Seksen 137
Wan visen we Lod i givim long Profet Josef Smit, long tempol long Ketlan, Ohaeo, long 21 Jenuware 1836. Hemia i bin hapen long taem we oli mekem wok blong ol odinens blong stap rere from dedikesen blong tempol.
1–6, Profet i luk brata blong hem, Alvin, insaed long selestial kingdom; 7–9, Lod i talemaot doktrin blong fasin blong sevem ol dedman; 10, Jisas i sevem evri pikinini i go long selestial kingdom.
1 Ol heven oli bin open long mifala, mo mi bin luk selestial kingdom blong God, mo glori blong hem, be sapos mi stap long bodi blong mit mo bun, o aot, mi no save talem.
2 Mi bin luk get we i naes i bitim mak, we tru long hem, olgeta we oli gat raet long kingdom ia bae oli pas long hem, we i olsem faea we i laet mo i go raon;
3 Mo tu, jea blong God we i saen olsem faea, we Papa mo Pikinini i sidaon long hem.
4 Mi bin luk ol naesfala rod blong kingdom ia, we i luk olsem se oli wokem wetem gol.
5 Mi bin luk Papa Adam mo Ebraham; mo papa blong mi, mo mama blong mi; mo brata blong mi, Alvin, we i bin ded longtaem finis;
6 Mo mi bin askem miwan olsem wanem nao hem i bin kasem wan ples insaed long kingdom ia, from se mi save se hem i livim laef long wol ia bifo Lod i bin putum han blong hem blong karem Isrel i kam tugeta long nambatu taem, mo hem i no bin kasem baptaes blong kam klin aot long ol sin.
7 Olsem ia nao voes blong Lod i bin kam long mi, i talem: “Evriwan we i bin ded be oli no kasem save long gospel ia, we bae oli akseptem sapos mi bin letem olgeta oli stastap, bae oli gat ples long selestial kingdom blong God.
8 Mo evriwan we bae oli ded, stat long naoia i go, mo oli no kasem save long gospel ia, we bae oli akseptem nomo wetem ful hat blong olgeta, bae oli gat ples long kingdom ia;
9 From we mi, Lod, bae mi jajem evri man folem wok blong olgeta, folem wanem we hat blong olgeta i wantem.”
10 Mo tu, mi bin luk se evri pikinini we oli ded bifo oli kasem yia we oli save ansa from aksen blong olgeta, Lod i sevem olgeta oli go long selestial kingdom blong heven.