1 E koaua, e taku te Uea nakoimi ake kam a tia n ikotingkami ni kabane ni karekea ana kantaninga ibukimi:

2 Nooria, e kakukurei aio nakon ami Uea, ao a kimwareirei anera i aomi; angabwai ae ami tataro a tia n roko nakon taningan te Uea ae Tabaota, ao a tauaki mwiia n te boki ae kanoana araia ake a tia ni katabuaki, are araia naake n te aonaba ae te tiretio.

3 Mangaia are, I kanakoa ngkai te Tia Karaunano temanna, i aomi raou, bwa e aonga n tiku i nanomi, ae te Tamnei ae Tabu n te berita; are te Tia Karaunano anne bon titebo ma are I beritanna nakoia au taan reirei, n aron are e koreaki n ana kakoaua Ioane.

4 Te Tia Karaunano aei bon te berita are I anga nakoimi ibukin te maiu ae akea tokina, are mimitongin te abanuea ae te tiretio;

5 Are mimitongina bon are n ana ekaretia te Karimoa n Nati, ao te Atua, te kabanea n tabu i aoia ni kabane, rinanon Iesu Kristo are Natina te Mwaane—

6 Teuare e waerake nako karawa, n aron naba ae e rinanon ae korakora riki ni bwaai ni kabane, n te aro are e atai bwaai ni kabane, bwa e aonga ni mena i nanon bwaai ni kabane ao n rinanon bwaai ni kabane, ootan te koaua;

7 Are te koaua ae oota. Aio bon ootan Kristo. N aron ae e mena naba n taai, ao n ootan taai, ao mwaakana are iai are e karaoaki mai iai.

8 N aron naba ae e mena n namwakaina, ao ngaia ootan namwakaina, ao mwaakana are iai are e karaoaki mai iai;

9 N aron naba ootan itoi, ao mwaakaia are iai are a karaoaki mai iai;

10 Ao te aonaba naba, ao mwaakana are iai, are te aonaba are kam tei i aona.

11 Ao te oota are e oota, are e anganingkami te oota, bon mai irouna are e kaotai matami, are titebo ma te oota are e karikirakea ami atatai;

12 Are te oota are e waaki nako mai matan te Atua ni kaona annang ae akea tokina—

13 Te oota are e mena ni bwaai ni kabane, are e anga te maiu nakon bwaai ni kabane, are bon te tua are bwaai ni kabane a tautaekanaki iai, ae mwaakan te Atua are e tekateka i aon ana kaintokanuea, are ngaia ae e mena n te tai ae akea tokina, are e mena i buakon bwaai ni kabane.

14 Ngkai, e koaua ae I tuangkami, bwa rinanon te kaboaki are e karaoaki ibukimi ni kakoroa bukin te mangauti man te mate.

15 Ao te tamnei ao te rabwata a karika rabwatan te aomata.

16 Ao te mangauti man te mate bon kaboakin te tamnei.

17 Ao te kaboaki n te tamnei bon rinanon teuare e kamaiui bwaai ni kabane, i nanon bwanibwanna e tua bwa kainnano ao naake a nimamannei n te aonaba a na bwaibwai iai.

18 Ngaia are, e riai ni katabuaki man buakaka ni kabane, bwa e aonga ni katauraoaki ibukin mimitongin te tiretio;

19 Bwa i mwin kakoroan bukin karikana, e na baunaki ma te mimitong, i matan te Atua te Tama;

20 Bwa aonga rabwata ake man te abanuea ae te tiretio ni bwainna n aki tootoki; bwa, bwa ibukin aio e karaoaki ao e karikaki, ao bwa ibukin aio a katabuaki.

21 Ao naake aki katabuaki rinanon te tua are I a tia n anganingkami, are ana tua Kristo, a na karekea te abanuea are teuana, are te abanuea ae te teretirio, ke are te abanuea ae te teretio.

