Ang Sister Solo
Ang tagsulat nagpuyo sa Utah, USA.
“Awit nga di ko makanta si Jesus mamati” (Hymns, nu. 139).
Lisud nga madungog ang tanan nga mga tuno sa musika. Igo kaha ang kaisug ni Sophie sa pagkanta?
Ganahan si Sophie nga mokanta. Mikanta siya sa eskwelahan, sa balay sa iyang mga higala, ug diha sa panimalay. Ang iyang paborito nga dapit nga mokanta mao ang simbahan.
“Ma,” si Sophie nangutana usa ka adlaw, “gusto kong makakat-on sa pagkanta og mas maayo. Mahimo kaha ko nga mokuha og mga leksyon?”
“Morag maayo kana nga ideya,” si Mama miingon. “Akong tan-awon unsa akong makit-an.”
Ang pagkanta dili kanunayng sayon alang ni Sophie. Bungol siya ug dili makadungog kadaghanan sa iyang kaugalingong tingog. Duna siyay gamayng espesyal nga himan luyo sa iyang mga dunggan aron sa pagtabang niya nga makadungog. Ang tunog sa mga butang ingon og lahi ngadto niya kay sa paminaw sa ubang tawo. Apan gusto gihapon ni Sophie nga mokanta.
“Maayong balita, Sophie!” Miingon si Mama paglabay sa pipila ka adlaw. “Nakakita ko og klase nga mahimo nimong apilan. Usa kini ka choir uban sa mga bata nga nagkat-on sa pag-awit. Ang magtutudlo miingon nga mahimo na ka nga magsugod ugma!”
Si Sophie misayaw og diyutaygamay. Naghinam-hinam kaayo siya!
Apan nianang gabhiona, nagsugod na ang iyang kakulba.
“Naghinam-hinam na ka sa imong klase ugma?” nangutana ang iyang magulang nga si Kayla.
Mitando si Sophie. “Oo. Apan nahadlok sab ko gamay. Maayo unta nga dili ko moadto nga ako ra.”
“Makahimo ka niana!” Miingon si Kayla. “Apan makatabang ba kon mouban ko nimo? Magdungan ta sa pagkat-on og kanta.”
Si Sophie migakos ni Kayla. “Nindot kaayo kana.”
Pagkasunod buntag, si Sophie ug si Kayla mibangon og sayo aron moadto sa ilang klase sa pagkanta. Ang mga kakulba anaa sa hunahuna ni Sophie samtang misulod siya sa sakyanan. Unsaon na lang kon dili siya makasabut sa magtutudlo? Unsaon na lang kon dili siya makakita og mga higala? Unsaon na lang kon ang mga tawo motan-aw niya?
Giparking ni mama ang sakyanan ug milingi aron motan-aw ni Sophie. Mios-os si Sophie gikan sa iyang lingkuranan.
“Dili ko sigurado kon gusto pa ko nga moadto,” miingon siya.
“Unsay nahitabo?” Nangutana si Mama. “Naghinam-hinam ka man unta sa wala pa.”
Wala motingog si Sophie. Nagduko lang siya ug giakin-akin ang mga tiil.
Mipahiyum si Mama. “Dili ka kinahanglan nga moadto kon dili nimo gusto. Apan kon nahadlok ka, mahimo kang mag-ampo sa Langitnong Amahan, ug Siya motabang nimo! Dugang pa si Kayla mokuyog usab nimo didto.”
Si Kayla migunit sa kamot ni Sophie. “Makahimo mi ani!” miingon siya.
Nagpanglad-ok si Sophie. Sa kakulba mibati siya nga midaguok ang iyang tiyan, apan mikanaog gihapon siya sa sakyanan. Migunit siya og maayo sa kamot ni Kayla samtang padulong silang misulod ngadto sa lawak klasehanan.
Sa unang pipila ka adlaw sa klase, si Sophie kanunayng nagtupad ni Kayla. Dayon usa ka adlaw nakamatngon si Sophie og usa ka batang babaye nga nag-inusarang naglingkod. Tingali nahadlok sab siya. Miadto si Sophie ug mitupad niya og lingkod.
“Hi!” Miingon si Sophie. “Mahimo ba kong molingkod dinhi?” Ang batang babaye mitando. Wala madugay nagkinataw-anay ug nagdungan sila sa pagpanganta. Nalipay si Sophie nga igo ang iyang kaisog nga mohimo og bag-ong higala.
Ang pagkanta uban sa grupo makalingaw kaayo! Ganahan si Sophie nga makat-on sa mga nota ug sa pag-undak sa iyang mga tiil sa tugtog sa musika. Nakahimo pa gani siya sa pagtudlo sa pipila sa ubang bata kon unsaon sa pagsulti sa mga pulong diha sa sinyas nga pinulongan [sign language].
Usa ka adlaw ang magtutudlo adunay makapahinam nga pahibalo. Ang tanan sa klase makakanta og tulo ka solo nga bahin sa usa ka programa. Diha sa panimalay, si Kayla ug si Sophie naningkamot og maayo sa pagpraktis sa ilang solo. Sa wala madugay si Sophie makakanta na sa iyang unang duha ka bahin sa solo. Apan ang katapusan lisud kaayo! Dili siya makadungog sa tanang mga nota. Unsaon kaha niya nga makahimo sa pagkanta niini sa iyang kaugalingon atubangan sa daghan kaayong tawo?
Nahinumdom si Sophie unsay gisulti ni Mama mahitungod sa pag-ampo sa Langitnong Amahan alang sa tabang. Siya miluhod. “Langitnong Amahan, kining katapusang kanta lisud kaayo para nako. Mahimo ba ko nimong tabangan nga makakita og paagi nga makanta kini ug dili makulbaan?”
Sa iyang sunod nga klase sa pagkanta, ang magtutudlo ni Sophie miduol kaniya. “Nasayud ko nga gikulbaan ka kabahin sa imong ikatulo nga solo. Gusto ka ba nga mokanta niana uban ni Kayla? Mahimo kining sister solo!”
Mipahiyum si Sophie. Mibati siya og kainit ug kalipay. Nasayud siya nga ang Langitnong Amahan mitubag sa iyang pag-ampo.
Sa pasundayag, si Sophie mikanta sa iyang unang duha ka solo nga masaligon. Sa dihang panahon na sa iyang ikatulo nga solo, mibarug siya ug mibira sa kamot ni Kayla. Sila milakaw sa entablado ug gikanta ang sister solo nga kusog ug mapasigarbuhon. Si Sophie wala gayud mobati nga gikulbaan o nahadlok! Ang Langitnong Amahan mitubag sa iyang pag-ampo sa paagi nga siya wala magdahum, apan siya mapasalamaton kaayo nga kanunay Siya nga nakadungog kaniya.
Paghulagway pinaagi ni Alyssa Petersen