Icandelo 113
Iimpendulo kwimibuzo ethile kwimibhalo kaIsaya, zinikwe nguJoseph Smith uMprofeti, kufuphi okanye eFarWest, eMissouri, Matshi 1838.
1–6, IGatya likaYese, intonga ivela isuka apho, nengcambu kaYese iyaziswa; 7–10, Iintsalela ezichithachithiweyo zeZiyon zinelungelo kububingeleli kwaye zibizelwe ukubuyela eNkosini.
1 Ngubani oliGatya likaYese ekuthethwe ngalo kwiivesi yo-1, neye-2, eye-3, eye-4, neye-5 zesahluko se-11 sikaIsaya?
2 Inene itsho njalo iNkosi: NguKrestu.
3 Yintoni intonga ekuthethwe ngayo kwivesi yokuqala yesahluko se-11 sikaIsaya, emele ukuvela kwiGatya likaYese?
4 Qaphelani, itsho njalo iNkosi: Sisicaka ezandleni zikaKrestu, esiyinxenye yenzala kaYese nanjengekaEfrayim, okanye yendlu kaYosefu, kuso kubekwe amandla amaninzi.
5 Yintoni ingcambu kaYese ekuthethwe ngayo kwivesi ye-10 yesahluko se-11?
6 Qaphelani, itsho njalo iNkosi, iyinzala kaYese, nanjengekaYosefu, ububingeleli ngokufanelekileyo bubobazo, nezitshixo zobukumkani, zebhanile, nezokulungiselela ukuzihlanganisela kwabantu bam ngemihla yokugqibela.
7 Imibuzo kaElias Higbee: Yintoni ethethwa ngumyalelo kwisahluko sama-52 kuIsaya, ivesi yoku-1, ethi: Nxiba amandla akho, Owu Ziyon—kwaye uIsaya ubhekisa kwabaphi abantu?
8 Ubhekisa kwabo uThixo amele ukubabiza ngemihla yokugqibela, abamele ukuphatha igunya lobubingeleli ekuziseni kwakhona iZiyon, nenkululeko kaSirayeli; kwaye ukunxiba ukomelela kwayo kukunxiba igunya lobubingeleli, iZiyon, yona, enelungelo kulo ngokomlibo; kanjalo ekubuyeleni kwelo gunya ebilahlekene nalo.
9 Simele ukuqonda ntoni ngeZiyon ngokuzikhulula kwesiqu sayo kwiimbophelelo zentamo yayo; kwivesi yesi-2?
10 Simele ukuqonda okokuba iintsalela ezisasaziweyo zivuselelwe ekubuyeleni eNkosini ukusuka apho zaziwele khona; xa zikwenza oko, isithembiso seNkosi sesokuba iya kuthetha kuzo, okanye izinike isityhilelo. Khangela kwiivesi, eye-6, eye-7, neye-8. Iimbophelelo zentamo yayo ziziqalekiso zikaThixo phezu kwayo, okanye iintsalela zikaSirayeli kwimeko yazo yokuchithachithwa phakathi kweeNtlanga.