwa no, wɔbɛyɛ dɛ nkyen a ɔayew ne dɛw, onnye mma hwee bio, na mbom wɔtow gu ma nyimpa dze hɔn anan tsiatsia do.
11 Na nokwar, mese hom dɛ, mahyɛ ɔmom dɛ hom nuanom no a wɔabɔ hɔn apetse no bɛsan hɔn ekyir aba hɔn egyapadze asaase do, na wɔbɛkyekyer Zion ne mbea a wɔayɛ amamfo no.
12 Na abɛbrɛsɛ kɛse nyina ekyir no, dɛ mbrɛ makã akyerɛ hom wɔ me mbrasɛm a odzi kan no mu no, nhyira bɛba.
13 Hom nhwɛ, iyi nye nhyira a maabɔ hom ho anohoba dɛ ɔbɛba hom abɛbrɛsɛ ekyir no, na hom enuanom abɛbrɛsɛ ekyir no—hom mponee nye hom nuanom hɔn mponee, dɛ wɔbɛsan aba Zion asaase do mpo, wɔbɛtsena hɔ na wɔrunntum nndzi hom do da.
14 Naaso, sɛ wogu hɔn egyapadze no ho fĩ a, wɔbɔtow hɔn akyen; osiandɛ sɛ wogu hɔn egyapadze no ho fĩ a, meremmfa hɔnho nnkyɛ hɔn.
15 Hwɛ, mese hom dɛ, Zion no mponee no, ɔsɛ dɛ wɔdze nam tum do ba.
16 Dɛm ntsi, mebɛma ɔbarimba bi asoɛr ama mo nkorɔfo, a obedzi hɔn enyim tse dɛ mbrɛ Moses dzii Israelmba enyim no.
17 Na hom nye Israelmba, na hom yɛ Abraham n’asefo na ɔsɛ dɛ wɔdze tum, nye nsa a wɔatsen mu gye hom fi nkowaasom mu.
18 Na dɛ mbrɛ wodzii hom egyanom enyim ahyɛse no, dɛmara so na Zion no mponee no bɛyɛ.
19 Dɛm ntsi, mma hom akoma nntɔ bitsi, osiandɛ mennkã nnkyerɛ hom dɛ mbrɛ mekãa kyerɛɛ hom egyanom no: Mo bɔfoe bedzi hom enyim nye hom akɔ, na mbom nnyɛ mara m’enyim bi a.
20 Na mese hom dɛ: M’abɔfoe bedzi hom enyim akɔ, na emi mara m’enyim so, na ɔnnkɛkyɛr na hom akɛfa asaase pa no.
21 Nokwar, nokwar, mese hom dɛ, m’akowaa Joseph Smith, Kakraba nye ɔbarimba no a medze no too akowaa no a wenyin ture no wura no kãa no ho asɛm wɔ abɛbusɛm a makã akyerɛ hom no mu no ho no.
22 Dɛm ntsi, hom mma m’akowaa Joseph Smith, Kakraba nkã nkyerɛ me fie mu dɔm no, me mberantsɛ nye hɔn a hɔn enyi efir kakra ara yie no dɛ—Hom mboaboa hom ano na hom nkɔ Zion asaase do, asaase no a medze sika tɔe na wɔatsew ho ama me no do.
23 Na hom mma nsɔr no nyina nsoma hɔn mu enyansafo no ma wɔmfa hɔn sika nkɔtɔ nsaase no dɛ mbrɛ mahyɛ hɔn no.
24 Na susuampaara dɛ m’atamfo bɛba hom do dɛ wɔrebɛpam hom efi m’asaase pa no do no efi homankasa hom nsaase mpo do dza matsew ho dɛ ɔbɛyɛ Zion asaase no, adasegye a hom nkyii hom dze bogu m’enyim dze etsia hɔn no, hom ndom hɔn;
25 Na obiara a hom dze ndom kã no no, me dze ndom bɛkã no, na hom bedzi m’atamfo hɔn wer ama me.
26 Na mebɛkã hom ho wɔ ber a hom ridzi m’atamfo hɔn wer ama me no, fi ebusuasantsen a ɔtɔ do ebiasa dze kesi anan no a wɔtan me no do.
27 Mma nyimpa biara nnsuro dɛ ɔdze no nkwa bɔto hɔ wɔ emi ntsi, na obiara a ɔdze no nkwa bɔto hɔ wɔ emi ntsi no, benya no bio.
28 Na obiara a ɔmmpɛ dɛ ɔdze no nkwa to hɔ wɔ emi ntsi no nnyɛ mo suanyi.
29 Ɔyɛ me pɛ dɛ m’akowaa Sidney Rigdon bɛma ne ndze do wɔ asɔrmba a wɔwɔ boka aman do no mu, dze akyerɛkyerɛ nsɔr no ma woeedzi mbrasɛm a medze ama hɔn no a ɔfa Zion ne nsan anan mu na no mponee ho no do.
30 Ɔyɛ me pɛ dɛ m’akowaa Parley P. Pratt nye m’akowaa Lyman Wight nnkɛsan hɔn ekyir akɔ hɔn nuanom no hɔn asaase do, kesi dɛ wobenya me fie mu dɔm a wɔnye hɔn bɔkɔ Zion asaase do, ekuwekuw du du, anaa eduonu eduonu, anaa eduonum eduonum, anaa ɔha ɔha, kɛpem dɛ wobenya me fifo ahaenum no.
31 Hwɛ, iyi nye me pɛ; hom mbisa na hom nsa bɛkã; mbom adasa nnyɛ m’apɛdze daa.
32 Dɛm ntsi, sɛ hom enntum ennya ahaenum a, hom nsi nketse nhwɛ dɛ gyangyanbiara hom botum enya ahaebiasa a.
33 Na sɛ hom ennya ahaebiasa a, hom nsi nketse dɛ hom botum enya ɔha.
34 Mbom nokwar, mese hom dɛ, mbrasɛm a medze ma hom nye dɛ, mma hom nnkɔ Zion asaase do kesi dɛ hom benya me fie mu dɔm ɔha na wɔnye hɔn akɔ Zion asaase do.
35 Dɛm ntsi, dɛ mbrɛ mekãa kyerɛɛ hom, dɛ hom mbisa na hom nsa bɛkã; hom mbɔ mpaa enyiberdo dɛ gyangyanbiara m’akowaa Joseph Smith, Kakraba nye hom bɔkɔ, na ɔahwɛ mo nkorɔfo do, na ɔakyekyer m’ahenman no wɔ asaase a matsew ho no do, na ɔahwɛ ma Zion mba no etsim hɔ, na woedzi mbrasɛm a wɔdze ama hɔn nye dza wɔdze bɛma hɔn no do.
36 Wɔnam hom mbɔdzembɔ, nokwardzi na gyedzi mpaabɔ do dze konyimdzi na enyimnyam nyina brɛ hom.
37 Hom mma m’akowaa Parley P. Pratt nye m’akowaa Joseph Smith, Kakraba, ntu kwan.
38 Hom mma m’akowaa Lyman Wight nye m’akowaa Sidney Rigdon ntu kwan.
39 Hom mma m’akowaa Hyrum Smith nye m’akowaa Frederick G. Williams ntu kwan.
40 Hom mma m’akowaa Orson Hyde nye m’akowaa Orson Pratt ntu kwan nkɔ beebiara a m’akowaa Joseph Smith, Kakraba, bɛse hɔn no, ama wɔaama mbrasɛm yinom a medze ama hom no ahyɛ mã, na hom ngyaa dza aka no nhyɛ me nsa. Ɔnyɛ hɔ dɛm. Amen.