ພາກທີ 122
ພຣະຄຳຂອງພຣະຜູ້ເປັນເຈົ້າຕໍ່ໂຈເຊັບ ສະມິດ ຜູ້ເປັນສາດສະດາ, ໃນຂະນະທີ່ເພິ່ນຖືກຈຳຄຸກຢູ່ທີ່ເມືອງລີເບີຕີ, ລັດມີເຊີຣີ. ພາກນີ້ແມ່ນການຄັດລອກເອົາມາຈາກ ສານທີ່ສົ່ງເຖິງສາດສະໜາຈັກ ລົງວັນທີ 20 ເດືອນມີນາ 1839 (ເບິ່ງ ຫົວຂໍ້ຂອງ ພາກທີ 121).
1–4, ທີ່ສຸດຂອງແຜ່ນດິນໂລກຈະສອບຖາມກ່ຽວກັບນາມຂອງໂຈເຊັບ ສະມິດ; 5–7, ໄພອັນຕະລາຍ ແລະ ຄວາມເຈັບປວດທັງປວງຂອງເພິ່ນຈະເປັນປະສົບການແກ່ເພິ່ນ ແລະ ເກີດຂຶ້ນເພື່ອຄວາມດີຂອງເພິ່ນ; 8–9, ບຸດມະນຸດໄດ້ລົງຕ່ຳກວ່າທຸກສິ່ງເຫລົ່ານັ້ນທັງໝົດ.
1 ທີ່ສຸດຂອງແຜ່ນດິນໂລກຈະສອບຖາມກ່ຽວກັບ ນາມຂອງເຈົ້າ, ແລະ ຄົນໂງ່ຈະເຫັນວ່າເຈົ້າສົມຄວນທີ່ຈະຖືກເຍາະເຍີ້ຍ, ແລະ ນະລົກຈະລຸກໄໝ້ຕໍ່ຕ້ານເຈົ້າ;
2 ໃນຂະນະທີ່ຜູ້ທີ່ມີໃຈບໍລິສຸດ, ແລະ ຄົນສະຫລາດ, ແລະ ຜູ້ມີກຽດ, ແລະ ຜູ້ມີຄຸນນະທຳ, ຈະສະແຫວງຫາ ຄຳແນະນຳ, ແລະ ສິດອຳນາດ, ແລະ ພອນຢູ່ສະເໝີຈາກມືຂອງເຈົ້າ.
3 ແລະ ປະຈັກພະຍານຂອງຄົນທີ່ທໍລະຍົດຕໍ່ເຈົ້າຈະບໍ່ສາມາດເຮັດໃຫ້ຜູ້ຄົນຂອງເຈົ້າຫັນມາຕໍ່ຕ້ານເຈົ້າ.
4 ແລະ ເຖິງແມ່ນອິດທິພົນຂອງພວກເຂົາຈະນຳເຈົ້າໄປສູ່ຄວາມທຸກຮ້ອນ, ແລະ ໄປສູ່ກົງເຫລັກ ແລະ ກຳແພງ, ແຕ່ເຈົ້າຈະຖືກຍົກຍ້ອງ; ແລະ ບໍ່ດົນສຽງຂອງເຈົ້າຈະເປັນໜ້າຢ້ານກົວໃນທ່າມກາງສັດຕູຂອງເຈົ້າຍິ່ງກວ່າສຽງຂອງ ໂຕສິງດຸເດືອດ, ເພາະຄວາມຊອບທຳຂອງເຈົ້າ; ແລະ ພຣະເຈົ້າຂອງເຈົ້າຢືນຄຽງຂ້າງເຈົ້າຕະຫລອດການ ແລະ ຕະຫລອດໄປ.
