Pōnaohia i rāpae !
Tē ora nei te ta’ata pāpa’i i Utah, Marite.
’Ua tupu te reira ’ā’amu i Honeteria rōpū, Honeteria.
Penei a’e e nehenehe au e tauturu !
« ’A tu’u i tō ’outou ti’aturira’a i roto i taua vārua ra ’o tē arata’i ’ia rave i te maita’i » (Te Parau Ha’api’ira’a ’e te mau Parau Fafau 11:12).
’Ua ’ōu’a ’o Emma nā ni’a i te ’āfāfā o te haerera’a ta’ata ’ōfa’i . E mahana māramarama ’e te nehenenehe roa. Tē haere ra ’oia ’e ’o Māma i te fare toa.
« E Māmā, e aha te āteara’a o te mahana ? » tāna ïa uira’a.
« ’Aita vau i pāpū », te parau ïa a Māmā.
’Ua hefahefa te mata o Emma i te hi’ora’a i ni’a i te ra’i. « ’Ia mana’o ’oe, e tae te hō’ē pahī pao i ni’a i te mahana ? ’Ia mana’o ’oe e mea ve’ave’a a’e i te ho’a uira ? ’Ia mana’o ’oe … »
’Ua ’ata a’era ’o Māmā. « Tē haere noa atu ra tā ’oe mau uira’a i te pa’arira’a ! »
’Ua ’ata ato’a a’era ’o Emma. E mea rahi tāna mau uira’a. ’Ua fa’aitoito māite ’o Māma nō te pāhono i te reira. Terā ïa te hō’ē tumu e au ai ’o Emma e haere nā muri iho ia Māmā.
’Ua hi’o haere ’o Emma i tōna veutupura’a. ’Ua tere te mau pere’o’o uta ta’ata nā ni’a i te purūmu ’ōfa’i. ’Ua tere te ta’ata nā ni’a i te pere’o’o ta’ata’ahi. E rave rahi ta’ata e haere ato’a ra nā rāpae.
I muri iho, ’ua hi’o a’era ’o Emma i te tahi pae o te purūmu. Tē pārahi ra te hō’ē tamāhine iti i ni’a i te ta’ahira’a ’ē’a i rāpae i te hō’ē fare. Mai te huru ra ē, tē ta’i ra ’oia.
’Ua haere marū a’era ’o Emma. E tāpe’a ānei nō te tauturu atu ? Tē hina’aro ra paha terā tamāhine ’ia fa’aea noa ’ōna ana’e. I te tahi taime nō Emma, e fa’aea noa ’ōna ana’e ’ia ’oto ana’e ’oia.
Tāpe’a ihora ’o Emma. I te rahira’a taime e hina’aro ’o Emma i te hō’ē ta’ata nō te paraparau atu, ’ia hina’aro ana’e ’oia i te tauturu. ’E penei a’e e nehenehe tāna e tauturu !
’Ua haru mai ra ’oia i te rima o Māmā. « ’A hi’o na, e Māmā. Tē mana’o nei au ē, tē hina’aro ra terā tamāhine i te tauturu ».
’Ua hi’o a’era ’o Māma i te tahi pae o te purūmu. « ’Ua tano paha ’oe ».
’Ua tāpe’a ’o Emma i te rima o Māmā ’a haere ai rāua i te tahi pae o te purūmu. ’Ua ta’uma ’oia nā ni’a i te ’ē’a tei reira te tamāhine te pārahira’a. Nā ’ō atura ’oia, « E ». « Tē hina’aro ra ānei ’oe i te tahi tauturu ? »
’Ua ’oto’oto te tamāhine ’e ’ua hi’o mai ra ia rāua. ’Ua hā’ati tōna nā rima i tōna nā turi, ’e ’ua ’ute’ute roa ’e te ’oru’oru tōna nā mata.
« ’Ua… ’ua pōnaohia vau i rāpae i tō’u fare ». ʼUa mapu a’era ’oia i tōna aho. E reo rūrū ’e te marū tōna. Tūturi atu ra ’o Emma i pīha’i iho iāna nō te fa’aro’o maita’i a’e iāna.
« E’ita tā’u e nehenehe e tai’o », te parau ïa a te tamāhine. « ’Aita vau i ’ite e aha te pitopito e tāumi nō te ho’i i roto ».
’Ua hi’o a’era ’o Emma i ni’a i te papa’i i rāpae i te fare. Tē vai ra e rave rahi pitopito na’ina’i. E i’oa tō ni’a i te pitopito tāta’itahi. I pīha’i iho i te mau pitopito tē vai ra hō’ē āfata paraparau.
« ’O vai tō ’oe ’pa’era’a ? » Te uira’a ïa a Emma.
’Ua parau mai ra te tamāhine iti, « ’o Schneider ».
’Ua tai’o a’era ’o Māmā i te mau pitopito ato’a ’e ’itehia atu ra iāna hō’ē i’oa « Schneider ». ’Ua taumi a’era ’oia i te reira.
Buzz !
E māniania pūai te taumira’ahia te pitopito. ’E i muri iho, ’ua tararā mai ra te hō’ē reo i roto i te ’āfata paraparau.
« ’O Schneider teie. E nehenehe tā’u e tauturu ia ’oe ? »
’Ua paraparau ’o Māmā i roto i te ’āfata paraparau. « ’Ia ora na ! Tei rāpae nei au māua ’o tā’u tamāhine ’e te hō’ē tamāhine iti tei parau mai ē, ’ua pōnaohia ’oia i rāpae ».
’Ua ti’a vitiviti mai ra te tamāhine i ni’a ’e ’ua horo mai ra i pīha’i iho i te ’āfata paraparau. « Māmā », tāna ïa parau, « e’ita e nehenehe iā’u ’ia tai’o i te pitopito nō te ho’i atu i roto, ’e nā teie mau ta’ata i tauturu mai iā’u ! »
E reo māere tei fa’aro’ohia i roto i te āfata paraparau. « E Leni ! ’Ua mana’o vau ē, tei roto ’oe i tō ’oe piha ! ’Eiaha e ha’ape’ape’a. Tē pou atu nei au i teie iho taime ».
Tau tetoni i muri mai, tē horo mai ra te hō’ē vahine i rāpae. ’Ua horo atu te tamāhine ’e ’ua tauahi iāna.
’Ua fāriu mai ra te vahine i ni’a ia Emma. « Māuruuru nō te tauturura’a i ta’u Leni iti ! »
’Ua ’ata’ata a’era ’o Emma. « E mea ’ōhie roa ’ia tauturu ».
’Ua aroha rima atu ra rāua ’e ’ua pou mai i raro i te ’ē’a. ’Ua tupu te māhanahana i ni’a i te tino tā’āto’a o Emma. ’Ua feruri ’oia i te tahi atu uira’a ia Mama.
« E mea ’ōhie roa te tauturura’a i taua tamāhine ra. Nō te aha e ’oa’oa rahi tō’u nō te reira ? »
’Ua ’ū’umi a’era ’o Māmā i te rima o Emma. « ’O te Vārua Maita’i terā e parau mai ra ia ’oe ē, ’ua rave ’oe i te mā’itira’a maita’i. »
’Ua ’ata’ata a’era ’o Emma. ’Ua ’oa’oa ’oia i te mea ē, ’ua tāpe’a ’oia nō te tauturu.