1 Rikarejera, Orson Hyde, kar kūr e jān ekkapit eo an n̄an kabun̄bun̄ļo̧k gospel eo ejjeļo̧k jem̧ļo̧kin, jān Jetōb eo an Anij emour, jān armej n̄an armej, im jān aelōn̄ n̄an aelōn̄, ilo jarlepju in rijar ko an ro rinana, ilo im̧ōn jar ko aer, etale aer ļōmņak im tipdiki aolep jeje ko rekwōjarjar n̄an er.

2 Im, lo, im lo, en̄in ej jon̄ok eo n̄an aolepān ro kar kapit er n̄an priesthood in, ro mijen eo aer em̧ōj jitōn̄e n̄an er n̄an wōnm̧aanļo̧k—

3 Im en̄in ej jon̄ok eo n̄an er, bwe renaaj ekkōnono āinwōt kōm̧akūtkūt er jān Jetōb Kwōjarjar.

4 Im jabdewōt renaaj kōnono n̄e kōm̧akūtkūt er jān Jetōb Kwōjarjar enaaj jeje ekwōjarjar, enaaj ankilaan Irooj, naaj ļōmņak eo an Irooj, naaj naan eo an Irooj, naaj ainikien Irooj, im kajoor eo an Anij n̄an lo̧mo̧o̧r.

5 Lo, en̄in ej kallim̧ur eo an Irooj n̄an kom̧, O kom̧ ro rikarejera.

6 Kōn menin, kom̧in m̧ōņōņō, im jab mijak, bwe N̄a Irooj Ij pād ippemi, im naaj jutak ippemi; im kom̧ naaj jeje kam̧ool kōn Eō, em̧ool Jisōs Kraist, bwe N̄aij eo Nejin Anij emour, bwe N̄a iaar, bwe N̄aij, im bwe N̄a inaaj itok.

7 En̄in ej naan eo an Irooj n̄an kom̧, rikarejera Orson Hyde, im barāinwōt n̄an rikarejera Luk Johnson, im n̄an rikarejera Lyman Johnson, im n̄an rikarejera William E. McLellin, im n̄an aolep elder ro retiljek an kabun̄ eo Aō—

8 Kom̧in ilo̧k ilo aolepān laļ, im kwaļo̧k naan kōn gospel eo n̄an aolep armej, im m̧akūtkūt ilo maron̄ eo me Iaar lewōj n̄an kom̧, im peptaij ilo etan Jemān, im etan Nejin, im etan Jetōb Kwōjarjar.

9 Im eo ej tōmak im ej peptaij enaaj mour, im eo ej jab tōmak enaaj jako.

10 Im eo ej tōmak enaaj jeraam̧m̧an kōn kakōļļe ko renaaj ļoore, em̧ool āinwōt e kar jeje.

11 Im n̄an kom̧ naaj lewōj e n̄an jeļā kakōļļe ko an iien ko, im kakōļļe ko an itok eo an eo Nejin Armej;

12 Im kōn jon̄an wōt eo Jemān enaaj jeje kam̧ool, n̄an kom̧ naaj lewōj kajoor eo n̄an sili er n̄an mour indeeo. Amen.

13 Im kiiō, kōn men ko kobaiktok n̄an bujen ko im kien ko, rej er kein—

14 Ewōr repād tokālik, ilo iien eo an Irooj, bar jet bisop ro n̄an kōjenolo̧k er n̄an kabun̄ in, n̄an jerbal em̧ool ekkar n̄an eo m̧oktata;

15 Kōn menin renaaj pris utiej ro im rej tōllo̧ke, im renaaj ijjitōn̄ jān Presidency eo Kein Kajuon an Melkizedek Priesthood eo, ijello̧kun wōt n̄e rej lukkuun ro bwijjin Aron.

16 Im eļan̄n̄e rej lukkuun ro bwijjin Aron ewōr juon aer jim̧we āinwōt kōmlet n̄an opij eo an bisop eo, eļan̄n̄e rej m̧aanje ilubwiljin m̧aan ro nejin Aron.

17 Bwe m̧aanje eo ej kabwijer jim̧we eo n̄an presidency eo ioon priesthood in, im ki ko ak maron̄ eo an ejja in wōt.

18 Ejjeļo̧k juon em̧m̧aan ewōr an jim̧we kōmlet kake n̄an opij in, n̄an kabwijer ki ko an priesthood in, ijello̧kun wōt n̄e ej lukkuun bwijjin im m̧aanjien Aron.

