Imong Sinulat

Dali, Sunod Kanako atol sa COVID

Sarah F., edad 10, Pas-de-Calais, France

Sa panahon sa COVID-19 nga quarantine, akong gibuhat ang pag-eskwela diha sa panimalay uban ni Papa. Among gihimo ang akong kasagarang buhat sa eskwelahan, apan kami usab nagtuon sa Dali, Sunod Kanako nga manwal sa Primary. Ania ang pipila sa mga butang nga akong gihimo:

Mihimo ako og korona nga akong gisul-ob diha sa panimalay kon motabang ako sa akong mga ginikanan. Gusto kong moserbisyo sama ni Hari Benjamin.
Akong gikoloran ang usa ka tsapa [badge] nga porma og kasingkasing. Nagpahinumdom kini kanako nga sa panahon nga ako gibunyagan, akong gidala ang ngalan ni Kristo diha kanako.
Akong gidrowing ang hulagway ni Joseph Smith ug gikoloran ko kini. Kini nagpahinumdom kanako nga si Joseph Smith usa ka propeta sa Dios.
Gibuhat nako ang usa ka kalihokan nga pagputol sa papel mahitungod ni propeta Abinadi diha sa Basahon ni Mormon. Akong gihunahuna ang mahitungod kon sa unsa nga paagi ako kinahanglan gayud nga mobarug alang sa kamatuoran.
Akong gikoloran ang usa ka hulagway sa bunyag ni Jesukristo. Nagpahinumdom kini kanako nga sa dihang ako gibunyagan, ako mihimo og pakigsaad uban sa akong Langitnong Amahan.

Tungod kay ako nagtuon sa Dali, Sunod Kanako, naghunahuna ako nga ang Langitnong Amahan mitabang kanako sa akong pag-eskwela. Sa sinugdanan nakahimo ako og daghang mga sayop sa akong homework. Dayon si papa mihangyo kanako sa pagsugod pinaagi sa paglitok og pag-ampo. Human sa pag-ampo, mas nakasabut ako. Sa wala madugay dili na kaayo ako daghan og mga sayop. Kon madawat sa akong mga magtutudlo ang akong homework, sila moingon, “Mga pahalipay, Sarah! Padayon sa pagbuhat unsay imong gibuhat!”

Malampuson akong nahuman sa akong tuig sa pag-eskwela. Ug ang pag-eskwela diha sa panimalay maayo ang dagan, tungod kay kami kanunay nga magsugod sa pag-ampo, sama lamang sa among buhaton kon magtuon kami sa Dali, Sunod Kanako.