Ɔfã 121
Mpaabɔ na nkɔnhyɛ a Joseph Smith Nkɔnhyɛnyi no kyerɛwee wɔ nwoma a ɔdze kɛmaa Asɔr no wɔ ber a ɔyɛ daduanyi wɔ Liberty efiadze, Missouri, Ebɔw 20, 1839. Wɔdze Nkɔnhyɛnyi no nye mfɛfo pii a wɔkã no ho egu efiadze abosoom pii. Hɔn ntotɔserɛ a wɔdze kɛmaa asɛndzifo no a wɔdaan hɔn no ennkesi hwee.
1–6, Nkɔnhyɛnyi no totɔ serɛ Ewuradze dze ma Ahotseweefo no a woruhu amandze no; 7–10, Ewuradze kã asomdwee ho nsɛm kyerɛ no; 11–17, Ndom nkã hɔn a wɔkã mbrato tsia Ewuradze no nkorɔfo no; 18–25, Worinnya kyɛfa wɔ asɔfodzi no mu na wobobu hɔn fɔ; 26–32, Wɔdze enyimnyam nyikyerɛ bɔ hɔn a wɔsɔw nsɔhwɛ akokodur mu no anohoba; 33–40, Siantsir a wɔafrɛ dodowara na kumaabi na wɔasan mu eyi hɔn; 41–46, Ɔwɔ dɛ wɔdze asɔfodzi no dzi dwuma wɔ kwan tsenenee nko do.
1 O Nyankopɔn, ewɔ hen? Hen na wo ntamadan a ɔkata wo sumabew do no wɔ?
2 Ibesianka wo nsa ekodu dabɛn; na w’enyi, nyew, w’enyi buroburo no, ebɔtweɔn ekodu dabɛn na efi onnyiewiei ɔsorsor no mu ahwɛ bɔn a wɔdze reyɛ wo nkorɔfo nye wo nkowaa, na ama hɔn sufrɛ ehwira w’asomu?
3 Nyew, O Ewuradze, wobohu dɛm amandze yi na wɔasɔw dɛm atseetsee a ɔmmfa mbra kwan mu yi ekodu dabɛn ansaana ayamuhyehye ahyɛ w’abadaa mu wɔ hɔnho?
4 O Ewuradze Nyankopɔn Tumfo, sor nye asaase, nye po, nye dza ɔwɔ mu nyina yɛfo, ɔwo na ewɔ tum na ehyɛ abɔnsam nye sheol sum kebii do—tsen wo nsa; ma w’enyi nhwira; ma wonyi wo ntamadan no mfi hɔ; fi wo sumabew do pue; kyea w’aso, ma w’akoma ngow, na ma ayamuhyehye nhyɛ w’abadaa mu wɔ hɛn ho.
5 Ma w’ebufuhyew ndzɛw ntsia hɛn atamfo; na w’akomahyew mu no, fa wo nkrantsee dzi hɛn atamfo wer wɔ bɔn a wɔdze reyɛ hɛn ho.
6 Kaa w’ahotseweefo a woruhu amandze yi, O hɛn Nyankopɔn; na wo nkowaa bedzi dɛw wɔ wo dzin mu afebɔɔ.
7 Me ba, asomdwee nkã wo kra; w’akotorka na w’amandzehu no, ɔnnkɛkyɛr;
8 Na afei, sɛ esɔw no yie a, Nyankopɔn bɛma wo do wɔ sor; na ibedzi konyim wɔ w’atamfo nyina do.
9 W’anyɛnkofo gyina w’afã, na wɔdze enyigye akoma na ɔdɔ nsa bohuhor wo bio.
10 Innyae nnyɛɛ dɛ Job; w’anyɛnkofo nnkasa nntsia wo, nna wɔnnkã so dɛ wo mbrato so ntsi a, dɛ mbrɛ wɔdze yɛɛ Job no.
11 Na hɔn a wɔse dɛ osian wo mbrato ntsi no, hɔn enyidado bɛpa na dza woesusu no bɛnan dɛ ma ewia orupue no ne kan a ɔredzɛw no renan esukwankyɛba no;
12 Na Nyankopɔn so ama ne nsa do esi no pi resesã mber na hyɛber, na oefura hɔn adwen, amma woeenntum anntse n’anwanwadze ase; ama ɔaasɔ hɔn ahwɛ so, na ne nsa aakã hɔn wɔ hɔnankasa hɔn nyansaa na ndaadaa kwan do;
13 Na osiandɛ hɔn akoma aporɔw ntsi, ndzɛmba a wɔpɛ dɛ ɔba binom do, na wɔdɔ dɛ binom hu amandze no, bɛba hɔnankasa hɔn do pɛpɛɛpɛ.
