Fren I Go long Fren

Wan Pij Afta Narawan

I Kam long Sista Sharon Eubank

Fas Kaonsela long Rilif Sosaeti Jeneral Presidensi

I kamaot long wan intaviu wetem Amber Healey

Taem mi bin wan smol gel, papa mo mama blong mi i tekem sista blong mi, mo mi, i go long wan plantesen we i blong Jos. Mifala i stap longwe blong help blong pikimap ol pij. Mifala i klaem ol tolfala lada mo pusum han tru long ol tik lif blong karemaot ol pij long ol tri.

Fastaem, mitufala i glad tumas blong mekem hemia. Be i no longtaem, !ol hea blong frut blong pij i mekem ol han blong mitufala i sikras! Mitufala i talem long mama blong mitufala, “Mitufala i nomo wantem pikimap ol pij. Mitufala i wantem stop.”

Mama blong mitufala i askem sapos mitufala i save weaples bae evri pij ia i go long hem. Taem mitufala i talem no, hem i eksplenem long mitufala.

“Wanwan long ol pij ia, bae oli karem i go long wan bilding we i gat ol volontia we bae oli putum olgeta i go long ol tin. Afta bae oli givim ol tin ia i go long ol pipol we oli nidim kaekae. Evri yia, Jos i stap givim taosen blong ol kaekae long tin.”

Kwiktaem, sista blong mi mo mi i stop blong wari abaot ol han blong mitufala we i sikras. !Mitufala i stap helpem ol man we oli nidim kaekae! Afta long hemia, mitufala i gat gudtaem blong stap klaem long ol lada mo karem ol orenj frut ia we i gat fulap hea long hem.

Long yia ia, mifala i bin askem yu blong tekpat long wan invitesen blong Ol Han blong Help (luk long Frenblong Jenuware 2021). Blong stap givim seves long ol narawan long wei we Kraes i bin givim seves, i wan long ol samting we i moa impoten we yu save mekem. Ol pikinini oli gat wan spesel wei blong stap luksave olgeta we oli gat nid mo stap volontia blong oli help. Maet wan smol aksen blong seves i no luk olsem i fulap long stat. Be sapos evri pikinini raon long wol, oli lukaotem ol wei blong givim seves, !tugeta bae oli kasem ol samting we oli gud tumas!