Ol Sikret mo Ol Sapraes
Hem we i raetem hemia i stap long Aeowa, YSA
?Hem i stret blong haedem sikret blong Kate?
“Spirit blong Kraes, God i givim long evri man, blong hem i save gat save long samting we i gud aot long samting we i nogud” (Moronae 7:16).
“Ei, !luk!” Kate i pikimap wan pepa doli we oli skwisim long floa blong wan stoa. “Ya, putum insaed long poket blong yu.”
“?Yu wantem mi blong tekem?” Maddy i askem.
“Bae stoa ia i nomo save salem tu,” Kate i talem. “Bae oli sakem long toti nomo. Hemia i wan misin blong sevem man. !Yumi stap sevem doli ia!”
Kate i smael long Maddy. Maddy i smael i kambak long Kate.
“Okei.” Maddy i pusum pepa doli ia i go insaed long poket blong hem. !I filim spesel blong stap long wan misin blong sevem man!
Be yet, taem tufala i wokbaot i kamaot long stoa ia, Maddy i filim pepa doli ia i hevi olsem wan ston long poket blong hem. ?Wan misin blong sevem man i sapos blong filim olsem nao?
Taem oli gobak long haos blong Maddy, Kate i traem bes blong hem blong skojem mo mekem pepa doli i flat gud.
“?Bae mi mekem wanem kaen klos blong hem?” hem i askem mo pikimap wan kala. “?Olsem wanem long wan naesfala dres blong danis?”
Maddy i sakem hed blong agri. “!Afta yumitu save soem long mama!”
“!No! Yumi no save talem long eni man,” Kate i talem. “Bae yumi neva talem. Hem i sikret blong yumitu, ?OKEI? Promesem mi se bae yu no talem.”
“O … OKEI. Mi promes,” Maddy i talem. “?Be from wanem bae yumitu no save talemaot?”
“Sapos yu talem, bae mama blong yu bae i kros, mo ating bae hem i no save letem yumitu pleiplei tugeta bakegen.”
“?From wanem bae hem i kros?” Maddy i askem. Hem i filim wari mo fraet.
Kate i putum kala blong hem i go daon. “Sapos yu no talem, bae mi letem yu yu holemtaet doli mo ol klos we mi droem blong hem.”
Naoia Maddy i save from wanem hem i filim fraet tumas. “Yumi … ?yumi stilim doli ia?” hem i wispa.
“Ei, yu nao yu putum i go insaed long poket blong yu mo haedem i kam aotsaed long stoa.”
“!From se yu yu talem long mi blong mekem!”
“!Mi no talem tu!” Kate i talem. “Mi stap gobak long haos bifo yu mekem trabol i kasem mi.” Hem i stanap mo i ron i go aotsaed long doa.
Semmak taem, Mama i kam insaed long rum. “?From wanem Kate i hariap i go?” Hem i luk pepa doli long ol han blong Maddy. “?Mo doli ia i kam wea?”
Maddy i kakae lip blong hem. Hem i no filim gud tumas blong holemtaet wan sikret long Mama. ?Be wanem sapos Kate i talem tru mo Mama i kros?
Filing blong fraet long bel blong hem i no ronwe. Hem i pulum wan longfala win mo talemaot ful stori.
“Kate i mekem mi promes blong holemtaet olsem wan sikret,” hem i talem. “Be mi filim i no stret.”
Mama i sidaon narasaed long hem long bed. “Fulap sikret oli no stret. Speseli taem oli talem long yu blong neva talem long wan man. Long narasaed, wan sapraes, olsem wan presen o pati, i save wan gudfala samting. Oli minim blong mekem i wan gudtaem blong evriwan.”
Maddy i sakem hed blong agri. “Tangkyu blong no kros long mi,” hem i talem. “Kate i talem se bae yu kros.”
Mama i haggem hem strong. “Mi mi glad tumas long yu blong stap lisin long Tabu Spirit mo blong talem trutok long mi.”
“?Bae yu save draevem mi gobak long stoa blong givimbak doli?” Maddy i askem.
“!Yes, i oraet nomo!” Mama i smael. “Mo taem bae yumi kambak, yu save helpem mi blong mekem wan kek blong mekem sapraes long Papa.”
Maddy i laf. “!Hemia i wan samting we mi filim gud long hem!”
Ol pikja droing oli kam long Devin McSherry