Ang CTR nga Pahinumdom
Ang tagsulat nagpuyo sa Kuala Lumpur, Malaysia.
Kini nga istorya nahitabo sa Philippines.
“Buhata ninyo ang matarong ug ang maayo diha sa panan-aw sa Ginoo” (Deuteronomio 6:18).
“Hinumdumi kon kinsa ka ug unsa ang imong gibarogan,” miingon si Sister Aquino.
Mipahiyum si Raish samtang milakaw siya pagawas sa chapel. Nakadungog siya og musika sa piano nga gikan didto sa tumoy sa hawanan. Panahon na alang sa Primary!
“Ang paagi nga matarung,” mikanta si Raish uban sa laing mga bata. “Kanunay kong pilion.”
Human sa panahon sa pagpanganta, mibarog si Sister Aquino sa atubangan sa lawak. “Aduna bay bisan kinsa nga anaa pa ang CTR nga singsing nila?” nangutana siya.
Giisa ni Raish ang iyang kamot. “Ako!” miingon siya. “Gitipigan nako ang akoa sa akong hunos sa panimalay.”
“Nindot kana, Raish,” miingon si Sister Aquino. “Nakahinumdom ko sa dihang bata pa ko, ang akong mama kanunay nga misulti kanako, ‘Hinumdumi kon kinsa ka ug unsa ang imong gibarogan.’ Nanghinaot ko nga kamong tanan mobuhat sa inyong labing maayo sa pagpili sa matarong.”
Sa dihang nakauli si Raish gikan sa simbahan, midagan siya paingon sa iyang hunos ug gikuha ang iyang CTR nga singsing. Gusto niya nga isul-ob kini nga mas kanunay aron sa pagpahinumdom kaniya sa pagpili sa matarong.
Sa pagkasunod adlaw sa eskwelahan, gidala ni Raish ang iyang paniudto ngadto sa lamesa diin ang iyang mga higala kanunay nga maglingkoran. Kanunay siya nga ganahan nga makig-istorya ni Julia ug ni Bituin!
Si Raish ug ang iyang mga higala nangatawa kabahin sa ilang paborito nga salida sa dihang usa ka bag-o nga babaye ang miduol. Milingkod siya tupad ni Julia. “Hi,” hilom siyang miingon. “Ako si Imelda.”
“Kanang, tabi palihog!” Miingon si Julia. “Amoa ni nga lamesa.”
Mitindog si Imelda. “Aw,” miingon siya dayon. “Pasaylo.” Miduko siya ug mibiya.
Nag-abot ang mga kilay ni Raish. “Nganong miingon ka niadto?” gipangutana niya si Julia. “Kinahanglan nga maayo kita ngadto kaniya. Bag-o pa siya ug tingali nagkinahanglan siya og mga higala.”
“Apan atoa kini nga lamesa,” miingon si Julia.
“Oo,” miingon si Bituin.
Miduko si Raish nga mitan-aw sa iyang pagkaon. Naluoy siya para ni Imelda. Apan nahadlok siya nga mosulti og dugang pa. Unsa kaha kon masuko si Julia ug si Bituin kaniya?
Nianang gabhiona, kanunayng naghunahuna si Raish kang Imelda. Nakahukom siya nga mag-ampo. “Langitnong Amahan, palihog tabangi ko nga masayod unsay buhaton sa akong mga higala. Tabangi ko sa pagpili sa matarong.”
Samtang nagpadayon ang semana, gipangita ni Raish si Imelda kada adlaw atol sa paniudto. Ug kada adlaw, nakita niya si Imelda nga naglingkod nga nag-inusara. Naguol si Raish para kaniya. Gusto niya nga dapiton si Imelda nga molingkod diha sa ilang lamesa, apan maisogon kaha siyang makapanalipod sa iyang gituohan ngadto kang Julia ug Bituin? Wala gayud masayod si Raish kon unsay buhaton.
Usa ka adlaw nakita ni Raish si Imelda nga miagi sa ilang lamesa. “Tan-awa ang bag-ong babaye,” kusog nga miingon si Julia. “Giputos og dahon sa saging ang iyang paniudto. Laina oy!”
Mikatawa si Bituin. “Ang iyang pamilya wala gani igong kwarta nga ikapalit og balonan.”
Gitak-om lang ni Imelda ang iyang baba. Misugod siya sa paglakaw og paspas.
Gitan-aw ni Raish ang CTR nga singsing sa iyang tudlo. Gusto gayud niya nga mopili sa matarong. Dayon dunay laing butang nga misantop sa iyang hunahuna. Kini mao ang unsay giingon ni Sister Aquino sa Primary. Hinumdumi kon kinsa ka ug unsa ang imong gibarogan. Gusto niya nga mahimong mabination ug mobarog sa unsay matarong kanunay.
Miatubang si Raish sa iyang mga higala. “Palihog hunong,” miingon siya. “Walay gibuhat nga bisan unsa si Imelda kaninyo. Pasagdi lang siya.”
Lain ang tinan-awan ni Julia kang Raish.
Mitindog si Raish. “Molingkod ko tupad kang Imelda,” miingon siya. Gidala niya ang iyang pagkaon ngadto sa hawan nga lamesa diin naglingkod si Imelda. Nasurprisa si Imelda.
“Hi,” miingon si Raish. “Pasayloa ko nga dili kaayo kami maayo kanimo. Gusto ko nga mahimo nimong higala.”
Mipahiyum si Imelda. “Salamat,” hinay siya nga miingon.
Mipahiyum og balik si Raish. Nalipay siya nga mahimo siyang higala ni Imelda. Ug nalipay siya nga mipili siya sa matarong.
Mga paghulagway ni Jennifer Eichelberger