Ol Paeonia long Evri Ples
Vaha’i Tonga
Eksampol long Tonga
Hem we i raet i stap long Waikato, Niu Silan, mo Yuta, YSA.
Vaha’i i gohed blong stap prea, mo wan dei hem i defren.
Vaha’i i nildaon long saed blong bed blong hem blong mekem prea blong hem. Hemia fas naet blong hem long boding skul, mo hem i serem wan rum wetem fulap nara boe. I no gat wan long olgeta i memba blong Jos Ia blong Jisas Kraes blong Ol Lata-dei Sent, olsem hem.
Dia Papa long Heven … Vaha’i i stat blong prea long hat blong hem. Be i no bin isi. Ol nara boe oli stap toktok laod mo laf laod.
“!Ei, luk!” wan long ol boe, Akau, we oli silip tugeta i singaot. “!Hem i stap prea!”
Vaha’i i muv smol from hem i no filim gud tumas. Hem i save se Akau i stap jikim hem. Be hem i mekem olsem se hem i no harem Akau. Hem i gohed blong prea nomo.
Fastaem we Vaha’i i bin lanem abaot gospel, bubuman mo bubuwoman blong hem i no bin laekem Jos tu. Vaha’i i bin go long Praemeri wetem anggel blong hem o ol fren blong hem.
Taem hem i kasem 12 yia, hem i disaed blong kasem baptaes. Bubuman mo bubuwoman blong hem, oli bin bin glad tumas long stat. Be afta bubuwoman blong hem i talem: “Stat long naoia i go, yu yu wan memba blong jos ia. Mifala i wantem yu blong stap fetful.”
Naoia we Vaha’i i stap longwe long skul, hem i tingting strong blong mekem hemia nao. Mekem se hem i gohed blong prea. Iven taem ol nara boe oli jikim hem.
Wan naet taem Vaha’i i nildaon blong prea, hem i harem wan defren samting.
“Ei, !stap kwaet! Vaha’i i sta prea,” wan man i talem.
Vaha’i i finis blong prea mo openem ol ae blong hem.
Akau i stap sidaon long bed blong hem. “?Hem i impoten tumas long yu?”
Vaha’i i sakem hed blong hem blong talem yes. “Yes, hem i impoten.”
Afta long taem ia, ol nara boe oli stap kwaet eni taem we Vaha’i i prea. I no longtaem, Akau i stat blong stap nildaon wetem hem. Ol nara boe oli joen tu. Long en, evri boe long rum oli nildaon blong prea wetem Vaha’i evri naet.
Vaha’i i bin glad. Hem i neva gat famli i prea tugeta long hom. Be naoia, !hem i save gat famli prea wetem ol fren blong hem long skul!
Wan dei, Vaha’i i gat wan aedia. Wan bigfala miting blong Jos i stap kam. !Hem i save invaetem ol fren blong hem!
Afta long prea, Vaha’i i talem abaot miting ia long evriwan. “Oli singaotem distrik konfrens,” hem i talem. “Ol pipol oli kam blong lanem abaot Jisas. Yufala evriwan i save kam sapos yufala i wantem!”
From se oli mas aot long skul blong go long miting, wanwan long ol boe i mas saenem wan pepa blong kasem raet blong aot long skul. Vaha’i i sapraes tumas taem hem i luk pepa. !I gat 77 nem long lis!
Hat blong Vaha’i i filim wom insaed taem hem i sidaon wetem ol laen blong ol fren long klas blong hem mo lisin long ol toktok blong konfrens. Akau mo sam long ol nara fren blong hem i mas filim wom ia insaed tu. Long en blong konfrens ia, !seven long olgeta oli wantem kasem baptaes!
Long naet ia, Vaha’i i mekem wan prea blong hemwan afta long prea wetem ol fren blong hem. “Tangkyu blong blesem mi wetem ol gud fren,” hem i talem Papa long Heven. “Mo blong helpem mi blong stap olsem wan gudfala eksampol.”
I gat samples 170 aelan we i mekemap Tonga long Bigfala Solwota blong Pasifik.
Tedei, sikis aot long ten man long Tonga oli ol memba blong Jos.
Ol man oli save Tonga tu olsem “Ol Aelan we Oli Kaen long Ol Man.”
Vaha’i mo waef blong hem, Sela, oli fas kapol blong sil long Hamilton Niu Silan Tempol.
Hem i stap olsem presiden blong Nuku’alofa Tonga Tempol.
Hem i bin wan tija long Liahona Kolej we i wan hae skul blong Jos long Tonga.
Ol pikja droing oli kam long Susan Keeter