Avatu Faamanuiaga o a Outou Feagaiga

Uso e, e ese le matagofie o le toe faatasi ma outou.

Talu ai nei sa ou feiloai ai i se tamaitai sa sauni e papatiso. O lea Aso Sa faapitoa sa ia taunuu ai i le lotu mai le savalia o le lua maila (3 km) i le mafiafia o le palapala. Sa ia alu atu i le faleletaua i le taimi lava lena, sa aveese ona lavalava palapala, faamālū, ma fai ona laei mama o le Aso Sa. I le sauniga a le Aualofa sa ia faamatalaina ai lona liuaina. Sa ou ootia i lona naunau ma le faagaeetia ia faamama ma faapaia e ala i le salamo ma le taulaga togiola a le Faaola ma lona naunau e lafoai ese lona “olaga tuai” ina ia osia ai feagaiga paia ma lo tatou Tama Faalelagi. Sa ia nofoese mai i lana uo tama, sa faatoilaloina ia vaisu ina ia ola ai i le Upu o le Poto, sa faamavae i lana galuega i Aso Sa, ma le toe mauaina le faauooga ma e pele ina ua folafola i ai lana fuafuaga o le a papatiso. Sa ia naunau tele e salamo i ana agasala, ina ia faamamaina o ia ma lagonaina le alofa togiola o le Faaola. Sa musuia au i lena taeao e lona manao ia mama uma i la le tino ma la le agaga.

Matou te iloa o le toatele o outou sa faia ni osigataulaga faapena ina ua outou lagonaina le molimau a le Agaga Paia ma naunau ia salamo, ia papatisoina, ma ia mama. Atonu o le a leai lava se isi taimi tatou te lagonaina ai le faateleina o le alofa paia o le Faaola e pei ona tatou mauaina pe a tatou salamo ma lagonaina ia aafiaga o lona alofa mo i tatou ma faamautinoa mai ia i tatou Lona alofa ma Lana taliaina o i tatou.

I nai Aso Sa ua tuanai atu a o ou faalogo atu i le tatalo o le faamanatuga, sa ou ootia lava i le ala na faaleoina ai e le ositaulaga upu taitasi i se lagona maoae. Mulimuli ane, sa ou valaau atu i lena ositaulaga e faafetai i ai mo lana fesoasoani i le faia o le faamanatuga o se aafiaga loloto faaleagaga mo au ma le faapotopotoga. Sa le i i ai o ia i le fale, ae sa tali mai lona tina, “Oi, o le a fiafia tele o ia i lou valaau mai! O lona taimi muamua lea na faia ai le tatalo o le faamanatuga, ma sa matou saunia faatasi, i le talanoaina o le taua o le faamanatuga ma le faafouina ma le agavaa o a tatou feagaiga o le papatisoga ma le Faaola.” E maeu lou alofa i lenei tina pele mo le aoaoina o lona atalii e uiga i le mana o feagaiga o le papatisoga ma le auala e mafai ai ona ia fesoasoani i tagata o le uarota ia lagonaina lena mana.

O se isi tina ou te iloa sa nofo na o ia i le lotu mo le tele o tausaga ma lana fanauiti e toafa. Talu ai sa seasea ona mafai ona taulai atu i le Faaola i le taimi o le faamanatuga, sa ia faia ai se fuafuaga. I le taimi nei e taumafai o ia e faaaluina Aso Toonai taitasi e iloilo ai lona vaiaso ma mafaufau e uiga i ana feagaiga ma mea e moomia ona ia salamo mai ai. “Ia,” na ia fai mai ai, “e tusa lava po o a ituaiga o aafiaga ou te oo i ai ma lau fanau i Aso Sa, ua ou saunia lava e ai ma inu i le faamanatuga, faafou au feagaiga, ma lagonaina le mana faamama o le Togiola.”

