1 Me vaka au sa tukuna oti yani ena noqu ivola ni bera niu biuta mai na noqu itikotiko, ni’u na qai dau volavola yani vei kemudou ena veigauna eso me’u tukutuku yani ena vuku ni ulutaga e vuqa, au na tomana ena gauna oqo ena ulutaga ni nodra papitaisotaki na mate, me vaka ni vakaosoosotaka tiko na noqu vakasama ka tara tiko vakaukauwa duadua na lomaqu ena gauna oqo na ulutaga oqori, me tekivu mai na gauna era sa vakasasataki au tiko kina na noqu meca.

2 Au a vola yani vei kemudou e vica na vosa me baleta e dua na vunivola. Sa tiko voli vei au e vica na vakasama me baleta na tikina oqo, ka’u sa na vakadeitaka oqo. Sai koya, ni a tukuni yani ena noqu ivola e liu ni dodonu me dua na vunivola, o koya me na raica sara ga e matana, ka vakatalega kina me na rogoca sara e daligana, me rawa kina ni vola na itukutuku ni ka dina vua na Turaga.

3 Ia, ena vuku ni ka oqo, ena dredre sara kina vua e dua ga na vunivola me na tiko ena veigauna kecega, ka qarava na itavi kecega. Me levea na dredre oqo, e rawa ni lesi ena veitabanalevu kece ena koro oqo e dua na vunivola, ka sa buta vakavinaka tu ena kena dau volai vakadodonu sara na veika e yaco ena gauna vata e yaco tiko kina; ka me na dodonu ka matailalai na nona vola na veika kece e yaco, me vakadeitaka ena nona itukutukuvolai ni a raica e matana, ka rogoca e daligana, me vola na tikinisiga, kei na yaca, kei na veika tale eso, kei na itukutuku kece sara ni cakacaka; ka me tukuna talega na yacadratou e lewe tolu era a tiko kina, kevaka a tiko kina e dua, ka na rawa ni ratou vakadinadinataka ena dua ga na gauna eratou kacivi kina na veika vata oqori, me vakadeitaki kina ena nodratou itukutuku e lewe rua se lewe tolu na vosa kecega.

4 Me qai tiko e dua na vunivola raraba, me dau soli yani vua na veitukutukuvolai tale eso, ka kabi vata yani kei na kena sitivikiti ka ra sa dui sainitaka, me ra vakadeitaka ni sa dina na itukutuku era vola. Ni oti oya sa na qai rawa vua na vunivola raraba ni lotu me vola ena ivola levu ni lotu, vata kei na kena sitivikiti kei na ivakadinadina kece sara, kei na nona itukutuku, ni vakabauta vakaidina sara ni ra sa dina na vosa kei na itukutuku e cake, mai na veika e kila me baleta na ituvaki raraba ni nodra bula kei na nodra ilesilesi na tamata oqo ena lotu. Ni sa caka oti na veika oqo ena ivola levu ni lotu, sa na yaco me dodonu ka savasava na itukutukuvolai oqori, ka na vakadeitaka na cakacaka vakalotu me vaka ga ni a raica e matana ka rogoca e daligana, ka tukunikataka na veika vata oqori ena ivola levu ni lotu.

5 Dou na nanuma beka ni sa rui matailalai na ivakarau ni veika oqo; ia me’u tukuna vei kemudou, sa muri ga kina na inaki ni Kalou, ena kena muri na cakacaka vakalotu kei na vakavakarau sa vakarautaka ka lesia na Turaga ni sa bera ni tauyavutaki ko vuravura, me baleta na nodra vakabulai na mate era a mate ka sega ni kila e dua na ka me baleta na kosipeli.

6 Me kena ikuri, au vinakata tale ga mo dou nanuma ni a vakananuma tiko ko Joni na Daunivakatakila na ulutaga vata oqo me baleti ira na mate, ena gauna a kaya kina, me vaka ko ni na raica ena Ai Vakatakila 20:12—Ia ka’u a raici ira era a mate, na tamata lalai kei na turaga, era sa tu ena mata ni Kalou; a sa tevuki na ivola e so; e dua tani tale na ivola sa tevuki, na ivola ni bula; ia ko ira na mate era sa lewai mai na ka sa volai ena ivola, io me vaka na nodra ivalavala.