22 Bwa ane e aki kona n ongeaba n tuan te abanuea ae te tiretio e aki kona moan mimitongin te tiretio.

23 Ao ane e aki kona n ongeaba n tuan te abanuea ae te teretirio e aki kona moan mimitongin te teretirio.

24 Ao ane e aki kona n ongeaba n tuan te abanuea ae te teretio e aki kona moan mimitongin te teretio; ngaia are e aki tau ibukin te abanuea ae mimitong. Ngaia are e riai n tiku n te abanuea ae tiaki te abanuea ae mimitong.

25 Ao e koaua ae I manga tuangkami, te aonaba e na ongeaba n tuan te abanuea ae te tiretio, bwa e kakoroa oin bukin karikana, ao e aki urua te tua—

26 Mangaia are, e na katabuaki; eng, e ngae ngke e na mate, e na manga kamaiuaki, ao ni kona moan te mwaaka are e kamaiuaki mai iai, ao naake a raoiroi a na bwaibwai iai,

27 Bwa e ngae ngke a mate, a na manga bon uti naba, te rabwata n tamnei.

28 Naake iai tamneia ae te tiretio a na karekea te rabwata are rabwataia ngkoa n te aonaba; kam na karekea naba rabwatami, ao mimitongimi e na mimitong n aekakin are kamaiuaki iai rabwatami.

29 Ngkami ake kam kamaiuaki man mwakoron mimitongin te tiretio a na karekea naba ae titebo, are e bwanin.

30 Ao naake a kamaiuaki man mwakoron mimitongin te teretirio a na karekea naba ae titebo, are e bwanin.

31 Ao naake a kamaiuaki naba man mwakoron mimitongin te teretio a na karekea ae titebo, are e bwanin.

32 Ao naake a tiku a na kamaiuaki naba; e ngae n anne, a na okira naba oin aia tabo, ni kukurei n te bwai are a tauraoi ni karekea, ibukina bwa a aki tauraoi ni kukurei n te bwai are a kona ni karekea.

33 Bwa tera kabwaian te aomata ngkana e kaakaki i aona te bwai n tituaraoi, ao e aki butimwaea te bwai n tituaraoi? Nooria, e aki kukurei n te bwai anne are e anganaki, ke ni kukurei iroun are ngaia te tia anga te bwai n tituaraoi.

34 Ao e koaua ae I manga tuangkami, bwa te bwai are e tautaekanaki n te tua e bon kawakinaki naba n te tua ao ni kakororaoaki ao ni katabuaki mai iai naba.

35 Ane e urua te tua, ao n aki maiuakina te tua, ma ni ukoukouria n riki n tua i bon irouia, ao n tauraoi n tiku n te bure, ao ni bane ni maiuakina te bure, e aki kona ni katabuaki n te tua, ke n te nanoanga, te motiraoi, ke te motikitaeka. Ngaia are, a na teimatoa ni kammaira.

36 Ni kabane abanuea iai te tua aika anganaki;

37 Ao a mwaiti abanuea; bwa akea te tabo ae mwawa ae akea iai te abanuea; ao akea te abanuea ae akea iai te mwawa, ke te abanuea ae kakannato riki ke ae mangori riki.

38 Ao nakon abanuea nako a anganaki te tua; ao nakon tua nako iai tiaia naba ao bwai aika a kainnanoaki.

39 Ni kabane aomata ake aki maiuakini bwai aika a kainanoaki a aki karaoiroaki.

40 Bwa te rabakau e reitaki ma te rabakau; te wanawana e karekea te wanawana; te koaua e butimwaea te koaua; te raoiroi e tangira te raoiroi; te ota e reitaki ma te ota; te nanoanga e nanoanga i aon te nanoanga ao ni butimwaeia naake a nanoanga; te motiraoi e reitanako ana mwakuri ao ni butimwaeia naake a motiraoi; te motikitaeka e rimoan matan teuare e tekateka i aon te kaintokanuea ao e tautaekani ao e karaoi bwai ni kabane.

