Jekjōn 29
Revelesōn letok kōn Josep Smith Rikanaan eo, im̧aan mejān jiljino elder ro, ilo Fayette, New York, Jeptōm̧ba 1830. Revelesōn in kar leļo̧k jet raan m̧oktaļo̧k jān kwelo̧k eo, eo ekar ijjino ilo Jeptōm̧ba 26, 1830.
1–8, Kraist ej ain rikāālet ro An; 9–11, Itok eo An ej bōktok Meļļenium eo; 12–13, Jon̄oulruo ro renaaj ekajete aolepān Israel; 14–21, Kakōļļe ko, mennin kaen̄tanaan ko, im jorrāān ko renaaj itok im̧aan Itok eo Kein Karuo; 22–28, Jerkakpeje eo āliktata im ekajet eo āliktata rej ļoortok Meļļenium eo; 29–35, Men otemjeļo̧k ewōr nemāmeer jetōb n̄an Irooj; 36–39, Devil im jar ko an kar kadiwōjļo̧k er jān lan̄ n̄an kapoik armej; 40–45, Wōtlo̧k eo im Pinmuur eo rej bōktok lo̧mo̧o̧r; 46–50, Ajri ro reddik em̧ōj lo̧mo̧o̧ren er kōn Pinmuur eo.
1 Ron̄jake ainikien Jisōs Kraist, ami Ripinmuur, N̄a E eo Eļap, eo Pein an tūriam̧okake ar pinmuur kōn jero̧wiwi ko ami;
2 Eo enaaj ain armej ro An em̧ool āinwōt juon lo̧lo̧ ej aini jojo ko nejin ium̧win pā ko pein, em̧ool jon̄an wōt eo enaaj eo̧ron̄ Ainikiō im kōttāik er Im̧aō, im kūr Eō ilo jar ekajoor.
3 Lo, em̧ool, em̧ool, Ij ba n̄an kom̧, bwe ilo iien in em̧ōj jeorļo̧k jero̧wiwi ko ami, kōn menin kom̧ij bōki men kein; ak keememej im jab bar jero̧wiwi, n̄e nana ko raab itok ioomi.
4 Em̧ool, Ij ba n̄an kom̧ ro em̧ōj kāālet er jān laļ in n̄an kwaļo̧k gospel eo Aō kōn ainikien lan̄lōn̄, āinwōt kōn ainikien juon jilel.
5 Kotak būruōmi im kom̧in m̧ōņōņō, bwe Ij pād ilubwiljimi, im Ij ami rijojomar ippān Jemān; im ej Ankilaan em̧m̧an n̄an lewōj n̄an kom̧ aelōn̄ in kiin̄ eo.
6 Im, āinwōt e kar jeje—Jabdewōt kom̧ naaj kajjitōk ilo tōmak, juon wōt ilo jar ekkar n̄an Aō jiron̄, kom̧ naaj bōk.
7 Im em̧ōj kūr kom̧ n̄an kajejjet aintok in ro Aō rikāālet; bwe ro Aō rikāālet rej ron̄ Ainikiō im jab kapen burueer;
8 Kōn menin kean̄ eo em̧ōj an etal jān Jemān bwe naaj ainitok er ilo juon jikin ioon mejān āniin, n̄an kōpooj burueer im n̄an pojak ilo men otemjeļo̧k ņae raan eo n̄e en̄taan im n̄ūta jilkinļo̧k er ioon ro renana.
9 Bwe awa eo ej epaak im raan eo ej jab ettoļo̧k n̄e laļ ej kalo; im aolep ro rej juwa im er ro rej kōm̧m̧ane nana naaj āinwōt ujooj em̧ōrā; im I naaj tile er, Irooj in Inelep eo ej ba, bwe nana ej jamin pād ioon laļ in;
10 Bwe awa eo ej epaak, im men eo me kar kōnono kake jān rijjilōk ro Aō eaikuj in kūrm̧ool; bwe āinwōt rekar kōnono āindein enaaj jejjet kūtien;
11 Bwe Inaaj kwaļo̧k Eō make jān lan̄ kōn kajoor im aiboojoj eļap, ippān aolepān inelep ko ijo, im jokwe ilo wānōk ippān armej ro ioon laļ juon to̧ujin iiō ko, im rinana reban jutak.