5 ຖ້າຫາກເຈົ້າໄດ້ຖືກເອີ້ນໃຫ້ປະສົບກັບຄວາມທຸກຍາກລຳບາກ; ຖ້າຫາກເຈົ້າຢູ່ໃນໄພອັນຕະລາຍທ່າມກາງອ້າຍເອື້ອຍນ້ອງຈອມປອມຂອງເຈົ້າ; ຖ້າຫາກເຈົ້າຢູ່ໃນໄພອັນຕະລາຍທ່າມກາງພວກໂຈນ; ຖ້າຫາກເຈົ້າຢູ່ໃນໄພອັນຕະລາຍເທິງບົກ ຫລື ໃນທະເລ;
6 ຖ້າຫາກເຈົ້າຖືກກ່າວຫາດ້ວຍຂໍ້ກ່າວຫາເທັດ; ຖ້າຫາກສັດຕູມາຮຸກຮານເຈົ້າ; ຖ້າຫາກພວກເຂົາແຍກເຈົ້າຈາກການຢູ່ກັບພໍ່ແມ່ ແລະ ອ້າຍເອື້ອຍນ້ອງຂອງເຈົ້າ; ແລະ ຖ້າຫາກດ້ວຍດາບທີ່ສັດຕູຂອງເຈົ້າຖອດອອກມາເພື່ອແຍກເຈົ້າອອກຈາກອົກຂອງພັນລະຍາຂອງເຈົ້າ, ແລະ ຈາກລູກໆຂອງເຈົ້າ, ແລະ ຈາກລູກຜູ້ໃຫຍ່ຂອງເຈົ້າ, ເຖິງແມ່ນພຽງແຕ່ອາຍຸຫົກປີ, ຈະດຶງອາພອນຂອງເຈົ້າ, ແລະ ຈະກ່າວວ່າ ພໍ່ເອີຍ, ພໍ່ເອີຍ, ເປັນຫຍັງພໍ່ຈຶ່ງຢູ່ນຳພວກເຮົາບໍ່ໄດ້? ໂອ້, ພໍ່ເອີຍ, ພວກຜູ້ຊາຍເຫລົ່ານັ້ນຈະເຮັດຫຍັງກັບພໍ່? ແລະ ຈາກນັ້ນ ຖ້າຫາກເຂົາຈະຖືກຊຸກໜີຈາກເຈົ້າດ້ວຍດາບ, ແລະ ເຈົ້າຖືກລາກໄປທີ່ຄຸກ, ແລະ ສັດຕູຂອງເຈົ້າວົນວຽນອ້ອມຮອບເຈົ້າຄືກັບຝູງໝາ ປ່າຢາກກິນເລືອດຂອງລູກແກະ;
7 ແລະ ຖ້າຫາກເຈົ້າຖືກໂຍນລົງໄປໃນຫລຸມ, ຫລື ໃນມືຂອງຄາດຕະກອນ, ແລະ ຖືກຕັດສິນປະຫານຊີວິດ; ຖ້າຫາກເຈົ້າຖືກໂຍນລົງໄປໃນ ເຫວເລິກ; ຖ້າຫາກຄື້ນໃຫຍ່ຊັດກະໜ່ຳເຈົ້າ; ຖ້າຫາກພະຍຸຮ້າຍກາຍເປັນສັດຕູຂອງເຈົ້າ; ຖ້າຫາກຟ້າສະຫວັນເຕົ້າໂຮມຄວາມມືດ, ແລະ ທາດທັງປວງຮ່ວມກັນຕັນທາງເຈົ້າ; ແລະ ເໜືອທຸກສິ່ງອື່ນໝົດ, ຖ້າຫາກປາກ ນະລົກຈະເປີດກວ້າງງັບເອົາເຈົ້າ, ເຈົ້າຈົ່ງຮູ້ໄວ້ເຖີດ, ລູກຂອງພໍ່, ວ່າສິ່ງທັງໝົດເຫລົ່ານີ້ຈະເປັນ ປະສົບການໃຫ້ແກ່ເຈົ້າ, ແລະ ຈະເກີດຂຶ້ນເພື່ອຄວາມດີຂອງເຈົ້າ.
8 ບຸດມະນຸດໄດ້ ລົງຕ່ຳກວ່າທຸກສິ່ງເຫລົ່ານັ້ນທັງໝົດ. ເຈົ້າຍິ່ງໃຫຍ່ກວ່າພຣະອົງບໍ?
9 ສະນັ້ນ, ຈົ່ງຍຶດໝັ້ນຢູ່ໃນທາງຂອງເຈົ້າ, ແລະ ຖານະປະໂລຫິດຈະ ຄົງຢູ່ກັບເຈົ້າ; ເພາະ ຂອບເຂດຂອງມັນໄດ້ຖືກຕັ້ງໄວ້ແລ້ວ, ມັນບໍ່ສາມາດຜ່ານຂ້າມ. ວັນເວລາຂອງເຈົ້າໄດ້ຖືກຮັບຮູ້, ແລະ ປີຂອງເຈົ້າຈະບໍ່ຖືກນັບໃຫ້ໜ້ອຍລົງ; ສະນັ້ນ, ຢ່າຢ້ານກົວສິ່ງທີ່ມະນຸດສາມາດເຮັດໄດ້, ເພາະພຣະເຈົ້າຈະຢູ່ກັບເຈົ້າຕະຫລອດການ ແລະ ຕະຫລອດໄປ.