Wan Drim blong Dieter

I Kam long Charlotte Larcabal

Ol Magasin blong Jos

(I folem wan tru stori)

Oli karemaot long toktok blong Elda Dieter F. Uchtdorf, “Call for Heroes!” (BYU-Pathway Worldwide devotional, Jul. 14, 2020, byupathway.org/devotionals).

Taem hem i wan boe, Elda Dieter F. Uchtdorf i laekem tumas blong stap wajem ol plen. Hem i bin gat pikja long maen blong hem se hem i stap flae long wan long ol bigfala plen ia.

Wan dei, mi wantem kam wan paelot.

Be famli Dieter, oli no gat tumas mane. Oli bin ol rifuji, mo oli mas lego hom blong olgeta tu taem, blong go long wan niu kantri.

young Dieter delivering packages and watching planes in sky

Taem ol nara pikinini oli stap pleiplei, Dieter i bin wok olsem wan boe blong stap deliva ol samting blong helpem famli blong hem.

!Samtaem hem i filim olsem drim blong hem i no posibol nomo!

Be taem hem i stap groap, Dieter i wokhad fulap blong kasem ol drim blong hem. Hem i gat fet se bae Papa long Heven bae i helpem hem.

Hem i joenem ea fos mo tren blong kam bes paelot we hem i save kam olsem.

Long en, hem i kasem drim blong hem. !Hem i bin draevem ol bigfala plen blong plante yia!

Maet bae yu stap tingting long yuwan sapos ol drim blong yu oli posibol tu o no.

Maet bae i no isi, be yu save mekem.

Maet bae yu go tru long ol jalenj, be oli save mekem yu kam moa strong. !God i stap wetem yu evri step blong rod blong yu!

“Wokhad. Gat fet. Gat hop. Tras long God. Sapos yu mekem pat blong yu, bae ol samting bae oli wok gud.”