14 Ama hɔn sẽ aafem so, na hɔn enyidado so aapa.
15 Na ɔnnkɛkyɛr biara na woedwuw hɔn asefo nyina efi wi ase ha, Nyankopɔn na ɔse, na hɔn mu kor mpo rennka a ɔtse ase.
16 Ndom nkã hɔn a wɔbɛma hɔn anantsir do etsia nyia masera no ngo, Ewuradze na ɔse, na wosũ dɛ wɔayɛ bɔn, ber a wɔnnyɛɛ bɔn biara wɔ m’enyim, Ewuradze na ɔse, mbom wɔayɛ dza ɔtsen wɔ m’enyim, nye dza mehyɛɛ hɔn no.
17 Mbom hɔn a wosũ mbrato ho no yɛ dɛm osiandɛ wɔyɛ bɔn no nkowaa, na hɔnankasa so wɔyɛ asokyew mba.
18 Hɔn na wɔkã ator ntam tsia mo nkowaa, ama woeetum dze hɔn aba ndɔmmum ase na owu mu—
19 Wondue, osiandɛ wɔafom mo mbɔdomaba ntsi wɔnnkɛma hɔn kwan ma hɔn nsa akã ayɛdze wɔ me fi mu.
20 Hɔn nkɛntsɛn rennyɛ mã, hɔn efi na hɔn asan bɛsɛɛ, na hɔn a wɔdaadaa hɔn no bobu hɔn enyimtsia.
21 Worinnya asɔfodzi mu kyɛfa, hɔn nye hɔn asefo fi ebusuasantsen kesi ebusuasantsen.
22 Nkyɛ obeye ama hɔn dɛ wɔdze ewuyambo bɛsɛn hɔn kɔn mu na wɔatow hɔn akyen po no bun mu.
23 Wondue, hɔn a wɔhaw mo nkorɔfo, na wɔpam hɔn na wokum hɔn, na wɔgye dase tsia hɔn, Dɔm Ewuradze na ɔse, ehurutsia ebusuasantsen no rimmfi hɛl afɔbu no mu.
24 Hwɛ, m’enyi hu na minyim hɔn ndwuma nyina, na mowɔ atsɛmbu ɔbɛba ntsɛmara a medze esie ama hɔn nyina wɔ ne hyɛber mu;
25 Na woeetu mber bi esi hɔ ama nyimpa biara, dɛ mbrɛ no ndwuma tse no.
26 Nyankopɔn nam no Sunsum Krɔnkrɔn do bɛma hom nyimdzee, nyew, Sunsum Krɔnkrɔn n’akyɛdze a onnyi kabea no do, dza wonnyii nnkyerɛe fi ber a wɔbɔɔ wiadze dze besi sesei no;
27 Dza hɛn egyanom aper atweɔn mber tsentsen dɛ wɔbɛda no edzi akyerɛ wɔ mber a odzi ekyir no mu, dza abɔfo twee hɔn adwen gyinaa do no, dɛ wɔdze esie ama hɔn enyimnyam ne mãhyɛ no;
28 Mber bi bɛba a wɔremmfa biribiara nnsuma, sɛ Nyame kor anaa enyame pii na wɔwɔ hɔ a, wɔbɛda no edzi akyerɛ.
29 Ahengua na ahenman, mpanyindzi na etum nyina wɔbɛda no edzi ama hɔn a wogyinaa akokodur mu dze maa Jesus Christ n’asɛmpa no.
30 Na sɛ wɔdze pampi so esisi sor anaa po, anaa asaase kɛsɛɛ, anaa ewia anaa bosoom, anaa nworaba ano a—
31 Hɔn mber a wɔdze kyin hɔnho nyina, nda nyina a wɔdze esi hɔ, abosoom, mfe nyina ne nhyehyɛɛ nye nda nyina hɔn nda, abosoom, na mfe na hɔn nda mu nda nyina, abosoom na mfe, na hɔn enyimnyam nyina, mbra, na mber a wɔahyehyɛ ato hɔ nyina, wɔbɛda no edzi wɔ mberano nda ne mãhyɛ mu—
32 Dɛ mbrɛ wɔhyɛɛ no wɔ Onnyiewiei Nyankopɔn Abaguafo a wɔbɔ enyame nyina do hɔn finimfin no ansaana wɔrobɔ wiadze yi no, dɛ wɔdze besie ekesi dɛ ɔrokɔ n’ewiei nye ewiei ber a nyimpa biara bɛhɛn n’onnyiewiei enyim na ɔbɛhɛn ne bɛkyebo ahomgye mu no.
