ພາກທີ 66
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງໄຮຣຳ, ລັດໂອໄຮໂອ, ວັນທີ 29 ເດືອນຕຸລາ, 1831. ວິວລຽມ ອີ ມິກລີລິນ ໄດ້ອ້ອນວອນຕໍ່ພຣະຜູ້ເປັນເຈົ້າໃນທີ່ລັບ ຂໍໃຫ້ພຣະອົງເຮັດໃຫ້ເປັນທີ່ຮູ້ຈັກແກ່ສາດສະດາ ເພື່ອຕອບຄຳຖາມຫ້າຂໍ້, ຊຶ່ງໂຈເຊັບ ສະມິດ ບໍ່ຮູ້ຈັກ. ຕາມຄຳຂໍຮ້ອງຂອງນາຍມິກລີລິນ, ສາດສະດາໄດ້ທູນຖາມພຣະຜູ້ເປັນເຈົ້າ ແລະ ໄດ້ຮັບການເປີດເຜີຍນີ້.
1–4, ພັນທະສັນຍາອັນເປັນນິດຄືຄວາມສົມບູນແຫ່ງພຣະກິດຕິຄຸນ; 5–8, ແອວເດີຕ້ອງສັ່ງສອນ, ເປັນພະຍານ, ແລະ ໃຫ້ເຫດຜົນກັບຜູ້ຄົນ; 9–13, ການຮັບໃຊ້ທາງສາດສະໜາກິດຢ່າງຊື່ສັດຮັບປະກັນວ່າຈະໄດ້ຮັບຊີວິດນິລັນດອນເປັນມູນມໍລະດົກ.
1 ຈົ່ງເບິ່ງ, ພຣະຜູ້ເປັນເຈົ້າໄດ້ກ່າວດັ່ງນີ້ກັບຜູ້ຮັບໃຊ້ຂອງເຮົາ ວິວລຽມ ອີ ມິກລີລິນ—ເຈົ້າເປັນສຸກແລ້ວ, ຕາບໃດທີ່ເຈົ້າຫັນໜີຈາກຄວາມຊົ່ວຮ້າຍຂອງເຈົ້າ, ແລະ ຮັບເອົາຄວາມຈິງຂອງເຮົາ, ແມ່ນແຕ່ຫລາຍຕໍ່ຫລາຍຄົນທີ່ ເຊື່ອໃນນາມຂອງເຮົາ, ພຣະຜູ້ເປັນເຈົ້າ ພຣະຜູ້ໄຖ່ຂອງເຈົ້າ, ພຣະຜູ້ຊ່ວຍໃຫ້ລອດຂອງໂລກໄດ້ກ່າວ.
2 ຕາມຄວາມຈິງແລ້ວ ເຮົາກ່າວກັບເຈົ້າວ່າ ເຈົ້າເປັນສຸກແລ້ວ ເພາະເຈົ້າໄດ້ຮັບເອົາ ພັນທະສັນຍາອັນເປັນນິດຂອງເຮົາ, ແມ່ນແຕ່ຄວາມສົມບູນແຫ່ງພຣະກິດຕິຄຸນຂອງເຮົາ, ທີ່ສົ່ງອອກໄປຫາລູກຫລານມະນຸດ, ເພື່ອວ່າເຂົາຈະມີ ຊີວິດ ແລະ ຖືກເຮັດໃຫ້ເປັນຜູ້ຮັບສ່ວນຂອງລັດສະໝີພາບ ຊຶ່ງຈະຖືກເປີດເຜີຍໃນຍຸກສຸດທ້າຍ, ດັ່ງທີ່ຖືກຂຽນໄວ້ໂດຍສາດສະດາ ແລະ ອັກຄະສາວົກໃນສະໄໝບູຮານ.
3 ຕາມຄວາມຈິງແລ້ວ ເຮົາກ່າວກັບເຈົ້າ, ຜູ້ຮັບໃຊ້ຂອງເຮົາ ວິວລຽມ, ວ່າເຈົ້າສະອາດ, ແຕ່ບໍ່ແມ່ນທັງໝົດ; ສະນັ້ນ, ຈົ່ງກັບໃຈ, ຈາກສິ່ງເຫລົ່ານັ້ນຊຶ່ງບໍ່ເປັນທີ່ພໍພຣະໄທໃນສາຍຕາຂອງເຮົາ, ພຣະຜູ້ເປັນເຈົ້າໄດ້ກ່າວ, ເພາະພຣະຜູ້ເປັນເຈົ້າຈະ ສະແດງໃຫ້ເຈົ້າເຫັນສິ່ງເຫລົ່ານັ້ນ.
4 ແລະ ບັດນີ້, ຕາມຄວາມຈິງແລ້ວ, ເຮົາ, ພຣະຜູ້ເປັນເຈົ້າ, ຈະສະແດງໃຫ້ເຈົ້າເຫັນສິ່ງທີ່ເຮົາປະສົງກ່ຽວກັບເຈົ້າ, ຫລື ສິ່ງທີ່ເປັນຄວາມປະສົງຂອງເຮົາກ່ຽວກັບເຈົ້າ.
