ບົດທີ 12
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາແກ່ໂຈເຊັບ ໄນ້ ຜູ້ພໍ່, ທີ່ເມືອງຮາມໂມນີ ລັດເພັນໂຊເວເນຍ, ເດືອນພຶດສະພາ 1829. ໂຈເຊັບ ໄນ້ ເຊື່ອການປະກາດຂອງໂຈເຊັບ ສະມິດ ກ່ຽວກັບວ່າເພິ່ນມີແຜ່ນຈາລຶກຂອງພຣະຄຳພີມໍມອນ ແລະ ວຽກງານການແປທີ່ພວມດຳເນີນຢູ່ ແລະ ໄດ້ມອບອຸປະກອນຫລາຍຢ່າງໃຫ້ໂຈເຊັບ ສະມິດ ແລະ ຜູ້ຂຽນຂອງເພິ່ນ, ຊຶ່ງຊ່ວຍພວກເພິ່ນໃຫ້ສາມາດແປຕໍ່ໄປ. ຕາມການຂໍຮ້ອງຂອງໂຈເຊັບ ໄນ້, ສາດສະດາ ໄດ້ທູນຖາມພຣະຜູ້ເປັນເຈົ້າ ແລະ ໄດ້ຮັບການເປີດເຜີຍ.
1–6, ຜູ້ທຳງານໃນສວນອະງຸ່ນຈະໄດ້ຮັບຄວາມລອດ; 7–9, ທຸກຄົນທີ່ປາດຖະໜາ ແລະ ເໝາະສົມ ສາມາດຮັບໃຊ້ໃນວຽກງານຂອງພຣະຜູ້ເປັນເຈົ້າ.
1 ວຽກງານອັນຍິ່ງໃຫຍ່ ແລະ ໜ້າອັດສະຈັນພວມຈະອອກມາສູ່ລູກຫລານມະນຸດ.
2 ຈົ່ງເບິ່ງ, ເຮົາຄືພຣະເຈົ້າ; ຈົ່ງເອົາໃຈໃສ່ຕໍ່ຄຳຂອງເຮົາ, ຊຶ່ງມີຊີວິດ ແລະ ມີພະລັງ, ແຫລມຄົມຫລາຍກວ່າດາບສອງຄົມ, ຊຶ່ງຈະແຍກທັງຂໍ້ຕໍ່ ແລະ ໄຂໃນກະດູກອອກຈາກກັນ; ສະນັ້ນຈົ່ງເອົາໃຈໃສ່ຕໍ່ຄຳຂອງເຮົາ.
3 ຈົ່ງເບິ່ງ, ທົ່ງກໍຂາວພ້ອມແລ້ວທີ່ຈະເກັບກ່ຽວ; ສະນັ້ນ, ຜູ້ໃດພ້ອມແລ້ວທີ່ຈະເກັບກ່ຽວ, ກໍໃຫ້ເຂົາເດ່ກ່ຽວຂອງເຂົາອອກໄປດ້ວຍສຸດພະລັງຂອງເຂົາ, ແລະ ເກັບກ່ຽວໃນຂະນະທີ່ຍັງເວັນຢູ່, ເພື່ອເຂົາຈະໄດ້ສະສົມຄວາມລອດອັນເປັນນິດໄວ້ໃຫ້ແກ່ຈິດວິນຍານຂອງເຂົາໃນອານາຈັກຂອງພຣະເຈົ້າ.
4 ແທ້ຈິງແລ້ວ, ຄົນໃດກໍຕາມທີ່ຈະເດ່ກ່ຽວຂອງຕົນອອກໄປ ແລະ ເກັບກ່ຽວ, ຄົນໆນັ້ນແມ່ນຖືກເອີ້ນ ຈາກພຣະເຈົ້າ.
5 ສະນັ້ນ, ຖ້າຫາກເຈົ້າໝັ່ນຂໍຈາກເຮົາ ເຈົ້າກໍຈະໄດ້ຮັບ; ຖ້າເຈົ້າໝັ່ນເຄາະ ແລ້ວຈະມີຜູ້ໄຂປະຕູໃຫ້ເຈົ້າ.
6 ບັດນີ້, ດັ່ງທີ່ເຈົ້າໄດ້ຂໍ, ຈົ່ງເບິ່ງ, ເຮົາກ່າວກັບເຈົ້າວ່າ ຈົ່ງຮັກສາບັນຍັດຂອງເຮົາ, ແລະ ສະແຫວງຫາທີ່ຈະນຳອອກມາ ແລະ ສະຖາປະນາອຸດົມການຂອງຊີໂອນ.
7 ຈົ່ງເບິ່ງ, ເຮົາກ່າວກັບເຈົ້າ, ແລະ ກັບທຸກຄົນຜູ້ປາດຖະໜາທີ່ຈະນຳວຽກງານນີ້ອອກມາ ແລະ ສະຖາປະນາມັນຂຶ້ນ;
8 ແລະ ບໍ່ມີໃຜຈະສາມາດຊ່ວຍໃນວຽກງານນີ້ ຍົກເວັ້ນແຕ່ເຂົາຈະ ຖ່ອມຕົວ ແລະ ເຕັມໄປດ້ວຍ ຄວາມຮັກ, ໂດຍມີ ສັດທາ, ຄວາມຫວັງ, ແລະ ຄວາມໃຈບຸນ, ຢັບຢັ້ງຕົນໃນທຸກສິ່ງ, ບໍ່ວ່າອັນໃດກໍຕາມທີ່ຈະຝາກຝັງໄວ້ໃນການດູແລຂອງເຂົາ.
9 ຈົ່ງເບິ່ງ, ເຮົາເປັນຄວາມສະຫວ່າງ ແລະ ຊີວິດຂອງໂລກ, ທີ່ກ່າວຄຳເຫລົ່ານີ້, ສະນັ້ນຈົ່ງເອົາໃຈໃສ່ຈົນສຸດພະລັງຂອງເຈົ້າ, ແລະ ຈາກນັ້ນ ເຈົ້າຈະຖືກເອີ້ນ. ອາແມນ.