41 E atai bwai ni kabane, ao a mena bwai ni kabane i matana, ao bwai ni kabane a mena i rarikina; ao e mena i aon bwai ni kabane, ao ni bwai ni kabane, ao n rinanon bwai ni kabane, ao irarikin bwai ni kabane; ao bwai ni kabane bon mai irouna, ao n roko mai irouna, ae te Atua, n aki totoki.

42 Ao e koaua ae I manga tuangkami, e a tia n anga te tua nakon bwaai ni kabane, are a mwaing iai n aia tai n oin aia tai ae uarereke;

43 Ao a bon kateaki kawaia, kawain naba karawa ao aonaba, are kanoana bon te aonaba ao ni kabane buraneti.

44 Ao a anga te ota i marenaia n aia tai ao n oin taia nako, n aia miniti, n aia aoa, n aia bong, n aia wiiki, n aia namwakaina, n aia ririki—ni kabane aikai bon teuana te ririki ma te Atua, ma tiaki ma te aomata.

45 E mwaing te aonaba i aon baina ni kiba, ao e anga te ota taai n te ngaina, ao namwakaina e anga otana n te tairiki, ao itoi naba anga otaia, ngke a mwaing i aon baia ni kiba ni mimitongia, i buakon mwaakan te Atua.

46 Nakon tera ae N na kabotaui abanuea aikai, bwa kam aonga n atai?

47 Noria, ni kabane aikai bon taian abanuea, ao te aomata are e a tia n nori aikai ke ae e aki rang ni kakawaki i buakoia aikai e a tia n nora te Atua ngke e mwaing i nanon ueana ao mwaakana.

48 I tuangkami, e a tia n noria; e ngae n anne, teuare e roko nakoia oin ana aomata e aki kinaaki.

49 Te ota e ota n te ro, ao te ro e aki kinaa; e ngae n anne, e na roko te bong are kam na ata naba te Atua, are kam kamaiuaki rinanona ao mai irouna.

50 Ngkanne kam na ataia bwa kam a tia n norai, bwa bon iai Ngai, ao bwa Ngai te ota ni koaua are e mena i nanomi, ao bwa ngkami i nanou; bwa mwina kam aki kona n rikirake.

51 Noria, N na kabotaui abanuea aikai nakon te aomata ae iai ana nne n aroka, ao e kanakoia ana toro nakon te nne n aroka bwa a na keniken n te nne n aroka.

52 Ao e taku nakon te moan: Nako ao mwakuri n te nne n aroka, ao n te moan aoa N na kawariko, ao ko na nora kukurein ubu.

53 Ao e taku nakon te kauoman: Nako naba nakon te nne n aroka, ao n te kauoua n aoa N na kawariko ma kukurein ubu.

54 Ao nakon naba te kateniman, e taku: N na roko nakoim;

55 Ao nakon te kaaman, ao e waki nako ni karokoa te katengaun ma uoman.

56 Ao uean te nne n aroka e nako nakon te moan n te moan aoa, ao e tiku irouna ni kabanea te aoa anne, ao e kakukureiaki ma otan ubun ana uea.

57 Ao ngkanne e nako mai iroun te moan bwa e aonga ni kawara te kauoman naba, ao te kateniman, ao te kaaman, ao e waki nako ni karokoa te katengaun ma uoman.

58 Ao ngaia are a bane ni karekea otan ubun aia uea, aomata nako n aia aoa, ao n aia tai, ao n taina irouna—

59 Ni moanaki man te moan, ao e waki nako ni karokoa te kabanea, ao man te kabanea nakon te moan, ao man te moan nakon te kabanea;

60 Aomata nako n oin baireaia, ni karokoa e bane ana aoa, ni kaineti ma aron are e tuangnga ana uea, bwa e aonga ni mimitong ana uea irouna, ao ngaia iroun ana uea, bwa aonga ni bane ni mimitong.

61 Ngaia are, I kabotaui abanuea aikai ni kabane nakon te taetae ni kaikonaki aei, ao kaaina nako—abanuea nako n aia aoa, ao n aia tai, ao n oin taia, ni kaineti nakon te tua are e a tia ni karaoia te Atua.

