Mga Pioneer sa Matag Yuta
Vaha‘i Tonga
Ehemplo sa Tonga
Ang mga tagsulat nagpuyo sa Waikato, New Zealand, ug Utah, USA.
Si Vaha’i kanunay nga nag-ampo, ug usa ka adlaw kini lahi.
Si Vaha’i miluhod sa kilid sa iyang higdaanan sa paghimo sa iyang pag-ampo. Kini mao ang iyang unang gabii sa boarding school, ug kauban niya sa usa ka kwarto ang daghang mga batang lalaki. Walay usa kanila nga mga miyembro sa Ang Simbahan ni Jesukirsto sa mga Santos sa Ulahing mga Adlaw, sama kaniya.
Mahal nga Langitnong Amahan … misugod si Vaha’i sa pag-ampo diha sa iyang kasingkasing. Apan dili kini sayon. Ang ubang mga batang lalaki nag-istoryahanay ug nagkinataw-anay og kusog.
“Uy, tan-awa!” usa sa iyang mga kauban sa kwarto, si Akau, misinggit. “Nag-ampo siya!”
Si Vaha‘i dili komportable nga mitakilid. Nasayud siya nga si Akau nagbugal-bugal kaniya. Apan siya nagpakaaron-ingnon nga wala makadungog kaniya. Siya mipadayon lamang sa pag-ampo.
Sa dihang si Vaha’i unang nakakat-on mahitungod sa ebanghelyo, ang iyang mga apohan wala usab makagusto kaayo sa Simbahan. Si Vaha’i miadto sa Primary kauban sa iyang uyoan o sa iyang mga higala.
Sa dihang nag-edad siya og 12, mihukom siya nga magpabunyag. Ang iyang mga apohan sa sinugdanan wala kaayo malipay. Apan ang iyang lola miingon, “Gikan karon, ikaw miyembro na niana nga simbahan. Gusto namo nga magpabilin ka nga matinud-anon.”
Karon nga si Vaha’i nalayo tungod sa pag-eskwela, determinado siya sa paghimo lamang niana. Mao nga siya kanunay nga nag-ampo. Bisan kon ang ubang mga batang lalaki mibugal-bugal kaniya.
Usa ka gabii sa dihang si Vaha’i miluhod, nakadungog siya og usa ka butang nga lahi.
“Hoy, paghilum! Si Vaha’i nag-ampo,“ miingon ang usa ka bata.
Gihuman ni Vaha’i ang iyang pag-ampo ug gibuka ang iyang mga mata.
Si Akau naglingkod sa iyang katre. “Kini importante gyud kanimo, dili ba?”
Mitando si Vaha’i. “Oo, kini importante.”
Human niana, ang ubang mga batang lalaki hilum bisan kanus-a si Vaha’i mag-ampo. Wala madugay misugod si Akau pagluhod uban kaniya. Ang ubang mga batang lalaki miapil usab. Sa katapusan, ang tanang mga batang lalaki diha sa lawak miluhod sa pag-ampo uban ni Vaha’i matag gabii.
Si Vaha’i mibati og kalipay. Wala gayud siya makabaton og pamilya nga pag-ampo sa panimalay. Apan karon siya adunay pag-ampo sa pamilya uban sa iyang mga kauban sa eskwelahan!
Usa ka adlaw si Vaha’i adunay ideya. Usa ka dako nga miting sa Simbahan nagsingabut. Makadapit siya sa iyang mga higala!
Human sa pag-ampo, gisultihan ni Vaha’i ang tanan mahitungod sa miting. “Gitawag kini og komperensya sa district,” miingon siya. “Ang mga tawo moanha sa pagkat-on mahitungod ni Jesus. Makahimo kamong tanan sa pag-adto, kon gusto ninyo!”
Tungod kay sila kinahanglan nga mobiya sa eskwelahan aron moadto sa miting, ang matag usa sa mga batang lalaki kinahanglan nga mopirma og papel aron makakuha og pagtugot. Nahingangha si Vaha’i sa dihang iyang nakita ang papel. Dihay 77 ka mga ngalan diha sa lista!
Ang kasingkasing ni Vaha’i mibati og kadasig samtang siya mitupad og lingkod uban sa mga laray sa iyang kauban sa klase ug naminaw ngadto sa mga pakigpulong didto sa komperensya. Si Akau ug ang pipila sa uban tingali mibati usab og kadasig sa sulod. Sa pagtapos sa komperensya, pito kanila gusto nga magpabunyag!
Niana nga gabii human sa pag-ampo uban sa iyang mga higala, si Vaha’i nag-ampo sa iyang kaugalingon. Salamat kanimo sa pagpanalangin kanako og maayong mga higala, misulti siya sa Langitnong Amahan. Ug sa pagtabang kanako nga mahimong usa ka maayong ehemplo.
Ang Tonga naglangkob og mga 170 ka mga isla diha sa Dagat Pasipiko.
Karon, unom sa napulo ka mga tawo sa Tonga mga miyembro sa Simbahan.
Ang Tonga nailhan usab isip ang “Mahigalaon nga mga Isla.”
Si Vaha’i ug ang iyang asawa, si Sela, mao ang unang magtiayon nga gisilyo didto sa Templo sa Hamilton New Zealand.
Miserbisyo siya isip presidente sa Templo sa Nuku‘alofa Tonga.
Usa siya ka magtutudlo sa Liahona College, usa ka gipanag-iya sa Simbahan nga high school sa Tonga.
Mga paghulagway ni Susan Keeter