12 Im bar juon alen, em̧ool, em̧ool, Ij ba n̄an kom̧, im em̧ōj an mootļo̧k im̧aan ilo juon kean̄ epen, jān ankilaan Jemān, bwe rijjilōk ro Aō, Jon̄oulruo ro me rekar pād Ippa ilo jerbal eo Aō ilo Jerusalem, renaaj jutak ianbwijmaron̄ū ilo raan eo Ij itok ilo juon jurōn kijeek, im kōņak liboror ko in wānōk, ippān kūrawūn ko ioon bōraer, ilo wōj em̧ool āinwōt N̄a, n̄an ekajete aolepān m̧weo im̧ōn Israel, em̧ool jon̄an wōt eo raar iakwe Eō im kōjparok kien ko Aō, im jab bar juon.
13 Bwe juon jilel enaaj jan̄ jim̧or aetok im eļļaaj, em̧ool āinwōt ioon Toļ Sainai, im aolepān laļ enaaj m̧akūtkūt, im renaaj jerkaktok—aaet, em̧ool ro remej me rekar mej ilo N̄a, n̄an bōk kūrawūn in weeppān, im n̄an kōņak ioer, em̧ool āinwōt N̄a, n̄an pād Ippa, bwe kōmin maron̄ juon wōt.
14 Ak, lo, Ij ba n̄an kom̧ bwe m̧okta jān raan in eļap enaaj itok aļ enaaj marok, im allōn̄ enaaj oktak n̄an bōtōktōk, im iju ko renaaj wōtlo̧k jān lan̄, im enaaj lōn̄ļo̧k kakōļļe ko reļļapļo̧k ilo lan̄ ilōn̄ im ilo laļ ium̧win;
15 Im enaaj wōr jan̄ im lim̧ō ilubwiljin inelep in armej raņ;
16 Im enaaj wōr juon wōt dekā eļap jilkinļo̧k n̄an ko̧kkure mennin eddek ko an laļ.
17 Im enaaj waļo̧k, kōnke nana eo an laļ in, bwe Inaaj bōk idenoņe ioon ro renana, bwe reban ukeļo̧k; bwe kap in Aō libabne eobrak; bwe lo, bōtōktōkū ej jamin karreoik er eļan̄n̄e rej jab ron̄jake Eō.
18 Kōn menin, N̄a Irooj Anij naaj jilkinļo̧k ļo̧n̄ ko ioon mejān laļ in, ko renaaj eddāp n̄an ro rej pād ie, im naaj kan̄ kanniōkier, im naaj kōm̧m̧an bwe likaakrak ko ren itok ioer;
19 Im loer renaaj n̄ak m̧akūtkūt bwe ren jab naaj kōnono ņae Eō; im kanniōkier renaaj jarļo̧k jān di ko dier, im mājeer jān ijo jikier;
20 Im enaaj waļo̧k bwe mennin mour ko in bukun wōjke ko im bao ko in mejatoto renaaj oran̄ļo̧k er.
21 Im kabun̄ in eļap im kajjōjō, eo ej kōrā kijon̄ in aolepān laļ, naaj jolaļļo̧k ilo kijeek in ko̧kkure, ekkar āinwōt ekar kōnono jān lo̧n̄iin Ezekiel rikanaan eo, eo ar kōnono kōn men kein, me rejjan̄in kūrm̧ool ak em̧ool rej aikuj, āinwōt Aō mour, bwe mennin jōjō ko rej jamin irooj.
22 Im bar juon alen, em̧ool, em̧ool, Ij ba n̄an kom̧ bwe n̄e to̧ujin iiō rej jem̧ļo̧k, im armej raņ rej bar jino kaarmejjete aer Anij, innām Inaaj oņaake laļ kōn jidik wōt tōrean;
23 Innām jem̧ļo̧k eo enaaj itok, im lan̄ im laļ naaj wōran̄iļo̧k im rejako, im enaaj wōr juon lan̄ ekāāl im juon laļ ekāāl.