62 Ao e koaua ae I manga tuangkami, raou, I katukui taeka aikai iroumi bwa kam na iangoi inanomi, ma te tua aei are I anganingkami, bwa kam na weteai ngkai I kaan—

63 Kaaniai ao N na kaaningkami; botumwaaka n ukoukorai ao kam na kuneai; bubuti, ao kam na karekea; karebwerebwe, ao e na kaukaki nakoimi.

64 Bwai nako are kam bubutia te Tama n arau ane kam na anganaki, are e riai ibukimi;

65 Ao ngkana kam bubuti te bwai ae e aki riai ibukimi, e na riki bwa kabuakakaami.

66 Noria, te bwai ae kam ongo ai aron bwanaan temanna ae takarua n te rereua—n te rereua, ibukina kam aki kona n noria—bwanaau, ibukina bwanaau bon te Tamnei; Tamneiu bon te koaua; te koaua e reitinako ao akea tokina; ao ngkana iai iroumi e na kabatiaaki.

67 Ao ngkana kam mata teuana nakon mimitongiu, ni kabane rabwatami e na kaonrakeaki n te ota, ao a na akea te ro iroumi; ao te rabwata anne are e kaonaki n te ota e na atai bwai ni kabane.

68 Ngaia are, katabuingkami bwa aonga ami iango n ti teuana nakon te Atua, ao e na roko te bong are kam na noria; bwa e na kaaki rabunan ubuna nakoimi, ao e na bon riki n oin ana tai, ao n oin ana kawai, ao ni kaineti nakon oin ana kantaninga.

69 Uringa te berita are e korakora ao te kabanea are I a tia ni karaoi nakoimi; kanakoi ami iango n taningaroti ao ngaremi ae korakora ni kararoai mai iroumi.

70 Tiku ngkami, tiku ngkami n te tabo aei, ao tewea te botaki n taromauri, ake naake taan moan mwakuri n te kabanea n abanuea aei.

71 Ao a riai naake ake a tia ni kauringaki n aia mwamwananga ni wewetea te Uea, ao ni iangoa te kauring i nanoia are a tia ni karekea, i nanon te tai ae uarereke.

72 Noria, ao taraia, N na tararuai ami nanai, ao ni katauraoia unimwaane ao ni kanakoia nakoia.

73 Noria, N na kawaekoa au mwakuri n taina.

74 Ao I anganingkami, ake taan moan tia mwakuri n te kabanea n abanuea aei, te tua bwa kam na ikotingkami ni kabane, ao ni barongaingkami, ao ni katauraoingkami, ao ni katabuingkami; eng, kaitiaki nanomi, ao kaitiaka baimi ao waemi imatau, bwa I aonga ni kaitiakingkami;

75 Bwa I aonga ni kakoaua nakon Tamami, ao Atuami, ao Atuau, bwa kam itiaki man raraan te roro ae buakaka aei; bwa I aonga ni kakoroa bukin te berita aei, te berita aei ae korakora ao te kabanea, are I a tia ni karaoi nakoimi, ngkana I taku.

76 I anganingkami naba te tua bwa kam na reitinako n te tataro ao te aki mamatam man te tai aei.

77 Ao I anganingkami te tua bwa kam na reiakini i marenami reirein te abanuea.

78 Botumwaaka n reiakini ao au akoi e na mena iroumi, bwa kam aonga n reireiaki raoi n taekana, n tuana, n te reirei, n tuan te euangkerio, ni bwaai ni kabane ake a kaineti nakon uean te Atua, ake a riai ibukimi bwa kam na atai;

79 Ni kaineti ma bwaai i karawa ao n te aonaba, ao i aan te aonaba; bwaai ake a tia n riki, bwaai ake ngkai, bwaai ake a na waekoa ni koro bukiia; bwaai ake n abara, bwaai ake n aaba tabeua; te buaka ao waaki ni kamangaongao n aaba, ao te motikitaeka i aon te aba; ao te atatai naba ibukin taian aba ao ibukin taian abanuea—

80 Bwa kam aonga n tauraoi ni bwaai ni kabane ngkana N na manga kanakoingkami ni kakorakora te nakoa are I a tia ni wetei ngkami iai, ao te mition are I a tia n anganingkami.