7 Dou na kila ena itukutuku oqo ni ra sa dolavi tu na ivola; ka qai dolavi tale e dua na ivola, sai koya na ivola ni bula; ia era na lewai na sa mate ena veika sa volai ena ivola eso oqori, me vaka na nodra cakacaka; o koya qori, sa dodonu kina me ivola e volai tu kina na itukutuku ni nodra cakacaka, na ivola ka tukuni tiko oqo, ka sai koya na itukutukuvolai era sa maroroi tu e vuravura. Ia na ivola, o koya na ivola ni bula sai koya na itukutukuvolai sa maroroi tu mai lomalagi; na kena ivakavuvuli e veisotari vakavinaka sara kei na ivunau dou sa vakaroti kina ena ivakatakila ka tu ena ivola au sa vola yani vei kemudou ni bera ni’u biuta mai na noqu itikotiko—me volai talega kina mai lomalagi na veika dou sa vola.

8 Ia, na yavu ni cakacaka vakalotu oqo sa koto ga ena kaukauwa ni matabete, mai na ivakatakila nei Jisu Karisito, sa rawa kina me vauci mai lomalagi na veika sa vauci e vuravura, kei na veika kecega dou sa sereka e vuravura ena sereki mai lomalagi. Se, ena dua tale na kena itukutukuni, ena dua tale na kena ivakavakadewa, na veika kecega dou vola e vuravura ena volai mai lomalagi, ia na veika dou na sega ni vola e vuravura, ena sega ni volai mai lomalagi; ni ra na lewai mai na ivola na nomudou mate, me vaka na nodra dui cakacaka, se era a cakava sara ga o ira vakataki ira na nodra cakacaka vakalotu, se ena dua tale na kena sala, mai vei ira era veisosomitaki ena vukudra, me vaka na cakacaka vakalotu sa vakarautaka tu na Kalou me baleti ira mai na tauyavutaki ni vuravura, me vaka na itukutukuvolai era sa maroroya tu mai me baleti ira na nodra mate.

9 Ena kena irairai beka vei ira eso ni sa rui ivunau kaukauwa eda veivosakitaka tiko oqo—e dua na kaukauwa e vola se vauca vata e vuravura ka vauca vata talega mai lomalagi. Ia ena veitabayabaki kece ni vuravura, ni sa solia na Turaga e dua na itabagauna ni matabete vua e dua na tamata ena ivakatakila, se ki na dua na umatamata, sa dau soli kina na kaukauwa oqo, Ia, na veika kecega era vakayacora na tamata oqori ena dodonu e tu vei ira, ena yaca ni Turaga, ka ra vakayacora dina sara ena yalodina, ka maroroya toka e dua na kena itukutukuvolai dodonu ka dina, sa yaco me lawa e vuravura ka vakakina mai lomalagi, ka na sega ni rawa ni bokoci, me vaka na nona lawa ko Jiova cecere. Oqo e dua na ivosavosa yalodina. O cei e rawa ni rogoca?

10 Kei na dua tale, me vaka ena Maciu 16:18, 19: Au sa kaya tale ga vei iko, O iko ko Pita, ia ena dela ni vatu oqo ka’u na tara kina na noqu isoqosoqo lewe ni lotu; ia ena sega ni rawata na matamata ki eli. Au na solia tale ga vei iko na idola ni matanitu vakalomalagi; ia na ka kecega ko na vauca e vuravura, ena vauci mai lomalagi; ia na ka kecega ko na sereka e vuravura, ena sereki mai lomalagi.

