’O Braden e fa’a’ite ra i te ’ē’a
Tē ora nei te ta’ata pāpa’i i California, Marite.
’Ua tupu teie ’ā’amu i Louisiana, i te fenua Marite.
E mea au roa te orara’a i te fare fa’a’amura’a mo’o taehae. Terā rā, tē mo’e ra te hō’ē mea.
« ’Ei ha’apa’ora’a rā ’oe nā tei fa’aro’o ra » (1 Timoteo 4:12).
’Ua amo ’o Braden ’e ’o Pāpā i te mau pākete huero mā’a teiaha nā te mo’o taehae i ni’a i te pa’epa’e fa’a’amura’a. ’Ua puhā mai ra te upo’o o te mau mo’o taehae i ni’a i te pape ’e ’ua tere mai ra ia rāua ra. I te taera’a ’o Braden ’e ’o Pāpā i te vāhi fa’a’amura’a, ’ua hāmama te tahi mau mo’o taehae i tō rātou vaha.
’Aita rā ’o Braden i ri’ari’a. Te ravera’a i te ’ohipa ’e ’o Pāpā i te fare fa’a’amura’a mo’o taehae ’aita atu ai ïa.
« Taime fa’a’amura’a ! » Te parau ïa a Braden. ’Ua tāipu ma ira ’oia hō’ē ’āu’a huero mā’a ’e ’ua māni’i atu ra i roto i te pape.
Chomp. Chomp. Splash.
’Ua haru te tahi mau mo’o taehae i te mau huero mā’a i roto noa i te aore. ’Ua apu te tahi pae i te mau huero i te taime ’a topa ai i roto i te pape. ’Ua tāmau noa ’o Braden ’e ’o Pāpā i te hue i te mā’a ē pau roa atu.
« Māuruuru nō te tauturura’a mai iā’u », te parau ïa a Pāpā. « Haere ana’e. Fātata te mau misiōnare i te tae mai ».
’Ua ha’amata ’o Braden ’e tōna ’utuāfare i te paraparau i te mau misiōnare tau ’āva’e i ma’iri a’e nei. ’Ua au ’oia i te mau misiōnare ! ’E ’ua au ’oia i te ha’api’i mai nō ni’a i te ’Ēkālesia. E melo ’o Pāpā nō te ’Ēkālesia, ’aita rā ’oia i haere rahi i te purera’a. ’Aita ’o Māma ’e ’o Braden i bāpetizohia.
« I te hepetoma i ma’iri a’enei , ’ua ha’amau ’outou i te ’ōpuara’a ’ia tai’o i te Mosia 18 », ’ua parau te tuahine Cox i taua ahiahi ra. « E aha te huru ? »
’Ua hi’ohi’o a’era ’o Māma ’e ’o Pāpā i te tahi ’e te tahi, ’e ’ua muhu ’ore rāua nō te tahi taime iti. « ’Ua rahi roa tā māua ’ohipa i teie hepetoma », te parau ïa a Māma.
« ’Ua tai’o vau ! » Te parau ïa a Braden.
« Maita’i roa ! » Pāhono a’enei te tuahine Blood, ma te hōro’a atu i tōna rima. « E aha tō ’oe mana’o i muri a’e i tō ’oe tai’ora’a ? »
’Ua ’ata a’era ’o Braden. « E mea maita’i roa. ’E ’ua pure au nō ni’a i tō’u bpāpetizora’a. Tē hina’aro mau nei au. »
« ’Aita atu ai ïa ! ’Ua ’ite au ē, e ’oa’oa roa te Metua i te ao ra », te parau ïa a te tuahine Cox. ’Ua fāriu ’oia i ni’a i te Māma o Braden. « E aha tō ’oe mana’o nō ni’a i te reira ? »
« ’Aitā vau i pāpū atu ra. Tē mana’o nei au ē, e tīa’i ri’i ā », te parau ïa a Māma.
’Ua ’oto ri’i ’o Braden i te toe’a o te ha’api’ira’a. ’Ua hina’aro ’oia ’ia riro tōna nā metua ’ei melo nō te ’Ēkālesia. ’E ’ua hina’aro ’oia ’ia riro ’ei melo nō te ’Ēkālesia !
I te ho’ira’a te mau misiōnare, ’ua parau ’oia i tōna nā metua ē, e parau pāpū tāna i ’āraua’e ra. « E hina’aro mau tō’u ’ia bāpetizohia vau. ’E… » Huti hōhonu a’era ’o Braden i te aho. « Tē hina’aro mau nei au nā Pāpā e bāpetizo iā’u ».
Ma’a taime i muri iho, ’ua parau a’era ’o Pāpā. « ’Ua hina’aro mau ato’a vau i te reira ».
’Aita ’o Māma i paraparau a’e. « Pure ana’e nō ni’a i te reira ».
’Ua tūturi ’o Braden i raro ’e tōna ’utuāfare ’e ’ua ui atu ra i te Metua i te ao ra e bāpetizohia ānei ’oia ’e ’o Māma. ’Ua fāri’i a’era ’oia i te mana’o māhanahana ’e te here.
Nō te tahi tau hepetoma i muri mai, ’ua tai’o ’o Braden i te mau pāpa’ira’a mo’a ’e ’ua pure i te mau mahana ato’a. I te ha’amatara’a, nāna noa e ani i tōna nā metua ’ia pure ’e ’ia tai’o ho’i nā muri iho iāna. ’Aita rā i maoro, ’ua ha’amata a’era rāua i te ani iāna. ’Ia haere ana’e ’oia ’e ’o Pāpā e fa’a’amu i te mau ’mo’o taehae, e paraparau rāua nō ni’a i te mau pāpa’ira’a mo’a, ’aore rā, i te mau mea tā rāua i ha’api’i mai i te fare purera’a. E paraparau ’oia ’e ’o Māma nō ni’a i te mau ha’api’ira’a misiōnare. I te mau mahana ato’a, mai te huru ra ē, tē ’oa’oa ri’i ra ’o Māma ’e ’o Pāpā.
I te hō’ē mahana i roto i te hō’ē ha’api’ira’a ’e te mau misiōnare, ’ua parau ’o Māma i te mau parau tā Braden i tīa’i noa na : « Tē hina’aro nei au ’ia bāpetizohia vau ».
Nō te tahi tau hepetoma i muri mai, mai te huru ra ē, tē ma’ue haere ra ’o Braden i roto i te mau ata.
Ē i te hope’a, o te mahana bāpetizora’a ïa nō Māma ’e nō Braden. I te taime ’a haere mai ai ’o Braden i rāpae i te pape, ’ua ’ite ’oia i te here o te Metua i te ao ra nōna ’e nō tōna ’utuāfare. ’Ua ’āpā maita’i atu ra ’oia ia Pāpā.
’Ua tāpe’a mai ’o Pāpā ia Braden i pīha’i iho roa iāna ’e ’ua muhumuhu atu ra : « Māuruuru nō te rirora’a ’ei hi’ora’a maita’i ’e te tauturura’a mai ia māua. ’Ua here au ia ’oe ».