81 Noria, I kanakoingkami bwa kam na kakoaua ao ni kauringia aomata, ao e riai bwa aomata nako ake a tia ni kauringaki bwa a na kauringia kaain rarikia.

82 Ngaia are, akea aia aanga, ao aia bure a mena i aon atuuia.

83 Ane e botumwaka n ukoukorai e na kuneai, ao N na aki mwanuokinna.

84 Ngaia are, tiiku ngkami, ao botumwaaka ni mwakuri, bwa kam aonga ni kakororaoaki n ami mwakuri ni ibuobuoki ni waaki nako i buakoia Tientaire n te kabanea n tai, nakoia ni kabane ake atongaki araia iroun te Uea, ni kabaea te tua ao ni kanikinaea te koaua, ao ni katauraoia aomata aika itiaki ibukin te aoa ni motikitaeka bwa e a kaan roko;

85 Bwa e aonga tamneia n aki rootaki n unin te Atua, urubwain mwakuri ae bati n ribaki are e tataningaia naake a buakaka, n te aonaba aei ao n te aonaba ae e na roko. E koaua, I tuangkami, a riai naake tiaki tenaan moan unimwaane n reitinako n te nne n aroka ni karokoa e na atongia ni weteia te Uea, bwa e tuai roko aia tai; e aki itiaki aia kunnikai man raraan te roro aei.

86 Tiku ngkami n te inaomata are kam kainaomataaki iai; tai kabaeingkami n te bure, ma a riai baimi n itiaki, ni karokoa rokon te Uea.

87 Bwa e aki mwaiti te bong ma ngkai ao te aonaba e na ruru ao ni bebei n aron te aomata ae manging; ao taai e na karaba matana, ao e na rawa n anga otana; ao namwakaina e na tebokaki n te raraa; ao itoi a na rangi ni korakora uniia, ao a na kabwakaia n aron te biiku ae e bwaka man te aroka ae te biiku.

88 Ao i mwin ami koaua e na roko te aki kukurei ao te un i aoia aomata.

89 Bwa i mwin ami koaua e na roko ana koaua te mwaeiei, are e na karika te tangitang i buakona, ao a na bwaka aomata i aontano ao a na aki kona n tei.

90 Ao e roko naba ana koaua bwanaan te baa, ao bwanaan te iti, ao bwanaan taian angibuaka, ao bwanaan naon taari are ibetutu ni bwaro riaon tiaia.

91 Ao bwaai ni kabane a na mangaongao; ao n akea te nanokokoraki, e na bwara nanoia aomata; bwa e na roko te maaku i aoia aomata ni kabane.

92 Ao a na kiba anera rinanon karawa ni kabane, n takarua ma te bwana ae baibati, ni katanga ana buu te Atua, n taku: Katauraoingkami, katauraoingkami, O kaain te aonaba; bwa e a roko ana motikitaeka Atuara. Nooria, ao taraia, e a roko te Tia Iein; kam na otinaki ni butimwaia.

93 Ao n te tai naba arei e na kaoti te kanikina ae korakora i karawa, ao ni kabane aomata a na uaia n nooria.

94 Ao te anera temanna e na katanga ana buu, n taku: Te ekaretia ane e korakora anne, tinan mwakuri aika bati n ribaki, are e karikiia botanaomata ni kabane ni moi ni wain n te un n ana wenenibure, are e bwainikirinia ana aomata aika itiaki te Atua, ake a kawaanakoa raraaia—ngaia are e tekateka i aon raan aika mwaiti, ao i aon aban taari—nooria, boni ngaia titania n te aonaba; ngaia are e kabaeaki n taian bwabwati; kabaeana a kamatoaaki, akea te aomata ae e kona ni kabwarai; ngaia are e a tauraoi ni kabuekaki. Ao e na katanga ana buu ni kaanaua ao ni katakarua, ao ni kabane aaba a na ongo.

