Nangulo si Braden sa Dalan
Ang tagsulat nagpuyo sa California, USA.
Kini nga istorya nahitabo sa Louisiana, USA.
Talagsaon ang pagpuyo didto sa buhianan sa mga buaya [alligator farm]. Apan usa ka butang ang kulang.
“Himoa hinuon ang imong kaugalingon nga panig-ingnan sa mga magtutuo” (1 Timoteo 4:12).
Gidala ni Braden ug ni Papa ang bug-at nga mga balde sa panglawog sa buaya [alligator pellets] padulong ngadto sa lawoganan nga mulye [feeding dock]. Migimaw ang tumoy sa mga ulo sa mga buaya ug mipadulong ngadto kanila. Sa dihang si Braden ug si Papa miabot sa dapit sa paglawog, pipila sa mga buaya miabli na sa ilang mga baba.
Apan wala mahadlok si Braden. Ang pagtrabaho uban ni Papa sa buhianan sa mga buaya mao ang kinanindotan.
“Tingkaon na!” Miingon si Braden. Mikuha siya og usa ka takos sa mga lawog ug giitsa kini ngadto sa tubig.
Tsamp. Tsamp. Isplas.
Pipila sa mga buaya misalo sa mga lawog sa hangin. Ang uban mihambat niini sa dihang mitugdon kini sa tubig. Nagpadayon si Braden ug si Papa sa pag-itsa sa pagkaon hangtud nga wala nay sulod ang ilang mga balde.
“Salamat sa pagtabang kanako,” miingon si Papa. “Adto na ta. Hapit na moabot ang mga misyonaryo.”
Misugod sa pagpakig-istorya si Braden ug ang iyang pamilya sa mga misyonaryo pipila ka bulan ang milabay. Ganahan siya sa mga misyonaryo! Ug ganahan siya nga makakat-on mahitungod sa Simbahan. Usa ka miyembro sa Simbahan si Papa, apan wala kaayo siya magsimbahan. Wala pa mabunyagi sukad si Mama ug si Braden.
“Sa miaging semana mihimo kamo og tumong sa pagbasa sa Mosiah 18,” miingon si Sister Cox nianang gabhiona. “Komosta man kini?”
Nagtinan-away sa usag usa si Mama ug Papa ug nahilom og kadiyot. “Daghan kami og gibuhat karong semanaha,” miingon si Mama.
“Nabasa nako kini!” Miingon si Braden.
“Maayo!” Miingon si Sister Blood, nga mipaduol sa iyang kamot aron moapir. “Unsay imong gibati human nimo mabasa kini?”
Mipahiyum og dako si Braden. “Maayo gayud. Ug nag-ampo ko mahitungod sa pagpabunyag. “Ganahan gayud ko.”
“Maayo kana! Nasayod ko nga makapalipay gayud kana sa Langitnong Amahan,” miingon si Sister Cox. Milingi siya sa mama ni Braden. “Unsa ang imong gibati mahitungod niini?”
“Dili pa gihapon ko sigurado. Tingali nagkinahanglan pa ko og dugang nga panahon,” miingon si Mama.
Naguol og gamay si Braden atol sa nahibilin nga bahin sa leksyon. Nangandoy siya nga ang iyang mga ginikanan mga miyembro sa Simbahan. Ug gusto niya nga mahimong miyembro sa Simbahan usab!
Sa dihang mibiya ang mga misyonaryo, gisultihan niya ang iyang mga ginikanan nga seryoso siya sa iyang gisulti ganina. “Gusto gayud ko nga magpabunyag. Ug … ,” miginhawa og lawom si Braden. “Gusto gayud ko nga si Papa ang mobunyag kanako.”
Human sa makadiyot, si Papa misulti. “Gusto gayud usab nako kana.”
Hilom si Mama. “Mag-ampo kita kabahin niini.”
Miluhod si Braden uban sa iyang pamilya ug nangutana sa Langitnong Amahan kon siya ug si Mama kinahanglang magpabunyag. Mibati siya nga mainiton ug gihigugma.
Sa sunod nga pipila ka semana, nagbasa sa mga kasulatan ug nag-ampo matag adlaw si Braden. Sa sinugdanan, siya mao ang kanunay nga naghangyo sa iyang mga ginikanan nga sila mag-ampo ug mobasa uban kaniya. Apan sa wala madugay, sila ang misugod sa paghangyo kaniya. Sa dihang siya ug si Papa magpakaon sa mga buaya, maghisgot sila mahitungod sa mga kasulatan o kon unsay ilang nakat-onan sa simbahan. Siya ug si Mama maghisgot mahitungod sa mga leksyon sa misyonaryo. Matag adlaw, si Mama ug si Papa ingon og mas malipayon.
Usa ka adlaw atol sa usa ka leksyon uban sa mga misyonaryo, miingon si Mama sa mga pulong nga gihulat ni Braden: “Gusto ko nga magpabunyag.”
Sa sunod nga pipila ka semana, mibati si Braden nga daw naglutaw siya diha sa mga panganod.
Sa katapusan, adlaw na sa bunyag ni Mama ug ni Braden. Sa dihang mihaw-as si Braden gikan sa tubig, gibati niya ang gugma sa Langitnong Amahan alang kaniya ug sa iyang pamilya. Gigakos niya pag-ayo si Papa.
Gigakos ni Papa si Braden ug mihunghong, “Salamat sa pagkahimong maayo nga ehemplo ug sa pagtabang kanamo. Gihigugma ko ikaw.”
Mga paghulagway ni C.B. Canga