24 Bwe aolep men ko rem̧or renaaj jako, im aolep men renaaj erom kāāl, em̧ool lan̄ im laļ, im aolep men otemjeļo̧k kobbaer, jim̧or armej raņ im mennin mour kaņ, bao ko in mejatoto, im ek ko in lo̧jet;
25 Im jab juon kooļ, jab pelo̧k, enaaj jako, bwe e ej jerbal ko an Peiū.
26 Ak, lo, em̧ool Ij ba n̄an kom̧, m̧okta jān an laļ naaj jako, Maikeel, arkenjeļ eo Aō, naaj kōjan̄ jilel eo an, innām aolep rimej renaaj ruj, bwe lōb ko aer renaaj peļļo̧k, im renaaj jerkaktok—aaet, em̧ool aolepāer.
27 Im riwānōk ro naaj aintok er ianbwijmaron̄ū n̄an mour indeeo; im ro renana ianmiin̄ū Inaaj jook in bōk er Aō im̧aan Jemān;
28 Kōn menin Inaaj ba n̄an er—Iļo̧k jān Eō, kom̧ rilia, ilo kijeek ejjeļo̧k jem̧ļo̧kin, kar kōpooje n̄an devil im enjeļ ro an.
29 Im kiiō, lo, Ij ba n̄an kom̧, Ijjan̄in ilo jabdewōt iien kwaļo̧k jān Lo̧ņiiū make bwe renaaj ro̧o̧ltok, bwe ijo Ij pād ie rej jab maron̄ itok n̄an e, bwe er ejjeļo̧k aer kajoor.
30 Ak keememej bwe aolep ekajet ko Aō rejjan̄in kar liļo̧k n̄an armej raņ; im āinwōt an naan ko kar diwōjļo̧k jān Lo̧n̄iiū em̧ool āindein renaaj kūrm̧ool, bwe eo m̧oktata enaaj āliktata, im bwe eo āliktata naaj m̧oktata ilo aolep men ko otemjeļo̧k Iaar kōm̧anm̧an jān naan in kajoor eo Aō, eo ej kajoor eo an Jetōb eo Aō.
31 Bwe jān kajoor eo an Jetōb eo Aō Iaar kōm̧anm̧an er; aaet, aolep men otemjej jim̧or ilo jetōb im ilo kanniōk—
32 M̧oktata ilo jetōb, karuo ilo kanniōk, eo ej jinoin jerbal eo Aō; im bar juon alen, m̧oktata ilo kanniōk, im karuo ilo jetōb, eo ej āliktata in jerbal eo Aō—
33 Im ekkōnono n̄an kom̧ bwe kom̧in maron̄ meļeļe ekkar n̄an jeļā ko ami; ak n̄an N̄a jerbal ko Aō ejjeļo̧k jem̧ļo̧kier, im ejjeļo̧k jinoier; ak ej liwōj n̄an kom̧ bwe kom̧in maron̄ meļeļe, kōnke kom̧ ar kajjitōk e jān Eō im kom̧ij errā.
34 Kōn menin, em̧ool Ij ba n̄an kom̧ bwe aolep men ko otemjeļo̧k n̄an Eō rej jetōb, im jaab ilo jabdewōt iien Inan̄in kar lewōj n̄an kom̧ juon kien eo ej kanniōk; im jab jabdewōt armej, ak ro nejin armej; jab Adam, jemāmi, eo Iaar kōm̧anm̧ane.
35 Lo, Iaar leļo̧k n̄an e bwe en ripinej jenkean make; im Iaar leļo̧k n̄an e kien, ak ejjeļo̧k kien kanniōk Iaar leļo̧k n̄an e, bwe kien ko Aō rej jetōb; rej jab an laļ in ak n̄an jidik iien, im jab ekkar n̄an juwaļōn̄ļōn̄ ak m̧ōm̧ an kanniōk.