95 Ao e na iai te mabu i karawa i nanon te maan ae te itera n aoa; ao n aki maan i mwina e na uki rabunan karawa, n ai aron te ninira ni boki i mwin niniraki, ao e na oti ubun te Uea;

96 Ao aomata aika itiaki ake i aon te aonaba, ake a maiu, a na kamaiuaki ao ni uotaki rake ni kaitibo ma ngaia.

97 Ao naake a matu n ruanimateia a na roko, bwa e na kaukaki ruanimateia; ao a na uotaki rake naba ni kaitibo ma ngaia i buakon bouan karawa—

98 Bon ngaiia ana aomata Kristo, taian moan uaa, naake a na ruo ma ngaia moa, ao naake a mena i aon te aonaba ao n ruanimateia, are ngaia tenaan moan ni uotaki rake ni kaitibo ma ngaia; ao ni kabane aikai man bwanaan tangin ana buu ana anera te Atua.

99 Ao i mwin aei temanna te anera e na katanga ana bu, are te kauoua ni bu; ao ngkanne e na roko kaboakia naake ana aomata Kristo n rokona; ake a tia ni karekea nneia n te umwa ni kaikain are e katauraoaki ibukia, bwa a aonga ni karekea te euangkerio, ao ni motikaki taekaia n ai aroia aomata n rabwataia.

100 Ao teuana riki, e na tang te bu are teuana, are te katenua; ao ngkanne a na roko tamneia aomata ake a na motikaki taekaia, ao a kuneaki i an te kabuakaka;

101 Ao aikai bon nikiraia mate; ao a aki manga maiu ni karokoa e koro tenga te ririki, a na bon aki, ni karokoa e toki te aonaba.

102 Ao e na tang te buu are teuana, are te kaaua ni buu, ni kangai: A kuneaki i buakoia naake a tiku ni karokoa te bong are e kakannato ao te kabanea, are te toki, ake a na teimatoa ni kammaira.

103 Ao e na tang te buu are teuana, are te kanimaua ni buu, are te kaniiman n anera are e onimakinaki n te euangkerio ae akea tokina—ni kibakiba ri nukani karawa, nakon aaba ni kabane, reeti, neewe ao aomata;

104 Ao aio tangin ana buu, ae kangai nakoia aomata ni kabane, i karawa ao n te aonaba naba, ao ake i aan te aonaba—bwa taninga nako a na ongo, ao bubua ni wae nako a na katorobubua, ao neewe nako a na kaotia, ngke a ongo tangin te buu, ni kangai: Maaka te Atua, ao anga te mimitong nakon are e tekateka i aon te kaintokanuea, n aki tootoki; bwa e a roko aoan ana motikitaeka.

105 Ao teuana riki, te anera are temanna e na katanga ana buu, are te kaonoman n anera, ni kangai: E a bwaka neiere e karikiia aaba ni kabane ni moi ni wain n te un n ana wenenibure; e a bwaka, e a bwaka!

106 Ao teuana riki, te anera are temanna e na katanga ana buu, are te kaitiman n anera, ni kangai: E a tia; e a tia! Ana Tiibu te Teei te Atua e a tia n tokanikai ao n totoua nnen kamantan te kurebe n tii ngaia, are nnen kamantan te kurebe ae kakamakun unin te Atua ae Moan te Mwaaka.

107 Ao ngkanne a na baunaki anera ni mimitongin mwaakana, ao aomata aika itiaki a na kaonaki ni mimitongina, ao ni karekea aia bwaibwai ao ni katiteboaki ma ngaia.

108 Ao ngkanne e na manga katanga ana buu te moan anera i taningaia ni kabane ake a maiu, ao ni kaoti aia mwakuri aomata aika raba, ao ana mwakuri te Atua aika korakora n te moan ngaa n ririki.