11 Ia na ka vuni cecere ka levu duadua ena tikina oqo, kei na ka e vinaka duadua kina na ulutaga sa koto e matada oqo, sa koto ena kena rawati na kaukauwa ni Matabete Tabu. Ki vua sa soli kina na idola eso oqo ena sega ni dua na kena dredre na kena rawati me kilai na dina e baleta na nodra vakabulai na luve ni tamata, me baleti ira na mate ka vakatalega kina vei ira na bula.

12 Sa rawati kina na lagilagi kei na vakarokoroko, ka vakakina na tawamate rawa kei na bula tawamudu—Raica sa tautauvata na ivakarau ni cakacaka vakalotu ni papitaiso ena tabadromuci e wai kei na mate, io sa tautauvata na ivakaro oqo kei na ivakaro ko ya; me tabadromuci e wai ka qai lamata cake tale mai wai sa vaka na tucake tale mai na mate ena nodra lamata mai na nodra ibulubulu; ia, na cakacaka vakalotu oqo sa nakiti me rau vakaveiwekanitaki kina na cakacaka vakalotu ni papitaiso me baleti ira na mate, ni sa tautauvata kei na mate.

13 O koya oqo, sa vakatautauvatataki kina na ibulubulu ki na tobu ni papitaiso, ka sa vakaroti kina me na tu ena dua na vanua e ruku ni vanua era dau soqoni kina na bula, me ra kilai tani kina na bula mai vei ira na mate, ia na ka taucoko me na tu na kedra ivakatakarakara, io me ra tautauvata kina e dua kei na dua tale—na ka e vakavuravura me vakatakarakarataki kina na veika e vakalomalagi, me vaka e tukuna ko Paula, ena 1 Korinica 15:46, 47 kei na 48:

14 Ia sa sega ni taumada na veika vakayalo; ia na veika ga sa bulia na Kalou; ni sa oti ko ya sa qai tu na veika vakayalo. Na imatai ni tamata sa caka mai na veika vakavuravura, sa ka vakavuravura; na ikarua ni tamata sai koya na Turaga mai lomalagi. Me vaka ni sa ka ni vuravura, era sa vakakina ko ira sa caka ena veika vakavuravura; ia me vaka ni sa ka ni lomalagi, era sa vakakina ko ira sa caka ena veika vakalomalagi. Ia me vaka ni sa baleti ira na nomudou mate na veika sa volai e vuravura, na kena sa maroroi tu vakavinaka, sa vakatalega kina na itukutuku mai lomalagi. Oqori, na kaukauwa ni veivauci ka na vesuka vata, ia ena dua na kena ibalebale ni vosa oqori, sa idola ni matanitu, ka sa koto kina na idola ni kila ka.

15 Ia oqo, oi kemuni na taciqu kei na ganequ lomani, meu vakadeitaka mada vei kemuni ni sai ira oqo na ivakavuvuli e baleti ira na mate kei ira na bula eda na sega ni rawa ni raica vakamamada, me vaka ni sa baleta na noda vakabulai. Ni sa yaga ka veiganiti ki na noda vakabulai na nodra vakabulai, me vaka sa tukuna ko Paula me baleti ira na qase—kevaka e sega o keda, e ra na sega ni vakavinakataki rawa—ia kevaka e sega o ira na wekada era sa mate, e da na sega ni vakavinakataki.

16 Ia oqo, me baleta na nodra papitaiso na mate, au na tukuna tale vei kemuni e dua na vosa a cavuta ko Paula, ena 1 Korinica 15:29: Kevaka sa sega ni vakaoqo, era na vakaevei ko ira sa papitaisotaki ena vukudra na mate, kevaka sa sega sara ni tucake tale ko ira na mate? A cava era sa papitaisotaki kina ena vukudra na mate?

