?Ti o Mango Jus?
Hem we i raetem hemia i stap long Kalifonia, YSA.
Stori ia i hapen long Taewan.
“?From wanem yu no wantem ti?” Jiro i askem.
”Stand for the right” (Children’s Songbook, 159).
Chung i wokbaot long wan bisi strit long Taewan. Fren blong hem, Jiro, i stap kolosap narasaed long hem. !I gat man evri ples! Ol man blong soping oli lukluk ol klos we oli mekem praes i go daon long olgeta, ol pikinini oli pleplei ol gem, mo ol man oli stap hariap mo toktok long fon blong olgeta. Chung i hang strong long skul bag blong hem blong mekem sua se bae hem i no mestem i foldaon.
“Mi no save bilivim se !yia ia blong skul, kolosap i finis nao!” Chung i talem laod mekem se Jiro i save harem hem.
“!Mi save! Mi rere blong finis wetem ol klas ia,” Jiro i talem.
Chung mo Jiro i wokbaot pas bitim ol smosmol selta we oli salem eni kaen kaekae. Dragon frut mo ol stroberi. Dampling we oli fraenem. Ol rol blong pinat aeskrim. !Ol smel we oli naes, i smel evri ples! Be tingting blong Chung i tingbaot nomo olsem wanem hem i filim hot mo stiki.
“!Mi filim olsem mi stap insaed long wan oven!” Chung i talem.
“Mi tu,” Jiro i talem. “Bae yumitu pem sam samting blong dring.”
Oli wokbaot i go long wan smol selta we i stap salem sam dring we kala blong olgeta i braet we.
Jiro i karem aot sam mane. “Tu boba ti, plis.”
Chung i save se ti i agensem Tok blong Waes. “?Mi save gat wan mango jus nomo?” hem i askem.
Jiro i tanem hem blong lukluk Chung. Chung i filim se kat i tanem. ?Jiro i ting se hem i defren smol from hem i no karem ti?
Woman ia i givim wan kolkol boba ti long Jiro mo wan mango jus long Chung. Afta, tufala boe i wokbaot i gobak long strit we i go long hom blong tufala.
Jiro i dring dring blong hem. “?From wanem yu no wantem ti?” !I naes we!”
Chung i kakae lip blong hem. “Am, mi no dring ti.”
“?From wanem no?”
Chung i tingting long olsem wanem blong ansarem kwestin ia. Ol misinari oli bin tijim hem abaot Tok blong Waes. Long praemeri klas blong hem, hem i lanem se, blong stap kipim Tok blong Waes, i helpem hem blong gat Tabu Spirit i stap wetem hem.
“Mi biliv long God, mo Hem i wantem mi blong lukaotgud long bodi blong mi. Hem i askem blong yumi no dring ti o kofi o alkohol,” Chung i talem.
“?Olsem wanem yu save hemia?” Jiro i askem.
“Mi bin lanem abaot hemia long jos.”
Jiro i dring dring blong hem bakegen. “Hemia i krangke ia. !Hem i ti nomo! Bae i no mekem wan nogud samting long yu.”
Chung i filim se bel blong hem fulap long ol frog we oli stap jiamjiam. ?Olsem wanem nao bae hem i helpem Jiro blong andastanem? Ating wan man long jos bae i save helpem hem blong eksplenem long Jiro.
“?Bae yu wantem blong kam long jos wetem mi samtaem?” Mi stap go long Jos Ia blong Jisas Kraes blong Ol Lata-dei Sent. Yu save lanem abaot God mo Jisas Kraes.”
Jiro i tingting blong wan smol taem. “Mi no ting.”
“Okei,” Chung i talem. Hem i harem nogud smol se Jiro i no wantem kam long jos wetem hem. Be hem i glad se hem i bin serem testemoni blong hem.
Afta long wik ia, tija blong Chung, Mista Lin, i bin singaotem evriwan blong lisin long hem. “Tumoro hem i las dei blong klas. From se evriwan i bin wokhad long yia ia, mi gat wan sapraes. !Bae yumi evriwan i dring boba ti!”
Ful klas i singaot mo klap. Evriwan be Chung nomo i no hapi. Hem i sidaon i go daon long jea blong hem. !Blong talem long tija blong hem se hem i no dring ti, bae i moa had bitim we hem i bin talem long Jiro! Evriwan bae i tingting se hemia i defren, semmak olsem tingting blong Jiro.
Jiro i leftemap han blong hem. “?Mista Lin? Chung i no stap dring ti. Hem i pat blong relijin blong hem. Bae hem i save dring mango jus nomo?”
Mista Lin i tanem hem i go long Chung. “?Hemia i tru Chung?”
Chung i sakem hed blong talem yes.
Mista Lin i smael. “Okei. Bae mi odarem jus nomo blong yu.”
Afta long skul, Chung mo Jiro i wokbaot tugeta i gobak long hom. “Tangkyu blong mekem hemia,” Chung i talem.
Jiro i smael. “Yu yu fren blong mi. Sapos wan samting i impoten long yu, hem i impoten long mi tu.”
Ol pikja droing oli kam long Melissa Manwill