Pāpa’ihia e ’outou

E ’ite fa’ahou vau i tō’u taea’e

Hōho’a

Portrait of Isabella Stevenson.

Nā Isabella S., 11 matahiti, Utah, Marite

Hōho’a

girl hugging Primary teacher

I te tahi atu hepetoma, ’o te mahana fānaura’a ïa nō tō’u taea’e ’o Gabriel. E ti’ahia tōna matahiti i te hitu, terā rā, ’ua ro’ohia ’oia i te ma’i roro ha’aparuparu ’e ’ua pohe ’a piti matahiti i teienei. I roto i te Paraimere, ’ua hīmene mātou « Getesemane ». E mea pāpū maita’i ’e te faufa’a te mau parau. ’Ua ’ī roa te piha i te Vārua.

I muri a’e i te hīmene, ’ua fa’a’ite te tuahine Webster i tōna ’itera’a pāpū nō ni’a i te tāra’ehara a Iesu Mesia. ’Ua ’ī rahi roa atu te piha i te Vārua. I muri iho, ’ua paraparau ’oia nō ni’a i te pohera’a tōna taea’e e rave rahi matahiti i ma’iri. ’Ua ha’aferuri te reira iā’u ia Gabriel, ’e ’ua fātata roa vau i te ta’i. ’Ua feruri au i te taime ’a tāpe’a ai au ia Gabe nō te taime hope’a. ’Ua ’oto roa vau, ’ua hau ato’a rā vau.

’Ua paraparau te tuahine Webster nō ni’a i tōna ’oa’oa rahi ’ia ’ite ē, e ’ite fa’ahou ’oia i tōna taea’e. ’Ua parau ’oia ē, ’ua ’ite ’oia ē, e ’ite fa’ahou tātou pā’āto’a i tei herehia tei fa’aru’e mai.

I muri a’e i te Paraimere ’ua tauahi au i te tuahine Webster. ’Ua ta’i ’āmui māua nō te tahi tau minuti te maoro. E mea pūai mau te Vārua. ’Ua parau mai ’oia iā’u ē, e ’ite fa’ahou vau i tō’u taea’e teina. ’Ua parau mai ’oia ē, e ’ere te tāra’ehara a Iesu Mesia nō te feiā ’ī’ino ana’e, nō te feiā ato’a rā tei pēpē. ’Ua ani mai ’oia ē, e aha te mea tei mihi-rahi-hia e au nō ni’a ia Gabe, ’e ’ua parau atu vau ē, ’ua mihi roa vau i tāna ’ata.

’Ua parau vau i te tuahine Webster ē, ’ua ’oto vau nō te mea e mahana fānaura’a nō Gabriel tāua hepetoma ra, ’e ’ua hina’aro mau vau ’ia ’ite ē, e ’ite fa’ahou ānei au i tō’u taea’e. ’Ua parau mai ’oia iā’u ē, te roimata o tō māua ta’i, e roimata ïa nō te ’oa’oa. E putapū vau i te Vārua, ’e ’ua ’ite au ē, e parau mau tāna. ’Ua pāpū iā’u ē, e ’ite fa’ahou vau ia Gabriel, ’e nā te reira e fa’a’oa’oa nei iā’u. ’Ua here au iāna. ’Ua ’ite au ē, nō te here o Iesu Mesia iā’u, ’ua hōro’a ’oia i tōna ora ia nehenehe iā’u ’ia ’ite fa’ahou ia Gabriel.