17 Kei na dua tale, me ikuri ni vosa oqori, au na cavuta tale vei kemudou na nona vosa e dua na parofita, sa dei na matana ena vakalesui tale mai ni matabete, na veika lagilagi ena qai vakatakilai mai ena veisiga e muri, ka vakakina ena dua na kena ivalavala digitaki na kena ka lagilagi duadua mai vei ira na veiulutaga kecega e okati ki na kosipeli tawamudu, me vaka, na papitaiso ena vukudra na mate; ni sa kaya ko Malakai, ena iotioti ni wase, tikina e 5 kei na 6: Raica au na talai Ilaija na parofita e liu vei kemuni, ena qai lako mai e muri na siga i Jiova e levu ka rerevaki: ia ena vagolea ko koya na lomadra na qase ki vei ira na gone, kei na lomadra na gone vei ira na nodra qase, deu na lako mai ka cudruva na vanua ena veivakarusai.

18 Au rawa ni vakadewataka me matata cake sara mai na kena oqo na itukutuku oqo, ia na kena ituvaki mada ga oqo sa rauta vakavinaka na noqu inaki. Sa rauta mada ga me da kila, ena vuku ni tikina oqo, ni na vakanakuitataki ko vuravura ena dua na cudruvi, vakavo kevaka sa dua na isema kaukauwa, me umani ira vata na qase kei ira na gone, ena dua na ulutaga se dua tale—ia raica na ulutaga cava oqori? Na nodra papitaisotaki na mate. Ni da na sega ni rawa ni vakavinakataki sara koi keda kevaka e sega o ira; era na sega talega ni vakavinakataki sara ko ira kevaka e sega o keda. Ia era na sega ni vakavinakataki sara ko ira se koi keda, ke sega ko ira sa mate ka ra vakabauta tu na kosipeli; ni sa gadrevi me baleta na kena vakacurumi mai na itabagauna ni taucoko ni gauna, io na itabagauna sa tekivu tiko oqo na kena vakacurumi mai, me vakayacori mada e dua na veisemati e taucoko, ena nodra umani vata na itabagauna, na idola, kei na kaukauwa, kei na lagilagi, ka vakatakilai mai ena gauna i Atama ki na gauna oqo. Ia e sega walega ni o koya oqori, na veika e se bera ni vakatakilai mai na tauyavutaki ni vuravura, ia sa vunitaki tu mai vei ira na vuku ka lewa matau, ena vakatakilai vei ira na gonelalai kei ira na gone dramidrami ena gauna oqo, na itabagauna ni taucoko ni gauna.

19 Ena gauna oqo, na cava eda sa rogoca ena kosipeli sa vunautaki vei keda? Na domo ni mamarau! Na domo ni loloma levu mai lomalagi; kei na domo ni dina mai na loma ni qele; na itukutuku rekitaki vei ira na mate; na domo ni mamarau vei ira na bula kei ira na mate; na itukutuku rekitaki. Na kena lagilagi ena ulu ni vanua na yavai koya sa kauta mai na itukutuku rekitaki, ka sa tukuna mai ki Saioni: Raica, sa lewa na nomu Kalou! Me vaka na tegu kei Kameli, sa na vakakina na nodra kila ka me baleta na Kalou!

20 Kei na dua tale, na cava eda sa rogoca? Na itukutuku rekitaki mai Kumora! Ko Moronai, e dua na agilosi mai lomalagi sa tukuna na kena sa vakayacori na parofisai—na ivola ena qai vakatakilai mai. Na domo ni Turaga ena lekutu mai Feieti ena yasayasa vaka-Seneka, sa tukuni iratou na lewe tolu me ratou vakadinadinataka na ivola! Na domoi Maikeli ena bati ni Sasukuena, ka kila na tevoro ena nona rairai mai me vaka na agilosi ni rarama! Na domoi Pita, Jemesa kei Joni ena lekutu ena kedrau maliwa ko Amoni na yasayasa vaka-Sasukuena kei Kolosivili ena yasayasa vaka-Burumu, ena uciwai na Sasukuena, ka ratou tukuna kina ni sa tu vei iratou na idola ni matanitu vakalomalagi, ka vakakina na itabagauna ni taucoko ni gauna!

