Mga Pioneer sa Matag Yuta
Julia Mavimbela
Lider sa Komunidad sa South Africa
“Moabot lamang ang gugma pinaagi sa pagpasaylo sa uban.”
Gipahiran ni Julia ang iyang agtang. Dayon gipunit niya ang iyang pala ug misugod sa pagkalot. Karon, ang yuta sa iyang palibot usa ka luna sa lapok. Apan sa dili madugay mahimo kining usa ka matahom nga tanaman.
Kini nga panahon malisod alang sa Itom nga mga tawo sa South Africa. Ang mga balaod didto naglahi sa mga Itom ug sa mga Puti. Gipugos ang daghang Itom nga mga tawo sa pagbiya sa ilang mga panimalay ug sa pagpuyo sa piho nga mga dapit nga layo sa Puti nga mga tawo, ug dili sila makabotar. Dihay kapintas didto sa lungsod diin nagpuyo si Julia, ug ang mga eskwelahan gisirado tungod niini. Usahay peligro ang maanaa sa gawas.
Apan kana wala makapugong ni Julia. Gusto siyang mobuhat og usa ka butang nga modala og kamaayo sa iyang komunidad. Mao nga nagsugod siya og tanaman.
Pipila ka bata nakakita ni Julia nga nagtrabaho. “Mahimo ba kaming motabang?” nangutana sila.
“Siyempre,” miingon si Julia. Mitunol dayon siya og pala sa matag usa. Gipakita niya kanila unsaon sa pagpahumok sa yuta ug sa pagbungkal sa mga sagbot.
“Bungkalon nato ang yuta sa kayugot, itanom ang usa ka liso sa gugma, ug tan-awon unsa nga mga bunga ang mahatag niini kanato,” miingon siya. “Moabot lamang ang gugma pinaagi sa pagpasaylo sa uban.”
Milabay ang mga semana, ug dugang nga mga tanom ang mitubo. Ubang mga tawo miabot aron motrabaho sa tanaman. Giibot nila ang tag-as nga mga sagbot. Nananom sila og dugang nga mga liso. Gibuboan nila ang mga tanom. Nakapalipay kini ni Julia nga makakita og daghan kaayong tawo nga mitabang.
Usa ka adlaw nakahimamat si Julia og duha ka batan-ong lalaki. Nasurprisa si Julia tungod kay ang Puti nga mga tawo talagsa ra nga moadto sa iyang kasilinganan. Miingon sila nga mga misyonaryo sila. Gidapit niya sila sa pagpaambit og mensahe sa iyang panimalay.
Sa dihang nakadungog ang anak nga lalaki ni Julia nga nagpadulong sila, nakuratan siya. “Nganong gidapit nimo sila?” miingon siya. “Sila mga Puti. Dili kini luwas.”
Apan misalig si Julia sa mga misyonaryo. “Lahi kini nga mga tawo,” miingon si Julia. “Nagsangyaw sila og kalinaw.”
Sa dihang miabot ang mga misyonaryo, gipasulod sila ni Julia. Nakabantay ang usa sa ilaha og usa ka litrato diha sa aparador. Gikan kini sa kasal ni Julia.
“Kinsa kana?” nangutana ang misyonaryo, nga nagtudlo ngadto sa litrato.
“Ang akong bana, si John.” Miduko si Julia. “Namatay siya sa usa ka bangga sa sakyanan.”
Miyango-yango ang misyonaryo. “Nagtuo kami nga ang mga pamilya mahimong magkauban hangtod sa kahangturan, bisan human sila mamatay.”
Usa ka pagbati sa kalinaw ang milukop kang Julia. Nalipay siya nga nakakat-on mahitungod sa plano sa Dios ug nagpadayon sa pagpakigkita sa mga misyonaryo. Milambo ang gugma alang sa ebanghelyo diha sa kasingkasing ni Julia, sama sa mga tanom diha sa iyang tanaman. Sa wala madugay nakahukom siya nga magpabunyag.
Diha sa simbahan, nakahimamat si Julia og daghang bag-o nga mga tawo. Pipila mga Itom. Pipila mga Puti. Apan miserbisyo ug nagkat-on sila og dungan.
Gipakita ni Julia ang mga bata sa simbahan kon unsaon sa pagtabang diha sa iyang tanaman. “Kinahanglan malumo kita sa atong mga kasingkasing, sama niini nga yuta,” miingon siya. “Kinahanglan nga mohimo kita og luna alang sa ebanghelyo diha sa atong kaugalingon. Kinahanglan nga mohimo kita og luna alang sa gugma.”
Napulo ug tulo ka tuig human sa bunyag ni Julia, ang mga balaod sa tawo nga naglahi sa Itom nga mga tawo ug sa Puti nga mga tawo sa South Africa natapos.
Adunay hapit 70,000 ka miyembro sa Simbahan sa South Africa karon.
Ang South Africa adunay 11 ka opisyal nga mga pinulongan.
Mitabang si Julia sa pagsugod sa Kababayen-an alang sa Kalinaw [Women for Peace], usa ka grupo aron sa pagpasiugda og panaghiusa ug kalinaw sa South Africa.
Siya ang usa sa unang mga temple worker sa Templo sa Johannesburg South Africa.
Si Julia usa ka magtutudlo. Gitudloan niya ang mga bata sa pagbasa kon sila motrabaho sa iyang tanaman.
Mga paghulagway ni Tracy Bishop