Uso pele, aisea ua tuu ai e le Faaola le faataua tele i le faamanatuga? O le a le taua o lenei faafouina faalevaiaso o a tatou feagaiga o le papatisoga i o tatou olaga? Ua tatou iloaina ea le gafatia o le Faaola e faamamaina atoa i tatou i vaiaso uma a o tatou fetagofi atu ma le agavaa ma le mafaufau atoa i le faamanatuga? Sa molimau mai Peresitene Boyd K. Packer, “O le faamoemoega lena o le talalelei a Iesu Keriso ma le Togiola: … i le faaiuga o lo [tatou olaga, o le a mafai ona tatou] o atu i le veli ua salamo i a [tatou] agasala ma ua faamamaina e ala i le toto o Keriso.”¹

E lagonaina e lo matou au peresitene le olioli maoae a o osia ma tausia e o tatou uso ma o latou aiga ia feagaiga, ae e lagona lo matou faanoanoa mo outou na o e o feagai ma le tele o faigata i o outou olaga ona o feagaiga ua solia e e pele ia te outou. O le perofeta o Iakopo, le uso o Nifae, sa poloaiina e le Alii e talanoa atu i ona uso e faatatau i tamaitai ma fanau amiotonu o ona aso. Ou te molimau atu o ana upu sa faapolopoloina faapitoa mo o tatou aso. Ua ia saunoa mai ia i tatou e pei o fetalai mai le Faaola lava Ia. O Iakopo sa “sili atu ona mamafa ma … popole” a o ia molimau atu i tane ma tamā:

“Ma ou te faanoanoa foi i le tatau ai ona ou faaaoga o le tautala tuusa’o … i luma o a outou ava ma a outou fanau, o le toatele o o latou lagona ua agavaivai lava ma mama ma maaleale. …

“… Ma ua alu a’e masusu o o latou loto i le Atua. … Ua tele fatu [ua] pepe, ua tuia i manu’a loloto.”²

Mo tamaitai ma fanau tausi feagaiga o e sa soifua i ona aso ma e o soifua i le aso, ua folafola mai e Iakopo:

“Ia outou tepa taulai atu i le Atua ma le mausali o le mafaufau, ma tatalo atu ia te ia ma le faatuatua tele, ma o le a ia faamafanafanaina outou i o outou puapuaga. …

“… Ia ea ia o outou ulu ma tali le afioga malie a le Atua, ma taumamafa fiafia i lona alofa.”³

Ou te molimau atu i le malosi ma le mana o le tatalo a o faailoa atu i ai o tatou tiga matuitui ma manaoga i lo tatou Tama Faalelagi, ma tali ua tatou mauaina a o tatou “taumamafa” i tusitusiga paia ma upu a perofeta soifua.

Toeitiiti lava tolu tausaga talu ai sa faaleagaina ai e se afi matautia totonu o le tapeneko pele ma logologoa i Provo, Iuta. O lona faatamaiaina ua manatu i ai o se mala tele lea i le nuu ma tagata o le Ekalesia. Sa manatu le toatele, “Aisea na faatagaina ai e le Alii lenei mea e tupu? E mautinoa lava e mafai ona Ia taofia le afi pe taofia lona faatafunaga.”

Sefulu masina mulimuli ane, a o faia le konafesi aoao ia Oketopa 2011, sa lagonaina se leo o le maofa ina ua faasilasila mai e Peresitene Thomas S. Monson e faapea o le tapeneko sa toetoe a faaleagaina atoa o le a avea ma se malumalu paia—o se maota o le Alii! Sa faafuasei lava ona mafai ona tatou vaaia le mea ua leva ona silafia e le Alii! Na te le i faatupuina le afi, ae sa Ia faatagaina le afi e faaleagaina totonu o le fale. Sa ia silasila i le tapeneko o se malumalu ofoofogia—o se maota tumau mo le osia o feagaiga paia ma faavavau.⁴

Ou uso pele, e faatagaina e le Alii i tatou ia tofotofoina ma faaosoosoina, o nisi taimi e oo lava i le mea e gata ai lo tatou malosi. Ua tatou vaaia olaga o e pele—ma atonu o a tatou foi— ua susunuina moni i le eleele ma fesili ai pe aisea e faatagaina ai e se Tama Faalelagi alofa ma le agalelei ia mea ia tutupu. Ae Na te le tuua i tatou e aunoa ma le fesoasoani; e tu o Ia ma Ona aao mafola, ma naunau e valaaulia i tatou e o mai ia te Ia. Ua Ia fausiaina o tatou olaga i ni malumalu matagofie ina ia mafai e Lona Agaga ona mafuta ai e faavavau.

