Ɔfã 38
Nyikyerɛ a wɔnam Joseph Smith Nkɔnhyɛnyi no do dze mae wɔ Fayette, New York, Sanda 2, 1831. Aber no, nna Asɔr no reyɛ ehyiadzi kɛse bi.
1–6, Christ na ɔbɔɔ ndzɛmba nyina; 7–8, Ɔwɔ N’Ahotseweefo no a ɔnnkɛkyɛr na woehu No no mu; 9–12, Honam nyinara aprɔw wɔ N’enyim; 13–22, Oesiesie anohoba asaase ato hɔ ama N’Ahotseweefo wɔ aber yi nye mbersantsen mu; 23–27, Wɔhyɛ Ahotseweefo dɛ wɔnyɛ kor na wɔmfa obu mma hɔnho nkorkor dɛ wɔyɛ enuanom; 28–29, Wɔhyɛ akõkoekõ ho nkɔm; 30–33, Wɔbɛma Ahotseweefo no tum efi sor na wɔakɔ aman nyinara mu; 34–42, Wɔhyɛ Asɔr no dɛ wɔnhwɛ ehiafo na abɔbɔfo, na wɔmper nhwehwɛ mbersantsen ahonyadze no.
1 Dɛm na Ewuradze, hom Nyankopɔn, Jesus Christ mpo, Okokroko Emi Mara no, Alpha na Omega, ahyɛse na ewiei no, nyia n’enyi sõ mbersantsen mbea nyina do, nye Seraphfo dɔmtutuw a wɔwɔ sor, ansaana wɔrobɔ wiadze no se;
2 Emi na minyim ndzɛmba nyinara no, osiandɛ ndzɛmba nyinara gu m’enyim;
3 Emi nye nyia ɔkasae, na wɔyɛɛ wiadze no, na ndzɛmba nyinara nam mo do bae.
4 Emi nye nyia ɔafa Enoch ne Zion abɔ no bo no; na nokwar, mese dɛ dodowara a wɔagye me dzin edzi no, osiandɛ emi nye Christ, na mankasa me dzin ntsi, na osian bɔgya a mikyii no tum ntsi, maserɛ wɔ Egya no hɔ ama hɔn.
5 Mbom hwɛ, medze emumuyɛfo hɔn asefo no ato sum mpokyerɛ no mu ekesi atsɛmbu da kɛse no a ɔbɛba asaase n’ewiei no;
6 Na dɛm na mebɛma wɔdze emumuyɛfo a worinntsie me ndze na mbom wopirim hɔn akoma no esie, na wondue, wondue, wondue na mbusu bɛba hɔn do.
7 Na, hwɛ, nokwar, nokwar, mese hom dɛ m’enyi wɔ hom do. Mowɔ hom finimfin na hom nntum nnhu me;
8 Na da no bɛba ntsɛm a hom bohu me, na hom ehu dɛ emi nye mara; na ɔnnkɛkyɛr na sum n’akataenyim no apa, na nyia wɔnntseew no ho no nnkotum egyina wɔ da no mu.
9 Dɛm ntsi, hom mbɔ hom asen do na hom nyɛ ahosiesie. Hwɛ, ahenman no yɛ homdze, na ɔtamfo no nnkedzi konyim.
10 Nokwar mese hom dɛ, hom ho atsew, na mbom nnyɛ hom nyinara; na dɔm biara nnyi hɔ bio a m’enyi gye hɔnho yie;
11 Osiandɛ honam nyinara aprɔw wɔ m’enyim; na sum no tum agye asaase do, wɔ adasamba mu, wɔ sor dɔmtutuw nyinara enyim—
12 Dza ɔma kommyɛ dzi hen, na yaw kã mbersantsen nyina, na abɔfo no rotweɔn dza mbra kɛse no dɛ wontwa asaase do ndɔbaa, na wɔbɛtase nworahaban no na wɔahyew; na hwɛ, ɔtamfo no ayɛ kor.