109 Ao ngkanne e na katanga ana buu te kauoman n anera, ao ni kaoti aia mwakuri aomata aika raba, ao aia iango ao aia kantaninga nanoia, ao ana mwakuri te Atua aika korakora n te kauangaa n ririki—

110 Ao e reitinako, ni karokoa e na katanga ana buu te kaitiman n anera; ao e na tei i aon te aba ao i aon taari, ao n tuea n aran teuare e tekateka i aon te kaintokanuea, bwa a nang akea te tai; ao Tatan e na kabaeaki, are te naeta nikawai, are e aranaki bwa te riaboro, ao e na aki kabwaraaki i nanon te maan ae tenga te ririki.

111 Ao ngkanne e na kabwaraaki i nanon te tai ae uarereke, bwa e aonga ni ikotiia ana taanga ni buaka.

112 Ao Mikaera, te kaitiman n anera, are mataniwiia anera, e na ikotiia ana taanga ni buaka, are taanga ni buaka i karawa.

113 Ao te riaboro e na ikotiia ana taanga ni buaka; are taanga ni buaka i moone, ao a na waerake ni buakana Mikaera ao ana taanga ni buaka.

114 Ao ngkanne e na roko ana buaka te Atua ae korakora; ao te riaboro ao ana taanga ni buaka a na karenakoaki nakon oin aia tabo, bwa a na akea mwaakaia naba teutana i aoia aomata aika itiaki.

115 Bwa Mikaera e na buaka n aia buaka, ao e na tokanikai i aon are e ukoukora ana kaintokanuea teuare e tekateka i aon te kaintokanuea, are te Tiibu te Tei.

116 Aio mimitongin te Atua, ao naake a katabuaki; ao a na aki manga noora te mate.

117 Ngaia are, e koaua ae I tuangkami, raou, tewea te botaki n taromauri, n aron ae I a tia n tuangkami.

118 Ao ibukina bwa tiaki ni kabane iai aia onimaki, kam na botumwaaka n ukoukouri ao n reirei imarenami taekan te wanawana; eng, ukoukori man booki aika moan te raoiroi taeka ni wanawana; ukoukoura te rabakau, n te kamatebwai ao n te onimaki naba.

119 Barongaingkami; katauraoi bwaai nako aika kainnanoaki; ao katea te auti, ae te auti n tataro, te auti n aki mamatam, te auti n onimaki, te auti n reirei, te auti ae mimitong, te auti ae baireaki raoi, ana auti te Atua;

120 Bwa rinimi e aonga ni karaoaki n aran te Uea; bwa otinakomi e aonga ni karaoaki n aran te Uea; bwa ni kabane ami kamauri a aonga ni karaoaki n aran te Uea, ma kateani baai nakon are Moan te Rietata.

121 Ngaia are, katoki ami taetae ae akea manenaia ni kabane, ngaremi ni kabane, nanomi ni kaibwabwaru ni kabane, ami kamoamoa ao te bwabwainingare ni kabane, ao ami mwakuri aika buakaka ni kabane.

122 Rinea i buakomi te tia reirei, ao a aki riai ni bane n riki bwa taan taetae n te tai teuana; ma e riai n taetae temanna i mwin temanna ao a riai ni bane n ongora nakon ana taeka, bwa aonga ni bane ni karikirakeaki mai irouia ni kabane ngkana a bane n tia n taetae, ao bwa aomata ni kabane a aonga n titebo tibwangaia.

123 Taraia bwa kam na itangitangiri i marenami; katoka te mataai; ao reirei n tibwaua ami bwai i marenami n aron ae e tangiria te euangkerio.

124 Katoka te taningaroti; katoka te aki itiaki; tooki man kakaean kairuan temanna ma temanna; tooki man te matu ae abwabwaki nakon ae kainnanoaki; moantaai ni matu n am kainiwene, bwa kam aonga n aki kua; moantaai n uti, bwa e aonga rabwatami ao ami iango n maiureirei.

125 Ao i aon bwaai ni kabane, kunnikaingkami n te kabae ae te tangira ae kororaoi, n ai aron te rabuna, are bon kabaean te kororaoi ao te rau.