21 Kei na dua tale, na domo ni Kalou ena nona rumu na qase ko Witima mai Feieti ena yasayasa vaka-Seneka, ena veigauna eso ena veivanua duidui ena gauna taucoko ni kena veitosoyaki ka vakararawataki na Lotu i Jisu Karisito ni Yalododonu Edaidai! Kei na domoi Maikeli, na agilosi liu; na domodrau tale ga ko Keperieli kei Rafaele, kei na vuqa tale na agilosi duidui, me tekivu mai vei Maikeli se ko Atama ka yacova na gauna oqo, era sa tukuna kecega na nodra dui itabagauna, na nodra dodonu, na nodra ilesilesi, na nodra dokai, na nodra vakaturaga kei na lagilagi, kei na kaukauwa ni nodra matabete; ka vakatakilai mai ena laini ki na laini, na ivakavuvuli ki na ivakavuvuli; vakalailai eke, ka vakalailai e kea; era sa mai vakacegui keda ena nodra tukuna na veika sa bera ni yaco me tudei kina na noda vakanuinui.

22 Oi kemudou na wekaqu, me da kakua beka ni tomana tiko na inaki cecere vakaoqo? Me toso ki liu ka kakua ni suka ki muri. Na yaloqaqa, kemudou na wekaqu; ka toso tikoga ki liu, ki liu ki na qaqa! Me reki na lomamudou, ka marau vakalevu sara. Me kacabote mai ko vuravura ena lagasere. Me ra tukuna na mate na sere ni veivakacaucautaki tawamudu ki vua na Tui ko Imanueli, o koya sa lesia tu, ni bera ni buli ko vuravura, na veika ena rawa kina vei keda me da vueti ira tani mai na nodra valeniveivesu; io me ra sereki mai na nodra vesu tu.

23 Me ra kaila ena reki na veiulunivanua, io dou kaila vakadomoilevu na veibuca; dou seretaka na nona lagilagi na nomudou Tui Tawamudu, oi kemudou na veiwasawasa kei na vanua mamaca! Mo dou drodro sobu ena marau na veiuciwai, na uciwai lalai kei na veisoniwai! Me vakacaucautaka na Turaga na veikau ni lekutu kei na vunikau kecega ni vanua; ia dou kaila ena marau na veivatu! Dou ia vata na sere na matanisiga, na vula kei na kalokalo ivolasiga, io dou kaila ena reki oi kemudou kecega na luve ni Kalou! Me vakacaucautaka tiko ga na yacana me sega ni mudu ka sega ni mudu na ka buli kecega! Ka’u sa kaya tale, sa lagilagi vakaidina na domo eda sa rogoca mai lomalagi, ka tukuna tiko ki daligada, na lagilagi, kei na veivakabulai, kei na rokovi, kei na tawa mate rawa, kei na bula tawamudu; na veimatanitu vakatui, kei na kaukauwa!

24 Raica, sa voleka ni yaco mai na siga sa levu ni Turaga; ia ko cei ena yalodei ena siga ni nona lako mai, io ko cei me na tu rawa ni sa rairai mai ko koya? Raica sa vaka na nona bukawaqa na dausava koula ko koya, ka vaka na nodra sovu na dausava isulu; ia ena tiko ko koya me vaka e dua sa dau vakawaicalataka ka savata na siliva, ka na vakasavasavataki ira na kawa i Livai, ka savai ira me vaka na koula kei na siliva, me ra vakacabora kina vua na Turaga na ivakacacabo ena bula dodonu. Ia koi keda na lewenilotu, na Yalododonu Edaidai me da vakacabora vua na Turaga nai vakacacabo ena bula dodonu; me da kauta yani ki na nona valetabu, ni sa vakacavari, e dua na ivola ka lewena na kedra itukutukuvolai na noda mate, ka sa kilikili me ciqomi ena kena ivalavala kecega.

25 Oi kemudou na wekaqu, e se levu tu na ka me’u tukuna vei kemudou ena vuku ni tikina oqo; ia sa rauta mada ena gauna oqo, ka na qai tomani na ulutaga oqo ena dua tale na gauna. Koi au, me vaka ena veigauna kecega, na nomudou tamata yalomalumalumu ka itokani sega ni dau veivukiyaki,