I le Mataupu Faavae ma Feagaiga 58:3–4, ua fetalai mai le Alii ia i tatou:

“E le mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai pe a mavae puapuaga e tele.

“Aua a mavae puapuaga e tele ona oo mai lea o faamanuiaga. O le mea lea e oo mai le aso o le a faapaleina ai outou i le mamalu tele.”

Uso e, ou te molimau atu e i ai se fuafuaga a le Alii mo o tatou olaga taitoatasi. E leai se mea e tupu fua pe tupu faafuasei ia te Ia. O Ia e silafia mea uma ma tumu i le alofa. E naunau o Ia e fesoasoani ia i tatou, e faamafanafana i tatou, ma faamama o tatou tiga pe a tatou faalagolago atu i le mana o le Togiola ma faamamaluina a tatou feagaiga. O tofotofoga ma faigata ua tatou oo i ai atonu o mea tonu ia e taiala ai i tatou e o atu ia te Ia ma pipiimau i a tatou feagaiga ina ia mafai ona tatou toe foi atu i Lona afioaga ma mauaina mea uma ua i ai i le Tama.

O lenei tausaga ua tea, sa ou manaomia ma moomia le lagonaina atili le loloto o le alofa o le Alii, ia maua faaaliga patino, ia malamalama atili i au feagaiga o le malumalu, ma ia faamāmāina au avega. A o ou tatalo faapitoa mo nei faamanuiaga, sa ou lagonaina le taitaiina o au e le Agaga e alu i le malumalu ma faalogo ma le totoa i upu taitasi o faamanuiaga ua folafolaina mo au. Ou te molimau atu a o ou faalogo lelei atu ma le naunautai ma taumafai e faatino lou faatuatua, sa alofa mutimutivale le Alii ia te au ma sa fesoasoani e faamamaina au avega. Sa ia fesoasoani ia ou lagonaina le filemu maoae e uiga i tatalo sa le i taliina lava. Tatou te noatia le Alii ia tausia Ana folafolaga pe a tatou tausia a tatou feagaiga ma faatino lo tatou faatuatua.⁵ O mai i le malumalu, uso pele, ma avatu o outou faamanuiaga!

Ou te manao e talanoa atu i se isi auala e mafai ai ona tuuina mai ia i tatou le mautinoa ma le faatuatua. O nisi taimi, i le avea ai ma tamaitai, ua i ai se tatou masani o le faitio ia i tatou lava. A oo i nei taimi e manaomia ona tatou saili atu i le Agaga ma ole atu, “Mata o le mea lea o finagalo le Alii ou te mafaufau ai ia te au lava, pe mata o taumafai Satani e faavaivai au?” Manatua o le natura o lo tatou Tama Faalelagi, o lona alofa ua atoatoa ma e le iu.⁶ E finagalo o Ia e faamalosia i tatou i luga, e le o le faavaivaia o i tatou.

I le avea ai ma tagata o le Ekalesia, atonu tatou te lagonaina i nisi taimi lo tatou manaomia e avea ma se vaega o se “aiga atoatoa o le AAG” ina ia mafai ai ona taliaina e le Alii. E tele lava ina tatou lagonaina le “le agavaa” po o le le fetaui mo le malo pe afai ua tatou lagonaina lo tatou le talafeagai ma lena aiga atoatoa. Uso pele, pe a faataunuuina mea uma, o le mea o le a taua i lo tatou Tama o i le Lagi, o le auala na tatou tausia lelei ai a tatou feagaiga ma le tele o a tatou taumafaiga na faia e mulimuli ai i le faataitaiga a lo tatou Faaola, o Iesu Keriso.

Ou te molimau atu o Iesu Keriso o lo tatou Faaola ma le Togiola. Ona o Lana taulaga togiola, ua mafai ai ona faamamaina i tatou i vaiaso taitasi pe a tatou fetagofi atu ma le agavaa i Lana faamanatuga. A tatou faafouina ma faamamaluina a tatou feagaiga, e mafai ona faamamaina a tatou avega, ma e mafai ona faaauau pea ona faamamaina ma faamalosia i tatou ina ia oo atu i le iuga o o tatou olaga o le a faitaulia lo tatou agavaa e maua le faaeaga ma le ola e faavavau. Ou te molimau atu ai i nei mea i le suafa o lo tatou Faaola pele, o Iesu Keriso, amene.