33 Nsu a ɔrepem bɛda ho afon ekesi aber bɛn? Ebɛn tum na obotum esanka sor? Dɛ sɛ nyimpa botum atsen n’abasa a ɔyɛ mberɛw dze esianka Esutsen Missouri wɔ no kwan a ɔpem mu no, anaa wɔadan no ma wɔapem akɔ etsifi afamu mu mpo a, onnkotum esiw Otumfo kwan dɛ mma onnhue nyimdzee mmfi sor nngu Nda a Odzi Ekyir Ahotseweefo hɔn tsir do.
34 Hwɛ, wɔbɛfrɛ dodowara, na mbom kumaabi na wɔbɛsan mu eyi hɔn. Na ebɛnadze ntsi na wɔrennsan mu nnyi hɔn?
35 Osiandɛ hɔn akoma dzi wiadze ndzɛmba ekyir, na wɔper hwehwɛ nyimpa hɔ enyinyam ntsi, wonnsũa dɛm adzesũa kor yi—
36 Dɛ kyɛfa a ɔwɔ asɔfodzi no mu no nye sor tum no fam ho, na wonnkotum ahyɛ ɔsor tum do anaa wɔdze edzi dwuma gyedɛ wɔnam tsenenee fapem kwan do.
37 Dɛ wɔdze bɛma hɛn no dze, ɔyɛ nokwar; na mbom sɛ yɛyɛ dɛ yɛkata hɛn bɔn do, anaadɛ yɛma hɛn ahantanyɛ, nye hɛn nsusui hun ho kwan, anaadɛ yɛhwɛ anaa yedzi hɔn do tum dze haw adasamba hɔn akra wɔ akwan biara a ɔnntsen do a, hwɛ, ɔsorsor twe hɔnho; Ewuradze no Sunsum dzi yaw; na sɛ ɔtwe noho a, Amen nkã dɛm nyimpa no n’asɔfodzi anaa ne tumdzi no.
38 Hwɛ, afei n’enyi bɛba no ho no, nna woegyaa ne bra ahyɛ nankasa ne nsamu, dɛ ɔbɔwɔ dadzepoma ano ntsia, ɔatseetsee ahotseweefo, na ɔakõ etsia Nyankopɔn.
39 Ntɔhunii yaayaw a yeehu kyerɛ dɛ, ɔyɛ nyimpa dodowara hɔn awoo su na bɔbew dɛ, sɛ wonya tumdzi kakra bi a, dɛ mbrɛ wɔdwen no a, wɔhyehyɛ hɔnho ntsɛmara, dɛ wɔreyɛ dza ɔnntsen dze atseetsee hɔn a wɔhwɛ hɔn do no.
40 Dɛm iyi ntsi wɔafrɛ dodowara, mbom wɔbɛsan mu eyi kumaabi.
41 Tum anaa nhyɛdo biara nnyi hɔ a ɔwɔ dɛ osian asɔfodzi no ntsi wɔgye to mu, gyedɛ wɔnam ndzɛfɛdzɛfɛw, nye penkyɛr, nye botooyɛ, nye ɔdwe mu, nye ɔdɔ mapã kwan do nhwɛ hɔn do;
42 Ɔnam ayamuyie, na nyimdzee mapã do a ɔbɛma ɔkra enyin a enyidosomkyerɛ nye ndabraba biara mmbata ho—
43 Sɛ Sunsum Krɔnkrɔn no kenyan wo a, fa ndamyɛ kã enyim mber pa mu, na ekyir no nya ɔdɔ kɛse ma nyia akã n’enyim no, amma ɔaanndwen dɛ eyɛ ne tamfo;
44 Ama oeehu dɛ wo nokwar dzi mu yɛ dzen sen owu ntampehoma.
45 Ma ayamuyie nhyɛ w’abadaa mu mã, a onngyaa da mfa mma nyimpa nyina, nye gyedzi fifo no, na ma ɔbrapa nsiesie w’adwen mu a onngyaa da, nkyii w’awerɛhyɛmu wɔ Nyame enyim bɛhyɛ dzen; na asɔfodzi ho nkyerɛkyerɛ mu ndzepa no bɔsosɔ wo kra do tse dɛ bɔw a ofi sor.
46 Na ibenya Sunsum Krɔnkrɔn no n’anyɛnkoyɛ no aber nyina, na w’ahempoma bɛyɛ ahempoma a ɔnnsakyer wɔ tsenenee na nokwar mu; na w’ahendzi bɛyɛ ahendzi a ɔwɔ hɔ daapem na ɔbɛpem egu wo do efi afebɔɔ kesi afebɔɔ a ɔnnam nhyɛ kwan biara do.