13 Na afei merekyerɛ hom esumadze bi, adze a ɔhyɛ nsumaamu, ɔdze hom nsɛɛe bɛba aber yi mu, na hom nnyim;
14 Na afei merekã kyerɛ hom, na woehyira hom, nnyɛ osian hom emumuyɛ ntsi, nna nnyɛ hom ekyingye akoma so ntsi; na nokwar, hom mu binom dzi fɔ wɔ m’enyim, na mbom mubohu hom mberɛwyɛ ho mbɔbɔr.
15 Dɛm ntsi, ofi aber yi dze kɔ hom nhyɛ dzen; mma hom nnsuro, osiandɛ ahenman no yɛ homdze.
16 Na osian hom nkwagye ntsi mema hom mbrasɛm, osiandɛ matse hom mpaabɔ, na ehiafo no dze hɔn nsɛm ato m’enyim, na esikafo no emi na mobɔɔ hɔn, na honam nyina yɛ medze, na monnhwɛ nyimpa enyim.
17 Na mayɛ asaase frɔmfrɔm, na hwɛ, ɔyɛ m’ananadze egua, dɛm ntsi, mibegyina do bio.
18 Na mema me nsa do na ɔyɛ mepɛ dɛ medze ahonyadze kɛse ma hom, ɔyɛ anohoba asaase mpo, asaase a numfonsu na ewo repem do, dza sɛ Ewuradze ba a ndom biara nnkɛba do;
19 Na sɛ hom dze hom akoma nyina per hwehwɛ a, medze bɛma hom dɛ ɔyɛ hom egyapadze asaase.
20 Na iyi bɛyɛ ahyɛmu ama hom, hom benya dze ayɛ hom egyapadze asaase, na ɔayɛ hom mba hɔn egyapadze afebɔɔ, mber dodow a asaase yi bɛtsena hɔ, na ɔbɛyɛ homdze bio kesi mbersantsen, na orunntwa mu da.
21 Mbom, nokwar mese hom dɛ ɔrennkyɛr na hom rinnya ɔhen anaa ɔhwɛdofo, na mebɛyɛ hom hen na mahwɛ hom do.
22 Dɛm ntsi, hom ntsie me ndze na hom nkã mo do, na hom bɛyɛ fahodzifo, na sɛ meba a hom rinnya mbra biara nnkã medze ho; osiandɛ emi nye hom mbramafo, na ebɛnadze na obotum apem me nsa adze?
23 Na nokwar, mese hom dɛ, hom nkyerɛkyerɛ homho nkorkor dɛ mbrɛ dzibew a medze hom esisi no tse;
24 Na hom mma nyimpa biara mbu no nua dɛ nankasa noho, na hom mbɔ ɔbra pa nye krɔnkrɔnyɛ wɔ m’enyim.
25 Na bio, mese hom dɛ, hom mma nyimpa biara mbu no nua dɛ nankasa noho.
26 Na hom mu woana na ɔwɔ mba duebien, na wɔsom no setsie mu, na ɔnnyɛ nyiyimu, na ɔbɛse kor dɛ: Wɔnhyɛ no ntar a ɔyɛ fɛw na ɔntsena ha, na ɔbɛse kor so dɛ: Wɔnhyɛ no ntar a atsetsew na ɔntsena noho—na ɔbɔhwɛ ne mba no na ɔakã dɛ midzi pɛrpɛr?
27 Hwɛ, medze iyi ayɛ abɛbu ama hom, na ɔtse dɛ mara so mpo. Mese hom dɛ, hom nyɛ kor; na sɛ hom annyɛ kor a, nna hom nnyɛ medze.
28 Na bio, mese hom dɛ ɔtamfo no hyɛ nsumaamu, na ɔreper hwehwɛ hom nkwa.
29 Hom tse akõkoekõ nkã wɔ aman a ɔwɔ ekyirekyir no mu, na hom kã dɛ ɔrennkyɛr na akõkoekõ akɛse esisi aman a ɔwɔ ekyirekyir no mu, na mbom hom nnyim nyimpa a wɔwɔ homankasa hom asaase do no hɔn akoma mu.