19 Ak, āinwōt juon pris eutiej an Melkizedek Priesthood eo ewōr an maron̄ n̄an m̧akūtkūt ilo aolep opij ko reddikļo̧k im emaron̄ m̧akūtkūt ilo opij eo an bisop n̄e ejjeļo̧k lukkuun bwijjin Aron maron̄ in loe, eļan̄n̄e e kar kūr im kōjenolo̧k im kapit e n̄an kajoor in, ium̧win pein Presidency eo Kein Kajuon an Melkizedek Priesthood eo.

20 Im eo lukkuun bwijjin Aron, barāinwōt, eaikuj ijjitōn̄ jān Presidency in, im lo ke ej tōllo̧ke, im ekkapit, im kōjenolo̧k e ium̧win pā ko pein Presidency in, eļan̄n̄e jaab rej jab maron̄ ekkar n̄an kōmlet n̄an m̧akūtkūt ilo priesthood eo aer.

21 Ak, jān pedped wōt ioon kean̄ eo kōn jim̧we eo aer jān priesthood eo wanlaļtak jān jemān n̄an nejin, remaron̄ abņōņō kōn ekkapit eo aer eļan̄n̄e ilo jabdewōt iien remaron̄ kam̧ool e bwij eo aer, ak n̄an jeļā kake kōn revelesōn jān Irooj ium̧win pā ko pein Presidency in ba kake ilōn̄.

22 Im bar juon alen, ejjeļo̧k bisop ak pris eutiej eo naaj kōjenolo̧k e n̄an jerbal in naaj ekajete im̧aan jikin kien ak liaakeļo̧k kōn jabdewōt nana, ijello̧kun wōt n̄e ej im̧aan Presidency eo Kein Kajuon an kabun̄ in;

23 Im toun wōt aer lo bwe e ebōd im̧aan Presidency in, jān naan in kam̧ool ko reban maron̄ kariabi, e naaj ņa ruōn;

24 Im eļan̄n̄e e ej ukeļo̧k naaj jeorļo̧k an bōd, ekkar n̄an bujen ko im kien ko an kabun̄ in.

25 Im bar juon alen, toun wōt an ro jemān im jinen wōr nejier ilo Zaion, ak ilo jabdewōt stake ko an me em̧ōj kajutaki, im rej jab katakin er n̄an meļeļe pedped in katak in ukeļo̧k, tōmak ilo Kraist eo Nejin Anij emour, im peptaij im mennin letok eo an Jetōb Kwōjarjar jān likūt pā ko ioon, n̄e ruwalitōk iiō ko rūttoier, jero̧wiwi eo ej pād ioon bōran ro jemān im jinen.

26 Bwe en̄in enaaj kien eo n̄an ro rej pād ilo Zaion, ak ilo jabdewōt stake ko an im em̧ōj kajutaki.

27 Im ro nejier renaaj peptaij n̄an jeorļo̧k in jero̧wiwi ko aer n̄e ruwalitōk iiō rūttoier, im bōk likūt pā ko ioer.

28 Im renaaj barāinwōt katakin ro nejier n̄an jar, im n̄an etetal jejjet im̧aan Irooj.

29 Im ro rej pād ilo Zaion renaaj barāinwōt kōjparok raan in Jabōt n̄an kokwōjarjar e.

30 Im ro rej pād ilo Zaion barāinwōt renaaj keememej jerbal ko aer, toun wōt jitōn̄ er n̄an jerbal, ilo aolep tiljek; bwe ripād waan naaj pād ilo ememej im̧aan Irooj.

31 Kiiō, N̄a, Irooj, Ij jab em̧ōņōņō ippān ro rej pād ilo Zaion, bwe ewōr ripād waan ilubwiljier; im ro nejier rej barāinwōt rūttoļo̧k ilo nana; rej barāinwōt jab kanooj kappukot m̧weiie ko an indeeo, ak mejaer reobrak kōn arōk.

32 Men kein rej jab aikuj pād, im aikuj in jako jān ilubwiljier; kōn menin, rikarejera Oliver Cowdery en bōkiļo̧k ennaan kein n̄an āneen Zaion.

33 Im juon kien Ij leļo̧k n̄an er—bwe e eo ej jab kōm̧m̧ani jar ko an im̧aan Irooj ilo iien ko aer, e enaaj pād ilo ememej im̧aan riekajet eo an armej ro Aō.

34 Ennaan kein rej m̧ool im tiljek; kōn menin, jab rupi, im jab kōjenikļo̧k jāni.

35 Lo, N̄aij Alpa im Omega, im Ij itok m̧ōkaj. Amen.