126 Tataro n taai nako, bwa kam aonga n aki mamaara, ni karokoa I roko. Nooria, ao taraia, e tawe rokou, ao N na butimwaingkami nakoiu. Amen.

127 Ao teuana riki, bairean te auti are katauraoaki ibukin te beretitentii n aia tabo n reirei burabeti, are e kateaki ibukin reiakinaia ni bwaai ni kabane aika a riai ibukiia, ibukiia taan mwakuri n te ekaretia, ke n taekana teuana, naake a weteaki nakon te mwakuri ni ibuobuoki n te ekaretia, ni moanaki man te ibonga ae rietata, rikaaki nakon te rikan—

128 Ao aio bairean te auti ibukin te beretitentii n te reirei: Ane e rineaki bwa te beretitenti, ke te tia reirei, e na kuneaki n tei n ana tabo, n te auti are e katauraoaki ibukina.

129 Ngaia are, ngaia te moan n ana auti te Atua, n te tabo are aonga kaain te botaki n te auti n ongo ana taeka raoi ao ni mataata, tiaki ma te taetae ae takarua.

130 Ao ngkana e roko nakon ana auti te Atua, bwa e riai bwa te moan n te auti—nooria, e rangi n tamaroa aei, bwa e aonga n riki bwa te katooto—

131 E riai n anga ngaia n te tataro i aon bubuan waena imatan te Atua, ni kanikinaean ke kauringaan te berita ae akea tokina.

132 Ao ngkana iai ae roko i mwina, e riai n teirake te tia reirei, ao, ma te katei bai nako karawa, eng, ni kaetia nako eeta, ni kamaura tarina ke taari ma taeka aikai:

133 Ngkoe ke ngkami tariu? I kamauringkami n aran te Uea ae Iesu Kristo, ni kanikinaean ke kauringaan te berita ae tabu ae akea tokina, n te berita ae tabu are I butimwaiko bwa kaaina, ma te nanomatoa ae teimatoa, e aki mwainging, ao e aki bibitaki, n riki bwa raom ao tarim rinanon ana akoi te Atua n te kabaebae ae te tangira, n nakonako n akea kabuakakau i nanon ana tua nako te Atua, ma te karabwarabwa, n aki totoki. Amen.

134 Ao ane e kuneaki n aki tau n te kamauri aei e na akea ana tabo i buakomi; bwa kam na aki kariaia au auti bwa e na kabaerekaaki irouna.

135 Ao ane e rin ao ni kakaonimaki imatau, ao ngaia te tari, ke ngkana ngaiia taari, a na kamaura te beretitenti ke te tia reirei ma katean baia nako karawa, ma te tataro naba aei ao te berita, ke man taekina Amen, ni kanikinaean naba anne.

136 Nooria, e koaua, I tuangkami, aio te katoto nakoimi ibukin te kamauri imarenami n ana auti te Atua, n aia tabo n reirei burabeti.

137 Ao kam weteaki bwa kam na karaoa aio n te tataro ao te karabwarabwa, n aron ae te Tamnei e na anga taeka ni bwaai ni kabane are kam karaoi n umwan te Uea, n aia tabo n reirei burabeti, bwa e aonga n riki bwa te tabo ae tabu, mwaneaban te Tamnei ae Tabu ibukin karikirakeami.

138 Ao kam na aki butimwaia mai i buakomi nakon te reirei aei tii ngkana e itiaki man raraan te roro aei;

139 Ao e na butimwaeaki n te otenanti n tebo wae, bwa ibukin aei are e kateaki iai te otenanti n tebo wae.

140 Ao teuana riki, te otenanti n tebo wae e na bon karaoaki iroun te beretitenti, ke te unimwaane are tararua te ekaretia.

141 E na moanaki ma te tataro; ao i mwin kanakin te kariki ao te wain, e riai ni kabaea nukana ni kaineti nakon te banna are e kaotaki n te katebwi ma tenua ni mwakoro n ana kakoaua Ioane are e kaineti nakoiu. Amen.