ພາກທີ 48
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງເຄີດແລນ, ລັດໂອໄຮໂອ, ວັນທີ 10 ເດືອນມີນາ, 1831. ສາດສະດາໄດ້ທູນຖາມພຣະຜູ້ເປັນເຈົ້າກ່ຽວກັບວິທີດຳເນີນການຈັດຫາທີ່ດິນໃຫ້ໄພ່ພົນຂອງພຣະເຈົ້າເພື່ອຕັ້ງຖິ່ນຖານ. ນີ້ເປັນເລື່ອງສຳຄັນເນື່ອງດ້ວຍການອົບພະຍົບຂອງສະມາຊິກຈາກພາກຕາເວັນອອກຂອງສະຫະລັດ, ໃນການເຊື່ອຟັງຕໍ່ພຣະບັນຊາຂອງພຣະຜູ້ເປັນເຈົ້າວ່າໃຫ້ເຂົາເຈົ້າໄປເຕົ້າໂຮມກັນໃນລັດໂອໄຮໂອ (ເບິ່ງ ພາກທີ 37:1–3; 45:64).
1–3, ໄພ່ພົນຂອງພຣະເຈົ້າໃນລັດໂອໄຮໂອຕ້ອງແບ່ງປັນທີ່ດິນໃຫ້ພີ່ນ້ອງຂອງເຂົາເຈົ້າ; 4–6, ໄພ່ພົນຂອງພຣະເຈົ້າຕ້ອງຊື້ທີ່ດິນ, ສ້າງເມືອງ, ແລະ ປະຕິບັດຕາມຄຳແນະນຳຂອງເຈົ້າໜ້າທີ່ຄວບຄຸມຂອງເຂົາເຈົ້າ.
1 ມັນຈຳເປັນທີ່ເຈົ້າຈະຄົງຢູ່ສຳລັບເວລານີ້ ໃນບ້ານເຮືອນທີ່ເຈົ້າອາໄສຢູ່, ດັ່ງທີ່ມັນຈະເໝາະສົມກັບສະພາບການຂອງເຈົ້າ.
2 ແລະ ຕາບໃດທີ່ເຈົ້າມີທີ່ດິນຢູ່, ຈົ່ງ ແບ່ງມັນໃຫ້ພີ່ນ້ອງທີ່ມາຈາກພາກຕາເວັນອອກ;
3 ແລະ ຕາບໃດທີ່ເຈົ້າບໍ່ມີທີ່ດິນ, ກໍໃຫ້ພວກເຂົາຊື້ສຳລັບເວລານີ້ໃນພາກພື້ນຕ່າງໆທີ່ອ້ອມຮອບເຫລົ່ານັ້ນ, ດັ່ງທີ່ພວກເຂົາເຫັນວ່າດີ, ເພາະຈຳເປັນວ່າພວກເຂົາຕ້ອງມີບ່ອນຢູ່ໃນເວລານີ້.
4 ຖືວ່າຈຳເປັນທີ່ເຈົ້າຕ້ອງເກັບທ້ອນເງິນຄຳທັງໝົດທີ່ເຈົ້າສາມາດເຮັດໄດ້, ແລະ ວ່າເຈົ້າຈະໄດ້ຮັບເອົາທັງໝົດທີ່ເຈົ້າສາມາດໄດ້ຮັບໃນຄວາມຊອບທຳ, ເພື່ອວ່າເຈົ້າຈະສາມາດ ຊື້ທີ່ດິນເປັນມູນມໍລະດົກໃນມື້ໜຶ່ງ, ແມ່ນແຕ່ເມືອງນັ້ນ.
5 ສະຖານທີ່ຍັງບໍ່ຖືກເປີດເຜີຍໃຫ້ຮູ້ເທື່ອ; ແຕ່ຫລັງຈາກພີ່ນ້ອງຂອງເຈົ້າມາຈາກພາກຕາເວັນອອກ ຈະມີ ຜູ້ຊາຍບາງຄົນຖືກກຳນົດໄວ້, ແລະ ຈະບອກພວກເຂົາໃຫ້ ຮູ້ຈັກສະຖານທີ່ນັ້ນ, ຫລື ຈະເປີດເຜີຍມັນໃຫ້ພວກເຂົາຮູ້.
6 ແລະ ພວກເຂົາຈະຖືກກຳນົດໃຫ້ຊື້ທີ່ດິນ, ແລະ ໃຫ້ທຳການເລີ່ມຕົ້ນວາງຮາກຖານຂອງ ເມືອງ; ແລະ ຈາກນັ້ນ ເຈົ້າຈະເລີ່ມຕົ້ນເຕົ້າໂຮມກັນເຂົ້າກັບຄອບຄົວຂອງເຈົ້າ, ທຸກຄົນຕາມ ຄອບຄົວຂອງເຂົາ, ຕາມສະພາບການຂອງເຂົາ, ແລະ ດັ່ງທີ່ໄດ້ກຳນົດໃຫ້ເຂົາໂດຍຝ່າຍປະທານ ແລະ ອະທິການຂອງສາດສະໜາຈັກ, ຕາມກົດ ແລະ ບັນຍັດ ຊຶ່ງເຈົ້າໄດ້ຮັບ, ແລະ ຊຶ່ງເຈົ້າຈະໄດ້ຮັບໃນພາຍຂ້າງໜ້າ. ແມ່ນເປັນດັ່ງນັ້ນ. ອາແມນ.