Usa ka Biyahe nga Giuswag
Ang tagsulat nagpuyo sa Maine, USA.
Unsa kaha kon si Freddie dili na gyud makabisita sa iyang mga apohan sa Korea?
“Mga Pamilya Mahimong Manag-uban sa Kahangturan” (Songbook sa mga Bata, 98).
Gigakos ni Freddie si Papa sa pagpanamilit. “Sultihi si Haraboji nga kami nag-ampo alang kaniya.”
“Akong sultihan. Motawag ako kada adlaw aron pahibaloon kamo kon unsa ang iyang kahimtang.”
Mitando si Freddie ug kahilakon sa kaguol.
Si papa molarga alang sa Habagatang Korea sa pagbisita sa mga apohan ni Freddie, sila si Haraboji ug Halmoni. Siya mawala sulod sa hapit usa ka bulan samtang si Freddie ug ang iyang pamilya mipabilin sa panimalay sa Estados Unidos.
Gisira ang pultahan, ug milakaw si Papa.
“Unta ako makaadto usab,” miyamyam si Freddie. Gipahiran niya ang luha. Wala makakita si Freddie ni Haraboji ug Halmoni sulod sa dugay nang panahon. Ang iyang pamilya naghinay-hinay og tigum og kwarta nga magasto sa ilang sunod nga bakasyon uban kanila didto sa Habagatang Korea. Apan si Haraboji nasakit, ug karon siya nagkinahanglan og operasyon.
“Gikasubo ko, Freddie,” miingon si Mama. “Unta kitang tanan makahimo sa pagkuyog ni Papa, apan wala pa kita makatigum og igo nga kwarta. Ug kini importante alang sa inyong papa sa pag-adto karon, sa panahon nga si Haraboji nagkinahanglan kaniya.”
“Apan unsa kaha kon ang mga doktor dili makatabang ni Haraboji? Unsa kaha kon siya mamatay ug dili na gayud ako makakita kaniya? Kita kinahanglang mokuyog ni Papa karon!” Gipahiran niya ang daghan pang mga luha. Gibati niya ang kasubo ug kasuko.
Gigakos siya ni Mama. Sa dihang siya mihunong sa paghilak, nangutana siya, “Kinahanglan ba kitang mag-ampo og usab alang ni Haraboji?”
Mitando si Freddie, ug sila mikyugpos sa ilang mga bukton ug dungan nga nag-ampo.
Si Freddie ug ang iyang pamilya nag-ampo alang ni Haraboji kada adlaw. Gisiguro ni Freddie sa pagpahinumdom kanila sa kanunay. Naninguha siya sa labing maayo sa pagtabang samtang si Papa wala. Gibuhat niya ang pipila sa mga trabaho ni Papa, sama sa pagsuroy sa iro ug pagbasa og mga istorya ngadto sa gagmayng mga bata sa dili pa matulog.
Mga semana milabay, ug si Freddie dili na kaayo masulub-on. Apan nabalaka gihapon siya mahitungod ni Haraboji.
Usa ka gabii nakigsulti siya sa telepono kang Papa. “Unsa kaha kon ako dili makaanha sa Korea?” nangutana siya. “Unsa kaha kon si Haraboji dili maarang-arang, ug ako wala nay higayon sa pagkakita kaniya?”
“Freddie, pipila ka adlaw ikaw maadunay higayon sa pagbisita sa Korea. Apan buhi pa o dili si Haraboji, makakita pa ikaw kaniya pag-usab. Ang atong pamilya mahangturon.”
“Nasayud ako,” miingon si Freddie. Siya mibati og kainit sa iyang dughan. Siya buot makakita pag-usab ni Haraboji sa pipila ka adlaw, bisan unsa pa ang mahitabo.
“Gimahal ko ikaw, Freddie,” miingon si Papa. “Ug ako mopauli na sa dili madugay.”
“Gimahal ko usab ikaw.”
Si Freddie mipahiyom samtang iyang gibutang ang telepono. Siya nahibalo nga silang tanan magkauban sa pipila ka adlaw. Siya nalipay nga siya adunay usa ka mahangturong pamilya.
Si Haraboji naayo gayud! Ug paglabay sa duha ka tuig, si Freddie mibisita kaniya sa Habagatang Korea.
Mga paghulagway ni Karly Jade Catto