36 Im eaar waļo̧k bwe Adam, kōnke devil eaar kapo e—bwe, lo, devil ekar m̧okta jān Adam, bwe eaar jum̧ae Eō, im ba, Letok n̄an eō utiej eo Am, eo ej Aō kajoor; im barāinwōt juon-m̧ōttan-jilu in inelep ko ilan̄ eaar ukōtļo̧k er jān Eō kōnke anemkwōj in kāālet eo aer;
37 Im kar jolaļļo̧k er, im āindein ar itok devil im enjeļ ro an;
38 Im, lo, ewōr juon jikin em̧ōj kōpooje n̄an er jān jinoin, jikin eo ej hell.
39 Im emennin aikuj bwe devil en kapo ro nejin armej, n̄e jaab reban maron̄ ro ripinej jenkwaer make; bwe eļan̄n̄e rej jamin bōk meo̧ rej jamin jeļā tōn̄al eo—
40 Kōn menin, eaar waļo̧k bwe devil ar kapo Adam, im eaar m̧ōn̄ā jān leen wōjke eo kōmo̧iki im rupe kien eo, ilo men in eaar erom rikōm̧akoko n̄an ankilaan devil, kōnke eaar kōtļo̧ke n̄an kapo.
41 Kōn menin, N̄a, Irooj Anij, Iaar kōm̧m̧an bwe en diwōjļo̧k jān Jikin Kallib Iden, jān im̧aan Meja, kōnke bōd eo an, eo kake eaar erom rimej ilo jetōb, eo ej mej eo m̧oktata, em̧ool ejja mej eo me ej mej eo āliktata, eo ej ilo jetōb, eo naaj likūt ioon rinana n̄e Inaaj ba: Ilo̧k, kom̧ rilia.
42 Ak, lo, Ij ba n̄an kom̧ bwe N̄a, Irooj Anij, Iaar leļo̧k n̄an Adam im n̄an ro ineen, bwe ren jab mej āinwōt n̄an mej eo ilo kanniōk, m̧ae N̄a, Irooj Anij, en jilkinļo̧k enjeļ ro n̄an kwaļo̧k n̄an er ukeļo̧k im lo̧mo̧o̧r, kōn tōmak ioon etan Nejin Eaar Keotake.
43 Im āindein N̄a, Irooj Anij, Iaar jitōn̄ n̄an armej raan ko ilo mour eo an—bwe jān an make mej en maron̄ jerkak ilo jab wabanban n̄an mour indeeo, em̧ool jon̄an wōt eo enaaj kar tōmak;
44 Im ro rej jab tōmak n̄an mej indeeo; bwe rej jab maron̄ bōk lo̧mo̧o̧r jān wōtlo̧k eo aer ilo jetōb, kōnke rej jab ukeļo̧k;
45 Bwe rej iakwe marok im jab meram, im jerbal ko aer renana, im rej bōk wōņāer jān eo rej kōllaajrak n̄an pokake.
46 Ak lo, Ij ba n̄an kom̧, bwe ajri ro reddik em̧ōj lo̧mo̧o̧ren er jān pedped ko an laļ kōn Nejin Eaar Keotake;
47 Kōn menin, rej jab maron̄ jero̧wiwi, bwe kajoor kar jab leļo̧k e n̄an Setan n̄an kapo ajri ro reddik, m̧ae rej jino maron̄ in bōk eddo Im̧aō;
48 Bwe em̧ōj leļo̧k e n̄an er em̧ool āinwōt Ankilaō, ekkar n̄an Aō make kōņaan, bwe men ko reļļap ren maron̄ aikuji jān pein ro jemāer.
49 Im, bar juon alen, Ij ba n̄an kom̧, jabdewōt eo ewōr an jeļāļo̧kjeņ, Ikar jab jiron̄ n̄an ukeļo̧k ke?
50 Im e eo ejjeļo̧k an meļeļe, epād wōt ilo N̄a n̄an kōm̧m̧an ekkar n̄an e āinwōt kar jeje. Im kiiō Ij jab kwaļo̧k ļo̧k wōt n̄an kom̧ ilo iien in. Amen.