Mau pionie i te mau fenua ato’a
Julia Mavimbela
Ti’a fa’atere nō te ’oire i Afirita Apato’a
« E tae mai te here nā roto ana’e i te fa’a’orera’a i te hapa a vetahi ’ē »
’Ua tāmarō ’o Julia i tōna rae. I muri iho, ’ua rave mai ra ’oia i tāna ope ’e ’ua ha’amata a’era i te ’ō. I teienei, ’ua riro te repo ’āti a’e iāna ’ei pōta’a repo. E’ita rā e maoro e riro mai ïa ’ei ’āua nehenehe.
E mea fifi te orara’a nō te mau ta’ata ’ere’ere i Afirita Apato’a. ’Ua fa’ata’a ’ē te mau ture i reira i te ta’ata ’ere’ere ’e te ta’ata ’uo’uo. E rave rahi mau ta’ata ’ere’ere tei fa’ahepohia ’ia fa’aru’e i tō rātou fare ’e ’ia ora i te tahi mau vāhi i te ātea ’ē i te mau ta’ata ’uo’uo, ’e e’ita e ti’a ia rātou ’ia ’āmui i roto i te mā’itira’a. ’Ua tupu te mau hāmani-’ino-ra’a i roto i te ’oire i reira ’o Julia te orara’a, ’e ’ua ’ōpani te mau fare ha’api’ira’a nō te reira. I te tahi taime, e mea fifi roa ’ia haere i rāpae.
’Aita rā te reira i tāpe’a ia Julia. ’Ua hina’aro ’oia e rave i te hō’ē ’ohipa nō te hōpoi mai i te maita’i i tōna ’oire. Nō reira ’oia i ha’amata ai i te hō’ē ’āua.
’Ua ’ite te tahi mau tamari’i ia Julia tē rave ra i te ’ohipa. « E nehenehe anei tā mātou e tauturu ? » tā rātou ïa uira’a.
« ’Oia mau », tē nā reira ra ’o Julia. ’Ua hōro’a ’oia ia rātou tāta’itahi i te hō’ē ope. ’Ua fa’a’ite ’oia ia rātou nāhea ’ia tāmarū i te repo ’e ’ia hutihuti i te ’aihere.
« E mata na tātou i te heru i te repo o te ’ino’ino, e tu’u i te huero o te here i roto, ’e e hi’o e aha te mau hotu e nehenehe e roa’a mai ia tātou », tē nā reira ra ’oia. « E tae mai te here nā roto ana’e i te fa’a’orera’a i te hapa a vetahi ’ē »
’Ua ma’iri te mau hepetoma, ’e ’ua rahi atu te mau rā’au tanu i te tupu. ’Ua haere mai te tahi atu mau ta’ata nō te rave i te ’ohipa i roto i te ’āua. ’Ua hutihuti rātou i te mau ’aihere teitei. ’Ua tanu rātou i te tahi atu mau huero. ’’Ua fa’ararirari rātou i te mau rā’au tanu. ’Ua fa’atupu te reira i te ’oa’oa i roto ia Julia i te ’itera’a e rave rahi ta’ata i te tauturura’a mai.
I te hō’ē mahana, ’ua fārerei ’o Julia e piti nā feiā ’āpī tamāroa. ’Ua māere ’o Julia i te mea ē, e mea varavara te ta’ata ’uo’uo i te haere mai nā tō rātou vāhi. ’Ua parau mai ra rāua ē, e misiōnare rāua. ’Ua ani atu ra ’oia ia rāua ’ia hōro’a i tā rāua poro’i i tōna fare.
I te fa’aro’ora’a te tamaiti a Julia ē, tē haere mai ra rāua, ’ua hitimahuta roa ’oia. « Nō te aha ’oe i ani ai ia rāua ’ia haere mai ? » tāna ïa parau. « E ta’ata ’uo’uo rāua. E mea huru ataata ».
Terā rā, ’ua ti’aturi ’o Julia i nā misiōnare. « E mea ta’a ’ē teie nā ta’ata », te parau ïa a Julia. « Tē poro nei rāua i te hau ».
I te taera’a mai te mau misiōnare, ’ua fāri’i poupou ’o Julia ia rāua. ’Ua ’ite a’era te hō’ē o rāua i te hō’ē hōho’a i ni’a i te ’ahu tāpo’i. Nō te fa’aipoipora’a ïa o Julia.
« ’O vai terā ? » te uira’a ïa a te misiōnare, ma te fa’atoro i ni’a i te hōho’a.
« Ta’u tāne ’o Ioane. » ’Ua hi’o ’o Julia i raro. « ’Ua pohe ’oia i roto i te hō’ē ’ati pere’o’o. »
’Ua ’āueue te upo’o o te misiōnare. « Te ti’aturi nei mātou ē, e nehenehe te ’utuāfare e vai ’āmui ē a muri noa atu, noa atu ē, ’ua pohe rātou ».
’Ua tupu te mana’o hau i roto ia Julia. ’Ua ’oa’oa ’oia ’ia ha’api’i mai nō ni’a i te fa’anahora’a a te Atua ’e ’ua tāmau noa ’oia i te fārerei i te mau misiōnare. ’Ua tupu tōna here nō te ’evanelia i te rahi i roto i te ’ā’au o Julia, mai te mau rā’au tanu i roto i tōna ’āua. ’Aita i maoro a’era ’ua fa’aoti ’oia e bāpetizo iāna.
I te fare purera’a, ’ua fārerei ’o Julia e rave rahi ta’ata ’āpī. E mau ta’ata ’ere’ere te tahi. E mau ta’ata ’uo’uo te tahi. Terā rā, ’ua tāvini ’e ’ua ha’api’i ’āmui rātou pā’āto’a.
’Ua fa’a’ite ’o Julia i te mau tamari’i i te fare purera’a nāhea ’ia tauturu i roto i tōna ’āua. « E mea ti’a ’ia marū tō tātou ’ā’au, mai teie repo », tāna ïa parau. « E mea ti’a ’ia fa’ata’a i te hō’ē vāhi nō te ’evanelia i roto ia tātou. E mea ti’a ia tātou ’ia fa’ata’a i te hō’ē vāhi nō te here. »
’Ahuru ma toru matahiti i muri a’e i te bāpetizora’a o Julia, ’ua hope te ture fa’ata’a ’ē i te ta’ata ’ere’ere ’e te ta’ata ’uo’uo i Afirita Apato’a.
Fātata e 70 000 melo o te ’Ēkālesia i Afirita Apato’a i teie mahana.
I Afirita Apato’a, e 11 reo mana.
’Ua tauturu ’o Julia ’ia ha’amata i Te mau vahine nō te hau, hō’ē pupu fa’atiani i te hō’ēra’a ’e te hau i Afirita Apato’a.
’O ’oia hō’ē o te mau rave ’ohipa mātāmua nō te hiero i roto i te hiero nō Johannesburg (Afirita Apato’a).
E ’orometua ha’api’i ’o Julia. ’Ua ha’api’i ’oia i te mau tamari’i i te tai’ora’a ’a rave ai rātou i te ’ohipa i roto i tōna ’āua.