30 Mekã nsɛm yinom kyerɛ hom, osian hom mpaabɔ ntsi; dɛm ntsi hom nkora nyansa wɔ hom bo mu, amma emumuyɛfo enndua hɔn emumuyɛdze mu annda ndzɛmba yinom edzi annkyerɛ hom, wɔ kwan bi do a ɔbɛma wɔdze ndze a ɔyɛ dede akasa wɔ hom asowa mu akyɛn dza ɔbɛma asaase awosow; na mbom sɛ hom ayɛ ahosiesie a, hom nnkosuro.
31 Na ama hom eetum eguan efi ɔtamfo no tum ase, na wɔdze hom aaboa ano ayɛ hom atseneneefo a nkekãa nye afɔbu biara nnyi hom ho dze ama me—
32 Dɛm ntsi na mehyɛɛ hom dɛ hom nkɔ Ohio no; na hɔ na medze me mbra bɛma hom, na hɔ na medze adom akyɛdze tum a ofi sor bɛma hom.
33 Na hɔ na obiara a mepɛ no, mebɛma ɔakɔ aman nyinara mu, na wɔbɛkã dza ɔwɔ dɛ wɔyɛ akyerɛ hɔn; na mahyehyɛ dwumadzi kɛse bi ato hɔ, na wɔbɛgye Israel nkwa, na mibegya hɔn akɔ beebiara a mepɛ, na tum biara nnkotum apem me nsa adze.
34 Na afei, medze mbrasɛm ma asɔr a ɔwɔ dɛm mbea yi do no dɛ wɔmma nyimpa binom a wɔwɔ hom mu nsisi dzibew, asɔrmba nyina na wɔmbɔ mu mfa hɔn ndze nyi hɔn;
35 Na hɔn na wɔbɔhwɛ ehiafo nye abɔbɔfo do, na wɔama hɔn mboa amma woeennhu amandze; na wɔasoma hɔn dze hɔn akɔ bea a mahyɛ hɔn no do;
36 Na iyi nye hɔn edwuma, dɛ wɔbɔhwɛ asɔr yi n’egyapadze ho nsɛm do.
37 Na hɔn a wɔwɔ haban a wonnkotum atɔn no, wɔmma wongya no hɔ anaadɛ wɔmfa mma binom ma wɔnyɛ do edwuma dɛ mbrɛ wɔhwɛ a oye ma hɔn.
38 Wɔnhwɛ mbɔ ndzɛmba nyina ho ban; na sɛ wɔdze adom akyɛdze tum a ofi sor no nya hyɛ nyimpa no mã na wɔsoma hɔn a, wɔbɔboaboa ndzɛmba yinom nyina ano akɔ asɔr no bo mu.
39 Na sɛ hom per hwehwɛ ahonyadze no a ɔyɛ Egya ne pɛ dɛ ɔdze ma hom a, hom bɛyɛ ahonyafo wɔ nyimpa nyinara mu, osiandɛ hom benya onnyiewiei ahonyadze; na wiadze ahonyadze so yɛ medze a ɔsɛ dɛ medze ma; na mbom hom nhwɛ yie wɔ ahantanyɛ ho, amma hom ammbɛyɛ dɛ tsetseberdo Nephifo no.
40 Na bio, mese hom dɛ, mema hom mbra yi, dɛ banyin biara, elder, ɔsɔfo, kyerɛkyerɛnyi nye asɔrba so dɛ, ɔmfa n’ahoɔdzen nye ne nsa nkɛyɛ edwuma mfa nyɛ ndzɛmba a mahyɛ no ho.
41 Na hom mma hom asɛmpakã nyɛ kɔkɔbɔ ndze, obiara nkasa wɔ botooyɛ nye ɔdwe mu nkyerɛ ne nyɛnko.
42 Na hom mfi emumuyɛfo no mu. Hom ngye homho nkwa. Hom mma homho ntsew, hom a hom soso Ewuradze nkuraba no. Ɔnyɛ dɛm so. Amen.