5 ຈົ່ງເບິ່ງ, ຕາມຄວາມຈິງແລ້ວ ເຮົາກ່າວກັບເຈົ້າວ່າ ມັນເປັນຄວາມປະສົງຂອງເຮົາທີ່ເຈົ້າຈະ ປະກາດພຣະກິດຕິຄຸນຂອງເຮົາຈາກແຜ່ນດິນໜຶ່ງຫາອີກແຜ່ນດິນໜຶ່ງ, ແລະ ຈາກເມືອງໜຶ່ງຫາອີກເມືອງໜຶ່ງ, ແທ້ຈິງແລ້ວ, ໃນພາກພື້ນຕ່າງໆທີ່ອ້ອມຮອບເຫລົ່ານັ້ນ ບ່ອນທີ່ມັນຍັງບໍ່ຖືກປະກາດເທື່ອ.
6 ຢ່າຢູ່ຫລາຍມື້ໃນບ່ອນນີ້; ບໍ່ໃຫ້ຂຶ້ນໄປຍັງແຜ່ນດິນຊີໂອນເທື່ອ; ແຕ່ຕາບໃດທີ່ເຈົ້າສາມາດສົ່ງໄປໄດ້, ຈົ່ງສົ່ງໄປ; ຖ້າບໍ່ດັ່ງນັ້ນ, ກໍຢ່າຄິດກ່ຽວກັບຊັບສິນຂອງເຈົ້າ.
7 ຈົ່ງ ໄປຫາແຜ່ນດິນທາງທິດຕາເວັນອອກ, ສະແດງ ປະຈັກພະຍານໃນທຸກບ່ອນ, ໃຫ້ແກ່ທຸກຜູ້ຄົນ ແລະ ໃນທຳມະສາລາຂອງພວກເຂົາ, ໃຫ້ຊີ້ແຈງເຫດຜົນກັບຜູ້ຄົນ.
8 ໃຫ້ຜູ້ຮັບໃຊ້ຂອງເຮົາ ແຊມໂຍ ເອັຈ ສະມິດ ໄປກັບເຈົ້າ, ແລະ ຢ່າປະຖິ້ມລາວ, ແລະ ໃຫ້ຄຳແນະນຳຂອງເຈົ້າແກ່ລາວ; ແລະ ຄົນທີ່ຊື່ສັດຈະຖືກເຮັດໃຫ້ ເຂັ້ມແຂງຂຶ້ນໃນທຸກບ່ອນ; ແລະ ເຮົາ, ພຣະຜູ້ເປັນເຈົ້າ, ຈະໄປກັບເຈົ້າ.
9 ຈົ່ງວາງ ມືຂອງເຈົ້າໃສ່ເທິງຄົນທີ່ເຈັບປ່ວຍ, ແລະ ພວກເຂົາຈະ ຫາຍດີ. ຢ່າກັບຄືນມາຈົນກວ່າເຮົາ, ພຣະຜູ້ເປັນເຈົ້າ, ຈະສົ່ງເຈົ້າກັບ. ຈົ່ງອົດທົນໃນຄວາມທຸກຍາກລຳບາກ. ຈົ່ງ ໝັ່ນຂໍ, ແລ້ວພວກເຈົ້າຈະໄດ້ຮັບ; ຈົ່ງໝັ່ນເຄາະ, ແລ້ວຈະມີຜູ້ໄຂປະຕູໃຫ້ພວກເຈົ້າ.
10 ຢ່າສະແຫວງຫາທີ່ຈະເຮັດໃຫ້ຫຍຸ້ງຍາກເກີນຄວນ. ຈົ່ງປະຖິ້ມຄວາມບໍ່ຊອບທຳທຸກຢ່າງ. ຢ່າ ຫລິ້ນຊູ້—ຊຶ່ງເປັນການລໍ້ລວງທີ່ໄດ້ສ້າງບັນຫາໃຫ້ເຈົ້າຕະຫລອດມາ.
11 ຈົ່ງ ເຊື່ອຟັງຄຳກ່າວເຫລົ່ານີ້, ເພາະມັນຈິງ ແລະ ຊື່ສັດ; ແລະ ຈົ່ງຂະຫຍາຍໜ້າທີ່ຂອງເຈົ້າ, ແລະ ຊຸກຍູ້ຄົນທັງຫລາຍໃຫ້ໄປສູ່ ຊີໂອນ ດ້ວຍ ເພງແຫ່ງຄວາມສຸກອັນເປັນນິດເທິງຫົວຂອງພວກເຂົາ.
12 ຈົ່ງ ສືບຕໍ່ໃນສິ່ງເຫລົ່ານີ້ ແມ່ນແຕ່ຈົນເຖິງທີ່ສຸດ, ແລະ ເຈົ້າຈະໄດ້ສວມ ມົງກຸດແຫ່ງຊີວິດນິລັນດອນ ຢູ່ທາງເບື້ອງຂວາພຣະຫັດຂອງພຣະບິດາຂອງເຮົາ, ຜູ້ທີ່ເຕັມໄປດ້ວຍພຣະຄຸນ ແລະ ຄວາມຈິງ.
13 ຕາມຄວາມຈິງແລ້ວ, ພຣະຜູ້ເປັນເຈົ້າອົງເປັນ ພຣະເຈົ້າຂອງເຈົ້າ, ພຣະຜູ້ໄຖ່ຂອງເຈົ້າ, ແມ່ນແຕ່ພຣະເຢຊູຄຣິດໄດ້ກ່າວດັ່ງນີ້. ອາແມນ.